Read Northwest Gbaya TƆRA-BÍÍ 6 Bible Online

TƆRA-BÍÍ 6 - Northwest Gbaya bible

TƆRA-BÍÍ 6

¹GASA WAN tɔ̧ɔ̧ ha̧ Moisɛ:

²«Mɛ̀ tɔ̧́ wen’ɛ ha̧ o be Israɛl; kà ŋma wiwii kóó okoo a̧ kɔ̧ɔ̧ mɛ e tɛ ha̧ GASA WAN nɛ yuwar-mɔɔ-nazir,

³a̧ beka nɔ dɔ̧ɔ̧ na, a̧ beka nɔ dɔ̧ɔ̧ nɛ kaia siɗi na mbɛt. A̧ beka nɔ ŋma yì waya-nyak-dɔ̧ɔ̧ na, a̧ beka nyɔŋ tɔr waya-nyak-dɔ̧ɔ̧, kóó kora-a na mbɛt.

⁴Ŋgimbi ha̧a̧nú kɔ̧-a̧, a̧ beka nyɔŋ ŋma mɔ nɛ‘i dee nɛ waya-nyak-dɔ̧ɔ̧ na, kóó nɛ́ gba̧a̧-a̧, kóó nɛ́ saɗa-a.

⁵«Ŋgimbi ee tɛ ha̧ GASA WAN nɛ yuwar-mɔɔ-nazir, wi’ɛi beka kpui zu-a na hegɔ hɔ nɛnɛ wese kaɗa-a ko ŋgimbi'i; a̧ tɛ duk nɛ sa̧a̧ bíí, ɓɛɛ a̧ tɛ e ha̧ mu̧i̧-zu-a mɛ hɔ nɛ dɔka-a.

⁶Ŋgimbi n'aa ha̧a̧ nɛ tɛ-a ha̧ GASA WAN'i, a̧ beka hɔ ká̧ wɔr bíí na,

⁷kóó nɛ́ wɔr dáà kɔ̧-a̧, kóó nɛ́ wɔr nàà kɔ̧-a̧, kóó nɛ́ wɔr nya-a̧, kóó nɛ́ wɔr boko-nya-a̧. Hee mɔ'ɔ nɛ dɔka mu̧i̧-zu-a usi'e a̧ ee tɛ-a ha̧ Sɔ̧ kɔ̧-a̧ ga, a̧ beka de ha̧ simbo mɛ ba a̧ na.

⁸Ŋgimbi ee tɛ kɔ̧-a̧ ha̧ GASA WAN nɛ yuwar-mɔɔ-nazir'i, a̧ tɛ duk nɛ sa̧a̧-a̧ wen GASA WAN.

⁹«Kà ŋma bíí nɛ fee katɛ a̧ yek nɛ a̧, pi̧ nɛ simbo zu a̧, a̧ tɛ kpui zu-a tɛ mɔɔrɔ-ɗoŋ-yiitoo zɛ, ŋgimbi n'aa tɛ ɗafi nɛ war-tɛ-a.

¹⁰Tɛ mɔɔrɔ-ɗoŋ-taar zɛ, a̧ tɛ kai gbaku̧i yiitoo, kóó pola yiitoo tɛnɛ ha̧ wi-ɗafi-sɔ̧ nú Tua-kpa-ŋmaa.

¹¹Wi-ɗafi-sɔ̧ tɛ ba nɔ̧́í̧ kpɔk ɗafi nɛ sɔ̧ wen kpaa ea-ɗaŋmɔ, a̧ tɛ dɔ ɓii-aa nɛ kpoo-sɔ̧, ɓɛɛ a̧ dee do-mɔ nɛ usi ea-ɗaŋmɔ zu wi’ɛi wen n'aa dee ɗaŋmɔ duk nɛnɛ ká̧ wɔr. Nɛ́ ŋgimbi'i a̧ a̧ tɛ e nɛ tɛ-a ha̧ Sɔ̧ woyo.

¹²A̧ tɛ e tɛ-a woyo ha̧ GASA WAN, nyɛm nɛ ɗoŋ kuti ŋgimbi n'aa gɔna so'i; a̧ beka tɔr kuti ŋgimbi nɛ yaka na, wen nɛ yuwar-mɔɔ-nazir kɔ̧-a̧ ɗaŋa so. A̧ tɛ ba be-sami nɛ a̧a̧ nɛ pɛ kpɔk tɛnɛ wen ɗafa-a nɛ mgbara-a in Sɔ̧.

¹³«Heembea zu wi nɛ e tɛ ha̧ GASA WAN nɛ yuwar-mɔɔ-nazir nɛ mɔ'ɔ: ŋgimbi nɛ ee tɛ-a ha̧ GASA WAN tɛ kaɗi, wa tɛ mgbɔ a̧ nɛnɛ si nú Tua-kpa-ŋmaa.

