Read Northwest Gbaya MICHEE 6 Bible Online

MICHEE 6 - Northwest Gbaya bible

MICHEE 6

¹Ɛ̀nɛ̀ zíí wen nɛ GASA WAN tɔ̧: a̧‘e a̧‘m nɛ́ɛ̀ ɓa kita nɛ hee-ger oi nú-wi ti o kaya in ti o zu-tɔ̧́.

²O kaya, ɛ̀nɛ̀ zíí war kita ko GASA WAN! O mbiŋ-nù, ɛ̀nɛ̀ zíí mbɛt, ɓáá-wen mgbara GASA WAN in dukbíí kɔ‘i nɛ mɔ'ɔ. A̧ ɓa nɛ kita in Israɛl.

³«Dukbíí kɔ‘m, nɛ́ ge a̧‘m dee in'nɛ̀ɛ́ ge? Nɛ́ ge a̧‘m dee s’ɛnɛ mbɔi ge? Ɛ̀nɛ̀ kífí nú ha̧‘m.

⁴Ɛnɛ mbɔia tɛ mgbɔɔ‘nɛ́ n'am mgbɔɔ daŋnɛ nɛ Egiptɛ? Tɛ gboo'nɛ́ n'am gboo tɛ bara? Tɛ toma Moisɛ, Arɔŋ in Mariama n'am toma ha̧ wa mɛ duk ti h’ɛ́nɛ́'ɛ nde?

⁵Dukbíí kɔ‘m, tɛ‘nɛ́ a̧ mbaŋ ɗoŋ mɔ nɛ Balak wannu Mɔab kɔ̧ɔ̧ so mɛ de, in kifa-nú nɛ Balam bem ko Beɔr kifa ha̧ a̧. Tɛ‘nɛ́ a̧ mbaŋ ɗoŋ ɓira-a nɛ Sitim si Gilgal, ɓɛɛ ɛ́nɛ́ iŋa gbina biro ko GASA WAN.»

⁶Nɛ́ ge a'm tɛ de ha̧ GASA WAN, ŋgimbi n'am tɛ gu nù ti Sɔ̧ wan nɛ duk ŋgɔn mɛ‘i ge? A̧‘m ba nɛ be ndai nɛ a̧a̧ nɛ pɛ kpɔk, a̧‘m dɔ, ɗafi nɛ sɔ̧ ha̧ a̧ nde?

⁷GASA WAN tɛ kɔ̧ mɛ kpɛk vala sami booro nde? Kóó a̧‘m ɗafi nɛ sɔ̧ nɛ nɔ̧́ hee yì ga nde? A̧‘m ba nɛ kaya-bem kɔ‘m há̧ ha̧ a̧, dafi nɛ sɔ̧ oi ɗaŋmɔ kɔ‘m, kóó a̧‘m ha̧ nɛ bem kɔ‘m ha̧ a̧ oi ɗaŋmɔ kɔ‘m nde?

⁸A̧ dee ha̧‘m, bíí, mɛ iŋ demɔ; mɔ nɛ GASA WAN ak er-mɛ, bíí, nɛ́ dee tom nɛ yuwar-a ɓɛɛ; in ha̧ mɛ mɛ kɔ̧ ŋma-mɛ nɛ see-mɛ lɛŋ, in ha̧ mɛ mɛ nɛ nɔ nɛ mɔka-see ti Sɔ̧ kɔ-mɛ.

⁹GASA WAN sa nɛ sara si saaye. A̧ tɛ kpasi o bíí nɛ yu kíí nin-a. «Zuduk be Juda in giiwi nɛ mɔi̧ saaye, ɛ̀nɛ̀ zìì.

¹⁰Ɛnɛ o bíí-de-ɗaŋmɔ, see-am tɛ ga̧ zu mɔɔ-we-mɔ nɛ nyɛm sɛnɛ na, ɓɛɛ nɛ fom baa nde?

¹¹Mi beka tɔ̧‘e, o wi nɛ we mɔ tan na, kóó o wi nɛ de kilo de na, nɛ́ o wi-de-mɔ nɛ yuwar-a na.

¹²O wanmbɔi kifa o wi-de-ŋgamɔ, ɓɛɛ o wi saaye’ɛ kifi o wi-ndela. Mi nyɛm mɛ nyɔŋ nin zu ɗaŋmɔ hegɔ na; mi beka kpɛk mɔɔ-fom hegɔ‘i na.

¹³Hegɔ mi gusa mɛ, ɓɛɛ mɛ ɔ zɛɛ, mi ɗaŋa mɛ wen zu ɗaŋmɔ kɔ-mɛ.

¹⁴Mɛ tɛ nyɔŋ mɔ, ɓɛɛ zaŋ-mɛ beka sur na; kaɓa tɛ ba fara tɛ kɔ-mɛ. Mɛ tɛ kpa mɔ, ɓɛɛ mɛ beka e ŋgɔn na; kà mɛ e ŋma mɔ, mi tɛ ba mɔ‘i yinɛ er-mɛ nɛ gba-paa.

¹⁵Mɛ tɛ gun nyɔnɔ, ɓɛɛ mɛ beka mɔi̧ na; mɛ tɛ ɓar yí-nɔ̧́, ɓɛɛ mɛ́ beka sɔ̧ nɔ̧́‘i na. Mɛ tɛ vati nyɔ̧ɔ̧ dɔ̧ɔ̧, ɓɛɛ mɛ beka nɔ dɔ̧ɔ̧‘i na.

¹⁶Mɛ́ kásí kɔ-mɛ nɛ heembea ko Ɔmri in o mɔ nɛ o bíí ko Akab dee lɛŋ mɛ de nɛ mɔ nyɛm nɛ ɗoŋ usamɔ kɔ-wa, ɓɛɛ mi tɛ de mɔɔ-kíì pi̧ zu mɛ. Wa tɛ zɛkɛɗi o bíí kɔ-mɛ, ɛnɛ tɛ tui búù ko dukbíí kɔ‘m.»