Read Northwest Gbaya SOFONII 1 Bible Online

SOFONII 1 - Northwest Gbaya bible

SOFONII 1

¹Wen ko GASA WAN nɛ ee nú Sofonii, bem ko Kusi be-koo Gedalia, bezaŋ Amaria, nutua ko Ezɛkias, ŋgimbi wan ko Josias, wannu Juda, bem ko Amɔŋ, nɛ mɔ'ɔ.

²GASA WAN'e: «Mi tɛ ɗaŋ mɔ zu nù'ɛ yinɛ lɛŋ.

³Mi tɛ kum o bíí in o saɗi, o nɔ̧́í̧ gu nɛ o zoro, mi tɛ kum o ɗaŋ bíí nɛ oi ɗaŋ deemɔ kɔ-wa. Ŋma oi ndaa bíí kpɔk n'am tɛ e zu nù'ɛ bo na. Ɛ mi GASA WAN a̧ tɔ̧ wen’ɛ.

⁴Mi tɛ de ŋmaa in Juda, si kpa nɛ o bíí Jerusalɛm lɛŋ. Mi tɛ bi nin Bal yinɛ fara’ɛ gu nɛ o gasa wi-de-tom kɔ̧-a̧ in o wi-ɗaf'a mbɛt.

⁵Mi tɛ kum o wi-daŋ-zu tua gasi nɛ o sɔra, gu nɛ o bíí nɛ gu nù ti GASA WAN, ɓɛɛ tɛ̀ɛ̀ kan mɔ nɛ nin sɔ̧ kɔ-wa Milkɔm mbɛt.

⁶Mi tɛ kum o wi nɛ e GASA WAN duk, nɛ pii ɗoŋ tɛ a̧ mɛ ai nú ha̧ a̧ na mbɛt.»

⁷Ɛ̀nɛ̀ dúk nɛ oi nú ti GASA WAN Sɔ̧, wen wese kita ko GASA WAN hɛɗa kaɗi. GASA WAN ɗafa mɔɔ-ɗafi-sɔ̧, ɓɛɛ a̧ ɗafi war-tɛ o wi n'aa saa.

⁸GASA WAN tɔ̧a̧: «Wese-ɗafa-sɔ̧ kɔ‘m, mi tɛ de ŋmaa in o gasawi, o be-wan ká bá nɛ̀ oi wi nɛ ba nɛ yuwar deemɔ ko o gɔni-duk.

⁹Wese'i, mi tɛ de ŋmaa in o wi nɛ kpíɗí nú dadaa nú tua ko sɔ̧ kɔ-wa, ká bá nɛ̀ o wi nɛ ɔr mɔ, ɓar nɛ mɔ er o bíí si kɔ̧ tua ko sɔ̧ kɔ-wa.»

¹⁰GASA WAN tɔ̧a̧: «Wese'i, wi tɛ zii hiɗimɔ sɛn nú garo Zoro, in gɔfamɔ ko o bíí tɛ mbe ye, ká bá nɛ̀ gasa giti mɔ zu kaya mɛ.

¹¹Ɛ́nɛ́ o wi-ɔ-see-ye Jerusalɛm, ɛ̀nɛ̀ áí nú, wen o wi-ɗɔr-mɔ lɛŋ kuma kaɗi gu nɛ o wi-kpai-sede.

¹²Ŋgimbi'i, mi tɛ du wee kii nɛ mɔ sɛn Jerusalɛm, ɓɛɛ mi tɛ de ŋmaa in o wi nɛ ya ɓɔn tɛ ɗaŋ deemɔ kɔ‘i tɔ̧ nɛnɛ‘e: ‹GASA WAN nɛ duk nɛ kɔ‘i'i de demɔ na, a̧ de ɗaŋmɔ na mbɛt.›

¹³Bíí tɛ kai mbɔi kɔ-wa yaknɛ, bíí tɛ ɗaŋ tua kɔ-wa gbin a nù ŋgɛ́rɛ́m-ŋgɛ́rɛ́m; wa baa so tua kɔ-wa e ŋgɔn, ɓɛɛ wa beka ɔ sɛnɛ na; wa waa so fɔ nyak-dɔ̧ɔ̧, ɓɛɛ wa beka nɔ dɔ̧ɔ̧-a̧a̧ na mbɛt.»

¹⁴Wese kita ko GASA WAN hɛɗa kaɗi! Wese'i hɛɗa dɔ̧́ɔ̧́ kaɗi; wese'i hɔɔ hɔɔ kaɗi. O bíí tɛ hiɗi mɔ nɛ paŋ nú; wese'i kóó nɛ o ŋgaŋa-wi tɛ kii gbakamɔ.

¹⁵Wese'i nɛ́ wese ŋga nyimsea, wese ŋga bɔnɛ in dita-see, wese ɗaŋamɔ lɔ́kɔ́tí-lɔ́kɔ́tí, puturu, wese gba tum in ti-tum kpɔ̧́ɔ̧́-kpɔ̧́ɔ̧́, wese gba búk-kórò in tura-zan ndír-ndír;

¹⁶wese-dɔm-mbia in gayamɔ-biro si zu o ye-ŋgárá in o ŋga fara-pɛm-mɔ.

¹⁷GASA WAN tɔ̧a̧: «Mi tɛ pi̧ ŋga bɔnɛ zu o bíí; wa tɛ nɛ nɔ hee o wi-boma-yí ga, wen wa dee ɗaŋmɔ in GASA WAN. Tɔk tɛ-wa tɛ pɛsi dam fara lɛŋ; o bíí tɛ hui nyak zaŋ-wa a taŋ hee yɔsɛ ga.»

¹⁸Kóó bu-mbɔi gu nɛ lɔr beka kpasi wa na; wese nyimsea ko GASA WAN, wese-de-gɔya tɛ-wi ko GASA WAN tɛ kpɔr hee wee ga; nù tɛ ɗaŋ, o bíí tɛ kum lɛŋ, mɔ‘i tɛ duk nɛ mɔɔ-ari.