¹⁴A̧ tɛ ba ha̧a̧mɔ kɔ̧-a̧ nɛnɛ ha̧ GASA WAN; nɛ be-sami nɛ a̧a̧ nɛ pɛ kpɔk, nɛ ŋma mɔ ɗaŋ tɛ-a na, wen dɔa-a nɛ kpoo-sɔ̧, zɔŋa sami nɛ a̧a̧ nɛ pɛ kpɔk, nɛ ŋma mɔ ɗaŋ tɛ-a na, wen ɗafa sɔ̧ wen kpaa ea-ɗaŋmɔ, in vala sami nɛ ŋma mɔ ɗaŋ tɛ-a na, wen ɗafa-sɔ̧-gaŋmɔ.

¹⁵A̧ tɛ ba gɛsɛ brɛt nɛ hao bo sɛnɛ na tɛnɛ, ká bá nɛ̀ o brɛt nɛ‘i vata nɛ nɔ̧́ in makala nɛ hao bo sɛnɛ na, nɛ‘i sɔ̧ɔ̧ nɔ̧́ zu a̧, gu nɛ ha̧a̧mɔ nɛ̀ nyɔnɔ in dɔ̧ɔ̧ wen tɛna-a a nù nɛ‘i tɛ ha̧ kànà mbɛt.

¹⁶«Wi-ɗafi-sɔ̧ tɛ kai mɔɔ nɔ‘i lɛŋ a ti GASA WAN, ɓɛɛ a̧ ɗafa sɔ̧ wen kpaa ea-ɗaŋmɔ, dɔ nɛ kpoo-sɔ̧ mbɛt.

¹⁷War ko vala sami, a̧ tɛ ha̧ ha̧ GASA WAN nɛ ɗafa-sɔ̧-gaŋmɔ, in gɛsɛ brɛt nɛ hao bo sɛnɛ na'i. A̧ tɛ ha̧ mɔ nɛ nyɔnɔ, ɓɛɛ a̧ tɛna dɔ̧ɔ̧ a nù hee mɔ'ɔ nɛ‘i tɛɛ de so kànà ga mbɛt.

¹⁸Ɓɛɛ wi nɛ ee tɛ ha̧ GASA WAN nɛ yuwar-mɔɔ-nazir'i tɛ kpui mu̧i̧-zu n'aa ee so ha̧ GASA WAN yinɛ sɛn nú Tua-kpa-ŋmaa. A̧ tɛ kai mu̧i̧-zu-a a yí wee nɛ nyɛk ɗɔɔ ɗafa-sɔ̧-gaŋmɔ.

¹⁹«Wi-ɗafi-sɔ̧ tɛ ba dɔɔ ɓaa sami in ŋma brɛt nɛ hao bo sɛnɛ na sɛn kɔ̧ gɛsɛ in ndaɗa-ndaɗa makala nɛ hao bo sɛnɛ na, ɓɛɛ a̧ kaia mɔɔ nɔ‘i lɛŋ a kɔ̧ er wi nɛ ee tɛ ha̧ GASA WAN ɗoŋ nɛ wi’ɛi kpuia zu kaɗi.

²⁰Wi-ɗafi-sɔ̧ tɛ wɛk o mɔɔ nɔ‘i ha̧ GASA WAN. Mɔ‘i nɛ́ mɔ nɛ ɔ sa̧a̧ nɛ duk nɛ ko wi-ɗafi-sɔ̧: ŋguɗi sami n'aa wɛka in ku-a n'aa baa'i nɛ kɔ̧-a̧ mbɛt. Ɓɛɛ nɛ́ ɗoŋ ŋgimbi'i, á̧ wi nɛ ee tɛ ha̧ GASA WAN nyɛma mɛ nɔ dɔ̧ɔ̧.

²¹«Heembea wen wi nɛ ha̧a̧ nú mɛ e tɛ ha̧ GASA WAN, in o mɔ n'aa tɛ ha̧ tɛ ŋgimbi'i nɛ mɔ‘i; kà a̧ nɛ́ kɔ̧ɔ̧ mɛ ha̧ mbe mɔ, a̧ nyɛma mɛ ha̧, ɓɛɛ a̧ tɛ de kànà mɔ nyɛm nɛ ɗoŋ heembea ee-tɛ ha̧ GASA WAN n'aa yee sɛnɛ.»

²²GASA WAN tɔ̧ɔ̧ ha̧ Moisɛ:

²³«Mɛ tɛ tɔ̧ mɔ n'am tɛ tɔ̧ ha̧ mɛ ha̧ Arɔŋ in o bem kɔ‘i. Yuwar toka de yoŋgo zu o be Israɛl nɛ mɔ'ɔ:

²⁴‹GASA WAN a̧ tok de yoŋgo zu mɛ, ɓɛɛ a̧ a̧ pɛm mɛ;

²⁵GASA WAN a̧ de ha̧ sɔnti-a mɛ tok zu mɛ, ɓɛɛ a̧ a̧ de ko ha̧ mɛ;

²⁶GASA WAN a̧ zɔk mɛ, ɓɛɛ a̧ a̧ ha̧ ga̧a̧mɔ ha̧ mɛ!›

²⁷«Nɛ́ hegɔ a̧ nin-am tɛ duk nɛnɛ mgbara o be Israɛl, ɓɛɛ mi toka de yoŋgo zu wa.»