Read Northwest Gbaya TƆRA-BÍÍ 21 Bible Online

TƆRA-BÍÍ 21 - Northwest Gbaya bible

TƆRA-BÍÍ 21

¹Wannu Arad be Kanaŋ nɛ ɔ nú Nɛgɛb zia'e o be Israɛl a̧ tɛ nɛ war Atarim'i, ɓɛɛ a̧ nɛɛ bi wa, kai o ŋma mgbara wa nɛ bara.

²Nɛ mɔ'ɔ nɛ o be Israɛl ha̧a̧ nú ha̧ GASA WAN hee mɔ'ɔ ga: «K’ɛ̀nɛ̀ nɛ́ dee ha̧ wi nɔ'ɔ mɛ tik er yɛ, ɛɛ tɛ ndur o ye kɔ-wa a nù nɛ tɛ duk nɛ ha̧a̧mɔ h’ɛ́nɛ́ war kpɔk.»

³GASA WAN zia aia-nú ko o be Israɛl, ɓɛɛ a̧ e o be Kanaŋ er-wa. Nɛ mɔ'ɔ nɛ wa ɗaŋa wa in o ye kɔ-wa yinɛ ha̧ nɛ wa war kpɔk ha̧ GASA WAN, ɓɛɛ wa a nin fara'i'e Ɔrma.[6]

⁴Wa kura ká̧ naŋ kaya Ɔr, ɓɛɛ wa ba nɛ yuwar nú Gbɛ̧ gba-tɔp ɓir nɛnɛ nɛ ɗoŋ nú Edɔm. Wa hɔɔ yuwar, ɓɛɛ nɔɔ-ŋgiɗi bo ɓɔna.

⁵O bíí ku̧u̧ naŋ ku̧i̧a mɔ zu Sɔ̧ in Moisɛ hee mɔ'ɔ ga: «Wen ge ɛnɛ kaia yɛ nɛ Egiptɛ mɛ gbonɛ pii ŋga-gbárà h’ɛ́ɛ́ mɛ fe ge? Nyɔŋmɔ nɛ mɔ'ɔ nɛ bo na, yí-nɔ nɛ mɔ'ɔ nɛ bo na mbɛt; nyɔŋmɔ-kaɓa’ɛ baa tɛ yɛ kaɗi.»

⁶Nɛ mɔ'ɔ nɛ GASA WAN toma ɗaŋ gɔ́k, ɓɛɛ kum o bíí nɛ dɔka-a mgbara o be Israɛl.

⁷Dukbíí tɛɛ tɛ Moisɛ ɓɛɛ tɔ̧: «Ɛɛ dee ɗaŋmɔ tɛ ku̧i̧amɔ n’ɛɛ ku̧i̧a zu GASA WAN in zu'nɛ́. Ɛ̀nɛ̀ áí nú ha̧ GASA WAN wen zu yɛ ha̧ a̧ mɛ fo o ɗaŋ gɔ́k nɔ'ɔ yinɛ mgbara yɛ!» Moisɛ aia nú wen zu o bíí,

⁸ɓɛɛ GASA WAN kifi nú ha̧ a̧: «Mɛ̀ tɔ̧́ ha̧ wa mɛ dui ŋma gɔk-ndɛrɛ, ɓɛɛ mɛ̀ bá a̧ ga̧i̧ tɛ diŋa. Kóó o ndé nɛ̀ gɔ́k nyɔŋa nɛ̀ tɛ zɔk mɔ sitɛ gɔk-ndɛrɛ‘i tɛ kpasi.»

⁹Moisɛ duia gɔk-ndɛrɛ‘i, ɓɛɛ ba ga̧i̧ tɛ te'i. Ŋgimbi nɛ gɔ́k nyɔŋ ŋma bíí, kà wi’ɛi zɔk gɔk-ndɛrɛ‘i, ɓɛɛ a̧ kpasa.

