Read Northwest Gbaya TƆRA-BÍÍ 32 Bible Online

TƆRA-BÍÍ 32 - Northwest Gbaya bible

TƆRA-BÍÍ 32

¹O bezaŋ Gad in o bezaŋ Rubɛn a̧a̧ so nɛ̀ gii mɔ-dai. Nɛ mɔ'ɔ nɛ wa zɔka'e nú Yazɛr in nú Galad nɛ́ de fara nyɛmna wen daia mɔ-dai.

²O bezaŋ Rubɛn in o bezaŋ Gad tɛa kpa Moisɛ in wi-ɗafi-sɔ̧ Eleazar ká bá nɛ̀ o gasawi, ɓɛɛ wa tɔ̧:

³«Nù nɛ o ye Atarot, Dihɔŋ, Yazɛr, Nimra, Hɛsbɔŋ, Eleale, Sebam, Nɛbo in Bɛɔŋ ya sɛnɛ,

⁴nù nɛ GASA WAN dee so ha̧ o be Israɛl mɛ ba'i nɛ de nù wen o mɔ-dai, ɓɛɛ ɛɛ o wi-de-tom k’ɛ́nɛ́, ɛɛ a̧a̧ nɛ o mɔ-dai nɛ dɔka-a mbɛt.

⁵K’ɛ̀nɛ̀ nɛ́ kpɛka, ɓɛɛ ɛ̀nɛ̀ há̧ nù‘i h’ɛ́ɛ́ o wi-de-tom k’ɛ́nɛ́, ha̧ nù‘i mɛ duk nɛ k’ɛɛ, ɓɛɛ k’ɛ́nɛ́ de h’ɛ́ɛ́ mɛ ku Jurdɛn yak na.»

⁶Moisɛ kifa nú ha̧ o bezaŋ Gad in o bezaŋ Rubɛn: «O nya'nɛ́ tɛ nɛ biro, ɓɛɛ ɛnɛ yaa k’ɛ́nɛ́ hɛ̧ɛ̧ nde?

⁷Wen ge ɛnɛ de ha̧ tɛ o be Israɛl mɛ ga̧ tɛ nɛa-a sitɛ nù nɛ GASA WAN ha̧ ha̧ wa ge?

⁸Mɔ nɛ o dáà k’ɛ́nɛ́ dee so ŋgimbi n'am toma nɛ wa nɛ Kadɛs-Barnɛa wen kpee naŋ nù nɛ mɔ‘i.

⁹Wa daŋa so hɔ mgbara kaya Ɛskɔl, wa kpee naŋ nù‘i nɛ de-a, ɓɛɛ wa tɛɛ tɔ̧ wen-gbin-tɛ o be Israɛl wen ká wa tɛɛ nɛ sitɛ nù nɛ GASA WAN ha̧a̧ so ha̧ wa.

¹⁰See GASA WAN nyima wese'i, ɓɛɛ a̧ kan mɔ:

¹¹‹O wi nɔ'ɔ nɛ gboo nɛ Egiptɛ nɛ a̧a̧ nɛ pɛ ɓu-yiitoo kóó gan mbɛt, beka zɔk nù n'am ha̧a̧ so nú nde, mi tɛ ha̧ ha̧ Abraham, ha̧ Izak ká bá nɛ̀ Jakob na, wen wa nika naŋ-wa tɛ mboo zu ha̧‘m.›

¹²Kànà nɛ Kalɛb bem ko Yefunɛ, be Keniz in Josue bem ko Nun ɓɛɛ, wen wa ndaka pata GASA WAN nɛ see-wa lɛŋ.

¹³See GASA WAN nyima, ɓɛɛ de ha̧ wa mɛ yambali nɛ ŋga-gbárà nɛnɛ tɛ pɛ ɓu-naar hɔ nɛnɛ ŋgimbi nɛ o wi nɛ dee so mɔ ɗaŋ see GASA WAN'i fee nɛnɛ lɛŋ.

¹⁴Kinii, ɛnɛ kpar o ɗaŋwi nɔ'ɔ, ɛ́nɛ́ zɔ́k nɛ ɗoŋ mɔ ko o dáà k’ɛ́nɛ́ h’ɛ́nɛ́ mɛ aŋ nyimsea ko GASA WAN a ŋgɔn zu Israɛl woyo.

