Read Northwest Gbaya MICHEE 7 Bible Online

MICHEE 7 - Northwest Gbaya bible

MICHEE 7

¹Oee bɔnɛ kɔ‘m wa! Mi duk hee ŋma wi-mɔi̧-nyɔnɔ mɛ bɛɛ ga, kóó hee ŋma wi-ɓi-sikila nyak-dɔ̧ɔ̧ nɛ̀ nɛ́ kpɛɛfɔ sɛn oi ɓíí waya-a yinɛ kaɗi’ɛ ga; wi’ɛi kpa ŋma waya-nyak-dɔ̧ɔ̧, kóó ŋma waya-te-nɔ̧́ nɛ wɔ-a gbɛɛ so a̧ mɛ nyɔŋ‘i ɓɔna.

²O wi-mbo-zu bo tɛ ye ɓɔna, ŋma wi nɛ de mɔ nɛ yuwar-a kóó kpɔk, bo na; wa hu̧sa̧ lɛŋ mɛ gbɛ zu, kóó o ndé hu̧si pɛm nɛ nya-wi.

³Er-wa de kana kɔ‘i nɛ ɗaŋmɔ, be-wan ak nɛ kpaamɔ sɛka dee demɔ; o wi-gɔn-kita gɔn kita wen kpaamɔ. Gasawi tɔ̧ wen, wen kpaa mɔ n'aa kɔ̧a̧.

⁴De-wi mgbara wa lɛŋ hɔɔ ŋmaa in tɛn-dara; wi-de-mɔ nɛ yuwar-a mgbara wa mbɛt ɗaŋa gan mgboi-gata; ɛnɛ tɛɛ tɛ ŋgimbi nɛ o wi-pɛm-mɔ k’ɛ́nɛ́ tɔ̧ɔ̧ nɛnɛ‘i; kinii búù baa wa.

⁵K’ɛ́nɛ́ e ta nɛ ŋma nam k’ɛ́nɛ́ na, k’ɛ́nɛ́ e ta nɛ sɛm k’ɛ́nɛ́ na. Mɛ̀ kásí zu-mɛ tɛ mɔ nɛ gbo nɛ̀ nú-mɛ sitɛ okoo nɛ mɛ ɔ in a̧ kpɔk gɔn gado,

⁶wen bem mɛ be-wiwii-a e nɛ dáà kɔ‘i tɛ bɔkɔ, be-okoo kur nɛ zu nàà kɔ‘i; be-for kur kur zu for mɛ kóò. Kóó o ndé a̧a̧ nɛ wisɛn kɔ̧ tua kɔ‘i.

⁷Kɔ‘m, mi zɔk nɛ mɔ sitɛ GASA WAN; mi e ta nɛ Sɔ̧, wi-kpas'am; Sɔ̧ kɔ‘m tɛ zii aia-nú kɔ‘m.

⁸Wi-sɛn-am, ká mɛ́ mam am wen ŋgamɔ nɛ kpaa'm na; kà‘m nɛ́ tika, mi tɛ kur, kà‘m duk ti tum, GASA WAN nɛ́ sa̧a̧mɔ kɔ‘m.

⁹Mi tɛ tui nyimsea ko GASA WAN, wen mi dee ɗaŋmɔ in a̧ hɔ fara n'aa tɛ gɔn kita zu mɔ n'am dea, ha̧‘m mɛ duk tɛ deemɔ nɛ tana-a. A̧ tɛ de ha̧‘m mɛ gbo sitɛ sa̧a̧mɔ, ɓɛɛ a̧ duna'm nɛ o deemɔ kɔ̧-a̧ nɛ ɔ dee.

¹⁰Kà wisɛn kɔ‘m zɔk mɔ‘i, ɓɛɛ foe tɛ ba a̧, wi’ɛi nɛ tɔ̧ɔ̧ so'e, «GASA WAN Sɔ̧ kɔ-mɛ‘i a̧a̧ bɔɔ déè ndé,» wo'i. Yí‘m tɛ zɔk a̧, wi tɛ i̧si̧ a̧ nɛ naŋ hee ɓɔtɛ yuwar ga.

¹¹Wese nɛ‘i tɛ mbo garo kɔ-mɛ, nù kɔ-mɛ tɛ gasi siti.

¹²Wese'i, o bíí Asirii in o bíí Egiptɛ, o bíí Tir in o bíí kur yì, gu nɛ o bíí ká̧ gba-tɔp hɔ nɛnɛ zu o kusa kaya tɛ tɛ pii tɛ-mɛ.

¹³Nù tɛ kifi nɛ ŋga-gbárà wen ɗaŋ deemɔ ko o bíí tɛ nù‘i. Mɔ‘i tɛ duk nɛ mɔɔ-oi-naŋanɔ kɔ-wa.

¹⁴Ɛ̀nɛ̀ dáí dukbíí k’ɛ́nɛ́; wa duk nɛ mɔ-dai k’ɛ́nɛ́, GASA WAN; wa ɔ nɛ poo mɔ in nɛ kpɛɛfɔ nɛnɛ. GASA WAN nyɛma mɛ dai wi hee mɔ'ɔ n'aa dee so ɓeemɛ fara de mbɔɗi sɛn Basaŋ in sɛn nú Galad ga.

¹⁵Ɛ̀nɛ̀ dé h’ɛ́ɛ́ mɛ zɔk o gasamɔ hee mɔ'ɔ n’ɛnɛ dee so wese n’ɛnɛ gboo so nɛ yɛ sɛn Egiptɛ ga.

¹⁶O tugun bíí tɛ zɔk o gasamɔ nɔ‘i, ɓɛɛ foe baa wa. Nú-wa in zer-wa tɛ kpe nɛ oi ŋgai kɔ-wa'i mbɛt.

¹⁷Wa tɛ ndal fuunu hee gɔ́k ga, kóó hee o saɗi-gbur-zaŋ nɛ̀ nù ga; wa tɛ gbo nɛ naka-tɛ nɛ kɔ̧ ŋgárá kɔ-wa sitɛ GASA WAN Sɔ̧ k’ɛɛ; kíì in bele tɛ zar wa ti'nɛ́.

¹⁸Nɛ́ ge sɔ̧ ge a̧ ba ɗaŋmɔ yinɛ, nɛ̀ e ɗaŋmɔ ha̧ bíí, nɛ̀ nyimsea kɔ̧-a̧ duk zu bíí ɗoŋ-aa nyɛi̧ na, nɛ̀ de kɔ‘i nɛ́ ko ha̧ bíí hee ɛ́nɛ́ ga o? Wen see zu kɔ̧ɔ̧mɔ k’ɛ́nɛ́ sitɛ yɛ, ɛ́nɛ́ ŋgai see'nɛ́ tɛ nyimsea k’ɛ́nɛ́ na.

¹⁹Ɛ̀nɛ̀ dé ko h’ɛ́ɛ́ war kpɔk woyo; ɛ̀nɛ̀ í̧sí̧ ɗaŋmɔ k’ɛɛ nɛ naŋ‘nɛ́, ɓɛɛ ɛ̀nɛ̀ káí wa a ɗɔɔ gba-tɔp.

²⁰Ɛ̀nɛ̀ úsí yora-ɗoŋ-wen k’ɛ́nɛ́ ha̧ Jakob, ɛ̀nɛ̀ úsí gasa deako k’ɛ́nɛ́ ha̧ Abraham hee mɔ'ɔ n’ɛnɛ kana so nɛ mɔ ha̧ o dáà k’ɛɛ ɓeemɛ ga.