Read Northwest Gbaya MALACHII 2 Bible Online

MALACHII 2 - Northwest Gbaya bible

MALACHII 2

¹«Ɛ́nɛ́, o wi-ɗafi-sɔ̧, mgbák wen’ɛ nɛ k’ɛ́nɛ́.

²K’ɛ̀nɛ̀ nɛ́ zia na, k’ɛ̀nɛ̀ nɛ́ ee see'nɛ́ wen zɔna nin-am na, mi tɛ fom'nɛ́, mi tɛ fom o de toka yoŋgo k’ɛ́nɛ́ mbɛt. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. Mi tɛ fom'nɛ́ wen ɛ́nɛ́ lɛŋ kasi wen kɔ‘m na.

³Mi tɛ de ŋgamɔ in o bezaŋ‘nɛ́; mi tɛ a̧r o ɗɔr saɗi-ɗafi-sɔ̧ k’ɛ́nɛ́ yo nɛ yí‘nɛ́, ɓɛɛ wa tɛ kai'nɛ́ nɛ oi-aa a taŋ,

⁴h’ɛ́nɛ́ mɛ iŋ‘e nde, nɛ mi a̧ tɔ̧ɔ̧ wen'i, wen ha̧ nɔɔ-tɔk kɔ‘m in Levii mɛ duk siti. Nɛ mi GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

⁵«Nɔɔ-tɔk kɔ‘m in Levii'i nɛ duka-kpasa in duka-a tɛ ga̧a̧mɔ. Nɛ mɔ‘i a̧‘m ha̧a̧ ha̧ a̧, in yuu kíí tɛ‘m mbɛt.

⁶A̧ duka so mɛ usi nɛ́ kpasawen; ndela bó kɔ̧ nú-a na. A̧ nɛ̀ɛ́ nɔ in am nɛ mboozu nɛ yuwar-a. A̧ dee ha̧ o bíí nɛ dɔka-a mɛ zik tɛ e ɗaŋmɔ duk.

⁷Wen mɛ nɛ tɛ tɔ̧ɔ̧-wen ko o wi-ɗafi-sɔ̧ a̧ o bíí tɛ iŋ nɛ yuwar ko Sɔ̧. Wí nɛ́ sɛn tɛ wa mɛ kpa yambamɔ wen wa nɛ o betom ko GASA WAN nɛ a̧a̧ nɛ ŋgayamɔ lɛŋ.

⁸«Ɓɛɛ k’ɛ́nɛ́, ɛnɛ a̧ra̧ tɛ yuwar kɔ‘m; usamɔ k’ɛ́nɛ́ dee ha̧ o bíí nɛ dɔka-a mɛ kɔ̧ naŋ. Ɛnɛ ɗaŋa nɔɔ-tɔk kɔ‘m in Levii. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

⁹Ɓɛɛ hee mɔ'ɔ n’ɛnɛ ee yuwar kɔ‘m duk, ɓɛɛ ɛnɛ zɔk bíí hee ŋmaa ga na, mi tɛ de h’ɛ́nɛ́ mɛ duk nɛ gee o fɛŋa bíí mgbara dukbíí Israɛl.»

¹⁰Bo nɛ ɛɛ lɛŋ nɛ bem ko kpɔk dáà na nde? Bo nɛ Sɔ̧ kpɔk a̧ dee yɛ na nde? Ɓɛɛ wen ge s’ɛɛ e kiri in o ŋmaa, ɗaŋ nɛ nɔɔ-tɔk ko Sɔ̧ in o zɔmdáa k’ɛɛ ge?

¹¹Juda gbina ha̧a̧nú kɔ‘i; wa dee gasa ɗaŋmɔ sɛn Jerusalɛm in nú Israɛl lɛŋ. Wa ɗaŋa sa̧a̧-fara nɛ GASA WAN kɔ̧ɔ̧ so nyɛmna, tɛ baa o okoo nɛ nɛ́ ɗoŋ sɔ̧ ko o gɔni-duk nɛ kóò.

¹²Wi nɛ de mɔ hegɔ, GASA WAN a̧ fo a̧ in o bezaŋ-aa lɛŋ yinɛ nutua ko Jakob in wi nɛ tɛ ɗafi GASA WAN nɛ a̧a̧ nɛ ŋgayamɔ lɛŋ oi nú wi’ɛi mbɛt.[2]

¹³«Ŋma mɔ n’ɛnɛ de woyo nɛ mɔ'ɔ. O aia-nú, o gɔfamɔ in miikɔ̧a k’ɛ́nɛ́ kpee zu fara-ɗafi GASA WAN, wen n'aa kpɛk o mɔ n’ɛnɛ ha̧ ha̧ a̧ nɛ de-a ɓɔna.

¹⁴Ɓɛɛ ɛnɛ tɔ̧‘e: ‹Wen ge a̧ kɔ̧ bɔɔ na ge nde› na? Wen GASA WAN zɔka ha̧a̧nú kɔ-mɛ ha̧ kóò nɛ mɛ baa nɛ gbɛ̧-naŋ; kóò‘i duka so nɛ gbama-yari kɔ-mɛ nɛ mɛ hoka, ɓɛɛ nɛ mɔ'ɔ nɛ mɛ ee a̧ duk.

¹⁵Bo nɛ Sɔ̧ dee h’ɛ́nɛ́ mɛ duk nɛ kpɔk bíí tɛ kiitɛ in tɛ ɔmi na? Ɓɛɛ kpɔk bíí‘i kii nɛ ge? A̧ kii nɛ bezaŋ nɛ Sɔ̧ tɛ ha̧ ha̧ a̧. Hegɔ, mɛ̀ zɔ́k tɛ-mɛ nɛ tɛ-mɛ, ɓɛɛ ká mɛ e kóò nɛ mɛ baa nɛ gbɛ̧-naŋ duk na.

¹⁶GASA WAN Sɔ̧ ko Israɛl tɔ̧a̧‘e, wi nɛ ndaka kóò kɔ‘i zu sɛnmɔ dee ŋgamɔ, wen a̧a̧ zu a̧. Ɛ̀nɛ̀ zɔ́k tɛ‘nɛ́ nɛ tɛ‘nɛ́, ɓɛɛ k’ɛ́nɛ́ gbin ha̧a̧nú k’ɛ́nɛ́ na. GASA WAN nɛ a̧a̧ nɛ ŋgayamɔ lɛŋ a̧ tɔ̧ hegɔ.»

¹⁷Tɛ GASA WAN mbɔia tɛ zia wen nɔ‘i k’ɛ́nɛ́‘i kaɗi. Ɓɛɛ ɛnɛ‘e nde: «Nɛ ge ɛɛ dee bɔɔ in GASA WAN mɛ mbɔi ge?» Mɔ‘i n’ɛnɛ dea'i nɛ tɔ̧a̧-a̧‘e nde: «Kóó bíí dee so ɗaŋmɔ, GASA WAN zɔk a̧ hee de bíí ga, usi nɛ kɔ̧ɔ̧mɔ kɔ̧-a̧ ha̧ wi’ɛi», ɓɛɛ ɛnɛ tɔ̧ɔ̧ woyo'e nde: «Sɔ̧, wi-de-mɔ nɛ yuwar-a'i a̧a̧ de?»