Read Northwest Gbaya ZAKARII 9 Bible Online

ZAKARII 9 - Northwest Gbaya bible

ZAKARII 9

¹Wen ko GASA WAN nɛ mɔ'ɔ: «Wen kɔ̧-a̧ nɛ̀ɛ̀ hɔ zika-nù Hadrak, ɓɛɛ si tik nɛ zu Damas, wen Damas, gasa ye nú Sirii nɛ ko GASA WAN, hee mɔ'ɔ nɛ o zuduk be Israɛl lɛŋ duk nɛ́ kɔ̧-a̧ ga.

²Hamat nɛ duk katɛ a̧ nɛ kpɔk mɔ, Tir in Sidɔŋ zu iŋamɔ kɔ-wa'i, kana nɛ o ye kɔ̧-a̧ mbɛt.

³O bíí Tir mboo gasa ŋgárá ye kɔ‘i, ɓɛɛ wa mɔi̧ sede hee fuunu ga; wa kaia lɔr hee kiiɓii ga.

⁴Ɓɛɛ kinii, GASA WAN tɛ kai o mɔɔ nɔ‘i lɛŋ, a̧ tɛ gbin ŋgárá ye'i a ɗɔɔ gba-tɔp, ɓɛɛ wee tɛ dɔ ye'i a nù.

⁵Tɛ zɔka ŋgamɔ‘i, kíì tɛ ba Askelɔŋ, bele tɛ zar Gaza in Ekrɔŋ mbɛt, wen a̧ bó nɛ̀ mɔɔ-e-nɛ-ta ɓɔna; wannu beka bo sɛn Gaza na, ɓɛɛ bíí beka ɔ ye Askelɔŋ ɓɔna mbɛt.

⁶O be-dàlà[11] tɛ ba fara sɛn Asdod; nɛ́ hegɔ a̧‘m tɛ de ha̧ ŋmaŋa-tɛ ko o be Filistii mɛ kaɗi nɛnɛ.

⁷Mi tɛ ba tɔk in ndiŋ nyɔŋmɔ[12] yinɛ kɔ̧ nú-wa; ɓɛɛ oi o bíí nɛ tɛ ɓɔn tɛ duk nɛ kɔ‘m. Wa tɛ duk hee ŋma bíí nú-gara ko Juda ga, ɓɛɛ Ekrɔŋ mbɛt tɛ ye zaŋ dukbíí kɔ‘m hee mɔ'ɔ nɛ o be Jebus dee so ga.

⁸Mi tɛ pɛm mɔ zik nɛ nù kɔ‘m wen zu o bíí nɛ ɓir fara'i; o wisɛn beka ɓir mɛ nasi nɛ dukbíí kɔ‘m ɓɔna, wen yí‘m a̧a̧ ɗoŋ wa.»

⁹Mɛ̀ dé nyɛŋɛ, boko be Siɔŋ! Mɛ̀ hé yílí nɛ desee, boko be Jerusalɛm! Kinii wannu kɔ-mɛ a̧ tɛ pii tɛ mɛ‘i! A̧ nɛ wi-de-mɔ nɛ yuwar-a, in wi-gan-zu mɔ. A̧ nɛ wi-mɔka-see nɛ daŋ nɛ tuifuu; nɛ́ be tuifuu a̧ a̧ daŋ.

¹⁰A̧ tɛ de, ɓɛɛ keekee-biro beka bo sɛn Efraim ɓɔna, in o nyaŋa-biro sɛn Jerusalɛm na mbɛt. A̧ tɛ gbin o kusaa-biro a nù, ɓɛɛ a̧ baa nɛ ga̧a̧mɔ tɛnɛ mgbara o tugun bíí. A̧ tɛ ɔ wan ku̧u̧naŋ nú gba-tɔp hɔ nú ɓii-aa, in tɛ nú nana-yì Efrat hɔ nduti-nù mɛ.

¹¹GASA WAN'e: «Ɓɛɛ war kɔ-mɛ, mi tɛ gbo o bíí kɔ-mɛ nɛ wa kaia so yaknɛ a kɔ̧ zɔɓɔ wan mɛ kɔ̧ kɔ̧, nɛ yì bo sɛnɛ na piinɛ ɗoŋ, wen zu nɔɔ-tɔk kɔ‘m in mɛɛ.

¹²Ɛnɛ o bara nɛ e ta pɛm nɛ gboo'nɛ́, ɛ̀nɛ̀ sí ɗoŋ si ye-ŋgárá nɛ‘i baa e ŋgɔn woyo; sɔsɔɔ mi ha̧a̧ nú, mi tɛ ha̧ mɔ zu ŋmaa war yiitoo h’ɛ́nɛ́ oi bɔnɛ n’ɛnɛ zɔka.

¹³Mi ŋgaŋa Juda nɛ̀ kusaa, ɓɛɛ mi ba Efraim e yí-a nɛ̀ góò. Siɔŋ, mi tɛ som o ŋgai ye kɔ-mɛ mɛ nɛ̀ɛ́ bi o wan mɛ Grɛs; wa tɛ de tom ha̧‘m hee mɔ'ɔ nɛ gba-paa de nɛ tom ha̧ wi-biro’ɛ ga.»

¹⁴GASA WAN tɛ tɛ̀ɛ́ duk zu o bíí kɔ̧-a̧, ɓɛɛ góò kɔ̧-a̧ tɛ gɔm hee pi̧i̧-kórò ga. GASA WAN Sɔ̧ tɛ dɔm zak, tɛ nɛnɛ nɛ gba búk-kórò nɛ̀ ká̧-zan-mɛ́-ɗɔɔ.

¹⁵GASA WAN nɛ a̧a̧ nɛ ŋgayamɔ lɛŋ tɛ pɛm o bíí kɔ‘i; a̧ tɛ pi̧ ɓɔrɔ yo nɛ o wisɛn kɔ-wa mbɔli hee ta-birndiŋ a̧ yoo wa ga; wa tɛ gbai tɔk tɛ o wisɛn kɔ-wa a nù hee dɔ̧ɔ̧ ga, kóó hee tɔk nɛ dun yèé-misi̧-gaŋmɔ nɛ‘i a tɛ zak fara-ɗafi-sɔ̧'ɛ ga.

¹⁶GASA WAN Sɔ̧ tɛ kpasi o bíí kɔ‘i wese'i, hee mɔ'ɔ nɛ wi-dai-sami kpasi nɛ mɔ-dai kɔ‘i’ɛ ga. Wa tɛ ya tɛ nù kɔ̧-a̧ tok nɛnɛ hee de ta nɛ tok tɛ laasɔ̧i̧-wan ko wannu’ɛ ga.

¹⁷Oee desee kɔ-wa wa! Oee de duka-a wa! Alkamaari in mbe dɔ̧ɔ̧ tɛ ha̧ ŋgai in desee ha̧ o be-ŋgaiwi gu nɛ o be-zɔŋa.