Read Northwest Gbaya TƆRA-BÍÍ 24 Bible Online

TƆRA-BÍÍ 24 - Northwest Gbaya bible

TƆRA-BÍÍ 24

¹Balam zɔka'e nde, GASA WAN kɔ̧ɔ̧ mɛ tok de yoŋgo zu o be Israɛl, ɓɛɛ a̧ e nɛa-a mɛ zɔk mɔ duk, zik tɛ-a zɔk mɔ si ŋga-gbárà.

²A̧ baa yí-a nɛ ŋgɔn, a̧ zɔka o be Israɛl nɛ ya kɔ̧ gbagari nɛ nutua kɔ-wa, ɓɛɛ ɔmi ko Sɔ̧ zir pii zu a̧.

³A̧ tɔ̧ɔ̧ wen hee mɔ'ɔ ga: «Mɔ'ɔ nɛ́ wen ko Balam, bem ko Pɛɔr, wen ko wi nɛ yí ɔ baa nyɛmna,

⁴wen ko wi nɛ zii wen ko Sɔ̧, wen ko wi nɛ zɔk mɔ nɛ Wan nɛ a̧a̧ nɛ ŋgayamɔ lɛŋ usi ha̧ a̧, ŋgimbi nɛ gba-gbana ba a̧, ɓɛɛ nɛ̀ yí-a hu̧i̧.

⁵Jakob, o tua-laa kɔ-mɛ ɔ dee, Israɛl, o fara-ɔ kɔ-mɛ ɔ dee nyɛmna.

⁶Wa ya hee mɛ̀ nɛ́ foka-yì ga, hee mɛ̀ nɛ́ o fɔ sɛn ká̧ zaŋ yì ga, hee o ŋma gasa te nɛ GASA WAN guna so ga, hee o gbatui[8] ká̧ zaŋ yì ga mbɛt.

⁷O nyɛk lɛŋ dun dun nɛ yì, o bɔr-nyɔnɔ kɔ-wa duk duk nɛ yì zɔr-zɔr. Wannu kɔ̧-a̧ gasa gan Agag, mɔɔ-wan kɔ̧-a̧ gasi gasi siti.

⁸GASA WAN dee ha̧ a̧ mɛ gbo Egiptɛ; a̧ a̧a̧ nɛ ŋgai hee bara-nam ga. A̧ nasi nɛ o wisɛn kɔ̧-a̧, ɓɛɛ a̧ gbina gba̧a̧ tɛ-wa; a̧ a nɛ góò kɔ̧-a̧ tɛ-wa.

⁹A̧ sui ɓɛɛ a̧ ɔɔ nù hee dila ga, hee boko-nam ga. O'o nyɛma mɛ fo a̧ pi̧ ŋgɔn o? Israɛl, wi nɛ tɛ tok de yoŋgo zu mɛ tɛ kpa toka de yoŋgo mbɛt, ɓɛɛ wi nɛ tɛ fom mɛ, tɛ kpa fom mbɛt.»

¹⁰Ɓɛɛ see Balak kur in Balam, ɓɛɛ a̧ mbɛr er-a nɛ ŋmaa, ɓɛɛ tɔ̧: «Bo nɛ mi saa mɛ tɛnɛ ha̧ mɛ mɛ fom o wisɛn kɔ‘m na? Mɛ toka de yoŋgo zu wa war taar kaɗi’ɛ hee ge bɔɔ ge?

¹¹Hee mɔ'ɔ nɛ mɛ dee hegɔ ga, mɛ̀ sí ɗoŋ si nù kɔ-mɛ. Mi tɔ̧ɔ̧ so'e mi tɛ ha̧ mbɔi ha̧ mɛ wó, ɓɛɛ nɛ́ GASA WAN a̧ dora mɔ‘i er mɛ.»

