Read Northwest Gbaya TƆRA-BÍÍ 22 Bible Online

TƆRA-BÍÍ 22 - Northwest Gbaya bible

TƆRA-BÍÍ 22

¹O be Israɛl kura hi̧i̧ yak nɛ́ɛ̀ ba gbagari sɛn bɔkɔ-nú Mɔab, nɛ kur Jurdɛn, nyɛm nɛ ti Jeriko.

²Balak, bem ko Sipɔr zɔka mɔ lɛŋ nɛ o be Israɛl dee in o be Amɔr;

³kíì dee wannu Mɔab in o bíí kɔ‘i ti o dɔka be Israɛl nɛ wa zɔka, gasa kíì baa wa.

⁴Wa tɔ̧ɔ̧ ha̧ o kuti-wi Madiaŋ: «O zɔm gii wi nɔ'ɔ tɛ nyɔŋ mɔ katɛ ɛɛ lɛŋ yinɛ hee mɔ'ɔ nɛ ndai nyɔŋ nɛ zɔ̧'ɛ ga.» Balak bem ko Sipɔr duka so nɛ wannu Mɔab tɛ ŋgimbi'i.

⁵A̧ toma o betom sitɛ Balam, bem ko Beɔr sɛn Pɛtɔr ká̧ zaŋ Efrat sɛn tɛ nù nɛ wa koo a̧ sɛnɛ mɛ sa a̧ tɛnɛ tɔ̧ nɛnɛ: «Zɔk, ŋma dukbíí gboo nɛ nú Egiptɛ, nɛ kpee zu nù lɛŋ; wa dee ye mgbák nú zɔ̧ɔ̧-am.

⁶Mi ai nú ha̧ mɛ, mɛ tɛ, mɛ̀ fóm zuduk wi nɔ'ɔ, wen wa ŋgaia gan am. Ŋmafara mi nyɛma mɛ gan wa in mɛ ndak wa yinɛ nù kɔ‘m mbɛt, wen mi iŋa, wi nɛ mɛ tok de yoŋgo zu a̧ kpa nɛ de sɔnti, ɓɛɛ wi nɛ mɛ fom kpa nɛ ɗaŋ sɔnti.»

⁷O kuti-wi Mɔab in o kuti-wi Madiaŋ kaia o mɔ nɛ wa tɛ ha̧ ha̧ wi-zɔk-mɔ yak nɛnɛ. Nɛ̀ wa hɔɔ tɛ Balam, wa wee ɗoŋ wen ko Balak ha̧ a̧.

⁸Balam tɔ̧ɔ̧ ha̧ wa: «Ɛ̀nɛ̀ ɔ́ nù; sa̧a̧mɔ mi tɛ kifi nú h’ɛ́nɛ́ nyɛm nɛ ɗoŋ mɔ nɛ GASA WAN tɛ tɔ̧ ha̧‘m.» Ɓɛɛ o gasawi Mɔab ɔ tɛ ko Balam.

⁹Sɔ̧ tɛɛ pii tɛ Balam, ɓɛɛ ak a̧: «Nɛ́ o ge bíí ge a̧ ya tɛ kɔ-mɛ'ɛ ge?»

¹⁰Balam kifa nú ha̧ Sɔ̧: «Nɛ́ o bíí nɛ Balak bem ko Sipɔr, wannu ko o be Mɔab toma mɛ tɔ̧ ha̧‘m'e,

¹¹dukbíí nɛ gboo nɛ Egiptɛ kpee nù kɔ‘i lɛŋ, à̧‘m nɛ́ɛ̀ fóm wa ha'i; hegɔ, ŋmafara wi nyɛma mɛ bi wa, ɓɛɛ wi ndaka wa.»

¹²Sɔ̧ tɔ̧ɔ̧ ha̧ Balam: «Mɛ beka nɛ in o wi nɔ‘i na, mɛ beka fom dukbíí'ɛ na mbɛt, wen mi toka de yoŋgo zu wa.»

¹³Mɛ tutuyɛ, Balam kura ɓɛɛ tɔ̧ ha̧ o gasawi ko Balak: «Ɛ̀nɛ̀ sí k’ɛ́nɛ́ tɛ nù k’ɛ́nɛ́, wen GASA WAN kɔ̧ ha̧‘m mɛ nɛ in'nɛ̀ɛ́ na.»