¹⁵K’ɛ̀nɛ̀ e mboo zu ha̧ a̧ duk, a̧ tɛ de ha̧ zɛ‘nɛ́ mɛ dɔk ŋga-gbárà siti, ɓɛɛ nɛ́ wen zu'nɛ́ a̧ o bíí nɔ'ɔ lɛŋ tɛ kum nɛnɛ.»

¹⁶Nɛ mɔ'ɔ nɛ wa ɗɔŋa pii katɛ Moisɛ, ɓɛɛ wa tɔ̧ ha̧ a̧: «Ɛɛ kɔ̧ɔ̧ mɛ ɗafi fara-nyɔŋ-mɔ ko o ndai k’ɛɛ in ye wen o bem k’ɛɛ hɛ̧ɛ̧.

¹⁷Ɓɛɛ ɛɛ nɛ tɛ yɛ, ɛɛ tɛ kai o mɔɔ-de-biro, mɛ ya ti ha̧ o dɔka be Israɛl hɔ fara n’ɛɛ tɛ mgbɔ nɛ wa ye nɛ fara kɔ-wa. Tɛ ŋgimbi'i, o bem k’ɛɛ tɛ ya tɛ o ŋga ye nɔ'ɔ wen ká o bíí nù'ɛ tɛɛ de ŋmaa in wa.

¹⁸Ɛɛ beka pii ɗoŋ pii tɛ k’ɛɛ nɛti ha̧ o be Israɛl lɛŋ mɛ kpa fara-duk kɔ‘i na, na.

¹⁹Ɛɛ beka kɛ̧ nù in o be Israɛl nɛ kur Jurdɛn hi̧i̧ na, wen nù k’ɛɛ a̧a̧ nɛ kur Jurdɛn, nɛ war tɛ yɛ hɛ̧ɛ̧, si war daŋa-wese.»

²⁰Moisɛ tɔ̧ɔ̧ ha̧ wa: «K’ɛ̀nɛ̀ de hee mɔ‘i ga, k’ɛ̀nɛ̀ nɛ́ kaia boi-biro ti GASA WAN mɛ nɛ biro,

²¹kà o wi-biro k’ɛ́nɛ́ lɛŋ nɛ́ kuu Jurdɛn ti GASA WAN hɔ fara n'aa tɛ ndak o wisɛn kɔ̧-a̧ lɛŋ,

²²kà nù‘i nɛ́ duka ɗɔɔ ŋgai kɔ̧-a̧, ɓɛɛ ɛnɛ nyɛma mɛ pii ɗoŋ fara k’ɛ́nɛ́; hegɔ ŋma wen beka bo mgbara'nɛ́ in GASA WAN ká bá nɛ̀ o be Israɛl na, ɓɛɛ nù'ɛ tɛ duk nɛ k’ɛ́nɛ́ ti GASA WAN.

²³K’ɛ̀nɛ̀ nɛ́ dee hegɔ na, ɓɛɛ mɛ̀ nɛ́ wen nɛ tɔ̧‘e, ɛnɛ dee ɗaŋmɔ ti GASA WAN kaɗi, ɓɛɛ ɛ̀nɛ̀ íŋ kànà‘e, mɔɔ-oi-ɗaŋmɔ k’ɛ́nɛ́ tɛ tik kànà zu'nɛ́.

²⁴Ɛ̀nɛ̀ mbó o ye wen o bem k’ɛ́nɛ́, ɛ̀nɛ̀ ɗáfí o fara wen o mɔ-dai k’ɛ́nɛ́, ɓɛɛ mɔ n’ɛnɛ ha̧a̧ nú sɛnɛ, ɛ̀nɛ̀ dé kànà ŋgaɓo.»

²⁵Ɓɛɛ o bem ko Gad in o bem ko Rubɛn tɔ̧ ha̧ Moisɛ: «Ɛɛ o wi-de-tom k’ɛ́nɛ́, ɛɛ tɛ de kànà mɔ nyɛm nɛ ɗoŋ wen k’ɛ́nɛ́.

