Read Northwest Gbaya MALACHII 3 Bible Online

MALACHII 3 - Northwest Gbaya bible

MALACHII 3

¹Kifa-nú ko GASA WAN nɛ a̧a̧ nɛ ŋgayamɔ lɛŋ nɛ mɔ'ɔ: «Mi tom nɛ betom mɛ ɗafi yuwar ha̧‘m. Gasa Wan n’ɛnɛ kii'i tɛ ye kɔ̧ Tua kɔ‘i kinii; betom n’ɛnɛ pɛm, nɛ tɛ we ɗoŋ nɔɔ-tɔk kɔ‘m in'nɛ̀ɛ́‘i nɛ mɔ'ɔ nɛ tɛ'ɛ.»

²Nɛ o'o tɛ yor ti a wese n'aa tɛ tɛ nɛnɛ‘i o? Nɛ o'o tɛ duk ti a̧ wese nɛ‘i tɛ zɔk nɛ a̧ o? Wen a̧ tɛ duk hee wee-dɔra ko wi-dui-mɔ in sa̧-ndiŋ ko wi-fɔr-mɔ ga.

³A̧ tɛ duk hee wi-nɔi̧-boi in wi-dui-mɔ ga. A̧ tɛ de ha̧ war-tɛ o bezaŋ Levii mɛ sa̧; wa tɛ ya hee lɔr in bu-mbɔi nɛ‘i nɔi̧a ga, ɓɛɛ wa tɛ ha̧ ha̧a̧mɔ ha̧ GASA WAN nɛ yuwar-a.

⁴Hegɔ, ha̧a̧mɔ ko Juda in Jerusalɛm tɛ de tɛ GASA WAN hee mɔ'ɔ nɛ dee so nɛti tɛ o kuti ŋgimbi ga.

⁵«Mi tɛ ɗɔŋ pii katɛ‘nɛ́ wen gɔna kita; hɔa-a kɔ‘m hegɔ, mi tɛ tɔ̧ wen zu o wi-de-mɔɔ-kifi, o wi-de-dàlà in o wi-kan-mɔ nɛ ndela, ɓɛɛ mi tɔ̧ɔ̧ wen a zu o wi-nyɔŋ-sede-tom ko o wi-de-tom, zu o wi-ɓar-mɔ er o ko-gera in o be-oi, ká bá nɛ̀ o wi-de-ŋgamɔ in o gɛnɛ mbɛt. O wi nɔ‘i lɛŋ yu'm na. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

⁶«Kɔ‘m, mi GASA WAN, mi kpai na, ɓɛɛ k’ɛ́nɛ́, ɛ́nɛ́ kana nɛ mgbák bezaŋ Jakob hɔ kinii.

⁷Tɛ ŋgimbi ko o zɔmdáa k’ɛ́nɛ́, ɛ́nɛ́ a̧ra̧ nɛnɛ e nɛ o geŋa kɔ‘m duk, ɛ́nɛ́ kasi o geŋa nɔ‘i na. Ɛ̀nɛ̀ píí ɗoŋ pii tɛ‘m, ɓɛɛ mi tɛ si ɗoŋ tɛ‘nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ hegɔ. Ɓɛɛ ɛ́nɛ́ tɛ̀ɛ̀ kifi k’ɛ́nɛ́‘e nde: ‹Ɛɛ tɛ pii bɔɔ pia ɗoŋ‘i hee ge nde?›

⁸Mi'e nde, bíí tɛ ɔr Sɔ̧ nde? Ɛ̧ɛ̧ n’ɛnɛ zu̧u̧ bɔɔ mi’ɛ, ɓɛɛ ɛ́nɛ́ tɛ̀ɛ̀ kifi tɔ̧‘e: ‹Ɛɛ ɔra'nɛ́ tɛ ge?› Ɛnɛ zu̧‘m tɛ ha̧a̧-zu-mɔ in ndɛma mɔ ha̧‘m.

⁹Fom a̧a̧ zu'nɛ́ wen ɛnɛ ɔr nɛ‘m, ɛnɛ dukbíí'ɛ nɛ oi-aa lɛŋ.

¹⁰Ɛ̀nɛ̀ kai o zu-mɔ nɛ dama-a nɛnɛ a kɔ̧ Tua kɔ‘m, wen ha̧ nyɔŋmɔ mɛ dɔk kɔ̧ Tua'i ɓɔnsɛnɛ. Ɛ̀nɛ̀ we'm tɛ mɔ‘i ɛnɛ zɔk; mi tɛ hú̧í̧ yiwese ha̧ nɛ de sɔnti h’ɛ́nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹¹Mi tɛ dor o kokoɗo-mɔ ká wa tɛɛ ɗaŋ o nyɔnɔ in o fɔ-nyak-dɔ̧ɔ̧ k’ɛ́nɛ́. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹²O tugun bíí lɛŋ tɛ zɔn'nɛ́, wen nù k’ɛ́nɛ́ tɛ dun nɛ̀ demɔ. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.»

