Read Northwest Gbaya TƆRA-BÍÍ 3 Bible Online

TƆRA-BÍÍ 3 - Northwest Gbaya bible

TƆRA-BÍÍ 3

¹O bezaŋ Arɔŋ in Moisɛ ŋgimbi nɛ Sɔ̧ tɔ̧ɔ̧ so nɛ wen ha̧ Moisɛ zu kaya Sinai nɛ́ mɔɔ nɔ'ɔ.

²Nin o bem ko Arɔŋ nɛ: kaya-bem nɛ́ Nadab, sɛka Abihu in Eleazar ká bá nɛ̀ Itamar.

³Nin o bem ko Arɔŋ nɛ wa tɛna nɔ̧́ a zu wa ha̧ wa mɛ de tom-ɗafa-sɔ̧ nɛ mɔ‘i.

⁴Nadab in Abihu fee so ti GASA WAN wen nɛ wa baa so ŋma wee nɛ̀ bó nɛ́ kɔ̧-a̧ na e ti a̧. Wa ko bem kóó kpɔk na fe nɛnɛ ŋga-gbárà Sinai mɛ. Nɛ́ Eleazar in Itamar a̧ dee tom-ɗafa-sɔ̧ nɛ yí dáà kɔ-wa Arɔŋ.

⁵Nɛ mɔ'ɔ nɛ GASA WAN tɔ̧ɔ̧ ha̧ Moisɛ:

⁶«Mɛ̀ káí o duk ko Levii pii ti mɛ ha̧ wa mɛ gbak Arɔŋ wi-ɗafi-sɔ̧. Wa tɛ de tom-ɗafa-sɔ̧ in a̧.

⁷Wa tɛ gbak a̧ tɛ tom n'aa tɛ de, ɓɛɛ wa tɛ de tom ha̧ bíí lɛŋ nú Tua-kpa-ŋmaa. Nɛ́ wa a̧ tɛ kasi tom fara-duk ko GASA WAN.

⁸Wa tɛ ɗafi mɔ nɛ ya kɔ̧ Tua-kpa-ŋmaa mbɛt nɛ yuwar-a, ɓɛɛ wa tɛ de tom oi nú o be Israɛl kɔ̧ tua'i mbɛt.

⁹Mɛ tɛ ha̧ zuduk ko Levii ha̧ Arɔŋ in o bem kɔ‘i; mɛ tɛ ha̧ wa nɛ̀ kpasa ha̧a̧mɔ, nɛ̀ war ko o be Israɛl.

¹⁰Mɛ tɛ e Arɔŋ in o bem kɔ‘i mɛ de tom-ɗafa-sɔ̧; kà ŋma géé bíí ɗɔŋ pii ti mɛ de tom'i, wi tɛ gbɛ a̧ yinɛ.»

¹¹GASA WAN tɔ̧ɔ̧ ha̧ Moisɛ woyo:

¹²«Kinii, o be Levii tɛ duk nɛ́ kɔ‘m. Mi kaia wa oi o kaya-bem ko o be Israɛl lɛŋ,

¹³wen o kaya-bem lɛŋ so nɛ kɔ‘m. Ŋgimbi n'am gbɛɛ so nɛ o kaya-bem nú Egiptɛ, mi kaia so o kaya-bem nɛ wa koo sɛn Israɛl nɛ̀ kɔ‘m; kaya-bem ko o bíí hɔ nɛnɛ tɛ kaya mɔ-dai lɛŋ so nɛ kɔ‘m. Mi nɛ GASA WAN.»

¹⁴GASA WAN tɔ̧ɔ̧ ha̧ Moisɛ ŋga-gbárà Sinai mɛ:

¹⁵«Mɛ̀ tɔ́r o bezaŋ Levii tɛ nutua in tɛ nú-gara kɔ-wa kpɔk kpɔk; mɛ̀ tɔ́r o wiwii lɛŋ, ku̧u̧naŋ-a tɛ o wan nɛ a̧a̧ nɛ fio-zɛ kpɔk yak nɛnɛ.»

¹⁶Moisɛ tɔra wa hee mɔ'ɔ nɛ GASA WAN baa ha̧ so nɛ nú ha̧ a̧ mɛ de ga.