¹⁰O be Israɛl gbina yak nɛɛ ɔ sɛn Obot.

¹¹Wa kura sɛn Obot nɛɛ ɔ sɛn Ye-Abarim sɛn ŋga-gbárà ká̧ Mɔab nɛ war daŋa-wese.

¹²Wa kura hi̧i̧ nɛɛ ɔ nú be-zer ko Zɛrɛd.

¹³Wa yaka nɛ hi̧i̧ woyo ɔ nɛ kur Arnɔŋ. Yi'i fok nɛ nu ko o be Amɔr ɓir nɛnɛ nɛ ŋga-gbárà; nɛ́ Arnɔŋ a̧ gɔna mgbara nú Mɔab in nu ko o be Amɔr.

¹⁴Nɛ wen hegɔ a̧ wa yɔra so mɔ zaŋ Kalata Biro ko GASA WAN zu yi Vahɛb in o gbaa-er-a sɛn Sufa, in Arnɔŋ

¹⁵in o gbaa-er-a nɛ zir si ye Ar, ɓir nɛnɛ nɛ ká̧ nú Mɔab.

¹⁶Wa kura hi̧i̧ yak si Bɛr, nɛ mɔ nɛ tɔ̧ «gɔna-yì»; ɓɛɛ GASA WAN tɔ̧ ha̧ Moisɛ: «Mɛ̀ mɔ́í̧ o bíí lɛŋ, ɓɛɛ mi tɛ ha̧ yì ha̧ wa.»

¹⁷Ɓɛɛ o be Israɛl ŋma nú tɛ gima: «Yi a̧ ŋmai̧ gbonɛ nɛ ɗɔɔ nù; ɛ̀nɛ̀ zɔ́n a̧!

¹⁸O gasawi gɔna yì, o be-wan za̧a̧ yì nɛ̀ dɔ́rá-wan in nɛ̀ te kɔ-wa.»

¹⁹Wa kura nɛ ŋga-gbárà nɛ́ si Matana. Wa kura Matana nɛ́ si Nahaliɛl.

²⁰Wa kura nɛ Nahaliɛl nɛ́ si Bamɔt. Wa kura nɛ Bamɔt hɔ nɛnɛ mgbara kaya nɛ ɓir hɔ nú Mɔab si ká̧ naŋ kaya Pisga nɛ kusa yak zu ŋga-gbárà lɛŋ.

²¹O be Israɛl toma o betom mɛ nɛ̀ɛ́ tɔ̧ ha̧ Sihɔŋ, wannu ko o be Amɔr:

²²«Ɛ̀nɛ̀ é h’ɛ́ɛ́ ɓir yak nɛ tɛ nù k’ɛ́nɛ́. Ɛɛ beka a̧r ye kpɛɛfɔ k’ɛ́nɛ́ na, kóó poo fɔ-nyak-dɔ̧ɔ̧ k’ɛ́nɛ́ na; ɛɛ beka nɔ gɔna-yì k’ɛ́nɛ́ na mbɛt. Ɛɛ tɛ ba nɛ gasa war hɔ ŋgimbi n’ɛɛ tɛ gbo nɛnɛ nù k’ɛ́nɛ́ yak.»

²³Ɓɛɛ Sihɔŋ e ha̧ o be Israɛl mɛ ɓir nɛ nù kɔ̧-a̧ yak na; a̧ mɔi̧a o bíí kɔ̧-a̧ lɛŋ, ɓɛɛ a̧ gɔn ti o be Israɛl ŋga-gbárà mɛ. A̧ tɛɛ pii Yahas, ɓɛɛ a̧ ba biro duk nɛ̀ o be Israɛl hi̧i̧.

