Read Northwest Gbaya TƆRA-BÍÍ 25 Bible Online

TƆRA-BÍÍ 25 - Northwest Gbaya bible

TƆRA-BÍÍ 25

¹O be Israɛl nɛɛ de ye sɛn Sitim, ɓɛɛ wa ku̧ naŋ dee mɔ nɛ mbɔɗɔnu in o boko be Mɔab.

²O boko-bem nɔ‘i saa wa mɛ ɗafi o sɔ̧ kɔ-wa; o be Israɛl nyɔŋa nyɔŋmɔ-ɗafi-sɔ̧ kɔ-wa in wa, ɓɛɛ wa gu nù ti o sɔ̧ nɔ‘i.

³O be Israɛl pi̧i̧ tɛ tɛ gasa sɔ̧ Bal-Pɛɔr, ɓɛɛ see GASA WAN nyim in wa.

⁴GASA WAN tɔ̧ɔ̧ ha̧ Moisɛ: «Mɛ̀ káí o gasawi ko o be Israɛl, ɓɛɛ mɛ̀ pí̧ nyak ger-wa ga̧i̧ tɛ te ti'm, mɛ̀ zík yí-wa si yiwese, wen ha̧ nyimsea kɔ‘m mɛ yu zu o be Israɛl.»

⁵Nɛ mɔ'ɔ nɛ Moisɛ tɔ̧ɔ̧ ha̧ o wan-gɔn-kita ko Israɛl: «Kóó o ndé a̧ gbɛ bíí kɔ‘i nɛ̀ pi̧i̧ tɛ tɛ gasa Bal-Pɛɔr yinɛ.»

⁶Ɓɛɛ nɛ mɔ'ɔ nɛ ŋma bíí mgbara o be Israɛl baa ŋma zɔŋa Madiaŋ tɛnɛ pii mgbara o nya-a̧ nɛ yí Moisɛ, in o be Israɛl lɛŋ nɛ ya so kɔ‘i nú Tua-kpa-ŋmaa hi̧i̧ nɛ kɔ̧a̧.

⁷Pinas, bem ko Eleazar, be-koo Arɔŋ zɔka mɔ‘i, a̧ kura mgbara o dɔka bíí, ɓɛɛ a̧ ba sɛɛ;

⁸a̧ ndaka ɗoŋ be Israɛl‘i in zɔŋa Madiaŋ‘i si fara nɛ wa nɛɛ si sɛnɛ‘i, ɓɛɛ a̧ tok wa yiitoo gbɛ a nù; a̧ toka wa tɛ zaŋ. Hegɔ ŋgamɔ nɛ tika zu o be Israɛl tɛ ŋgimbi'i kaɗa.

⁹Bíí nɛ fee lɛŋ tɛ ŋgamɔ‘i duka nɛ bíí booro-ɓu-yiitoo-zua-naar.

¹⁰GASA WAN tɔ̧ɔ̧ ha̧ Moisɛ:

¹¹«Wi-ɗafi-sɔ̧ Pinas, bem ko Eleazar, be-koo Arɔŋ foo nyimsea kɔ‘m yinɛ zu o be Israɛl kaɗi. A̧ duka oi nú‘m usi nɛ ɗaŋsee kɔ̧-a̧ mgbara wa. Nɛ́ hegɔ sa'm kɔ̧ kuma o be Israɛl oi ɗaŋsee kɔ‘m na.

¹²Mɛ̀ nɛ́ɛ̀ tɔ̧ ha̧ Pinas nde, mi nɔɔ tɔk wen ga̧a̧mɔ in a̧.

¹³Mɔ‘i tɛ duk nɛ kpasa mɔ wen a̧ in o bezaŋ-aa wen ha̧ wa mɛ ya nɛ o wi-ɗafi-sɔ̧ ɓɔnsɛnɛ, wen n'aa dee gɔya oi nú Sɔ̧ kɔ̧-a̧, ɓɛɛ mɔ n'aa dea nɛ do-mɔ nɛ usi'e, o be Israɛl kpaa ea-ɗaŋmɔ.»

¹⁴Nin be Israɛl nɛ wa gbɛɛ in zɔŋa Madiaŋ‘i nɛ Zimri, bem ko Salu. A̧ duka so nɛ ŋma gasawi nutua ko Simɛɔŋ.

¹⁵Nin boko be Madiaŋ nɛ wa gbɛa'i nɛ Kosbi, boko-bem ko Suar, ŋma gasawi nú-gara ko o be Madiaŋ.

¹⁶GASA WAN tɔ̧ɔ̧ ha̧ Moisɛ:

¹⁷«Ɛ̀nɛ̀ tík o be Madiaŋ, ɓɛɛ ɛ̀nɛ̀ kúm wa lɛŋ,

¹⁸wen nɛ́ wa a̧ ɔra'nɛ́ mɛ gasi sɔ̧ Bal-Pɛɔr in nɛ́ wa a̧ dee so ha̧ wen ko Kosbi, boko-bem ko ŋma gasawi Madiaŋ nɛ wa gbɛɛ ŋgimbi nɛ ŋgamɔ yaka nɛnɛ sɛn Pɛɔr mɛ tik zu'nɛ́.»

¹⁹Ɗoŋ ŋgamɔ‘i,