Read Northwest Gbaya TƆRA-BÍÍ 5 Bible Online

TƆRA-BÍÍ 5 - Northwest Gbaya bible

TƆRA-BÍÍ 5

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ ha̧ o be Israɛl mɛ fo o wi-doko in o wi nɛ a̧a̧ nɛ horso in o wi nɛ foo wɔr gbonɛ kɔ̧ gbagari.

³Kóó nɛ okoo, kóó nɛ wiwii, ɛ̀nɛ̀ fó gbonɛ kɔ̧ gbagari wen ká wa tɛɛ de ndiŋ a bee-gara n'am duk sɛnɛ mgbara o be Israɛl.»

⁴Nɛ mɔ'ɔ nɛ o be Israɛl dee hee mɔ'ɔ nɛ GASA WAN tɔ̧ɔ̧ ha̧ Moisɛ ga, ɓɛɛ wa ndak o wi nɔ‘i yinɛ mgbara wa.

⁵GASA WAN tɔ̧ɔ̧ ha̧ Moisɛ:

⁶«Mɛ̀ tɔ̧́ ha̧ o be Israɛl, kà ŋma wiwii, kóó ŋma okoo nɛ́ dee ɗaŋmɔ in ŋma bíí, a̧ dee nɛ́ ŋgazu in GASA WAN, ɓɛɛ ɗaŋmɔ‘i tɛ tik zu a̧.

⁷A̧ tɛ gbar ɗaŋmɔ n'aa dea, ɓɛɛ a̧ yoɓa mɔ oi-aa, e nɛ ŋma mɔ zu-a.[1]

⁸Kà wi’ɛi nɛ̀ wa ɗaŋa mɔ kɔ̧-a̧‘i nɛ́ fee kaɗi, kà ŋma nam kɔ̧-a̧ bó ha'i mɛ yoɓi mɔ‘i siɗoŋ ha̧ a̧ na, wi tɛ yoɓi mɔ‘i siɗoŋ ha̧ GASA WAN: nɛ́ wen nɛ tɔ̧, wi tɛ yoɓi mɔ‘i ha̧ wi-ɗafi-sɔ̧. Zu-a'i wi’ɛi tɛ ha̧ vala sami wen ɗafa sɔ̧ ha̧ wi-ɗafi-sɔ̧ mɛ de mɔ nɛ usi'e Sɔ̧ ee ɗaŋmɔ ko wi’ɛi ha̧ a̧.

⁹Zu-mɔ nɛ o be Israɛl tɛ ndɛm lɛŋ wen ha̧a̧ ha̧ Sɔ̧ tɛ duk nɛ ko wi-ɗafi-sɔ̧.

¹⁰Mɔ nɛ bíí e nɛtɛ ha̧ GASA WAN tɛ duk nɛ ko wi-ɗafi-sɔ̧; mɔ nɛ bíí ha̧ ha̧ wi-ɗafi-sɔ̧ tɛ duk kànà nɛ kɔ̧-a̧ mbɛt.»

¹¹GASA WAN tɔ̧ɔ̧ ha̧ Moisɛ:

¹²«Mɛ̀ tɔ̧́ mɔ n'am tɛ tɔ̧ ha̧ mɛ ha̧ o be Israɛl. Ŋmafara kóó ko ŋma bíí de mɔ nɛ yuwar-a na, de nɛ ŋgazu,

¹³nɛ mɔ'ɔ nɛ ŋma wiwii ɔɔ in a̧, ɗaŋ nɛ war-tɛ-a, wíì kɔ̧-a̧ iŋ na, ŋma wi-sedaako nɛ zɔka a̧ bo na, ŋma bíí nɛ baa a̧ tɛ mɔ‘i bo na mbɛt;

¹⁴ɓɛɛ kà taamɔ́-gɔya nɛ́ hɔɔ zu wíì ko kóò‘i, ka a̧ ta'e, kóò kɔ̧-a̧ de nɛ dàlà, ɓɛɛ kà kóò‘i a̧ dee dàlà nɛ mbetɛ, kóó kà taamɔ́-gɔya nɛ́ hɔɔ zu wíì‘i, ɓɛɛ nɛ̀ kóò kɔ̧-a̧ de dàlà na,

¹⁵tɛ taamɔ nɔ‘i yiitoo'i, wíì kɔ̧-a̧ tɛ mgbɔ a̧ nɛnɛ ha̧ wi-ɗafi-sɔ̧. A̧ tɛ ba ha̧a̧mɔ wen a̧ nɛnɛ mbɛt. A̧ tɛ ba kilo fuu taar nɛnɛ ha̧ wi-ɗafi-sɔ̧, ɓɛɛ a̧ beka a nɔ̧́ sɛnɛ na in a̧ beka a fuu-nyama sɛnɛ na mbɛt, wen mɛ nɛ ha̧a̧mɔ-dee-gɔya in bee-mɔ.

¹⁶«Wi-ɗafi-sɔ̧ tɛ mgbɔ kóò‘i mɛ nɛɛ yor ti GASA WAN.

