Read Northwest Gbaya ZAKARII 5 Bible Online

ZAKARII 5 - Northwest Gbaya bible

ZAKARII 5

¹Mi hu̧i̧a̧ yí‘m woyo, ɓɛɛ mi zɔk ŋma kara kalata nɛ bu̧i.

²Ɓɛɛ betom ak am: «Ge a̧ mɛ zɔka ge?» Mi kifa nú ha̧ a̧: «Mi zɔka ŋma kara kalata nɛ bu̧i bu̧i, zi̧a̧-a̧ hee mɛtrɛ ɓu, ɓɛɛ pɛsa-a hee mɛtrɛ mɔɔrɔ ga.»

³A̧ tɔ̧ɔ̧ ha̧‘m: «Mɔ‘i nɛ fom nɛ tɛ tik zu nù'ɛ lɛŋ: yɔramɔ mɛ kɔ̧ a̧‘e, o wi-zuzu lɛŋ tɛ yu zu nù'ɛ, ɓɛɛ wan mɛ ɗoŋ-aa'e, kanamɔ ndela lɛŋ tɛ kaɗi zu nù'ɛ mbɛt.

⁴Mi pi̧i̧ kalata’ɛ ha̧ fom mɛ tik zu tua ko o wi-zuzu in ko o wi-kan-mɔ-ndela, ha̧ a̧ mɛ duk kɔ̧ tua kɔ-wa, ɗaŋ nɛ mɔ ku̧u̧naŋ-a tɛ o ta hɔ nɛnɛ tɛ o gaŋgala.» Wen nɛ GASA WAN nɛ a̧a̧ nɛ ŋgayamɔ lɛŋ tɔ̧ nɛ mɔ‘i.

⁵Betom nɛ duka so we ɗoŋ wen ha̧‘m tɛ̀ɛ̀ pii ti, ɓɛɛ tɔ̧ ha̧‘m: «Mɛ̀ hú̧í̧ yí-mɛ, mɛ̀ zɔ́k mɔ nɛ tɛ'ɛ a'i.»

⁶Ɓɛɛ mi ak a̧: «Mɔ'ɔ nɛ́ ge mɔ ge?» A̧ kifa nú ha̧‘m: «Nɛ́ gɛsɛ.» A̧ tɔ̧ɔ̧ siti woyo: «Nɛ́ ɗaŋmɔ ko o bíí zu nù'ɛ lɛŋ a̧ a̧a̧ kɔ̧ a̧.»

⁷Nɛ mɔ'ɔ nɛ kirkiti mɔ nɛ‘i dee nɛ tuŋgu nɛ duka kpe nú gɛsɛ‘i hu̧i̧a̧, ɓɛɛ mi zɔk ŋma okoo fara duka-a kɔ̧ gɛsɛ‘i.

⁸Nɛ mɔ'ɔ nɛ betom tɔ̧ɔ̧ ha̧‘m: «Kóò'ɛ usi nɛ́ ɗaŋ.» Ɓɛɛ a̧ gbɔsi kóò‘i si kɔ̧ gɛsɛ‘i, ba mɔɔ-kpe-nú-a'i gu zu-a woyo.

⁹Mi hu̧i̧a̧ yí‘m nɛ ŋgɔn woyo, ɓɛɛ mi zɔk o ŋma okoo yiitoo fara bu̧i̧a̧-a̧ tɛnɛ. Búk duka ba wa wen wɔr-ɓaa-wa a̧a̧ sɛnɛ hee wɔr-ɓaa nɔ̧́í̧-gba-dɔya ga. Wa gata gɛsɛ‘i nɛ ŋgɔn yaknɛ,

¹⁰ɓɛɛ mi ak betom nɛ we ɗoŋ wen ha̧‘m'i: «Wa ba gɛsɛ‘i si dee?»

¹¹Ɓɛɛ a̧ kifi nú ha̧‘m: «Wa ba si nú Babilɔŋ, ha̧ wa mɛ de tua zu a̧; nɛ́ hi̧i̧ a̧ wa tɛ ɗaf'a ba e zu paku.»[4]