Read Northwest Gbaya AGEE 2 Bible Online

AGEE 2 - Northwest Gbaya bible

AGEE 2

¹Sɛn tɛ yiitoo pɛ ɔɔ-wan ko Darius, tɛ mɔɔrɔ-ɗoŋ-yiitoo fio-zɛ tɛ pɛ‘i, ɔɔ zɛ ɓu-yiitoo-zua-kpɔk, ɓɛɛ GASA WAN tom Agee wi-tɔ̧-wen oi nú Sɔ̧ hee mɔ'ɔ ga woyo:

²«Mɛ́ tɔ̧́ ha̧ Zorobabɛl, gasawi nù Juda, bem ko Saltiɛl in gasa wan-ɗafi-sɔ̧ Josue, bem ko Yosedɛk, in oi dukbíí lɛŋ.

³‹Nɛ́ o mgbara'nɛ́ a̧ zɔka so gba de Tua’ɛ nɛ duka so nɛti o? Ɛ́nɛ́ zɔk bɔɔ a̧ duk hee ge kinii ge? Bo nɛ a̧ kifa duk nɛ geemɔ na?

⁴GASA WAN'e nde, Zorobabɛl, Josue, gasa wan-ɗafi-sɔ̧ bem ko Yosedɛk, in ɛnɛ dukbíí nù'ɛ lɛŋ, ɛnɛ nɔ ŋgiɗi. GASA WAN a̧ tɔ̧. Ɛ̀nɛ̀ dé tom, mi a̧a̧ in'nɛ̀ɛ́. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧a̧.

⁵Mi kana mɔ ŋgimbi gboa-a k’ɛ́nɛ́ nɛ nú Egiptɛ mɛ, ɔmi kɔ‘m tɛ duk in'nɛ̀ɛ́, k’ɛ́nɛ́ de kíì na!

⁶« ‹Wen’ɛ nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧: Dekpaa tikiɗi, mi tɛ de ha̧ yiwese in nù, mɔ mɛ zan in mɔ mɛ ɗɔɔ yi mbɛt mɛ nak.

⁷Mi tɛ sakali o gɔni-duk lɛŋ; o demɔ kɔ-wa lɛŋ tɛ pii ɗoŋ pii hɛ̧ɛ̧, ɓɛɛ Tua’ɛ tɛ duk nɛ gba demɔ nyɛmna. Wen’ɛ nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧:

⁸o bu-mbɔi in lɔr nɛ kɔ‘m. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧.

⁹Gasamɔ kɔ̧ Tua’ɛ tɛ gan wan mɛ ti, ɓɛɛ mi tɛ e ga̧a̧mɔ sɛn fara’ɛ. Nɛ mi GASA WAN nɛ a̧a̧ nɛ ŋgayamɔ lɛŋ a̧ tɔ̧.› »

¹⁰Tɛ yiitoo pɛ ɔɔ-wan ko Darius, tɛ mɔɔrɔ-ɗoŋ-naar fio-zɛ tɛ pɛ‘i, ɔɔ zɛ ɓu-yiitoo-zua-naar, GASA WAN tɔ̧ɔ̧ wen ha̧ Agee wi-tɔ̧-wen oi nú Sɔ̧ woyo.

¹¹«GASA WAN nɛ a̧a̧ nɛ ŋgayamɔ lɛŋ tɔ̧a̧: ‹Mɛ̀ ák o wi-ɗafi-sɔ̧ mɛ kɛ̧ mgbara wen’ɛ:

¹²ka ŋma bíí mgbara'nɛ́ pi̧ mur kpoo nɛ wa gɔna ha̧‘m kaɗi kɔ̧ zibaa laa kɔ̧-a̧, ɓɛɛ kà a̧ fo laa'i nɛ brɛt, kóó nɛ̀ wa̧a̧-kpoo, kóó dɔ̧ɔ̧, kóó nɔ̧́, kóó nɛ̀ ge nyɔŋmɔ ge, ɓɛɛ o mɔɔ nɔ‘i tɛ duk nɛ sa̧a̧-a̧ yi Sɔ̧ nde?› » O wi-ɗafi-sɔ̧ kifa nú ɓɛɛ tɔ̧: «Weyaa.»