¹⁷Nin o bem ko Levii nɛ́ mɔɔ nɔ'ɔ: Gersɔŋ, Kehat in Mɛrari.

¹⁸Nin o bem ko Gɛrsɔŋ nɛ̀ nú-gara kɔ-wa nɛ́ mɔ'ɔ: Libni in Simɛi.

¹⁹O bem ko Kehat nɛ̀ nú-gara kɔ-wa nɛ́ mɔ'ɔ: Amram, Yisekar, Hebrɔŋ in Uziɛl.

²⁰O bem ko Mɛrari nɛ̀ nú-gara kɔ-wa nɛ́ mɔ'ɔ: Mali in Musi. O nú-gara ko o bezaŋ Levii nɛ‘i tɔra nyɛm nɛ ɗoŋ nutua kɔ-wa nɛ́ mɔɔ nɔ‘i.

²¹Nú-gara ko Libni in nú-gara ko Simɛi gboo nɛ tɛ Gɛrsɔŋ. Wa nɛ o bezaŋ Gɛrsɔŋ.

²²O wiwii lɛŋ nɛ wa tɔra, o wan nɛ a̧a̧ nɛ fio-zɛ kpɔk yak nɛnɛ, nɛ bíí 7.500.

²³O bezaŋ Gɛrsɔŋ ɔɔ kɔ-wa ɗoŋ fara-duk ko GASA WAN nɛ war yee-wese.

²⁴Gasawi ko o bezaŋ Gɛrsɔŋ nɛ Eliasaf, bem ko Laɛl.

²⁵O bem ko Gɛrsɔŋ dee kɔ-wa nɛ tom kɔ̧ Tua-kpa-ŋmaa. O tom nɔ‘i nɛ ɗafa laa-kpe-tua nɛ zan, nɛ kɔ̧ a̧ in nɛ zu a̧,

²⁶laa nú Tua-kpa-ŋmaa, laa-kpe-ɗoŋ-zala nɛ zika fara-duk ko GASA WAN in fara-ɗaf'aa, laa-kpe-nú-zala, ká bá nɛ̀ o nyak lɛŋ wen baa tua'i e ŋgɔn.

²⁷Nú-gara ko Amram, ko Yisear, ko Hebrɔŋ ká bá nɛ̀ ko Uziɛl gboo nɛ tɛ Kehat. Wa nɛ o bezaŋ Kehat.

²⁸O wiwii mgbara o bezaŋ Kehat nɛ wa tɔra, ku̧u̧naŋ-a nɛ fio-zɛ kpɔk yak nɛnɛ, nɛ bíí 8.600. Wa dee kɔ-wa nɛ tom tɛ sa̧a̧-fara.

²⁹O bezaŋ Kehat ɔɔ kɔ-wa nɛ ká̧ tua ko GASA WAN nɛ war ɗɔɔ.

³⁰Gasawi nutua ko o bezaŋ Kehat nɛ Elisafaŋ, bem ko Uziɛl.

³¹Wa dee kɔ-wa nɛ tom Kuɓa nɔɔ-tɔk, taŋe-e-brɛt, dek-e-wee, o fara-ɗafi-sɔ̧, o nyɛk-sa̧a̧-fara nɛ‘i de nɛ tom, ká bá nɛ̀ babir-laa. Tom kɔ-wa nɛ́ ɗafa o mɔɔ nɔ‘i lɛŋ.

³²Gasawi ko o bezaŋ Levii lɛŋ nɛ Eleazar, bem ko Arɔŋ, wi-ɗafi-sɔ̧; nɛ́ a̧ a̧ duka zu o wi nɛ de tom sa̧a̧-fara.

³³Nú-gara ko Mali in ko Musi gboo nɛ tɛ Mɛrari. Wa nɛ o bezaŋ Mɛrari.

³⁴O wiwii mgbara o bezaŋ Mɛrari, ku̧u̧naŋ-a nɛ fio-zɛ kpɔk yak nɛnɛ nɛ bíí 6.200.

³⁵Gasawi nutua ko o bezaŋ Mɛrari nɛ Suriɛl, bem ko Abihayil. Wa ɔɔ so kɔ-wa nɛ ká̧ tua ko GASA WAN nɛ war ŋgɔn.

