Read Northwest Gbaya ZAKARII 14 Bible Online

ZAKARII 14 - Northwest Gbaya bible

ZAKARII 14

¹Wese ko GASA WAN a̧ tɛ‘i. O be Jerusalɛm, wese'i, o bíí tɛ kai mɔ k’ɛ́nɛ́, mɛ kɛ̧ nɛ er ŋmaa nɛ gbaayí‘nɛ́.

²Mi tɛ de ha̧ o tugun bíí lɛŋ mɛ mɔi̧ ŋmaa mɛ bi Jerusalɛm. Wa tɛ ba ye, wa tɛ gbin o tua, wa tɛ ɗaŋ o okoo, wa tɛ kai reeta bíí yaknɛ nɛ bara-biro, ɓɛɛ oi reeta-a tɛ ɓɔn saaye.

³GASA WAN tɛ kur in o dukbíí nɔ‘i mɛ bi wa hee mɔ'ɔ n'aa de nɛnɛ ŋgimbi biro ga.

⁴Wese'i, naŋ-a tɛ i̧si̧ zu kaya Te-nɔ̧́ nɛ̀ dúk ká̧ Jerusalɛm nɛ war daŋa-wese, ɓɛɛ kaya tɛ mbaŋ tan see-a nɛ war daŋa-wese si yee-wese, ɓɛɛ nɛ́ gba ɗɔŋgɔ a̧ tɛ duk oi-aa. Kaya tɛ kɛ̧ tɛ nɛ ŋmaa, reeta si war ká̧-zan-mɛ́-ŋgɔn, reeta si war ká̧-zan-mɛ́-ɗɔɔ.

⁵Ɓɛɛ ɛnɛ tɛ ba gba ɗɔŋgɔ mgbara kaya'i yu nɛ mɔ wen gboŋgo'i tɛ nɛ hegɔ hɔ Asal. Ɛnɛ tɛ yu mɔ hee mɔ'ɔ n’ɛnɛ yuu so nɛnɛ tɛ naka-nù ŋgimbi ko Ozias wannu Juda ga, ɓɛɛ nɛ́ tɛ́ ŋgimbi'i a̧ GASA WAN Sɔ̧ kɔ‘m tɛ́ tɛ̀ nɛnɛ in o betom kɔ‘i.

⁶Wese'i, sa̧a̧mɔ-wese in sa̧a̧mɔ-zɛ beka bo na, gɛ̧ɛ̧ in ɓɔrɔ beka bo na mbɛt.

⁷Wese'i tɛ duk nɛ ŋma gasa wese, nɛ́ GASA WAN kpɔk a̧ iŋa ɓɛɛ. Wi beka iŋ kɛ̧ɛ̧ mgbara wese in zɛ na; zɛ tɛ duk hee sa̧a̧mɔ ga kpoo nɛ kpoo.

⁸Wese'i, gba-for-yì duka-kpasa tɛ fok gbonɛ nɛ Jerusalɛm, reeta-a tɛ nɛ sitɛ gba-tɔp mɛ si daŋa-wese, ɓɛɛ ɓii-aa nɛɛ sitɛ wan mɛ si yee-wese, mɛ ɓar mbɛt in mɛ bɛɛ mbɛt.

⁹Ŋgimbi'i nɛ́ GASA WAN a̧ tɛ ɔ wan zu nù lɛŋ; nɛ́ a̧ kpɔk ɓɛɛ a̧ tɛ duk nɛ Sɔ̧; ɓaa nin nɛ‘i tɛ gasi nɛ nin-a kpɔk ɓɛɛ.

¹⁰Nù ká̧ Jerusalɛm lɛŋ tɛ hir kifi bɔkɔ-nù, ku̧u̧naŋ Gɛva hɔ nɛnɛ Rimɔŋ nɛ war ɗɔɔ. Fara nɛ Jerusalɛm duk sɛnɛ‘i tɛ kusi gan zu o oi dɔka fara nɛ yak zik a̧, ɓɛɛ pɛsa ye tɛ ku̧naŋ sɛn nú garo ko Bɛnjamin hɔ nɛnɛ nú garo mɛ mgbii-aa, fara nɛ kuti nú garo duka so sɛnɛ nɛti, ɓir nɛ fara-pɛm-mɔ ko Hananeɛl hɔ nɛnɛ fara-vati-dɔ̧ɔ̧ ko wannu.