¹³Agee tɔ̧ɔ̧ woyo: «Kà ŋma bíí fo wɔr-bíí, ɓɛɛ kà war er-a nɛ foo o ŋma mɔɔ nɔ‘i, ɓɛɛ o mɔɔ nɔ‘i tɛ duk nɛ ndiŋmɔ sɛn yi Sɔ̧ nde?» O wi-ɗafi-sɔ̧ kifa nú: «Mɔɔ nɔ‘i tɛ duk nɛ ndiŋmɔ.»

¹⁴Agee kifa nú: «Dukbíí'ɛ duk hee mɔ‘i ga! Tugun bíí'ɛ duk hee mɔ‘i ga sɛn ti'm. Wen’ɛ nɛ GASA WAN a̧ tɔ̧; tom kɔ-wa nɛ mɔ‘i, o mɔ nɛ wa ha̧ ha̧‘m lɛŋ nɛ ndiŋmɔ.»

¹⁵«Ku̧u̧naŋ-a sɔsɔɔ yak nɛnɛ, nɛti h’ɛ́nɛ́ mɛ ku̧naŋ mboo Tua ko GASA WAN woyo,

¹⁶ɛnɛ yaa so hee ge? Nyɔnɔ n’ɛnɛ nyɛma so mɛ mɔi̧ dun bufu ɓu-yiitoo, ɛnɛ mɔi̧a dun nɛ bufu ɓu ɓɛɛ. Waya nyak-dɔ̧ɔ̧ n’ɛnɛ vata so mɛ dun dak ɓu-mɔɔrɔ duna nɛ dak ɓu ɓɛɛ.

¹⁷GASA WAN nɛ a̧a̧ nɛ ŋgayamɔ lɛŋ tɔ̧a̧: Mi dee ha̧ mɔ n’ɛnɛ dee nɛ er'nɛ́ lɛŋ mɛ gbɛ dua, mɛ ba ŋgake in ha̧ ɓɔrɔ mɛ ɗaŋ, ɓɛɛ ɛnɛ kɔ̧ mɛ pii ɗoŋ pii tɛ‘m na.

¹⁸Kinii, ɛ̀nɛ̀ zɔ́k mɔ nɛ tɛ yak, ku̧u̧naŋ-a nɛ sɔsɔɔ yak nɛnɛ; ku̧u̧naŋ-a tɛ ɓu-yiitoo-zua-naar ɔɔ-zɛ tɛ mɔɔrɔ-ɗoŋ-naar fio-zɛ, wese n’ɛnɛ ku̧u̧ nɛ naŋ ee naŋ Tua ko GASA WAN, ɛ̀nɛ̀ zɔ́k mɔ nɛ tɛ de.

¹⁹Ŋma nyɔnɔ a̧a̧ kɔ̧ dam ɓɔ nde? Kóó nɛ fɔ nyak-dɔ̧ɔ̧, kóó nɛ te-mbɔra, kóó nɛ kóɓò, kóó nɛ te-nɔ̧́ mbɛt wai na. Ku̧u̧naŋ-a nɛ sɔsɔɔ, mi tɛ tok de yoŋgo zu'nɛ́.»

²⁰War yiitoo tɔ̧ɔ̧-wen ko GASA WAN ha̧ Agee tɛ ɓu-yiitoo-zua-naar ɔɔ-zɛ nɛ mɔ'ɔ.

²¹«Mɛ̀ tɔ̧́ ha̧ Zorobabɛl gasawi nù Juda'e, mi tɛ de ha̧ yiwese in nù mɛ nak;

²²mi tɛ gbin o mɔɔ-wan a nù, mi tɛ ɗaŋ ŋgai-mɔɔ-wan ko o tugun bíí yinɛ, mi tɛ tir o keekee-biro in o wi-daŋ-aa a nù, o nyaŋa tɛ kum, ɓɛɛ o wi-daŋ-nyaŋa tɛ gbɛ ŋmaa a nù nɛ gba-paa.

²³GASA WAN nɛ a̧a̧ nɛ ŋgayamɔ lɛŋ tɔ̧a̧: wese'i mi tɛ pɛm Zorobabɛl bem ko Saltiɛl, wi-de-tom kɔ‘m, wen'i nɛ GASA WAN ko o wi-biro a̧ tɔ̧. Mi tɛ e mɛ hee tumbal-wan ga wen nɛ́ mɛ́ a̧‘m hoka.» Tɔ̧ɔ̧-wen ko GASA WAN nɛ a̧a̧ nɛ ŋgayamɔ lɛŋ nɛ mɔ‘i.