²⁶O bem k’ɛɛ in o okoo k’ɛɛ, o mɔ-dai k’ɛɛ in o saɗi k’ɛɛ lɛŋ tɛ ya tɛ o ye nú Galad,

²⁷ɓɛɛ ɛɛ o wi-de-tom k’ɛ́nɛ́, ɛɛ tɛ kai o boi-biro k’ɛɛ mɛ yak biro ɗɔɔ ŋgai ko GASA WAN, hee mɔ'ɔ n’ɛnɛ tɔ̧ɔ̧ ga.»

²⁸Nɛ mɔ'ɔ nɛ Moisɛ tɔ̧ɔ̧ mgbara mɔ‘i ha̧ Eleazar wi-ɗafi-sɔ̧ in Josue, bem ko Nun in ha̧ o gasawi zuduk ko o be Israɛl lɛŋ.

²⁹A̧ tɔ̧ɔ̧ ha̧ wa: «Kà o bezaŋ Gad, in o bezaŋ Rubɛn nɛ́ kaia boi-biro ku nɛ Jurdɛn mɛ nɛ̀ɛ́ bi biro ɗɔɔ ŋgai ko GASA WAN, ɓɛɛ k’ɛ́nɛ́, kà nù‘i nɛ́ duka ɗɔɔ ŋgai k’ɛ́nɛ́ kaɗi, ɛ̀nɛ̀ há̧ nú Galad ha̧ wa nɛ kɔ-wa.

³⁰Kà wa nɛ́ nɛɛ in'nɛ̀ɛ́ mɛ bi biro na, ɓɛɛ nù kɔ-wa tɛ duk nɛ ŋma nú Kanaŋ mgbara'nɛ́.»

³¹Ɓɛɛ o bem ko Gad in o bem ko Rubɛn kifi nú: «Mɔ nɛ GASA WAN tɔ̧ɔ̧ h’ɛ́ɛ́ o wi-de-tom k’ɛ́nɛ́, ɛɛ tɛ de kànà hegɔ.

³²Ɛɛ tɛ kai o boi-biro k’ɛɛ nɛ nɛnɛ si nú Kanaŋ ɗɔɔ ŋgai ko GASA WAN, ɓɛɛ war nù k’ɛɛ n’ɛɛ tɛ kpa a̧a̧ nɛ kur Jurdɛn nɛ war hɛ̧ɛ̧.»

³³Nɛ mɔ'ɔ nɛ Moisɛ ha̧a̧ nù ko Sihɔŋ wannu ko o be Amɔr in nù ko Og wannu Basaŋ in o ye nɛ ya katɛ nù kɔ-wa lɛŋ ha̧ o bezaŋ Gad in o bezaŋ Rubɛn, in ha̧ reeta zuduk ko Manase bem ko Jozɛf.

³⁴O bem ko Gad ɗafa ɗoŋ o ye Dibɔŋ, Atarot, Arɔɛr,

³⁵Atrɔt-Sɔfaŋ, Yazɛr, Yɔgbɔha,

³⁶Bɛt-Nimra, in Bɛt-Araŋ. Wa ɗafa ɗoŋ o ŋga ye nɔ‘i, ɓɛɛ wa ɗafi o fara wen o mɔ-dai kɔ-wa mbɛt.

³⁷O bezaŋ Rubɛn ɗafa ɗoŋ o ye Hɛsbɔŋ, Eleale, Kiriataim,

³⁸Nɛbo, Bal-Mɛɔŋ, nɛ wa kpaia nin-a, sɛka Sibma. Wa ha̧a̧ mbe nin ha̧ o ye nɔ‘i nɛ wa ɗafa ɗoŋ-aa woyo'i.

³⁹O bezaŋ Makir bem ko Manase yaka si nú Galad, wa bìì o be Amɔr tɛ nù kɔ-wa, ɓɛɛ ndak wa yinɛ ba fara oi wa.

⁴⁰Nɛ mɔ'ɔ nɛ Moisɛ ha̧a̧ nú Galad ha̧ nú-gara ko Makir bem ko Manase, ɓɛɛ wa ɔ ye hi̧i̧.

⁴¹Yair, ŋma bem ko Manase nɛɛ ba o ŋma ye ko o be Amɔr, ɓɛɛ a̧ a nin fara'i nɛ «O ye ko Yair».

⁴²Nɔba nɛɛ ba ye Kɛnat in o ye nɛ ya zik a̧, ɓɛɛ a̧ gbar nin fara'i Nɔba.