Read Northwest Gbaya TƆRA-BÍÍ 18 Bible Online

TƆRA-BÍÍ 18 - Northwest Gbaya bible

TƆRA-BÍÍ 18

¹GASA WAN tɔ̧ɔ̧ ha̧ Arɔŋ: «Mɛ in o bem kɔ-mɛ, gu nɛ o bíí kɔ-mɛ, ɗaŋmɔ nɛ o bíí tɛ de tɛ sa̧a̧-fara in ɗaŋmɔ mɛ wan nɛ wa tɛ de tɛ tom-ɗafa-sɔ̧ tɛ tik nɛ zu mɛ in o bezaŋ-mɛ.

²Mɛ tɛ sa o nya-mɛ tɛ duk ko Levii, nutua ko dáà kɔ-mɛ ha̧ wa mɛ ndaɗi in mɛ, wen tom-sa̧a̧-fara. Wa tɛ ya nɛ wi-gbak-mɛ, wa tɛ yor ɗoŋ mɛ, ɓɛɛ nɛ́ mɛ in o bem kɔ-mɛ a̧ tɛ yor nú tua nɛ Kuɓa nɔɔ-tɔk duk kɔ̧ a̧.

³Wa tɛ de tom ha̧ mɛ, gbak nɛ mɛ tɛ tom lɛŋ nɛ a̧a̧ kɔ̧ Tua-kpa-ŋmaa; ɓɛɛ mɔ kpɔk, wa beka ɗɔŋ pii ká̧ nyɛk-sa̧a̧-fara in ká̧ fara-ɗafi-sɔ̧ na mbɛt, wen ká mɛ in wa lɛŋ tɛɛ fe.

⁴Wa tɛ ndaɗi in mɛ, ɓɛɛ wa tɛ de tom lɛŋ nɛ a̧a̧ kɔ̧ Tua-kpa-ŋmaa; ɓɛɛ ŋma géé bíí kpɔk beka ye mgbara'nɛ́ na.

⁵Nɛ́ ɛnɛ a̧ tɛ de tom kɔ̧ sa̧a̧-fara in fara-ɗafi-sɔ̧, hegɔ, nyimsea ko GASA WAN beka tik zu o be Israɛl ɓɔna.

⁶Mi hoka o nya'nɛ́, o be Levii mgbara o be Israɛl h’ɛ́nɛ́, ha̧ wa mɛ de tom ha̧ GASA WAN kɔ̧ Tua-kpa-ŋmaa.

⁷Nɛ̀ kɔ-mɛ, in o bem kɔ-mɛ lɛŋ, ɛnɛ tɛ de k’ɛ́nɛ́ tom zu fara-ɗafi-sɔ̧ in ɗoŋ babir-laa mbɛt. Ɛnɛ tɛ de tom ko GASA WAN nɛ ha̧a̧ h’ɛ́nɛ́ nɛ ta-tɛ; ɓɛɛ kà ŋma géé bíí ye mgbara'nɛ́, a̧ tɛ fe.»

⁸GASA WAN tɔ̧ɔ̧ ha̧ Arɔŋ: «Kɔ-mɛ, mɛ tɛ zɔk nɛ zu-mɔ nɛ o be Israɛl ndɛm tɛnɛ ha̧‘m; mi tɛ ha̧ mɔɔ nɔ‘i ha̧ mɛ, in o bem kɔ-mɛ, nyɛm nɛ ɗoŋ heembea nɛ tɛ duk ɓɔnsɛnɛ.

⁹Mɔ nɛ tɛ duk nɛ kɔ-mɛ mgbara o ha̧a̧mɔ nɛ ɔ sa̧a̧ nyɛmna nɛ‘i dɔ na nɛ mɔ'ɔ: o ha̧a̧mɔ nɛ̀ nyɔnɔ, o kpoo-ɗafi-sɔ̧ wen kpaa ea-ɗaŋmɔ, in o kpoo-ɗafa-mgbara'm in wa. O ha̧a̧mɔ nɛ ɔ sa̧a̧ nyɛmna nɔ‘i lɛŋ nɛ́ kɔ-mɛ in o bem kɔ-mɛ.

