Read Northwest Gbaya ZAKARII 2 Bible Online

ZAKARII 2 - Northwest Gbaya bible

ZAKARII 2

¹Mi hu̧i̧a̧ yí‘m, ɓɛɛ mi zɔk o zak naar;

²sa'm ak betom nɛ we ɗoŋ wen ha̧‘m'i: «O zak nɔ'ɔ usi nɛ ge?» Ɓɛɛ a̧ kifi nú ha̧‘m: «O zak nɔ'ɔ usi nɛ o ŋgaya tugun bíí nɛ ndaka so Juda, Israɛl in Jerusalɛm pɛsi a taŋ.»

³Mɛ ɗoŋ, GASA WAN usa o wi-dui-mɔ naar ha̧‘m.

⁴Ɓɛɛ mi ak mɔ: «Wa tɛ mɛ de ge?» A̧ kifa nú ha̧‘m: «Wa tɛ mɛ pi̧ kíì in mɛ ɗaŋ o ŋgaya tugun bíí nɛ yaia so Juda yinɛ, ndak nɛ o be-nù a taŋ nɛ ŋma bíí bo so nɛ ŋgai mɛ ba zu nɛ ŋgɔn ti wa na.»

⁵Mi hu̧i̧a̧ yí‘m, ɓɛɛ mi zɔk ŋma bíí nɛ kasi nyak-we-mɔ er.

⁶Mi aka a̧: «Mɛ nɛ si dee?» Ɓɛɛ a̧ kifi nú ha̧‘m: «Mi nɛ Jerusalɛm ha̧‘m mɛ we dura-a in pɛsa-a.»

⁷Betom nɛ we so ɗoŋ wen ha̧‘m'i ɗɔŋa siti, ɓɛɛ ŋma betom woyo we ti a̧ tɛnɛ.

⁸Kuti betom'i tɔ̧ɔ̧ ha̧ ɓii-aa: «Mɛ̀ má yì, mɛ̀ nɛ́ɛ̀ tɔ̧́ ha̧ wi-kasi nyak-we-mɔ ndé, wi beka mbo garo zik nɛ Jerusalɛm na, wen o bíí in o mɔ-dai nɛ ya hi̧i̧ tɛ dɔk batɛ.

⁹Ɓɛɛ kɔ‘m, mi tɛ duk hi̧i̧. Nɛ́ GASA WAN a̧ tɔ̧. Mi tɛ zik a̧ nɛ garo-wee e see-a, ɓɛɛ mi duka nɛ gasamɔ kɔ̧-a̧.»

¹⁰«Ɛ̀nɛ̀ yák! Ɛ̀nɛ̀ yák e nù mɛ ká̧-zan-mɛ́-ŋgɔn duk! Nɛ́ GASA WAN a̧ tɔ̧ wen’ɛ. Mi pɛsa so ɛnɛ dam mgbii-zan naar lɛŋ. Wen'i nɛ́ GASA WAN a̧ tɔ̧.

¹¹Siɔŋ, mɛ̀ yák Babilɔŋ nɛ mɛ baa fara sɛnɛ‘i e duk.»

¹²GASA WAN nɛ a̧a̧ nɛ ŋgayamɔ lɛŋ ee gasa tom nú‘m. A̧ tɔ̧ wen'i zu o tugun bíí nɛ kaia mɔ er'nɛ́ hee mɔ'ɔ ga: «Wi nɛ tɛ tam tɛ‘nɛ́ a̧ iŋ‘e nɛ́ gbaayí‘m a̧ a̧ pi̧i̧ er sɛnɛ.

¹³Mi tɛ kur in o dukbíí nɔ‘i wen ha̧ o bíí nɛ yaa so o bara kɔ-wa mɛ kai mɔ er-wa.» Hegɔ, ɛnɛ tɛ iŋ‘e nɛ GASA WAN nɛ a̧a̧ nɛ ŋgayamɔ lɛŋ a̧ toma'm tɛnɛ.

¹⁴«Mɛ̀ hé yílí, mɛ̀ dé nyɛŋɛ, boko be Siɔŋ! Mi à̧ tɛ́ mɛ duk mgbara'nɛ́‘i. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen'i!

¹⁵Wese'i, dukbíí nɛ dɔka-a tɛ ndaɗi in GASA WAN, ɓɛɛ wa lɛŋ tɛ duk nɛ dukbíí kɔ‘m, ɓɛɛ mi tɛ duk mgbara'nɛ́.» Hegɔ mɛ tɛ iŋ‘e nɛ GASA WAN nɛ a̧a̧ nɛ ŋgayamɔ lɛŋ a̧ toma'm pii tɛ-mɛ.

¹⁶GASA WAN tɛ hok nɛ Juda tɛ Sa̧a̧ Nù mɛ duk nɛ́ kɔ̧-a̧ hee mɔɔ-oi ga, ɓɛɛ kpɛka Jerusalɛm woyo.

¹⁷Mɔ lɛŋ a̧ duk nɛ oi nú ti GASA WAN, wen a̧ tɛ gbo nɛ kɔ̧ sa̧a̧ fara-duk kɔ̧-a̧ kinii!