²⁴Nɛ mɔ'ɔ nɛ o be Israɛl gɔma wa nɛ gba-paa gbɛ lɛŋ, ɓɛɛ ba nù kɔ-wa ku̧u̧naŋ-a nɛ Arnɔŋ hɔ nɛnɛ Yabɔk, si kpa nɛ gbìsì ko o bem ko Amɔŋ nɛ mboo so garo gɔn nɛ mgbara nù kɔ‘i.

²⁵O be Israɛl baa o ye lɛŋ; wa ɔɔ tɛ o ye ko Amɔr, sɛn Hɛsbɔŋ, in tɛ o ye nɛ ya ká̧ a̧ lɛŋ.

²⁶Hɛsbɔŋ duka so nɛ gasa ye ko Sihɔŋ, wannu ko o be Amɔr. Sihɔŋ bíí so kuti wannu Mɔab, ɓɛɛ ba nù kɔ̧-a̧ lɛŋ hɔ nɛnɛ nú Arnɔŋ.

²⁷Mɛ nɛ wen hegɔ sa o wi-yɔr-mɔ tɔ̧: «Ɛ̀nɛ̀ tɛ́ pii Hɛsbɔŋ, ɛ̀nɛ̀ mbó a̧ woyo! Ɛ̀nɛ̀ ɗáfí ye ko Sihɔŋ woyo!

²⁸Ŋma wee gɔma nɛ Hɛsbɔŋ, ŋma leɓe-wee gboo nɛ ye ko Sihɔŋ, ɓɛɛ dɔ Ar sɛn nú Mɔab in o gasawi zu kaya Arnɔŋ.

²⁹Bɔnɛ a̧a̧ zu mɛ Mɔab! O bíí ko Kɛmɔs,[7] tɛ‘nɛ́ yɔa! O bem kɔ-mɛ mɛ́ be-wiwii-a nɛ́ o wi-yu-mɔ yak, o bem kɔ-mɛ mɛ́ be-okoo-a kifa nɛ́ bara-biro ko Sihɔŋ, wannu ko o be Amɔr.

³⁰Ɛɛ aa wa nɛ góò, sɛn Hɛsbɔŋ hɔ nɛnɛ Dibɔŋ; mɔ ɗaŋa lɛŋ ku̧u̧naŋ-a nɛ Hɛsbɔŋ hɔ Dibɔŋ. Ɛɛ ɗaŋa mɔ lɛŋ hɔ Nɛfa, hɔ nɛnɛ Madaba mbɛt.»

³¹Nɛ mɔ'ɔ nɛ o be Israɛl dee ye kɔ‘i sɛn tɛ nù ko o be Amɔr.

³²Moisɛ toma bíí mɛ nɛ̀ɛ́ kpe naŋ ye Yazɛr. O be Israɛl baa ye'i in o be ye nɛ ya nɛ ká̧ a̧ lɛŋ, ɓɛɛ wa ndak o bíí Amɔr nɛ ɔɔ so hi̧i̧ lɛŋ.

³³O be Israɛl kpaia ŋma yuwar, ɓɛɛ wa daŋ nɛ war Basaŋ. Nɛ mɔ'ɔ nɛ Og wannu Basaŋ gboo gɔn ti wa in o bíí kɔ‘i, mɛ bi wa sɛn Ɛsdrɛi,

³⁴ɓɛɛ GASA WAN tɔ̧ ha̧ Moisɛ: «Ká mɛ yu wa na, wen mi ee wa in nù kɔ-wa, gu nɛ o bíí kɔ-wa lɛŋ er mɛ kaɗi. Mɛ tɛ de mɔ in Og hee mɔ'ɔ nɛ mɛ dee nɛnɛ in Sihɔŋ, wannu ko o be Amɔr nɛ ɔɔ so wan sɛn Hɛsbɔŋ ga.»

³⁵O be Israɛl bìí wa, in o bem kɔ-wa gu nɛ o bíí kɔ-wa lɛŋ, ŋma bíí kpɔk ɓɔn kpasa na, ɓɛɛ wa ba nù kɔ-wa.