³⁶Wa dee kɔ-wa nɛ tom mɔɔ-tɔn-tua, o gaŋgala, o mbiŋ, o gun-aa ká bá nɛ̀ o mɔ-a lɛŋ. Tom kɔ-wa nɛ́ ɗafa o mɔɔ nɔ‘i lɛŋ.

³⁷Zu-a'i, wa dee tom o mbiŋ-zala in o gun-wa, o te mgboia-a ká bá nɛ̀ o nyak-aa.

³⁸Moisɛ in Arɔŋ ká bá nɛ̀ o bem kɔ-wa lɛŋ ɔɔ kɔ-wa nɛ war daŋa-wese nɛ war ti Tua-kpa-ŋmaa. Wa duka de nɛ tom sa̧a̧-fara wen o be Israɛl. Géé bíí nɛ tɛ ɗɔli pii ti mɛ de tom tua'i, wi tɛ gbɛ a̧.

³⁹O be Levii nɛ Moisɛ tɔra nɛ̀ nú-gara kpɔk kpɔk nyɛm nɛ ɗoŋ ha̧a̧nú ko GASA WAN, o wiwii nɛ wa tɔra, ku̧u̧naŋ-a tɛ fio-zɛ kpɔk yak nɛnɛ, nɛ bíí 22.000.

⁴⁰Nɛ mɔ'ɔ nɛ GASA WAN tɔ̧ɔ̧ ha̧ Moisɛ: «Mɛ̀ tɔ́r o kaya-be-wiwii ko o be Israɛl lɛŋ, ku̧u̧naŋ-a tɛ fio-zɛ kpɔk yak nɛnɛ; mɛ̀ tɔ́r wa lɛŋ nɛ nin-wa kpɔk kpɔk.

⁴¹Mɛ tɛ e nɛ o be Levii ha̧‘m oi nú o kaya-bem ko o be Israɛl wen mi nɛ GASA WAN. Mɛ tɛ kai o kaya mɔ-dai kɔ-wa e ha̧‘m oi nú kaya mɔ-dai ko o be Israɛl mbɛt.»

⁴²Nɛ mɔ'ɔ nɛ Moisɛ tɔra o kaya-bem ko o be Israɛl nyɛm nɛ ɗoŋ mɔ nɛ GASA WAN tɔ̧ɔ̧ ha̧ a̧.

⁴³O kaya-be-wiwii nɛ wa tɔra lɛŋ nɛ̀ nin kpɔk kpɔk ku̧u̧naŋ-a tɛ fio-zɛ kpɔk yak nɛnɛ nɛ bíí 22.273.

⁴⁴GASA WAN tɔ̧ɔ̧ ha̧ Moisɛ:

⁴⁵«Mɛ̀ káí o be Levii oi nú kaya-bem ko o be Israɛl, ɓɛɛ mɛ̀ káí o mɔ-dai ko o be Levii oi nú kɔ-wa. O be Levii ya nɛ kɔ‘m. Mi nɛ GASA WAN.

⁴⁶O kaya-bem ko o be Israɛl dɔka gan o bezaŋ Levii tɛ bíí 273. Mɛ tɛ gɔn zu o bíí nɔ‘i nɛ kɔya bu-mbɔi mɔɔrɔ wen bíí kpɔk nyɛm nɛ ɗoŋ sede sa̧a̧-fara. Kɔya bu-mbɔi kpɔk tɛ nyɛm ŋmaa in geɗek sede ɓu-yiitoo.

⁴⁷

⁴⁸Mɛ tɛ kai sede'i ha̧ ha̧ Arɔŋ in o bem kɔ‘i mɛ gɔn nɛ zu o kaya be Israɛl nɛ dɔka gan o bezaŋ Levii.»

⁴⁹Moisɛ ndɛma sede-gɔn-zu o kaya-bem ko o be Israɛl nɛ dɔka gan o bezaŋ Levii.

⁵⁰A̧ mɔi̧a kɔya sede 1.365, oi nú o kaya-bem ko o be Israɛl, nyɛm nɛ ɗoŋ sede sa̧a̧-fara.

⁵¹Moisɛ kaia sede'i ha̧ ha̧ Arɔŋ in o bem kɔ‘i nyɛm nɛ ɗoŋ wen nɛ GASA WAN tɔ̧ɔ̧ so ha̧ a̧.