¹⁴O gasawi nɔ‘i kura si ɗoŋ sitɛ Balak, ɓɛɛ wa tɔ̧ ha̧ a̧: «Balam bɛ̧ɛ̧ tɛa-a in yɛɛ.»

¹⁵Balak toma o mbe gasawi nɛnɛ; wa duka nɛ o dita-bíí in wa dɔka so gan o kuti bíí.

¹⁶Nɛ̀ wa hɔɔ tɛ Balam, wa tɔ̧ɔ̧ ha̧ a̧: «Balak bem ko Sipɔr hee nde, wi kɔfa'nɛ́, k’ɛ́nɛ́ bɛ̧ nɛa-a tɛ wi na,

¹⁷wen wi tɛ de h’ɛ́nɛ́ mɛ kpa mbɔi nɛ dɔka-a, ɓɛɛ mɔ n’ɛnɛ tɛ ak lɛŋ, wi tɛ de h’ɛ́nɛ́. Ɛ̀nɛ̀ nɛ́ ɛ̀nɛ̀ fóm dukbíí‘i ha'i.»

¹⁸Balam kifa nú ha̧ o betom hee mɔ'ɔ ga: «Kóó Balak ha̧a̧ nɛ tua kɔ‘i nɛ duna nɛ bu-mbɔi in lɔr, mi beka yak zu wen ko GASA WAN tɛ geɗek mɔ, kóó tɛ gasamɔ na.

¹⁹Ɛ̀nɛ̀ ɔ́ hɛ̧ɛ̧ sɔsɔɔ pɛm nɛ mɔ ha̧‘m zii mɔ nɛ GASA WAN kɔ̧ɔ̧ mɛ tɔ̧ ha̧‘m woyo sɛ.»

²⁰Sɔ̧ tɛɛ tɛ Balam mɛ zɛ, ɓɛɛ tɔ̧ ha̧ a̧: «Kà nɛ́ bòò nɛ́ mɛ a̧ o wi nɔ'ɔ tɛɛ mɛ sa, mɛ̀ kúr, mɛ̀ yák in wa, ɓɛɛ mɔ kpɔk, mɛ tɛ de nɛ mɔ n'am tɛ tɔ̧ ha̧ mɛ mɛ de.»

²¹Balam kura mɛ tutuyɛ, hɛr nana-tuifuu kɔ‘i, ɓɛɛ yak in o gasawi Mɔab.

²²Yaka-a kɔ̧-a̧ dee ha̧ see GASA WAN mɛ nyim, ɓɛɛ betom ko GASA WAN gɔn ti a̧, kpe nɛ yuwar ha̧ a̧. A̧ daŋa so nɛ zu nana-tuifuu kɔ̧-a̧, ɓɛɛ o wi-de-tom kɔ̧-a̧ yiitoo nɛɛ so in a̧.

²³Nana-tuifuu zɔka betom ko GASA WAN nɛ yor ti a̧ nɛ gba-paa er, ɓɛɛ tuifuu a̧r ye zaŋbɛɛ. Balam gusa a̧ ha̧ a̧ mɛ tik yuwar woyo.

²⁴Betom ko GASA WAN kpee yuwar, mgbák kɔ̧ mbar-nyaŋa nɛ a̧a̧ sɛn poo fɔ-nyak-dɔ̧ɔ̧.

²⁵Tuifuu zɔka betom ko GASA WAN, ɓɛɛ a̧ ɓir ndaɗi ŋgeŋ mɛ yak. A̧ baa naŋ Balam kpor nɛ ŋgeŋ, ɓɛɛ Balam gusi a̧ woyo.

²⁶Betom ko GASA WAN yaka si ti woyo nɛ́ɛ̀ duk tɛ ɓɔɔŋ fara; ŋma fara mɛ ɓir nɛnɛ, kóó nɛ̀ war gale, kóó nɛ̀ war wiiko bo na.

²⁷Nana-tuifuu zɔka betom ko GASA WAN, a̧ guu nù nɛ oi Balam. See Balam nyima, ɓɛɛ ba te gusi nɛ a̧ mɛ gusi gbɛ.

