Read Northwest Gbaya HABAKUK 2 Bible Online

HABAKUK 2 - Northwest Gbaya bible

HABAKUK 2

¹Mi tɛ yor nɛ nɔa-a fara-pɛm-mɔ kɔ‘m; mi tɛ pɛm mɔ zu kusa ŋgárá, mɛ zii mɔ nɛ Sɔ̧ tɛ tɔ̧, ha̧‘m mɛ zii kifa-nú kɔ̧-a̧ ha̧‘m tɛ aia-nú kɔ‘m.

²GASA WAN kifa nú ha̧‘m, ɓɛɛ tɔ̧: «Mɛ̀ yɔ́r hɔɔ-zu’ɛ; mɛ̀ yɔ́r gba̧a̧-wen-aa zu sɛka-ta, wen ha̧ bíí mɛ tɔr nɛ de-a.

³Hɔɔ-zu n'am hɔ ha̧ mɛ'ɛ, ŋgimbi-a tɛ hɔ na. Mɔ‘i tɛ de nɛ ɗoŋ; mɔ‘i n'am ha̧ nú‘m sɛnɛ‘i beka nyaŋ na. Kà be zɛ-a nɛ́ dɔka, mɛ̀ zɛ́m kana mɔ. Hɔɔ-zu'i tɛ hɔ kana gba̧a̧ nɛ mbetɛ!

⁴Mɛ yɔr mɔ'ɔ: Ɗoŋ fio ko o wi-de-ɗaŋmɔ nyɛi̧ na;[4] ɓɛɛ wi-de-mɔ nɛ yuwar-a tɛ kpasi wen zu kɔ̧ɔ̧ɗɔɔwen.

⁵«Kpaamɔ nɛ́ mɔɔ de ha̧ bíí mɛ tik! Wi-kpa-mɔ nɛ wi-ŋmaŋ-tɛ, a̧ duk oi-aa na. Tom kɔ̧-a̧ nɛ kia-a mɛ gur bíí hee kɔ̧-fio ga; a̧ hɔɔ ŋmaa in fio nɛ kaɗi gbɛɛ bíí na ga; a̧ tik biro kai nɛ tugun bíí nɛtɛ nɛtɛ zu nù ha̧ wa mɛ ya ɗɔɔ ŋgai kɔ̧-a̧.

⁶Ɓɛɛ kà o wi nɔ‘i lɛŋ nɛ́ mɔi̧a ŋmaa kpa, wa beka da̧ a̧ zɛkɛɗi nɛ a̧ na nde?» «Wa tɛ tɔ̧: ‹Fom a̧ ba a̧ wen n'aa duk kɔ̧-a̧ kai nɛ mɔ ko ŋma-a! Nɛ́ zɔm nyamandoi a̧ a̧ kai a zu a, ɓɛɛ mɔ‘i n'aa de'i tɛ kaɗi mɛ gese ge?›

⁷O wan-nyamandoi beka kur in a̧ na nde? Wa beka kur mɛ nas'aa na nde? Wa tɛ ba a̧.

⁸O oi bíí tɛ ɓar mɔ er-a, wen n'aa ɓara so mɔ er o tugun bíí nɛ dɔka-a. Wa tɛ de hegɔ wen zu gbaia tɔk-tɛ bíí n'aa gbaia, in wen zu ŋgamɔ n'aa dea in nù, in o ye, ba nɛ o bíí ye nɔ‘i.

⁹«Fom a̧ ba a̧ wen n'aa zu̧ mɔ ha̧ kpaamɔ kɔ̧ tua kɔ̧-a̧ mɛ dɔk, wen ka a̧ tɛ zɔk bɔnɛ.

¹⁰Mɔ‘i n'aa de'i, nɛ́ búù a̧ a̧ pi̧ zu o bíí kɔ̧ tua kɔ̧-a̧; gbɛɛ bíí n'aa gbɛ, nɛ́ fio tɛ-a a̧ a̧ kii.

¹¹Kóó nɛ o ta-ŋgeŋ-tua tɛ hiɗi mɔ ba nɛ wen zu a̧, ɓɛɛ kpaakpee-zu-tua kɔ̧ɔ̧ ɗɔɔ nú-wa.

¹²«Fom a̧ ba a̧ wen n'aa de ye tɛ gbaia tɔk-tɛ bíí a nù.

¹³Taamɔ ko GASA WAN nɛ a̧a̧ nɛ ŋgayamɔ lɛŋ nɛ mɔ'ɔ: Tom nɛ bíí de tɛ bìì wee sɔɔ gee, mɔɔ-oi-tom ko o dukbíí nɛ geemɔ;

¹⁴wen zaŋnu tɛ dun nɛ iŋa gasamɔ ko GASA WAN hee mɔ'ɔ nɛ gba-tɔp dun nɛnɛ zɛ́rɛ́rɛ́ nɛ yi’ɛ ga.

¹⁵«Fom a̧ ba a̧ n'aa ɔr sɛm kɔ̧-a̧, nɔsi nɛ a̧ nɛ dɔ̧ɔ̧, ha̧ dɔ̧ɔ̧ mɛ gbɛ a̧, wen zɔka zim-tɛ-a mam nɛnɛ‘i.

¹⁶A̧ pi̧ nɛ búù zu a̧ nɛ tɛ-a, bo nɛ zɔnamɔ na. A̧ a̧ nɔ kɔ̧-a̧ nɛ tɛ-a, ɓɛɛ ha̧ wa zɔk zim-tɛ-a mbɛt. GASA WAN tɛ ha̧ be ɗele dɔ̧ɔ̧ nɛ wii-er ha̧ a̧, ɓɛɛ búù tɛ ba a̧ ɗoŋ tu̧u̧-tɛ kɔ̧-a̧.

¹⁷O ŋgamɔ n'aa dee so Libaŋ tɛ pii ɗoŋ tik zu a̧; a̧ n'aa ɗaŋa so mɔ hee saɗi ga tɛ fe, wen zu gbaia tɔk-tɛ bíí n'aa gbaia, in wen zu ŋgamɔ n'aa dea in nù, in o ye, ba nɛ o bíí ye nɔ‘i.

¹⁸Kà ŋma bíí dui sɔ̧ nɛ boi, kóó sɛk sɔ̧ nɛ te wen ɔramɔ, ɓɛɛ kà wi’ɛi e ta nɛ sɔ̧‘i nɛ tɔ̧ wen na'i, nɛ́ ge a̧ a̧ tɛ kpa sɛnɛ ge?

¹⁹«Fom a̧ ba a̧ wen n'aa tɔ̧ ha̧ ɓira-te'e: ‹Mɛ̀ kúr,› kóó ha̧ ta nɛ tɔ̧ wen na: ‹Mɛ̀ tún.› O mɔɔ nɔ‘i nyɛm mɛ we ɗoŋ mɔ ha̧ bíí na; kóó nɛ̀ oi lɔr in bu-mbɔi nɛ‘i sɔ̧ɔ̧ tɛ wa'i, wa nɛ gee fio-mɔ.

²⁰Kinii, GASA WAN a̧a̧ kɔ̧ sa̧a̧ Tua kɔ‘i, ɓɛɛ bíí zaŋnu a̧ duk ti a̧ nɛ oi-nú kéɗéŋ!»