¹⁷A̧ tɛ ba sa̧a̧ yì a kɔ̧ be yee, ɓɛɛ a̧ kaia fuunu kɔ̧ tua fara-duk ko Sɔ̧ a sɛnɛ.

¹⁸A̧ tɛ de ha̧ kóò‘i mɛ yor ti GASA WAN. A̧ tɛ ba kalaafi yinɛ zu kóò‘i, ɓɛɛ a̧ baa ha̧a̧mɔ-bee-mɔ‘i, nɛ̀ duk nɛ ha̧a̧mɔ-dee-gɔya, e er kóò‘i, ɓɛɛ a̧ nɛ tɛ-a baa yì-bee-mɔ nɛ ɔ paŋa.

¹⁹Wi-ɗafi-sɔ̧ tɛ tɔ̧ wen ha̧ kóò‘i hee mɔ'ɔ ga: ‹Kà mɛ nɛ dee mɔ nɛ yuwar-a, kà ŋma wiwii nɛ ɔɔ in mɛɛ na, kà mɛ nɛ ɗaŋa war-tɛ-mɛ ɔr nɛ wíì kɔ-mɛ na, ɓɛɛ ká yí-fom’ɛ nɛ̀ ɔ paŋa’ɛ de ŋma ŋgamɔ in mɛɛ na.

²⁰Ɓɛɛ kà mɛ nɛ́ dee mɔ nɛ yuwar-a na, kà mɛ nɛ ɔɔ in ŋma gɔni wiwii, ɗaŋ nɛ war-tɛ-mɛ,

²¹GASA WAN a̧ pi̧ bɔnɛ zu mɛ, a̧ a̧ de ha̧ mɛ mɛ yar ndɔra, zaŋ-mɛ a̧ ndɔr, ɓɛɛ mɛ̀ kífí nɛ mɔɔ-tɔ̧-tua-wen ko o bíí ŋgimbi nɛ wa tɛ be nɛ mɔ.

²²Yí-fom’ɛ tɛ ye zaŋ-mɛ wen ndɔra zaŋ-mɛ, ha̧ mɛ mɛ yar ndɔra.› Ɓɛɛ koo'i tɛ kɔ̧ ɗɔaa: ‹Ii! Mɔ'ɔ dé hegɔ!›

²³«Wi-ɗafi-sɔ̧ tɛ yɔr bee-mɔ‘i zu kalata, ɓɛɛ fɔra si ɗɔɔ paŋ yì.

²⁴A̧ tɛ ha̧ paŋ yì‘i nɛ fom a̧a̧ ɗɔa-a'i ha̧ kóò‘i mɛ nɔ; yí-fom'i tɛ ye tɛ kóò‘i, ɓɛɛ a̧ zɔka bɔnɛ nyimmɔ.

²⁵Wi-ɗafi-sɔ̧ tɛ ba ha̧a̧mɔ-dee-gɔya'i er kóò‘i e ti GASA WAN, ɓɛɛ baa e zu fara-ɗafi-sɔ̧.

²⁶Wi-ɗafi-sɔ̧ tɛ kai ŋma be ha̧a̧mɔ‘i hee mbaŋa-tɛ-mɔ ga dun kɔ̧ er; a̧ tɛ dɔ mɔ‘i zu fara-ɗafi-sɔ̧, ɓɛɛ a̧ ha̧a̧ yì‘i ha̧ kóò‘i mɛ nɔ.

²⁷Kà kóò‘i nɛ́ dee so ŋgazu in wíì, ɗaŋ nɛ war-tɛ, yí-fom'i tɛ ye tɛ-a, ɓɛɛ a̧ zɔka bɔnɛ nyimmɔ. Zaŋ-aa tɛ ndɔr, a̧ tɛ yar ndɔra, ɓɛɛ a̧ kifa nɛ mɔɔ-tɔ̧-tua-wen ko o bíí ŋgimbi nɛ wa tɛ be nɛ mɔ.

²⁸Kà kóò‘i nɛ́ ɗaŋa so war-tɛ na, kà a̧ nɛ duka nɛ sa̧a̧-a̧, ŋma mɔ beka de a̧ na; a̧ tɛ ko bem nɛ de-a.

²⁹«Heembea zu okoo nɛ de mɔ nɛ yuwar-a na, nɛ de ŋgazu in wíì ɗaŋ nɛ war-tɛ nɛ mɔ‘i.

³⁰Kà wiwii nɛ dee gɔya zu kóò kɔ‘i, ta nɛnɛ‘e kóò dee dàlà, a̧ tɛ ba a̧ e ti GASA WAN, ɓɛɛ wi-ɗafi-sɔ̧ dee mɔ lɛŋ nɛ heembea usa zu kóò‘i.

³¹Ŋma mɔ beka hɔ zu wíì na, ɓɛɛ kà kóò‘i nɛ dee ɗaŋmɔ nɛ mbetɛ, ɗaŋmɔ‘i tɛ tik zu a̧.»