Read Northwest Gbaya MICHEE 4 Bible Online

MICHEE 4 - Northwest Gbaya bible

MICHEE 4

¹«Ŋma wese tɛ hɔ nɛ GASA WAN tɛ de Tua kɔ‘i sɛn mgbák zu kaya nɛ tɛ kusi gan o kaya lɛŋ. O dukbíí lɛŋ tɛ mɔi̧ ŋmaa si hi̧i̧.

²O gii tugun bíí tɛ nɛ hi̧i̧ ɓɛɛ wa tɛ tɔ̧: ‹Ɛ̀nɛ̀ tɛ́ ɛ̀ɛ̀ dáŋ si zu kaya ko GASA WAN, ɛ̀ɛ̀ dáŋ si kɔ̧ Tua ko Sɔ̧ ko Jakob. A̧ tɛ usi o yuwar kɔ̧-a̧ h’ɛ́ɛ́, ɓɛɛ ɛɛ nɛɛ nɔ tɛ o yuwar kɔ̧-a̧.› Nɛ mbetɛ, usamɔ tɛ́ nɛ̀ Siɔŋ, ɓɛɛ wen ko GASA WAN tɛ́ tɛ̀ nɛ̀ Jerusalɛm.

³A̧ tɛ pɛm o dukbíí nɛ dɔka-a, a̧ tɛ duk nɛ wi-ye-mgbara o ŋga tugun bíí. Wa tɛ kai o gba-paa kɔ-wa gusi dui nɛ wara, ɓɛɛ wa duia o sɛɛ kɔ-wa nɛ ada. O tugun bíí beka dak gba-paa sitɛ ŋmaa ɓɔna, wi beka yambi biro ɓɔna.

⁴Kóó o ndé tɛ duk ti ɗɔɔ nyak-dɔ̧ɔ̧ in te-mbɔra kɔ‘i, ŋma wi-pi̧-kíì tɛ ŋmaa bo na;» wen GASA WAN nɛ a̧a̧ nɛ ŋgayamɔ lɛŋ ha̧a̧ nú hegɔ.

⁵Kà o dukbíí lɛŋ de tom ha̧ sɔ̧ kɔ‘i, k’ɛɛ, ɛɛ de nɛ tom ha̧ GASA WAN Sɔ̧ k’ɛɛ kpoo nɛ kpoo.

⁶GASA WAN'e: «Ŋma wese tɛ hɔ n'am tɛ mɔi̧ o wi-nɛ̀-kum, o wi nɛ pɛsa so in o wi n'am usa so bɔnɛ ha̧ wa mbɛt pii ɗoŋ.

⁷Mi tɛ mɔi̧ oi o wi-nɛ̀-kum e kpɔk fara, ɓɛɛ mi dee ha̧ oi o wan nɛ pɛsa mɛ kifi ŋga tugun bíí, ɓɛɛ GASA WAN tɛ ɔ wan zu wa, zu kaya Siɔŋ ku̧u̧naŋ-a kinii yak nɛnɛ ɓɔnsɛnɛ.

⁸Ɓɛɛ kɔ-mɛ Jerusalɛm, fara nɛ GASA WAN pɛma so o giiwi kɔ‘i sɛnɛ hee Wi-dai-mɔ ga’ɛ, mɛ tɛ duk nɛ gasa ye, mɔɔ-wan kɔ-mɛ tɛ duk hee nɛti ga.»

⁹Wen ge sa mɛ hiɗi mɔ kinii ge? Ŋma wan bo tɛ kɔ-mɛ na nde? Wi-tɔ̧-mbɔrɔ kɔ-mɛ yɔɔ lɛŋ, sa nyimmɔ ba tɛ-mɛ hee ŋma nàá-zaŋ a̧ kɔ̧ɔ̧ mɛ ko bem ga’ɛ nde?

¹⁰Be-zɔŋa Siɔŋ, mɛ̀ bí nɛ̀ nyimmɔ ɓɛɛ mɛ̀ híɗí mɔ hee ŋma okoo nɛ ko’ɛ ga, wen kinii, mɛ tɛ gbo yak saaye mɛ nɛ̀ɛ́ ɔ nɛ zaŋbɛɛ. Mɛ tɛ nɛ hɔ Babilɔŋ. Mɛ̀ nɛ́ hì̧ì̧ á̧ GASA WAN tɛ ɓar nɛ mɛ yinɛ er o wisɛn kɔ-mɛ.

¹¹Kinii Jerusalɛm, o dɔka tugun bíí mɔi̧a ŋmaa wen mɛ; wen nɛ wa tɔ̧ nɛ mɔ'ɔ: «Ɛ̀ɛ̀ ɗáŋ a̧ h’ɛ́ɛ́ mɛ kpa desee.»

¹²Wen wa iŋ ee-zu-mɔ ko GASA WAN na, in wa iŋ mɔ n'aa ta mɛ de na. A̧ mɔi̧a wa hee gba̧a̧ alkamaari fara-gusa-a ga.

¹³GASA WAN'e: «Ɛ̀nɛ̀ kúr, ɛ̀nɛ̀ ŋmá gba̧a̧-nyɔnɔ, ɛ́nɛ́ o bíí Jerusalɛm! Mi tɛ kifi o zak'nɛ́ nɛ boi; mi tɛ kifi sɔ̧ɔ̧-naŋ‘nɛ nɛ ndɛrɛ, ɓɛɛ ɛnɛ tɛ mbɔli o bíí nɛ dɔka-a; ɛnɛ tɛ a o mɔɔ-oi-wa ɗɔɔ fom ha̧ GASA WAN in mbɔi kɔ-wa ha̧ Wan nɛ ɔ wan zu nù'ɛ lɛŋ.»

¹⁴Ɓɛɛ kinii, o bíí Jerusalɛm, ɛ̀nɛ̀ á da̧i̧ tɛ‘nɛ́, zim nɛ mɔ. O wi-biro a̧ mɔi̧ ŋmaa, wen wa kɛra'nɛ́ kaɗi. Wa tɛ ba ɓira-te gusi nɛ ká̧ yí o gasawi Israɛl.