Read Northwest Gbaya MICHEE 5 Bible Online

MICHEE 5 - Northwest Gbaya bible

MICHEE 5

¹«Nɛ̀ kɔ-mɛ Bɛtlɛhɛm Efrata, mɛ́ nɛ́ geɗek ye tɛ nú-gara ko Juda; ɓɛɛ nɛ́ mɛ́'ɛ tɛ ko wi nɛ tɛ ɔ wan zu Israɛl. Tugun wi’ɛi so ɓeemɛ nɛti tɛ kuti ŋgimbi mɛ.»

²Nɛ́ hegɔ sa Sɔ̧ e wa duk hɔ ŋgimbi nɛ okoo nɛ tɛ ko'i koa, ɓɛɛ oi o bíí nɛ tɛ ɓɔn mgbara o nya-wa sii ɗoŋ kpa o be Israɛl.

³Wi’ɛi[3] tɛ yor ŋgɔn dai nɛ mɔ-dai kɔ‘i nɛ ŋgai ko GASA WAN, nɛ̀ nin GASA WAN Sɔ̧ kɔ̧-a̧ nɛ ɔ gasa. O dukbíí kɔ̧-a̧ tɛ kpa fara-duk, ɓɛɛ nin-a tɛ hu̧r nɛ zu-zan gɔm ndaa-zan mɛ.

⁴A̧ nɛ tɛ-a tɛ duk nɛ ga̧a̧mɔ. Kà Asirii ye nù k’ɛɛ mɛ i̧s'a, ɛɛ tɛ fo wi-dai-mɔ mɔɔrɔ-ɗoŋ-yiitoo, o be-wan mɔɔrɔ-ɗoŋ-taar a zu a̧.

⁵Kà o bíí Asirii ba nù k’ɛɛ, kà naŋ-wa i̧si̧ nù k’ɛɛ, wa tɛ bi a̧ nɛ gba-paa, wa tɛ bi Nɛmrod nɛ̀ gba-paa.[4] Wa tɛ gbo yɛ er o be Asirii ŋgimbi nɛ o be Asirii nɔ‘i tɛ ku nɛ zu gbisi k’ɛɛ, mɛ ba nù k’ɛɛ.

⁶Ɓɛɛ oi bíí ko Jakob tɛ duk mgbara o giiwi hee mbɛŋ nɛ tɛ nɛ tɛ GASA WAN, koo hee yì-kórò tɛ zɔ̧ nɛ e kɔ‘i ta nɛ bíí, kà bo nɛ pɛma mɔ er bíí na ga.

⁷Ɓɛɛ oi bíí ko Jakob tɛ duk mgbara o giiwi hee dila mgbara o saɗi kɔ̧ kombo, koo hee be dila mgbara o sami ga. Kà a̧ yak, a̧ i̧sa wa, a̧ a̧ka̧ wa, ɓɛɛ ŋma bíí nyɛm mɛ ɓar wa er-a na.

⁸«Israɛl, mɛ̀ bá er-mɛ nɛ ŋgɔn zu o wi-sɛn-mɛ, mɛ̀ kúm o wi-sɛn-mɛ yinɛ lɛŋ.»

⁹GASA WAN'e: «Ŋma wese tɛ hɔ, n'am tɛ kai o nyaŋa yinɛ er-mɛ, o keekee kɔ-mɛ tɛ yambali.

¹⁰Mi tɛ ɗaŋ o ye nù kɔ-mɛ yinɛ lɛŋ, ɓɛɛ mi gbina o garo kɔ-mɛ yinɛ.

¹¹Mi tɛ ndak o wi-zɔk-mɔ tɛ kɔ-mɛ yaknɛ, o wi-de-mɔɔ-kifi beka bo ɓɔna.

¹²Mi tɛ gbin o sɛka-mɔ in géé-sɔ̧ k’ɛ́nɛ́ lɛŋ a nù, ɓɛɛ mɛ tɛ kaɗi gasa o mɔ nɛ mɛ dee nɛ er-mɛ.

¹³Mi tɛ dak o te nɛ‘i gasi gasi tɛ kɔ-mɛ yinɛ, ɓɛɛ mi ɗaŋa o ye kɔ-mɛ.

¹⁴Mi tɛ kifi er nɛ nyimsea in tu̧u̧-see ha̧ o tugun bíí nɛ mbo zu na.»