Read Northwest Gbaya SOFONII 3 Bible Online

SOFONII 3 - Northwest Gbaya bible

SOFONII 3

¹Ŋgamɔ tɛ kpa Jerusalɛm tɛ dee ŋgazu, in tɛ dee ndiŋmɔ n'aa de, nasi nɛ o bíí!

²Ye'i zii wen nú GASA WAN na, a̧ zii gayamɔ kɔ̧-a̧ na, a̧ e ta nɛ a̧ na, kà a̧ ndaɗi nɛnɛ in Sɔ̧ kɔ̧-a̧ na mbɛt.

³O gasawi kɔ̧-a̧ ya hee dila nɛ mgbimgbi ga; o wi-gɔn-kita kɔ̧-a̧ ya hee o gba-toyo ŋgimbi yee-wese nɛ e oi mɔ ŋgɔn na ga.

⁴O wi-tɔ̧-wen oi nú Sɔ̧ kɔ̧-a̧ nɛ o wi-ŋmaŋ-tɛ, o wi-nyɔŋ yí bíí; o wi-ɗafi-sɔ̧ kɔ̧-a̧ ɗaŋ nɛ war mɔ nɛ‘i ee ha̧ Sɔ̧, wa ɗaŋ nɛ yuwar heembea.

⁵Ɓɛɛ GASA WAN duk kana saaye'i; a̧ de mɔ nɛ yuwar-a, a̧ de ɗaŋmɔ na. Mɛ tutuyɛ dam ɗoŋ wese lɛŋ, a̧ usi nɛ deemɔ kɔ̧-a̧ nɛ yuwar-a ha̧ o bíí; ɓɛɛ zu-a'i, foe de o wi-ɗaŋ na.

⁶GASA WAN tɔ̧a̧: «Mi kuma o tugun bíí, o ŋga tua kɔ-wa gbina a nù. Mi ɗaŋa o yuwar kɔ-wa lɔkɔti lɔkɔti, bíí beka ba war'i ɓɔna. O gasa ye kɔ-wa yaia pɛsi a taŋ, bíí bo ɓɔna.

⁷Mi taa so kɔ‘m'e, mɛ́ Jerusalɛm, mɛ tɛ̀ɛ́ yu so'm, mɛ́ tɛ̀ɛ́ zii so mbɔrɔ kɔ‘m, ɓɛɛ bo nɛ mi tɛ̀ɛ́ ɗaŋ so fara-duk kɔ-mɛ na; ŋgimbi n'am tɛ so mɛ gai wa, ɓɛɛ soɓee, wa dee ɗaŋmɔ kɔ-wa siti kaɗi.»

⁸GASA WAN tɔ̧a̧: «Ɛ̀nɛ̀ pɛ́m am! Ɛ̀nɛ̀ pɛ́m wese n'am tɛ tɛ mɛ ɓa wen in'nɛ̀ɛ́. Gɔna-kita kɔ‘m tɛ duk hee mɔ'ɔ ga: Mi tɛ ɗaŋ o tugun bíí, mi tɛ mɔi̧ o mɔɔ-wan a ɗɔɔ ŋga nyimsea kɔ‘m; nù nɛ oi-aa lɛŋ tɛ bìì wee ɗɔɔ kpɔra nyimsea kɔ‘m.

⁹«Mi tɛ de ha̧ ndàrá-nú o dukbíí mɛ sa̧, ha̧ wa lɛŋ mɛ sa nɛ́ nin GASA WAN, ɓɛɛ ha̧ wa mɛ de tom ha̧ a̧ nɛ kpɔk ŋgai.

¹⁰Nɛ̀ war ko o bíí mɛ kur o nana-yì Etiopii n'am pɛsa só sót-sót nɛ̀ gas'am, wa tɛ ba ha̧a̧mɔ kɔ-wa tɛnɛ ha̧‘m.

