Read Northwest Gbaya TƆRA-BÍÍ 36 Bible Online

TƆRA-BÍÍ 36 - Northwest Gbaya bible

TƆRA-BÍÍ 36

¹O gasawi nutua ko o bíí nú-gara ko Galad, bem ko Makir, be-koo Manase, pɛ́r-nam ko Jozɛf, tɛɛ ti Moisɛ in o gasawi zuduk ko o be Israɛl lɛŋ. Wa tɔ̧a̧:

²«GASA WAN baa ha̧ nú h’ɛ́nɛ́ mɛ pi̧ tani kɛ̧ nɛ nù ha̧ o be Israɛl. Nɛ mɔ'ɔ nɛ GASA WAN ha̧a̧ nú h’ɛ́nɛ́ mɛ ha̧ war ko Selofehad ha̧ o boko-bem kɔ̧-a̧.

³Ɓɛɛ kà wa nɛ́ baa wíì tɛ ŋma zuduk Israɛl nɛ̀ bó nɛ́ kɔ-wa na, nù nɛ duk nɛ́ mɔɔ-oi kɔ-wa tɛ ya mgbara nù ko o dáà k’ɛɛ, ɓɛɛ ndaɗa in nù ko zuduk nɛ wa baa wíì‘i sɛnɛ‘i.

⁴Ŋgimbi nɛ pɛ nɛ o be Israɛl ha̧ nɛ mɔ siɗoŋ be tɛɛ hɔ, nù kɔ-wa nɛ ndaɗa in nù ko zuduk nɛ wa baa wíì sɛnɛ‘i tɛ yu mgbara nù ko zuduk k’ɛɛ kpoo nɛ kpoo.»

⁵Nɛ mɔ'ɔ nɛ Moisɛ kifa nú nyɛm nɛ ɗoŋ tɔ̧ɔ̧-wen ko GASA WAN ha̧ o be Israɛl hee mɔ'ɔ ga: «O bezaŋ Jozɛf tɔ̧ɔ̧ kpasawen.

⁶Ɛ̀nɛ̀ zíí wen nɛ GASA WAN tɔ̧ɔ̧ ha̧ o boko-bem ko Selofehad. Wa nyɛma mɛ ba wíì fara lɛŋ nɛ wa kɔ̧a̧, ɓɛɛ mɔ kpɔk, wa tɛ ba kànà wíì tɛ ŋma nú-gara zuduk ko dáà kɔ-wa.

⁷Hegɔ nù ko o be Israɛl beka ye er ŋma zuduk na, kóó o ndé tɛ kasi kànà nɛ nù ko o dáà kɔ‘i.

⁸Boko be Israɛl lɛŋ nɛ tɛ kpa nù nɛ mɔɔ-oi, tɛ ba kànà wíì tɛ ŋma nú-gara zuduk ko dáà kɔ‘i; hegɔ, kóó o ndé mgbara o be Israɛl tɛ kasi mɔɔ-oi ko dáà kɔ‘i.

⁹Nù ko zuduk kpɔk beka ye er ŋma zuduk nɛtɛ na, ɓɛɛ o zuduk ko o be Israɛl kpɔk kpɔk tɛ ɓɔn kana tɛ nù kɔ‘i.»

¹⁰Nɛ mɔ'ɔ nɛ o boko-bem ko Selofehad dee mɔ nyɛm nɛ ɗoŋ ha̧a̧nú nɛ GASA WAN ha̧a̧ ha̧ Moisɛ.

¹¹Mala, Tirsa, Ogla in Milka ká bá nɛ̀ Nɔa, o boko-bem ko Selofehad baa o bem ko o nya dáà kɔ-wa nɛ wíì.

¹²Wa baa nɛ o bíí tɛ pɛ́r-nam ko Manase, bem ko Jozɛf nɛ wíì, ɓɛɛ nù kɔ-wa ɓɔn kànà nú-gara zuduk ko dáà kɔ-wa.

¹³O heembea in o geŋa nɛ GASA WAN ha̧a̧ so ha̧ o be Israɛl nɛ nú Moisɛ sɛn bɔkɔ-nú Mɔab, ká̧ Jurdɛn nyɛm nɛ Jeriko nɛ mɔɔ nɔ‘i.