¹⁰Ɛnɛ tɛ nyɔŋ o mɔɔ nɔ‘i tɛ sa̧a̧-fara. O wiwii lɛŋ nyɛma nyɔŋa-a, ɓɛɛ ɛnɛ tɛ zɔk o nyɔŋmɔ nɔ‘i hee o sa̧a̧ nyɔŋmɔ ga.

¹¹«O zu ha̧a̧mɔ lɛŋ nɛ o be Israɛl wɛk ha̧ GASA WAN tɛ duk nɛ kɔ-mɛ in o bem kɔ-mɛ mɛ be-wiwii-a in be-okoo-a, nyɛm nɛ ɗoŋ heembea nɛ tɛ duk ɓɔnsɛnɛ. Kóó o ndé nutua kɔ-mɛ nɛ duk nɛ sa̧a̧-a̧ tɛ nyɔŋ mɔ‘i.

¹²«Mi tɛ ha̧ kuti zu-nyɔnɔ nɛ o be Israɛl ŋmar ha̧‘m h’ɛ́nɛ́: mbe nɔ̧́, mbe dɔ̧ɔ̧ in mbe alkamaari mbɛt.

¹³O kuti zu-nyɔnɔ kpɛɛfɔ lɛŋ nɛ wa tɛ kai tɛnɛ nɛ̀ ye kɔ-wa ha̧ GASA WAN tɛ duk nɛ kɔ-mɛ. Wi nɛ tɛ duk nɛ sa̧a̧-a̧ nutua kɔ-mɛ tɛ nyɔŋ.

¹⁴«O mɔ nɛ wa tɛ ha̧ ha̧ GASA WAN war kpɔk sɛn nú Israɛl tɛ duk nɛ kɔ-mɛ.

¹⁵«O kaya-bem ko bíí lɛŋ in o kaya-mɔ-dai lɛŋ nɛ̀ o be Israɛl tɛ kai tɛnɛ ha̧ GASA WAN tɛ duk nɛ́ kɔ-mɛ; ɓɛɛ nɛ̀ war ko kaya-bem ko bíí, in kaya mɔ-dai nɛ duk nɛ́ ndiŋ-a, mɛ tɛ de ha'i mɛ gɔn zu wa.

¹⁶Kà wa de fio-zɛ kpɔk, ɓɛɛ mɛ gɔna zu wa tɛ kɔya-bu-mbɔi mɔɔrɔ nyɛm nɛ ɗoŋ kɔya-sede sa̧a̧-fara mɛ. Kɔya-bu-mbɔi kpɔk tɛ nyɛm ŋmaa in geɗek sede ɓu-yiitoo.

¹⁷Mɛ beka de ha'i mɛ gɔn zu kuti be ndai, kóó kuti be-sami, kóó kuti be gbadua na mbɛt, wen wa nɛ́ kɔ‘m. Mɛ tɛ tɛn tɔk-wa a zu fara-ɗafi-sɔ̧, ɓɛɛ mɛ tɛ dɔ nɔ̧́-a̧ ha̧ de pɛr-aa mɛ kur sitɛ GASA WAN hee pɛr nyama ga.

¹⁸Kpoo-aa tɛ duk nɛ kɔ-mɛ, in tote-a ká bá nɛ̀ ku-a mɛ wiiko nɛ mɛ tɛ wɛk ha̧ GASA WAN.

¹⁹«O ha̧a̧mɔ nɛ̀ ɔ sa̧a̧ lɛŋ nɛ̀ o be Israɛl tɛ ha̧ ha̧ GASA WAN, mi tɛ ha̧ ha̧ mɛ in o bem kɔ-mɛ be-wiwii-a in be-okoo-a nyɛm nɛ ɗoŋ heembea nɛ tɛ duk ɓɔnsɛnɛ; mɔ‘i nɛ́ nɔɔ-tɔk nɛ bíí beka gbin na, nɛ̀ tɛ duk ɓɔnsɛnɛ ti GASA WAN, wen mɛ in o bezaŋ mɛ.»

²⁰GASA WAN tɔ̧ɔ̧ ha̧ Arɔŋ: «Mɛ beka bo nɛ̀ mɔɔ-oi tɛ nù'ɛ, in mgbara o bíí na mbɛt. Mi tɛ duk nɛ́ mɔ kɔ-mɛ, in mɔɔ-oi kɔ-mɛ mgbara o be Israɛl.

