Read Northwest Gbaya ZAKARII 1 Bible Online

ZAKARII 1 - Northwest Gbaya bible

ZAKARII 1

¹Darius ɔɔ wan pɛ yiitoo, ɓɛɛ tɛ mɔɔrɔ-ɗoŋ-taar fio-zɛ, GASA WAN ee wen nú wi-tɔ̧-wen oi nú Sɔ̧ Zakarii bem ko Berekia, be-koo Ido,

²mɛ tɔ̧ ha̧ o be Israɛl hee mɔ'ɔ ga: «See-am nyima so zu o zɔmdáa k’ɛ́nɛ́ batɛ. Mi GASA WAN nɛ a̧a̧ nɛ ŋgayamɔ lɛŋ a̧ tɔ̧. Ɛ̀nɛ̀ píí ɗoŋ tɛ‘m, mi GASA WAN wan ŋgayamɔ, ɓɛɛ mi tɛ si ɗoŋ tɛ‘nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

⁴K’ɛ́nɛ́ zɔk ɗoŋ mɔ ko o zɔmdáa k’ɛ́nɛ́ na. O wi-tɔ̧-wen oi nú Sɔ̧ tɔ̧ɔ̧ so ha̧ wa'e: ‹Mi GASA WAN nɛ a̧a̧ nɛ ŋgayamɔ lɛŋ saa'nɛ́ mɛ pii ɗoŋ, wen ee ɗaŋ yuwar in ɗaŋ deemɔ k’ɛ́nɛ́ duk,› ɓɛɛ wa kɔ̧ mɛ zii wen'i mɛ mbo zu sɛnɛ ha̧‘m na. GASA WAN a̧ tɔ̧ wen’ɛ.

⁵Ɓɛɛ kinii, o zɔmdáa k’ɛ́nɛ́ a̧a̧ dee? O wi-tɔ̧-wen oi nú Sɔ̧ k’ɛ́nɛ́ nɔ‘i a̧ duk kpasa'i?

⁶Zu-a'i, o zɔmdáa k’ɛ́nɛ́ zia kana o wen in o ha̧a̧nú n'am ha̧a̧ so ha̧ o wi-de-tom kɔ‘m, o wi-tɔ̧-wen oi nú Sɔ̧. Nɛ mɔ'ɔ nɛ wa pia ɗoŋ ɓɛɛ wa kpɛk'e, mi GASA WAN nɛ a̧a̧ nɛ ŋgayamɔ lɛŋ ha̧a̧ so nú mɛ de mɔ in wa nyɛm nɛ ɗoŋ naŋanɔ in deemɔ kɔ-wa, ɓɛɛ nɛ mɔ‘i a̧‘m dea.»

⁷Darius ɔɔ wan pɛ yiitoo, ɓɛɛ tɛ ɓu-yiitoo-zua-naar ɔɔ-zɛ tɛ ɓu-zua-kpɔk fio-zɛ, GASA WAN ee wen nú wi-tɔ̧-wen oi nú Sɔ̧ Zakarii bem ko Berekia, be-koo Ido. Duka nɛ zɛ Sebat. Wen-aa nɛ mɔ'ɔ:

⁸Mɛ zɛ'ɛ, GASA WAN hɔɔ zu ha̧‘m, ɓɛɛ mi zɔk ŋma bíí nɛ daŋa ŋma gbɛ̧ nyaŋa. A̧ duk so mgbara o be te nɛ pɛr-aa ɔ dee[1] sɛn kɔ̧ ɗɔŋgɔ; ɓɛɛ o gbɛ̧ nyaŋa in o tu̧-a̧ gu nɛ o bu-a ya nɛ ɗoŋ-aa.

⁹Nɛ mɔ'ɔ n'am aka GASA WAN: «O nyaŋa nɔ'ɔ usi nɛ ge?» Ɓɛɛ betom nɛ tɛ kifi nú ha̧‘m'i tɔ̧: «Mi tɛ tɔ̧ gba̧a̧-a̧ ha̧ mɛ.»

¹⁰Ɓɛɛ wi nɛ duka poo o be te nɔ‘i tɔ̧‘e: «Nɛ́ o wi nɛ GASA WAN toma so mɛ yar zɔk nɛ nù.»

¹¹Nɛ́ mɔ'ɔ nɛ o wi nɔ‘i tɔ̧ɔ̧ ha̧ betom ko GASA WAN nɛ duk poo o be te nɔ‘i hee mɔ'ɔ ga: «Ɛɛ yara so zɔk nɛ nù, ɓɛɛ ɛɛ zɔka nù duk keɗeŋ, foomɔ bo na.»

¹²Ɓɛɛ betom ko GASA WAN tɔ̧ woyo: «GASA WAN nɛ a̧a̧ nɛ ŋgayamɔ lɛŋ, ɛ́nɛ́ tɛ de ko ha̧ Jerusalɛm in o ye ko Juda mɛ gese ge nde? Wen ɛ́nɛ́ dee nyimsea zu wa tɛ pɛ ɓu-mɔɔrɔ-ɗoŋ-yiitoo kaɗi.»

¹³GASA WAN kifa nú ha̧ betom nɛ̀ we ɗoŋ wen ha̧‘m'i, nɛ̀ duka nɛ́ wen-ha̧-ga̧a̧-see in wen-ha̧-nɔɔ-ŋgiɗi.

¹⁴Betom'i tɔ̧ɔ̧ ha̧‘m mɛ nɛ̀ɛ́ pɛsi wen ko GASA WAN nɛ a̧a̧ nɛ ŋgayamɔ lɛŋ hee mɔ'ɔ ga: «Dee gɔya kɔ‘m ɔ ŋgaya zú Jerusalɛm in zú zu-tɔ̧́ Siɔŋ,

¹⁵ɓɛɛ nyimsea kɔ‘m ɔ gasa zu o tugun bíí-dùk-tɛ̀. Ŋgimbi nɛ see-am ɓɔna nyima-a tikiɗi zu Jerusalɛm, o tugun bíí nɔ‘i tɛ̀ɛ́ usi bɔnɛ ha̧ a̧ yak zale. Nɛ́ mi GASA WAN a̧ tɔ̧!

¹⁶Mɛ nɛ wen hegɔ sa'm pii ɗoŋ mɛ de ko ha̧ Jerusalɛm. Wa tɛ mbo Tua kɔ‘m hi̧i̧ woyo. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. Wi tɛ kun nyak-we-naŋ tua sɛn Jerusalɛm woyo.»

¹⁷Ɓɛɛ betom tɔ̧ ha̧‘m mɛ pɛsi wen’ɛ woyo: «Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. O ye kɔ‘m tɛ gasi woyo. Mi GASA WAN tɛ de ko ha̧ Siɔŋ; mi tɛ kpɛk Jerusalɛm woyo.»