Read Northwest Gbaya ZAKARII 8 Bible Online

ZAKARII 8 - Northwest Gbaya bible

ZAKARII 8

¹GASA WAN nɛ a̧a̧ nɛ ŋgayamɔ lɛŋ tɔ̧ɔ̧ ha̧‘m woyo hee mɔ'ɔ ga:

²«Mi GASA WAN tɔ̧a̧: Dee gɔya kɔ‘m zu Siɔŋ ɔ ŋgaya; wɔ-a gbɛ‘m gbɛɛ lɛk-lɛk.

³Nɛ́ hegɔ s'am tɔ̧‘e, Mi tɛ si ɗoŋ Siɔŋ mɛ duk sɛn Jerusalɛm; wa tɛ sa Jerusalɛm'e, Ye-mbo-zu, ɓɛɛ wa saa kaya ko GASA WAN nɛ a̧a̧ nɛ ŋgayamɔ lɛŋ‘e, Sa̧a̧ Kaya.

⁴GASA WAN nɛ a̧a̧ nɛ ŋgayamɔ lɛŋ tɔ̧a̧: O wiwii-gbɛrɛ in o okoo-gbɛrɛ tɛ ya bee-gara Jerusalɛm woyo; wa tɛ sɔk nɛ de-a kasi nɛ dɔra yar nɛnɛ.

⁵Bee-gara saaye tɛ dun nɛ be-wiwii in o be-okoo nɛ tɛ ya de nɛ saa.

⁶GASA WAN nɛ a̧a̧ nɛ ŋgayamɔ lɛŋ tɔ̧a̧: Kà oi bíí nɛ ɓɔna zɔk'e, tɛ ŋgimbi'i, mɔ‘i nyɛm mɛ de na, war kɔ‘m, mi nyɛma mɛ de ha̧ mɔ‘i mɛ hɔ gba̧a̧. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ɔ̧ wen'i.

⁷GASA WAN nɛ a̧a̧ nɛ ŋgayamɔ lɛŋ tɔ̧a̧: Mi tɛ kpasi dukbíí kɔ‘m nɛ ya nɛ war daŋa-wese in nɛ war yee-wese.

⁸Mi tɛ kai wa piinɛ ɗoŋ wen ha̧ wa mɛ duk sɛn Jerusalɛm; wa tɛ ya nɛ dukbíí kɔ‘m, ɓɛɛ mi tɛ duk nɛ Sɔ̧ kɔ-wa de nɛ mɔ nɛ yuwar-a nyɛm nɛ ɗoŋ o ha̧a̧nú kɔ‘m.»

⁹GASA WAN nɛ a̧a̧ nɛ ŋgayamɔ lɛŋ tɔ̧a̧: «Ɛ̀nɛ̀ nɔ́ ŋgiɗi, ɛnɛ o wi nɛ zia wen nɛ o wi-tɔ̧-wen oi nú Sɔ̧ tɔ̧ɔ̧ sɔsɔɔ, ŋgimbi ee naŋ-tua ko GASA WAN wen dea-a woyo’ɛ.

¹⁰Wen nɛti, o bíí kpa so yí-mɔ oi tom kɔ-wa na, gɛnɛ mɔ-dai nyɔŋ so na mbɛt. O bíí nyɛm so mɛ yar nɛ de-a na wen zu o wisɛn, wen mi ee o bíí mɛ kii nú ŋmaa in o ŋmaa.

¹¹Ɓɛɛ kinii, mi beka de mɔ in dukbíí'ɛ hee mɔ'ɔ n'am dee so nɛti ga ɓɔna. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹²Mi tɛ de ha̧ ga̧a̧mɔ mɛ pɛsi dam fara lɛŋ; o fɔ-nyak-dɔ̧ɔ̧ tɛ wai, nù tɛ dɛm nyɔnɔ, kórò tɛ hɔ nɛ dɔka-a mbɛt; mɔɔ nɔ‘i lɛŋ mi tɛ ha̧ nɛ̀ mɔɔ-oi ha̧ dukbíí'ɛ.