¹¹«Jerusalɛm, tɛ ŋgimbi'i, foe beka ba mɛ zu ɗaŋmɔ in ŋgazu nɛ mɛ dee so in am ɓɔna, wen mi tɛ fo o gasa wi-ŋmaŋ-tɛ mgbara'nɛ́ yinɛ, ɓɛɛ ɛnɛ tɛ kaɗi tɔ̧ɔ̧ wen-gɔ-tɛ zu sa̧a̧ kaya kɔ‘m;

¹²ɓɛɛ o wi nɛ̀ tɛ ya saaye'i nɛ́ o wisan in o wi-mɔka-see, nɛ̀ tɛ e ta nɛ̀ nin GASA WAN.

¹³Oi o be Israɛl beka de ɗaŋmɔ ɓɔna; wa beka tɔ̧ wen-ndela in wen-ɔr-mɔ ɓɔna. Wa tɛ dai o mɔ-dai kɔ-wa, ɓɛɛ wa ɔma tɛ nɛ de-a. Ŋma bíí beka pi̧ kíì tɛ-wa ɓɔna.»

¹⁴Boko be Siɔŋ, mɛ̀ hé yílí, nyɛŋɛ a̧ de mɛ! Israɛl, mɛ̀ kpá desee, mɛ̀ kɛ́kɛ́ɗí mami nɛ see-mɛ lɛŋ, boko be Jerusalɛm!

¹⁵GASA WAN baa kita yinɛ zu mɛ kaɗi, a̧ ndaka wisɛn kɔ-mɛ yaknɛ. GASA WAN nɛ́ wannu Israɛl, a̧ nɛ tɛ-a a̧a̧ in mɛɛ; mɛ beka de kíì ŋgamɔ ɓɔna.

¹⁶Wese'i, wa tɛ tɔ̧ ha̧ Jerusalɛm'e: «Ká mɛ dee kíì na, Siɔŋ! Ká tɛ-mɛ mɔk na.

¹⁷GASA WAN Sɔ̧ kɔ-mɛ a̧a̧ mgbara o bíí kɔ-mɛ; a̧ nɛ ŋgaŋa wi-gbin-biro. A̧ kpaa desee wen zu mɛ; a̧ dee ha̧ mɛ mɛ kpa mbe duka-a tɛ kɔ̧ɔ̧mɔ kɔ̧-a̧. A̧ kpíɗí nɛ tortɛ de nɛ nyɛŋɛ wen zu mɛ.»

¹⁸GASA WAN tɔ̧a̧: «Mi tɛ mɔi̧ o bíí nɛ kpa so yuwar dee gbaŋa na; wa yaa so nyɛi̧ nɛ mɛ, ɓɛɛ mɔ‘i duka so nɛ mɔɔ-foe zu Jerusalɛm.

¹⁹Mi tɛ de ŋmaa in o bíí lɛŋ nɛ dee ŋgamɔ in'nɛ̀ɛ́; tɛ ŋgimbi'i, mi tɛ kpasi o wi-kum, mi tɛ mɔi̧ o wi nɛ pɛsa so piinɛ ɗoŋ. Mi tɛ de ha̧ tɛ‘nɛ́ mɛ tu̧ in ha̧ nin'nɛ́ mɛ hu̧r zu nù lɛŋ nɛ foe baa so'nɛ́ sɛnɛ.

²⁰Ŋgimbi'i, mi tɛ mgbɔ‘nɛ́ piinɛ; tɛ duk nɛ ŋgimbi n'am tɛ mɔi̧‘nɛ́. In'nɛ́ tɛ hu̧r, ɓɛɛ mi tɛ de ha̧ tɛ‘nɛ́ mɛ tu̧ mgbara o dukbíí zu nù lɛŋ, ŋgimbi n'am tɛ ha̧ nɛ mbe de duka-a h’ɛ́nɛ́ nɛ yí‘nɛ́.» GASA WAN a̧ tɔ̧ɔ̧ hegɔ.