Read Northwest Gbaya TƆRA-BÍÍ 28 Bible Online

TƆRA-BÍÍ 28 - Northwest Gbaya bible

TƆRA-BÍÍ 28

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ wen’ɛ ha̧ o be Israɛl. Ɛnɛ tɛ ba ha̧a̧mɔ k’ɛ́nɛ́ tɛnɛ ha̧‘m hee nyɔŋmɔ ga, nɛ pɛr-aa tɛ kur nɛ de-a, ɓɛɛ ɛnɛ tɛ ba tɛnɛ ha̧‘m tɛ ŋgimbi-a.

³Mɛ̀ tɔ̧́ ha̧ wa: nyɔŋmɔ n’ɛnɛ tɛ ba tɛnɛ ha̧ GASA WAN tɛ wese kpɔk kpɔk, nɛ́ be-sami yiitoo nɛ ŋma mɔ ɗaŋ tɛ-wa na mɛ dɔ ha̧ GASA WAN ɓɔnsɛnɛ.

⁴Kuti be-sami, ɛnɛ tɛ dɔ ha̧ GASA WAN mɛ tutuyɛ, ɓɛɛ yiitoo-aa mɛ ga̧a̧mɔ.

⁵Ɛnɛ tɛ e kilo fuu taar nɛ‘i vata nɛ mbe nɔ̧́ tɛ litrɛ kpɔk nɛ reeta zu a̧.

⁶Mɔ‘i nɛ kpoo-sɔ̧ n’ɛnɛ dɔ so ɓɔnsɛnɛ sɛn zu kaya Sinai nɛ pɛr-aa ɔ dee tɛ GASA WAN.

⁷Ɛnɛ tɛ ha̧ litrɛ dɔ̧ɔ̧ kpɔk nɛ reeta ha̧ GASA WAN ŋgimbi n’ɛnɛ ha̧ nɛ be-sami mɛ tutuyɛ wen tɛna-a a nù, ɛnɛ tɛ ha̧ mɔɔ nɔ‘i sɛn kɔ̧ sa̧a̧-fara.

⁸Nɛ̀ ko ɓii be-sami, ɛnɛ tɛ dɔ mɛ ga̧a̧mɔ, ɓɛɛ ɛnɛ tɛ ha̧ fuu in dɔ̧ɔ̧ hee wan mɛ tutuyɛ ga mbɛt; mɔ‘i tɛ duk nɛ de nyɔŋmɔ nɛ pɛr-aa ɔ dee tɛ GASA WAN.»

⁹«Wese-ɔm-tɛ, ɛnɛ tɛ ha̧ be-sami yiitoo nɛ a̧a̧ nɛ pɛ kpɔk nɛ ŋma mɔ ɗaŋ tɛ-wa na, in kilo fuu mɔɔrɔ-ɗoŋ-kpɔk nɛ‘i vata nɛ nɔ̧́, in dɔ̧ɔ̧ mbɛt.

¹⁰Yuwar dɔɔ kpoo-sɔ̧ wese-ɔm-tɛ nɛ mɔ‘i. Ɛ́nɛ́ tɛ dɔ kpoo-sɔ̧ in ha̧a̧ dɔ̧ɔ̧ wese lɛŋ, ɓɛɛ ɛnɛ dee hegɔ dam ɗoŋ wese-ɔm-tɛ lɛŋ mbɛt.»

¹¹«Tɛ mbe yí-zɛ, ɛnɛ tɛ ha̧ wiwii ndai yiitoo in vala sami kpɔk ká bá nɛ̀ be-sami mɔɔrɔ-ɗoŋ-yiitoo nɛ a̧a̧ nɛ pɛ kpɔk nɛ ŋma mɔ ɗaŋ tɛ-wa na, wen dɔa-a ha̧ GASA WAN.

¹²Ko wiwii ndai kpɔk kpɔk, ɛnɛ tɛ ha̧ nɛ kilo fuu mɔɔrɔ-ɗoŋ-naar nɛ‘i vata nɛ nɔ̧́; war ko vala sami, ɛnɛ tɛ ha̧ nɛ kilo fuu mɔɔrɔ-ɗoŋ-kpɔk nɛ‘i vata nɛ nɔ̧́.

¹³War ko be-sami kpɔk kpɔk, wi tɛ ha̧ nɛ kilo fuu taar nɛ‘i vata nɛ nɔ̧́. Mɔ‘i nɛ dɔɔ-kpoo-sɔ̧, de nyɔŋmɔ nɛ pɛr-aa ɔ dee tɛ GASA WAN.

¹⁴Ɓɛɛ ko dɔ̧ɔ̧ wen tɛna-a a nù, nɛ litrɛ taar wen wiwii ndai kpɔk kpɔk, litrɛ yiitoo wen vala sami kpɔk kpɔk in litrɛ kpɔk nɛ reeta wen be-sami kpɔk kpɔk. Kpoo-sɔ̧ nɛ‘i tɛ dɔ ha̧ GASA WAN tɛ mbe yí-zɛ kpɔk kpɔk nɛ mɔ‘i.