¹³Hegɔ, nutua ko Juda in Israɛl, hee mɔ'ɔ nɛ fom baa so nɛ ɛnɛ mgbara o dɔka tugun bíí ga, nɛ hegɔ a̧‘m tɛ kpasi nɛ ɛnɛ, ɓɛɛ mɔ baa nɛ̀ ɛnɛ mgbara wa mbɛt. Ɛ̀nɛ̀ nɔ́ ŋgiɗi, k’ɛ́nɛ́ de kíì na.»

¹⁴GASA WAN nɛ a̧a̧ nɛ ŋgayamɔ lɛŋ tɔ̧a̧: «Mi taa mɛ usi bɔnɛ h’ɛ́nɛ́, wen nɛ o zɔmdáa k’ɛ́nɛ́ tu̧u̧ so see-am, ɓɛɛ mi de kana mɔ‘i. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧.

¹⁵Ɓɛɛ kinii, mi tɛ de nɛ demɔ in Jerusalɛm, ba nɛ nutua ko Juda nɛ oi-aa. Hegɔ k’ɛ́nɛ́ de kíì na!

¹⁶Mɔ n’ɛnɛ tɛ de nɛ mɔ'ɔ: ɛ̀nɛ̀ tɔ̧́ nɛ kpasawen ha̧ o ŋmaa, ɓɛɛ ɛ̀nɛ̀ gɔ́n kita nɛ yuwar-a ha̧ ga̧a̧mɔ mɛ duk mgbara'nɛ́ woyo.

¹⁷K’ɛ́nɛ́ ta mɔ wen dee ɗaŋmɔ in o ŋmaa na, k’ɛ́nɛ́ kan mɔ nɛ ndela na mbɛt, wen o mɔɔ nɔ‘i lɛŋ, mi sɛna. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen'i.»

¹⁸GASA WAN nɛ a̧a̧ nɛ ŋgayamɔ lɛŋ tɔ̧ɔ̧ ha̧‘m woyo:

¹⁹«Zima-yì tɛ naar fio-zɛ, tɛ mɔɔrɔ fio-zɛ, tɛ mɔɔrɔ-ɗoŋ-yiitoo fio-zɛ, in tɛ ɓu fio-zɛ tɛ duk nɛ mɔɔ-tortɛ, mɔɔ-desee in wese-yɔyɛ sɛn nutua ko Juda. Mɔ kpɔk, ɛ̀nɛ̀ kɔ̧́ nɛ kpasawen in ga̧a̧mɔ! GASA WAN a̧ tɔ̧.»

²⁰Wen nɛ GASA WAN nɛ a̧a̧ nɛ ŋgayamɔ lɛŋ tɔ̧ nɛ mɔ'ɔ: «O dukbíí nɛ dɔka-a, in o bíí gasa ye tɛ gar tɛnɛ,

²¹ɓɛɛ o bíí mɛ ɓii ye tɛ tɔ̧ ha̧ o wan mɛ ɓii-aa: ‹Ɛ̀nɛ̀ tɛ́ ɛ̀ɛ̀ kíí GASA WAN, ɛ̀ɛ̀ gásí Wan nɛ a̧a̧ nɛ ŋgayamɔ lɛŋ.› Ɓɛɛ wa kifa nú: ‹Ɛ́ɛ́ a̧ nɛ‘i!›

²²O dukbíí nɛtɛ nɛtɛ in o ŋgaya tugun bíí tɛ gar pii Jerusalɛm mɛ gasi Wan nɛ a̧a̧ nɛ ŋgayamɔ lɛŋ, mɛ kii GASA WAN.

²³GASA WAN nɛ̀ a̧a̧ nɛ ŋgayamɔ lɛŋ tɔ̧a̧: Ŋgimbi'i, bíí ɓu nɛ tɔ̧ nɛ nú nɛtɛ nɛtɛ tɛ kasi nú-laa ko be Juif kpɔk, ɓɛɛ tɔ̧ɔ̧ ha̧ a̧: ‹Ɛɛ kɔ̧ɔ̧ mɛ nɛ in'nɛ̀ɛ́ wen ɛɛ zia'e ndé, Sɔ̧ a̧a̧ in'nɛ̀ɛ́.› »