Read Northwest Gbaya MICHEE 3 Bible Online

MICHEE 3 - Northwest Gbaya bible

MICHEE 3

¹Mi tɔ̧ wen’ɛ h’ɛ́nɛ́, ɛnɛ o gasawi ko Jakob. Ɛnɛ o wi-gɔn-kita ko Israɛl, ɛ̀nɛ̀ zíí wen’ɛ: «Bo nɛ ɛnɛ'ɛ tɛ iŋ deemɔ nɛ yuwar-a na nde?

²Ɛ́nɛ́ sɛ́n nɛ́ demɔ, ɓɛɛ ɛ́nɛ́ kɔ̧ɔ̧ nɛ́ ɗaŋmɔ. Ɛ́nɛ́ zuɗi nɛ́ ndàrá-tɛ o bíí, ɓɛ̀ɛ́ ɛ́nɛ́ a̧i̧a o mur-tɛ-wa yinɛ tɛ gba̧a̧.»

³O wi nɛ nyɔŋ mur-tɛ dukbíí kɔ‘m, nɛ gbɛr ndàrá-tɛ-wa, nɛ gbin gba̧a̧-tɛ-wa, nɛ ɓir wa hee kpoo a kɔ̧ ɓìì ga, hee kpoo nɛ‘i gi kɔ̧ kpánà'ɛ ga,

⁴ŋgimbi nɛ wa be tɛ̀ɛ́ hiɗi mɔ sitɛ GASA WAN, a̧ beka kifi nú ha̧ wa na; a̧ tɛ hu̧si sɔnti-a nɛ wa tɛ ŋgimbi'i, wen o ɗaŋmɔ nɛ wa dee so.

⁵Wen nɛ GASA WAN tɔ̧ zu o wi-tɔ̧-wen oi nú Sɔ̧, nɛ ɔr dukbíí kɔ̧-a̧ nɛ mɔ'ɔ: «Kà o bíí kɔ‘m ha̧ nyɔŋmɔ h’ɛ́nɛ́ kaɗi, ɓɛɛ ɛnɛ tɔ̧ɔ̧ wen ga̧a̧mɔ zu wa, ɓɛɛ wi nɛ ha̧ nyɔŋmɔ h’ɛ́nɛ́ na, ɛnɛ tɔ̧a̧‘e, ŋgamɔ a̧ tɛ‘i.

⁶Wen mɔ‘i, ɛnɛ beka ɔ zu na, zɛ dee wen'nɛ́ kaɗi, ɛnɛ beka zɔk mɔ na, gasa tum tɛ ba nu, wese ko wi-tɔ̧-wen oi nú Sɔ̧ tɛ ye, ɓɛɛ tum baa nù wen wa.»

⁷Foe tɛ ba o wi-zɔk-mɔ, búù tɛ ba o wan-gbana; wa tɛ kpe yí-wa[1] wen foe, wen Sɔ̧ kifi nú ha̧ wa ɓɔna.

⁸Ɓɛɛ war kɔ‘m, mi a̧a̧ nɛ ŋgai nyɛmna wen ɔmi ko GASA WAN a̧a̧ tɛ‘m; mi kpaa ŋgai in kɛ̧ɛ̧-mgbara-mɔ ká bá nɛ̀ nɔɔ-ŋgiɗi wen usa ŋgazu ko Jakob ha̧ a̧ in ɗaŋmɔ ko Israɛl ha̧ a̧ mbɛt.

⁹Ɛ̀nɛ̀ zíí mɔ'ɔ, ɛnɛ o gasawi ko Jakob, ɛnɛ o wan ko Israɛl, fara mɛ de mɔ nɛ yuwar-a sɛnɛ, ɓɛɛ ɛnɛ dee nɛ gɔɔmɔ oi-aa.

¹⁰Ɛnɛ mboo Siɔŋ nɛ̀ tɔk tɛ bíí, in Jerusalɛm nɛ̀ ŋgamɔ.

¹¹O be-wan kɔ-wa e zu kita wen ha̧a̧mɔ, o wi-ɗafi-sɔ̧ ak nɛ mbɔi sɛka usa mɔ; o wi-tɔ̧-wen oi nú Sɔ̧ mbɛt ak nɛ mbɔi sɛka wee ɗoŋ mɔ nɛ tɛ hɔ. Wa duk tɛ-wa nɛ̀ GASA WAN tɔ̧ nɛnɛ‘e: «Ŋma ŋgamɔ beka kpa kɔ‘i yɛ na.»

¹²Siɔŋ tɛ duk hegɔ puturu, hee ŋma fɔ a'i waa ga wen zu'nɛ́. Jerusalɛm tɛ kifi bɛɛ-oi, ɓɛɛ zu kaya nɛ Tua ko GASA WAN duk sɛnɛ tɛ kifi mbufu.[2]