¹⁵Ɛnɛ tɛ ha̧ vala gbadua ha̧ GASA WAN ɗafi nɛ sɔ̧ wen kpaa ea-ɗaŋmɔ. Wi tɛ ha̧ mɔ‘i e zu kpoo-sɔ̧ nɛ‘i dɔ ɓɔnsɛnɛ in dɔ̧ɔ̧ nɛ‘i tɛn a nu.»

¹⁶«Kuti fio-zɛ tɛ ɔɔ-zɛ ɓu-zua-naar tɛ duk nɛ gbaŋa Paska wen tu̧u̧ tɛ GASA WAN;

¹⁷ɓɛɛ ɓu-zua-mɔɔrɔ ɔɔ-zɛ tɛ fio-zɛ‘i tɛ duk nɛ wese gbaŋa. Ɓɛɛ sɛn zaŋ zɛ mɔɔrɔ-ɗoŋ-yiitoo, ɛnɛ tɛ nyɔŋ nɛ brɛt nɛ hao bo sɛnɛ na.

¹⁸Tɛ kuti wese'i, ɛnɛ tɛ mɔi̧ tú̧ nɛ̀ tɛ GASA WAN; bíí beka de ŋma tom wese'i na.

¹⁹Ɛnɛ tɛ dɔ wiwii ndai yiitoo in vala sami kpɔk ká bá nɛ̀ o be-sami mɔɔrɔ-ɗoŋ-yiitoo nɛ a̧a̧ nɛ pɛ kpɔk nɛ ŋma mɔ ɗaŋ tɛ-wa na nɛ ha̧a̧mɔ ha̧ GASA WAN.

²⁰Ɛnɛ tɛ ha̧ kilo fuu mɔɔrɔ-ɗoŋ-naar nɛ‘i vata nɛ nɔ̧́ e zu wiwii-ndai kpɔk kpɔk in kilo fuu mɔɔrɔ-ɗoŋ-kpɔk e zu vala sami kpɔk,

²¹sɛka kilo fuu taar wen be-sami kpɔk kpɔk.

²²Zu-a'i, ɛnɛ tɛ ha̧ vala gbadua kpɔk ɗafi nɛ sɔ̧ wen kpaa ea-ɗaŋmɔ, ha̧ wa mɛ de do-mɔ zu'nɛ́ nɛ usi'e ɛnɛ kpaa ea-ɗaŋmɔ.

²³Ɛnɛ tɛ de mɔ‘i e zu dɔɔ-kpoo-sɔ̧ wan mɛ tutuyɛ, nɛ duk nɛ dɔɔ-kpoo-sɔ̧ wese ɓɔnsɛnɛ.

²⁴Ɛnɛ tɛ ha̧ nyɔŋmɔ wen dɔa-a dam ɗoŋ o zɛ nɔ‘i mɔɔrɔ-ɗoŋ-yiitoo'i nɛ pɛr-aa tɛ de tɛ GASA WAN. Wi tɛ ha̧ mɔ‘i e zu kpoo-sɔ̧, nɛ‘i dɔ ɓɔnsɛnɛ in dɔ̧ɔ̧ nɛ‘i tɛn a nù.

²⁵Ɛnɛ tɛ mɔi̧ tú̧ nɛ̀ tɛ GASA WAN tɛ mɔɔrɔ-ɗoŋ-yiitoo ɔɔ-zɛ woyo, ɓɛɛ ɛnɛ beka de ŋma tom wese'i na.»

²⁶«Wese Gbaŋa Zu-nyɔnɔ, ŋgimbi n’ɛnɛ tɛ ha̧ nɛ zu mbe nyɔnɔ k’ɛ́nɛ́ ha̧ GASA WAN, ɛnɛ tɛ mɔi̧ tú̧ nɛ̀ tɛ a̧, ɓɛɛ ɛnɛ beka de ŋma tom wese'i na.

²⁷Ɛnɛ tɛ dɔ wiwii-ndai yiitoo, in vala sami kpɔk ká bá nɛ̀ o be-sami mɔɔrɔ-ɗoŋ-yiitoo nɛ a̧a̧ nɛ pɛ kpɔk nɛ pɛr-aa tɛ de tɛ GASA WAN.

²⁸Ɛnɛ tɛ ha̧ fuu nɛ‘i vata nɛ nɔ̧́ tɛ kilo mɔɔrɔ-ɗoŋ-naar wen wiwii-ndai kpɔk kpɔk, kilo fuu mɔɔrɔ-ɗoŋ-kpɔk wen vala sami kpɔk kpɔk,

²⁹in kilo fuu taar wen o be-sami mɔɔrɔ-ɗoŋ-yiitoo nɛ a̧a̧ nɛ pɛ kpɔk.

³⁰Ɛnɛ tɛ ha̧ vala gbadua e zu a̧ mbɛt ha̧ wa mɛ de do-mɔ zu'nɛ́ nɛ usi'e ɛnɛ kpaa ea-ɗaŋmɔ.

³¹Ɛnɛ tɛ ha̧ mɔ‘i in dɔ̧ɔ̧ nɛ‘i tɛn a zu-a e zu kpoo-sɔ̧ nɛ‘i dɔ ɓɔnsɛnɛ in fuu nɛ‘i ha̧ mbɛt. Ɛnɛ tɛ ha̧ nɛ́ o saɗi nɛ̀ ŋma mɔ ɗaŋ tɛ-wa na.»