¹²Balam kifa nú ha̧ a̧: «Kóó Balak ha̧a̧ nɛ tua kɔ‘i nɛ duna nɛ bu-mbɔi in lɔr, mi beka yak zu wen ko GASA WAN, ba nɛ̀ demɔ kóó ɗaŋmɔ tɛnɛ nɛ ta-tɛ‘m na. Mi tɛ tɔ̧ kànà nɛ wen nɛ GASA WAN tɛ e nú‘m. Bo nɛ mi tɔ̧ɔ̧ so mɔ‘i ha̧ o kuti bíí nɛ mɛ toma so nɛnɛ sitɛ‘m’ɛ na nde?»

¹⁴«Kinii, mi tɛ si tɛ o bíí kɔ‘m, ɓɛɛ nɛti, mɛ tɛ, ha̧‘m tɔ̧ mɔ nɛ o wi nɔ‘i tɛ de in o bíí kɔ-mɛ nɛ ɗoŋ, a̧ mɛ zii!»

¹⁵Ɓɛɛ Balam tɔ̧ hee mɔ'ɔ ga: «Mɔ'ɔ nɛ́ wen ko Balam, bem ko Pɛɔr, wen ko wi nɛ yí ɔ baa nyɛmna;

¹⁶wen ko wi nɛ zii wen ko Sɔ̧, ko wi nɛ iŋa mgbara mɔ ko Wan nɛ duk ŋgɔn mɛ, ko wi nɛ zɔk mɔ nɛ Wan nɛ a̧a̧ nɛ ŋgayamɔ lɛŋ usi ha̧ a̧; ŋgimbi nɛ gbana ba a̧, ɓɛɛ nɛ̀ yi-a hú̧í̧.

¹⁷Mi zɔk nɛ Israɛl ɓɛɛ bo nɛ kinii na, mi mbaɗi nɛ a̧, ɓɛɛ mi hɛɗi katɛ a̧ na. Ŋma sɔra gboo nɛ̀ mgbara o bezaŋ Jakob; ŋma dɔ́rá-wan gboo nɛ̀ mgbara o be Israɛl, ɓɛɛ gbin ger Mɔab, kum o bem ko Sɛt lɛŋ.

¹⁸Israɛl tɛ ba Edɔm, Wa tɛ ba Sɛir nɛ duka so nɛ wisɛn kɔ-wa;

¹⁹ŋma wan gboo nɛ̀ tɛ Jakob; ɓɛɛ a̧ kum oi bíí nɛ ɓɔna saaye.»

²⁰Balam zɔka Amalɛk ɓɛɛ tɔ̧ hee mɔ'ɔ ga: «Amalɛk, wan-duk-ti ha̧ o dukbíí lɛŋ nɛ ŋgai, mɔ nɛ zɛm mɛ nɛ́ yaia-a ɗɛsɛ-ɗɛsɛ.»

²¹A̧ zɔka o be Kɛn, ɓɛɛ a̧ tɔ̧ hee mɔ'ɔ ga: «Tua k’ɛ́nɛ́ ɔ ŋgaya, fara-ɔ k’ɛ́nɛ́ duk zu kam-ta,

²²ɓɛɛ kóó hegɔ mbɛt, ye k’ɛ́nɛ́ tɛ bìì wee, ɓɛɛ nɛ̀ ɗoŋ, Asur tɛ kai'nɛ́ nɛ bara.»

²³Sɔŋkur-aa, Balam tɔ̧ɔ̧ hee mɔ'ɔ ga: «Bɔnɛ a̧a̧ sɛnɛ! Nɛ́ o'o tɛ duk kpasa tɛ deemɔ ko Sɔ̧ o nde?

²⁴O kombon tɛ nɛ Kitim, wa tɛ nasi Asur in Ebɛr; ɓɛɛ Kitim mbɛt tɛ yai.»

²⁵Nɛ mɔ'ɔ nɛ Balam kura ɓɛɛ si tɛ nù kɔ‘i, ɓɛɛ Balak yak si nù kɔ‘i mbɛt.