¹¹Bíí tɛ ɔ hi̧i̧; fom beka bo ɓɔna, ɓɛɛ ŋma mɔɔ-fo Jerusalɛm beka bo na mbɛt.

¹²Ɓɛɛ ŋgamɔ nɛ GASA WAN tɛ pi̧ zu o dukbíí nɛ baa so biro duk nɛ Jerusalɛm nɛ mɔ'ɔ: wa tɛ mbɔr nɛ zu kpasa; gbaayí-wa tɛ mbɔr kɔ̧-a̧ mɛ, ɓɛɛ leɓe-wa mbɔra ɓɔn kɔ̧ nú-wa.

¹³Wese'i, GASA WAN tɛ pi̧ zɔm kíì tɛ-wa; wa tɛ bi biro in o ŋmaa, tok nɛ ŋmaa woyo.

¹⁴Juda mbɛt tɛ ye ɗoŋ Jerusalɛm mɛ bi nɛ biro. Wa tɛ kai o kpaamɔ, o lɔr, o bu-mbɔi in o laa nɛ dɔka-a ko o tugun bíí lɛŋ nɛ ya zik wa nɛ mɔɔ-oi-biro.

¹⁵Kpɔk ŋgamɔ‘i tɛ tik zu o nyaŋa, o sunda, o ŋgeloba, o tuifuu in o saɗi lɛŋ kɔ̧ gbagari ko o wisɛn kɔ-wa.

¹⁶Pɛ nɛ pɛ yaknɛ ɗoŋ ŋgimbi'i, o oi bíí nɛ tɛ ɓɔn mgbara o wan nɛ baa so biro dúk nɛ̀ Jerusalɛm tɛ daŋ si Jerusalɛm mɛ gu nù ti GASA WAN, Wannu nɛ a̧a̧ nɛ ŋgayamɔ lɛŋ, in Wan nɛ dee Gbaŋa Tua-laa.

¹⁷Ɓɛɛ ko o dukbíí zaŋnu nɛ beka daŋ si Jerusalɛm mɛ gu nù ti GASA WAN nɛ a̧a̧ nɛ ŋgayamɔ lɛŋ na, kórò beka hɔ a zu nù kɔ-wa na.

¹⁸Kà o be Egiptɛ nɛ́ daŋa si hi̧i̧ wen dee Gbaŋa Tua-laa'i na, ŋgamɔ nɛ GASA WAN tɛ pi̧ zu dɔka tugun bíí nɔ‘i nɛ beka daŋ wen dee gbaŋa'i na'i tɛ tik zu wa mbɛt.

¹⁹Bɔnɛ nɛ tɛ tik zu Egiptɛ in zu dɔka tugun bíí lɛŋ nɛ daŋ si Jerusalɛm wen dee Gbaŋa Tua-laa na, nɛ mɔ‘i.

²⁰Wese'i, yɔramɔ'ɔ: «Mɔ nɛ‘i ee nɛtɛ ha̧ GASA WAN,» tɛ duk ɗoŋ o mana nɛ‘i kun ger nyaŋa, ɓɛɛ o nyɛk-gi-mɔ sɛn kɔ̧ Tua ko GASA WAN, tɛ duk nɛ sa̧a̧-a̧ hee o yee-pi̧-gaŋmɔ sɛn fara-ɗafi-sɔ̧ ga.

²¹O nyɛk-gi-mɔ wan mɛ Jerusalɛm in o wan mɛ Juda lɛŋ tɛ duk nɛ ko GASA WAN nɛ a̧a̧ nɛ ŋgayamɔ lɛŋ, ɓɛɛ kóó o ndé nɛ tɛ́ tɛ̀ mɛ ɗafi sɔ̧ tɛ ba o kpánà nɔ‘i mɛ gi nɛ mɔ. Ŋma wi-ɗɔr-mɔ beka duk kɔ̧ Tua ko GASA WAN nɛ a̧a̧ nɛ ŋgayamɔ lɛŋ wese'i na.