Read Northwest Gbaya ZAKARII 10 Bible Online

ZAKARII 10 - Northwest Gbaya bible

ZAKARII 10

¹Ɛ̀nɛ̀ ák mɔ sitɛ GASA WAN ha̧ a̧ mɛ tom kórò h’ɛ́nɛ́, ŋgimbi nɛ kórò pii ɗoŋ nɛ haya-a na, wen nɛ a̧ a̧ de ha̧ kórò mɛ hɔ. A̧ tɛ de ha̧ kórò nɛ dɔka-a mɛ hɔ, ha̧ nyɔnɔ mɛ dɛm kpɛɛfɔ ko bíí lɛŋ.

²Ŋgala ko o géé-sɔ̧ tɔ̧ kɔ‘i ŋma mɔ na, o wi-tan-mɔ zɔka nɛ mɔɔ-ndela, gba̧a̧ wee ɗoŋ ɔɔ-zu kɔ-wa bo na, wa ga̧ see bíí nɛ ɔrmɔ. Nɛ hegɔ sa dukbíí kɔ‘m pɛsi nɛnɛ dé nɛ̀ kó nɛ̀ tɛ̀ yaknɛ hee mɔ-dai nɛ wi-daia-a bo na ga.

³«Nyimsea kɔ‘m kura zu o gɔni wi-dai-mɔ-dai; mi tɛ kur in o vala gbadua nɔ‘i. Nɛ mbetɛ, GASA WAN nɛ a̧a̧ nɛ ŋgayamɔ lɛŋ tɛ zɔk mɔ-dai kɔ‘i; mɔ-dai'i nɛ nutua ko Juda. A̧ tɛ e a̧ nɛ ŋga nyaŋa-biro kɔ̧-a̧.

⁴O wan tɛ gbo nɛ tɛ Juda; wa tɛ ya hee ta-mgbii-tua ga, hee te-tɔn-tua-laa ga, in hee ŋga kusaa-biro ga mbɛt.

⁵Wa lɛŋ tɛ ya nɛ o gbin-biro, nɛ tɛ isi o wisɛn kɔ-wa hee ɓɔtɛ yuwar ga. Wa tɛ bi biro in o wan-nyaŋa pi̧ nɛ foe zu wa, wen GASA WAN a̧a̧ in wa.

⁶Mi tɛ ha̧ nɔɔ-ŋgiɗi ha̧ nutua ko Juda, ɓɛɛ mi kpasa nutua ko Jozɛf. Mi tɛ ba wa e ŋgɔn woyo wen ko de'm dee ha̧ wa, ɓɛɛ tɛ duk hee bo nɛ mi pi̧i̧ so wa taŋ ga na, wen mi nɛ GASA WAN Sɔ̧ kɔ-wa, ɓɛɛ mi tɛ zii kɔfamɔ kɔ-wa.

⁷O be nutua Efraim tɛ duk kpa nɛ ŋgai hee o gbin-biro ga, tɛ-wa tɛ hai hee dɔ̧ɔ̧ a̧ wa nɔɔ ga; tɛ zɔka wa, o bem kɔ-wa tɛ ya nɛ desee, de nɛ nyɛŋɛ wen zu GASA WAN.

⁸Mi tɛ sa dukbíí kɔ‘m, ɓɛɛ mi mɔi̧a wa, wen mi gboo wa kaɗi;[13] ɓɛɛ wa tɛ dɔk hee nɛti ga.

⁹Mi pɛsa wa mgbara o tugun bíí, hee mɔ'ɔ nɛ‘i pɛ nɛ gba̧a̧ mɔ'ɛ ga; ɓɛɛ koo wa a̧ duk nɛ nyɛi̧a-a, tɛ-wa tɛ mbaŋ ɗoŋ am. Wa tɛ ko o bem, ɓɛɛ wa pia ɗoŋ.

¹⁰Mi tɛ mgbɔ wa pii ɗoŋ nɛ nú Egiptɛ, mi tɛ sa wa mɛ mɔi̧ piinɛ nɛ nú Asirii mbɛt; mi tɛ de ha̧ wa mɛ ɔ ye nú Galad in Libaŋ, ɓɛɛ nù‘i beka nyɛm wa na.

¹¹GASA WAN tɛ gusi yì, ɓɛɛ wa kuu gba-tɔp Egiptɛ;[14] gba-for Nil mbɛt tɛ ɔ̧si̧ kútú-kútú. Ŋmaŋa-tɛ ko Asirii tɛ kaɗi, ɓɛɛ mi baa dɔ́rá-wan er Egiptɛ yinɛ mbɛt.

¹²Mi tɛ ha̧ ŋgai ha̧ dukbíí kɔ‘m, ɓɛɛ wa tɛ duk tɛ̀ nɛ̀ nin am. Nɛ GASA WAN a̧ tɔ̧ wen'i.»