¹³GASA WAN tɔ̧a̧: «Tɔ̧ɔ̧-wen k’ɛ́nɛ́ pii tɛ‘m ɔ ŋgaya nyɛmna. Ɓɛɛ ɛ́nɛ́ tɛ̀ɛ̀ tɔ̧‘e: ‹Nɛ ge ŋga wen ge ɛ́ɛ́ tɔ̧ɔ̧ zu'nɛ́ ge?›

¹⁴Ɛnɛ tɔ̧‘e, tom ha̧ Sɔ̧ nɛ tom takaɗi; nɛ ge a'i tɛ kpa oi kasa geŋa in zima-mɔ ti GASA WAN nɛ a̧a̧ nɛ ŋgayamɔ lɛŋ ge?

¹⁵Ɛnɛ tɔ̧ mbɛt'e, o wi-ŋmaŋ-tɛ ya kɔ‘i nɛ desee, mɔ ko o wi-ɗaŋ, dɔk dɔk siti; wa we Sɔ̧, ɓɛɛ ŋma mɔ de wa na.»

¹⁶Nɛ hegɔ a̧ o wi-yu-sɔ̧ tɔ̧ɔ̧ in o ŋmaa. GASA WAN yeŋa zer, ɓɛɛ zii mɔ lɛŋ nɛ wa tɔ̧a̧; nɛ mɔ'ɔ nɛ wa yɔra kalata nin o bíí lɛŋ nɛ yuu GASA WAN in nɛ zɔna nin-a ɓɔn ti a̧.

¹⁷Ɓɛɛ GASA WAN nɛ a̧a̧ nɛ ŋgayamɔ lɛŋ tɔ̧: «Wese kɔ‘m n'am ɗafi'i be tɛ̀ɛ́ hɔ, o wi nɔ'ɔ tɛ ya nɛ o mgbák bíí kɔ‘m. Mi tɛ ba ŋgamɔ zu wa yinɛ hee mɔ'ɔ nɛ dáa-wan-bem ba nɛ ŋgamɔ yinɛ zu bem kɔ‘i, wan nɛ mbo zu ha̧ a̧'ɛ ga.

¹⁸Ɓɛɛ tɛ mɔ‘i woyo, ɛnɛ tɛ zɔk war mɔ nɛ tɛ kpa wi-ɗaŋ in wi-de-mɔ nɛ yuwar-a, mɔ nɛ tɛ kpa wi-de-tom ha̧ Sɔ̧ in wi nɛ de tom ha̧ Sɔ̧ na.

¹⁹«Wese'i nɛ tɛ‘i tɛ duk hee wee-dɔra ga; o wi-ŋmaŋ-tɛ in wi-ɗaŋ lɛŋ tɛ ya hee kora zɔ̧ ga. Wese'i nɛ tɛ‘i tɛ dɔ wa a nù kór-kór, nɛ‘i beka zɔk gee zɔka kunin-wa na. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

²⁰Ɓɛɛ k’ɛ́nɛ́, o wi-yu'm, ɛnɛ tɛ zɔk deemɔ nɛ yuwar-a kɔ‘m nɛ tɛ tok zu'nɛ́ hee daŋa-wese-tuyɛ nɛ a tɛ-wi hai nɛ tɛ-wi’ɛ ga, ɓɛɛ ɛnɛ tɛ hɔ zaŋgule hee be ndai nɛ gbo zan mɛ nyɔŋ mɔ'ɛ ga.

²¹Wese n'am ɗafi tɛnɛ‘i be tɛ̀ɛ́ hɔ, ɛnɛ tɛ i̧si̧ o wi-ɗaŋ hee bùk ga nɛ naŋ‘nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

²²«Tɛ‘nɛ́ a̧ mbaŋ ɗoŋ heembea ko Moisɛ, wi-de-tom kɔ‘m; mi ha̧a̧ so o heembea in o geŋa ha̧ a̧ zu kaya Hɔrɛb wen dukbíí Israɛl lɛŋ.

²³«Ɓɛɛ kinii, mi tɛ tom wi-tɔ̧-wen oi nú‘m Elii h’ɛ́nɛ́ nɛti sɛka wese kɔ‘m hɔa. Wese'i tɛ duk nɛ gasa wese-kundi-ari.

²⁴A̧ tɛ ɗafi mgbara o bem in o dáà, wen ká‘m tɛ̀ɛ́ ɗaŋ nù'ɛ.»