Read Northwest Gbaya ZAKARII 11 Bible Online

ZAKARII 11 - Northwest Gbaya bible

ZAKARII 11

¹Libaŋ, mɛ̀ hú̧í̧ o kpar nú tua kɔ-mɛ, wee a̧ dɔ o gbatui kɔ-mɛ a nù.

²O zawaya, ɛ̀nɛ̀ pɛ́ see'nɛ́ nɛ dita-see wen o gbatui gbina, wen o gasa te ɗaŋa. Ɛ̀nɛ̀ pɛ́ see'nɛ́, o gasa te[15] nú Basaŋ, wen da̧a̧ kombo nɛ bíí nyɛm so mɛ ye na, yaia.

³Wi zii nɛ gɔfamɔ ko o wi-dai-mɔ-dai, wen de fara-nyɔŋ-mɔ ko o mɔ-dai kɔ-wa bo ɓɔna; wi zii nɛ hiɗimɔ ko o be dila, wen da̧a̧ zer Jurdɛn ɗaŋa.

⁴Ŋma wese, GASA WAN Sɔ̧ kɔ‘m tɔ̧ɔ̧ hee mɔ'ɔ ga: «Mɛ̀ dáí o sami nɛ‘i hoka e wen gɔna-a,

⁵nɛ o wi-hi̧fa-a gɔn hee mɔ'ɔ nɛ see-wa kɔ̧ɔ̧ ga, ɓɛɛ nɛ‘i ɗɔr tɔ̧ nɛnɛ‘e: ‹Osoko ha̧ GASA WAN; mi kifa wanmbɔi kaɗi!› Ɓɛɛ o wi-daia-a de ko ha̧ wa na mbɛt.

⁶«Mi mbɛt, mi beka de ko ha̧ o bíí zu nù'ɛ ɓɔna. Nɛ́ GASA WAN a̧ tɔ̧. Mi tɛ fo o bíí pi̧ er ŋma-wa in er o wannu kɔ-wa. O wannu tɛ ɗaŋ nù, ɓɛɛ mi beka kpasi o wi nɔ‘i er wa na.»

⁷Mi yee tɛ daia o sami nɛ‘i hoka e wen gɔna-a'i. Mi kia dɔ́rá yiitoo; mi saa nin ɛ̧ɛ̧ kpɔk’ɛ nɛ «Deako», ɓɛɛ mi sa nin ɓii-aa'e «Éé-nú-kpɔ́k», ɓɛɛ mi duk tɛ daia o sami nɔ‘i.

⁸Zaŋ fio-zɛ kpɔk, mi gboo o wi-dai-sami taar a nù. Dekpaa, ɓɛɛ wɔ o sami nɔ‘i ku̧ naŋ busa tɛ‘m, ɓɛɛ mi mbɔi wa mbɛt.

⁹Hegɔ mi tɔ̧a̧: «Mi beka dai'nɛ́ ɓɔna! Wan nɛ kɔ̧ɔ̧ mɛ fe a̧ fe! Wan nɛ kɔ̧ɔ̧ mɛ yɔ a̧ yɔ! Ɓɛɛ o wan nɛ tɛ ɓɔn a̧ tik zu ŋmaa nyɔŋ nɛ ŋmaa.»

¹⁰Nɛ mɔ'ɔ n'am baa dɔra, wan n'am aa nin-a'e «Deako'i», ɓɛɛ mi gbin, ɗaŋ nɛ nɔɔ-tɔk mgbara GASA WAN in o dukbíí lɛŋ.

¹¹Nɔɔ-tɔk'i kaɗa wese'i, ɓɛɛ o wi-ɗɔr-sami nɛ zɔka'm tɛ dee mɔ‘i iŋ‘e, mɔ‘i duka nɛ tɔ̧ɔ̧-wen ko GASA WAN.

¹²Nɛ mɔ'ɔ n'am tɔ̧ɔ̧ ha̧ wa: «K’ɛ̀nɛ̀ nɛ́ kɔ̧a̧, ɛ̀nɛ̀ yóɓ‘am; k’ɛ̀nɛ̀ nɛ́ kɔ̧ɔ̧ na, ɛ̀nɛ̀ é duk.» Ɓɛɛ wa yoɓ‘am tɛ kɔya-sede ɓu-taar.

¹³Nɛ mɔ'ɔ nɛ GASA WAN tɔ̧ɔ̧ ha̧‘m: «Mɛ̀ káí sede nɛ wa ta'e mɛ nɛ zɔm sede nyɛmna wen gɛn'am wo'i nɛnɛ ha̧ wi-nɔi̧-boi.»[16] Ɓɛɛ mi kai kɔya-sede nɔ‘i ɓu-taar'i yaknɛ nɛ́ɛ̀ siŋ pi̧ ha̧ wi-nɔi̧-boi sɛn kɔ̧ Tua ko GASA WAN.

¹⁴Nɛ mɔ'ɔ n'am baa ɓii dɔra kɔ‘m nɛ nin-a'e «Éé-nú-kpɔ́k'i», ɓɛɛ mi gbin, ɗaŋ nɛ dee nam ko nya-wi mgbara Juda in Israɛl.

¹⁵GASA WAN tɔ̧ɔ̧ ha̧‘m woyo: «Kinii, mɛ̀ dé mɔ hee ŋma wi-dai-mɔ-dai nɛ zu bo na ga.

¹⁶Mi tɛ e ŋma wi-dai-mɔ-dai tɛ nù'ɛ nɛ wen kɔ̧-a̧ beka bó nɛ̀ mɔ-dai nɛ bi fio na, kóó kia wan nɛ yɔa na, kóó dee nyina ha̧ wan nɛ baa da̧i̧ na, kóó zɔka wan nɛ duk nɛ haya-tɛ na mbɛt. A̧ tɛ or nɛ o sɔ̧ɔ̧ naŋ-wa, ɓɛɛ a̧ nyɔŋa o ŋmaŋa-a.»

¹⁷Bɔnɛ a̧ tik zu ɗaŋ wi-dai-mɔ-dai nɛ e o sami kɔ‘i duk! Gba-paa a̧ ɓir ɓaa-a in a̧ o yí-a mɛ wiiko! Ɓaa-a a̧ ɔ̧k dor pii ɗoŋ, yí-a mɛ wiiko a̧ bomi mbɛt!