Read Northwest Gbaya NAHUM 2 Bible Online

NAHUM 2 - Northwest Gbaya bible

NAHUM 2

¹Ɛ̀nɛ̀ zɔ́k betom nɛ ma yi nɛ zu kaya mɛ, tɔ̧ nɛ wen ga̧a̧mɔ ha̧ o bíí tɛnɛ‘i! O bíí Juda, ɛ̀nɛ̀ dé gbaŋa k’ɛ́nɛ́ so'i, ɛ̀nɛ̀ dé mɔ n’ɛnɛ ha̧a̧ so nú wen-aa, wen wi-ɗaŋ beka hɔ tɛ‘nɛ́ ɓɔna, a̧ tika kaɗi!

²GASA WAN tɛ ɗafi o bezaŋ Israɛl in nyak-dɔ̧ɔ̧ nɛ o wi-ɗaŋ-mɔ ɗaŋa so lɔkɔti lɔkɔti'i ha̧ mɛ ɓɔ woyo.

³Ninivɛ, ŋma wi-ɗaŋ-mɔ a̧ tɛ pii tɛ‘nɛ́‘i; ɛ̀nɛ̀ á o wi-pɛm-mɔ nɛ zu garo, ɛ̀nɛ̀ kpé o yuwar, ɛ̀nɛ̀ hɛ́r tɛ‘nɛ́, ɓɛɛ ɛ̀nɛ̀ mɔ́i̧ o wi-biro k’ɛ́nɛ́ lɛŋ.

⁴Dap ŋgéé ko o ŋgaŋa-wi nɔ‘i nɛ gbɛ̧-a̧ lɛŋ; laa-biro kɔ-wa ɔ zóŋ-zóŋ, o boi keekee kɔ-wa zar zar bar-bar ŋgimbi-tik-biro, ɓɛɛ o sɛɛ kɔ-wa nak nak pit-pit.

⁵O keekee gɛk nɛ zaŋbɛɛ tɛnɛ hakaka, gɔm nɛnɛ a bee-gara. Ka'i zɔk wa, ɓɛɛ ɛnɛ‘e nɛ leɓe-wee; wa kpaŋii nɛ mgbara mɔ hee pi̧i̧-kórò ga.

⁶Wannu Asirii saa o yaa-ŋgo-biro kɔ‘i, ɓɛɛ tɛ-wa nak tɛ naŋanɔ kɔ-wa. O wi-gbin-biro kpánà nɔ si ká̧ garo, ɓɛɛ wa ɗafi mɔ kpe nɛ zu-wa.

⁷O nu garo mɛ si ká̧ nana-yì gbina a nu, ɓɛɛ bele zar o bíí kɔ̧ kira ko wannu.

⁸O wi-biro baa ɓóó-sɔ̧ kɔ-wa yaknɛ, gu nɛ o ko-ɗafi-sɔ̧́-a̧; o kóò nɔ‘i hi̧i̧ nɛ kɔ̧a̧, ku̧i̧ nɛ mɔ hee gbaku̧i ga, mbɛr nɛ yí-see.

⁹Ninivɛ hɔɔ so ŋmaa in ŋma gba-zu, ɓɛɛ kinii yi gbina gbazu'i yak. Wi sa wa mɛ yor, ɓɛɛ wa yor na! Ŋma bíí kifi tɛ pii ɗoŋ na.

¹⁰Ɛ̀nɛ̀ tútúrí bu-mbɔi in o lɔr; dɔka mbɔi saaye’ɛ nɛ ari, bo nɛ mɔɔ kaɗi kaɗi na!

¹¹Ninivɛ yaia kasa-kasa kifi geemɔ! Ɗɛɗɛ bíí gɔn gɔn, ɓɛɛ tɛ-wa nak nak tututu! Kíì hɛra zaŋ-wa, ɓɛɛ yí-wa fɛŋ kpalili.

¹²Di̧i̧-dila nɛ o be dila nyɔŋ so mɔ sɛnɛ a̧a̧ bɔɔ dee? Ŋgimbi nɛ bao-dila yar so yaknɛ, nana-a duk kɔ‘i oi-aa in o be-a, ŋma mɔ pi̧ kíì tɛ-wa na.

¹³Bao-dila duka so gbɛ nɛ saɗi, ɓir nɛnɛ ha̧ o nana-a in o be-a. A̧ kaia so o kpoo-saɗi dun di̧i̧ kɔ̧-a̧.

¹⁴«Ɓɛɛ kinii, mi hɔɔ kaɗi! Mɛ̀ bá zu-mɛ! Mɛ nɛ mi GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. Mi tɛ dɔ o keekee-biro kɔ-mɛ a nu gbuɗuk; gba-paa tɛ kum o bem kɔ-mɛ lɛŋ. Ndaa zuzu kɔ-mɛ gɔna; bíí beka zii ger o betom kɔ-mɛ ɓɔna.»