²⁸Ɓɛɛ GASA WAN hú̧í̧ nú tuifuu mɛ tɔ̧ ha̧ Balam: «Nɛ́ ge a̧‘m dee in mɛɛ sa mɛ gusa'm war taar ge?»

²⁹Ɓɛɛ Balam kifi nú ha̧ tuifuu: «Mɛ zɛkɛɗi nɛ‘m, kà‘m bo so nɛ̀ gba-paa er-am, mi tɛ̀ɛ́ gɔm mɛ gbɛ ɓɔn bɛɗɛ.»

³⁰Nana-tuifuu tɔ̧ɔ̧ ha̧ Balam: «Mi bo nɛ tuifuu kɔ-mɛ nɛ mɛ daŋa tɛ ŋgimbi ŋgaiwi kɔ-mɛ hɔ kinii na nde? Mi dee so mɔ hegɔ in mɛɛ nɛti nde?» Ɓɛɛ Balam kifi nú ha̧ a̧‘e: «Weyaa.»

³¹GASA WAN hu̧i̧a̧ yí Balam mɛ zɔk betom ko GASA WAN nɛ yor yuwar nɛ gba-paa er. Balam hɔ̧fa̧ tik nù, ba yi gu nù.

³²Ɓɛɛ betom ko GASA WAN ak a̧: «Wen ge mɛ gusa nana-tuifuu kɔ-mɛ war taar ge? Nɛ́ mi'i kpee yuwar ha̧ mɛ, wen mi iŋa'e kà mɛ nɛ́ nɔ̀‘i, mɛ tɛ fe.

³³Nana-tuifuu zɔka'm, ɓɛɛ a̧ a̧r war taar. Kà a̧ a̧r so na, mi tɛɛ gbɛ mɛ ɓɔn bɛɗɛ, ɓɛɛ mi ee a̧ kpasa.»

³⁴Ɓɛɛ Balam kifi nú ha̧ betom ko GASA WAN: «Mi dee ɗaŋmɔ wen mi iŋ so'e ndé, nɛ́ ɛnɛ'ɛ kpee yuwar kɔ‘m na; kà naŋanɔ kɔ‘m nɛ dee tɛ‘nɛ́ na, mi tɛ si ɗoŋ.»

³⁵Ɓɛɛ betom ko GASA WAN tɔ̧: «Mɛ̀ nɛ́ in o wi nɔ'ɔ; mɔ kpɔk, ká mɛ tɔ̧ ŋma wen yak zu mɔ n'am tɛ tɔ̧ ha̧ mɛ na.» Ɓɛɛ Balam yak in o gasawi ko Balak.

³⁶Balak zia'e Balam a̧ tɛ‘i, ɓɛɛ a̧ we ti a̧ nɛnɛ hɔ Ir-Mɔab nduti-nù kɔ̧-a̧, nú Arnɔŋ.

³⁷Balak tɔ̧ɔ̧ ha̧ Balam: «Bo nɛ mi toma so o bíí mɛ sa mɛ na nde? Wen ge sa mɛ tɛ na ge? Mi bo nɛ̀ ŋgai mɛ ha̧ mbɔi ha̧ mɛ na nde?»

³⁸Balam kifa nú ha̧ Balak: «Mi hɔɔ kaɗi, ɓɛɛ nɛ́ ge wen ge a̧‘m tɛ tɔ̧ ge? Mɔ n'am tɛ tɔ̧ kànà nɛ́ wen nɛ Sɔ̧ tɛ e nú‘m.»

³⁹Balak in Balam kura hɔ Kiriat-Husɔr.

⁴⁰Ɓɛɛ Balak gɔn o ndai in o geɗek mɔ-dai ɗafi nɛ sɔ̧, ɓɛɛ a̧ ha̧ ŋma kpoo-aa ha̧ Balam in o gasawi nɛ nɛɛ so in a̧.

⁴¹Mɛ tutuyɛ, Balak mgbɔɔ Balam daŋ si zu kaya Bamɔt-Bal mɛ, ɓɛɛ wa ya hi̧i̧ zɔk nɛ o ŋma duk be Israɛl.