Read Northwest Gbaya MALACHII 1 Bible Online

MALACHII 1 - Northwest Gbaya bible

MALACHII 1

¹Wen ko GASA WAN nɛ tɔ̧ɔ̧ ha̧ Malachii[1] mɛ tɔ̧ ha̧ o be Israɛl nɛ mɔ'ɔ.

²GASA WAN tɔ̧a̧: «Mi kɔ̧ɔ̧‘nɛ́, ɓɛɛ ɛnɛ tɛɛ tɔ̧‘e, nɛ́ tɛ́ ge a̧‘m kɔ̧ɔ̧ nɛ wi ge? Bo nɛ Esau duka so nɛ baka ko Jakob na? Mi sɛna so Esau, ɓɛɛ mi kɔ̧ nɛ Jakob? Nɛ GASA WAN a̧ tɔ̧. Mi ɗaŋa o ye ko o bezaŋ Esau sɛn mgbara kaya mɛ, ɓɛɛ nù kɔ-wa kifi nɛ fara-yaa ko o gbóò.»

⁴O be Edɔm nɔ‘i nyɛma mɛ tɔ̧‘e: «Wa ɗaŋa ɛɛ, ɓɛɛ ɛɛ tɛ mbo o ye k’ɛɛ nɛ ɗaŋa so'i woyo.» Ɓɛɛ GASA WAN nɛ a̧a̧ nɛ ŋgayamɔ lɛŋ kifi nú: «Wa a̧ mbó o ye nɔ‘i woyo, mi tɛ gbin a nù lɛŋ. Wi tɛ gɔn nin a zu wa'e, ‹Nù ko o wi-ɗaŋ nɛ nyimsea ko Sɔ̧ duk zu wa kpoo nɛ kpoo.›

⁵«Ɛnɛ o be Israɛl, ɛnɛ tɛ zɔk mɔ‘i, ɓɛɛ ɛnɛ tɛ tɔ̧‘e: ‹GASA WAN usa ŋgai kɔ‘i yak zu gbìsí-nù ko o be Israɛl.› »

⁶«Bem tu̧ nɛ tɛ dáà kɔ‘i; wi-de-tom yu nɛ wan kɔ‘i mbɛt. Ɓɛɛ kà‘m duk nɛ dáà k’ɛ́nɛ́, tu̧u̧-tɛ-mɔ k’ɛ́nɛ́ pii tɛ‘m a̧a̧ de? Kà‘m duk nɛ wan k’ɛ́nɛ́, ɓɛɛ yuu kíí tɛ‘m a̧a̧ de? Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ ha̧ o wi-ɗafi-sɔ̧. Ɛ́nɛ́ e nin-am tɛ geemɔ, ɓɛɛ ɛnɛ tɛɛ tɔ̧‘e: ‹Nɛ tɛ ge mɔ ge ɛ̀ɛ̀ e nɛ nin'nɛ́ tɛ geemɔ ge?›

⁷Mɛ nɛ wen n’ɛnɛ ba nɛ o ndiŋ nyɔŋmɔ e fara-ɗaf'am. Ɓɛɛ ɛnɛ tɔ̧ɔ̧ woyo'e: ‹Ɛɛ ɗaŋa bɔɔ nin'nɛ́ tɛ ge mɔ ge?› Nɛ tɛ tɔ̧a̧-a̧‘e: ‹Fara-e-nyɔŋmɔ ha̧ GASA WAN nɛ́ geemɔ.›

⁸O saɗi nɛ yí bo na, o wan nɛ nɛ́ kum, in o wan nɛ ɔ nɛ zɛɛ n’ɛnɛ ba nɛnɛ si fara-ɗafi-sɔ̧, bo nɛ ɗaŋmɔ na? K’ɛ̀nɛ̀ ba wa nɛnɛ mɛ ha̧ ha̧ gasawi zu nù k’ɛ́nɛ́, a̧ tɛ kpɛk'nɛ́ nɛ desee nde? GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

⁹«Kinii, ɛ̀nɛ̀ áí nú ha̧ Sɔ̧ mɛ de ko h’ɛnɛ; ɓɛɛ k’ɛ̀nɛ̀ ha̧ o pɛrti mɔɔ nɔ‘i ha̧ a̧, a̧ tɛ kpɛk so ɛnɛ nde? GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹⁰Nyɛma so ha̧ ŋma bíí mgbara'nɛ́ mɛ kpe nú tua fara-ɗafi-sɔ̧ wen k’ɛ́nɛ́ tɛɛ ye wee zu fara-ɗaf'am sɔɔ gee. Mi kpa desee zu'nɛ́ na, kóó tikiɗi; in ha̧a̧mɔ mɛ er'nɛ́ de tɛ‘m ɓɔna mbɛt. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹¹Nɛ̀ war daŋa-wese hɔ yee-wese mɛ, nin-am nɛ zɔm mɔ mgbara o tugun bíí dam fara lɛŋ; wa dɔ nɛ fuu-nyama ha̧‘m, ha̧ nɛ mɔ nɛ ɔ sa̧a̧, wen nin-am ɔ gasa mgbara o tugun bíí. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹²Ɓɛɛ k’ɛ́nɛ́, ɛnɛ fɛŋ nɛ nin-am tɛ tɔ̧a̧-a̧‘e, ‹Fara-e-nyɔŋmɔ ha̧ GASA WAN nɛ́ ndiŋ fara, ɓɛɛ o nyɔŋmɔ nɛ‘i e zu-a'i nɛ geemɔ.›

¹³Ɛnɛ tɔ̧a̧: ‹Zɔk ŋma mɔɔ-nyɛr wa!› Ɓɛɛ ɛnɛ e'm tɛ geemɔ. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. Ɛ́nɛ́ bá nɛ o saɗi-zuzu in o wan nɛ nɛ́ kum ká bá nɛ̀ o wan nɛ ɔ nɛ zɛɛ ha̧ ha̧‘m. Ɛnɛ taa k’ɛ́nɛ́‘e, mi tɛ kpɛk ha̧a̧mɔ nɔ‘i k’ɛ́nɛ́‘i? GASA WAN a̧ tɔ̧ wen’ɛ.

¹⁴Fom a̧ ba wi-de-saka-yí nɛ a̧a̧ nɛ ŋmaŋa saɗi mgbara o mɔ-dai kɔ̧-a̧ n'aa ha̧a̧ nú mɛ ha̧ ha̧‘m, ɓɛɛ nɛɛ ba nɛ saɗi nɛ tɛ-a ɗaŋa mɛ gbɛ ɗafi nɛ‘m. Wen mi nɛ gasa wannu, nɛ̀ o tugun bíí de zɛŋ nɛ nin-am na. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen'i.»