²¹«War ko o be Levii, mi tɛ ha̧ nɛ zu-mbɔi nɛ wa tɛ ndɛm ha̧‘m sɛn Israɛl ha̧ wa oi tom nɛ wa de sɛn kɔ̧ Tua-kpa-ŋmaa,

²²wen ká o be Israɛl tɛɛ hɛɗi ká̧ Tua-kpa-ŋmaa pi̧ nɛ tɛ-wa tɛ ɗaŋmɔ.

²³Nɛ́ o be Levii a̧ tɛ de tom kɔ̧ Tua-kpa-ŋmaa, ɓɛɛ ɗaŋmɔ nɛ wa tɛ de hi̧i̧ tɛ tik nɛ zu wa. Mɔ‘i tɛ duk nɛ heembea nɛ tɛ duk ɓɔnsɛnɛ wen o bezaŋ‘nɛ́ lɛŋ. Wa beka bo nɛ̀ mɔɔ-oi mgbara o be Israɛl na.

²⁴War mɔ n'am ha̧ ha̧ o be Levii nɛ́ zu-mbɔi nɛ o be Israɛl ndɛm ha̧‘m. Nɛ́ mɔ‘i sa'm tɔ̧ ndé, wa beka bo nɛ̀ mɔɔ-oi mgbara o be Israɛl na.»

²⁵GASA WAN tɔ̧ɔ̧ ha̧ Moisɛ:

²⁶«Mɛ̀ tɔ̧́ ha̧ o be Levii: k’ɛ̀nɛ̀ nɛ́ baa zu-mbɔi nɛ o be Israɛl tɛ ndɛm h’ɛ́nɛ́ nɛ mɔɔ-oi k’ɛ́nɛ́, ɛnɛ tɛ ha̧ kànà ŋma zu-a ha̧ GASA WAN mbɛt.

²⁷Ha̧a̧mɔ‘i tɛ duk nɛ ha̧a̧mɔ nɛ hɔɔ ŋmaa in ha̧a̧mɔ ko wi-dɛm-nyɔnɔ nɛ ha̧ zu-nyɔnɔ nɛ alkamaari in mbe dɔ̧ɔ̧.

²⁸Zu-mbɔi nɛ o be Israɛl tɛ ndɛm tɛnɛ h’ɛ́nɛ́, ɛnɛ tɛ ba war ko GASA WAN yinɛ, ɓɛɛ ɛnɛ baa nɛnɛ ha̧ Arɔŋ.

²⁹Ha̧a̧mɔ lɛŋ nɛ wa tɛ ha̧ h’ɛ́nɛ́, ɛnɛ tɛ ha̧ war ko GASA WAN nɛ oi-aa lɛŋ. Ɛnɛ tɛ hok nɛ mɔ nɛ dee nyɛmna mgbara o ha̧a̧mɔ nɔ‘i ha̧ GASA WAN.

³⁰Mɛ tɛ tɔ̧ ha̧ wa woyo; k’ɛ̀nɛ̀ nɛ́ baa war ko GASA WAN yinɛ kaɗi, ɓɛɛ oi-aa nɛ k’ɛ́nɛ́, hee mɔ'ɔ nɛ o dɔka be Israɛl mɔi̧ nɛ oi nyɔnɔ in dɔ̧ɔ̧ in nɔ̧́'ɛ ga.

³¹Ɛnɛ tɛ nyɔŋ mɔ‘i in o bíí k’ɛ́nɛ́ sɛn fara lɛŋ n’ɛnɛ kɔ̧a̧, wen nɛ́ mɔɔ-oi-tom n’ɛnɛ de kɔ̧ Tua-kpa-ŋmaa.

³²K’ɛ̀nɛ̀ nɛ hoka de-a e ha̧ GASA WAN kaɗi, ɛ́nɛ́ dee mɔ nɛ yuwar-a; ɛ́nɛ́ ɗáŋ ha̧a̧mɔ nɛ ɔ sa̧a̧ ko o be Israɛl na; hegɔ, ɛnɛ beka fe na mbɛt.»