Read Northwest Gbaya MATTHIEU 10 Bible Online

MATTHIEU 10 - Northwest Gbaya bible

MATTHIEU 10

¹Jesu saa o ŋgaiwi kɔ‘i ɓu-zua-yiitoo, ɓɛɛ sur wa mɛ ndak o ɗaŋ-sɔ̧ yinɛ tɛ bíí in ha̧ wa mɛ kpasi o wi-zɛɛ lɛŋ in o wi nɛ̀ a̧a̧ nɛ̀ nyimmɔ nɛtɛ nɛtɛ.

²Nin o betom nɔ‘i ɓu-zua-yiitoo'i nɛ́ mɔ'ɔ: kuti-a nɛ́ Simɔŋ (nɛ̀ wa sa'e Pierre), in Andre nya-a̧; hɔ-ɗoŋ-aa nɛ́ Jak bem ko Zebedee, in Jean nya-a̧;

³ká bá nɛ̀ Filip, Bartelemi, Tomas in Matthieu wi-ba-garama; Jak bem ko Alfe, in Tadee;

⁴sɛka Simɔŋ nɛ̀ wa sa'e mgbák kpasa be-nù in Iskariot wi nɛ̀ ee ɗɔra tɛ Jesu.

⁵Jesu toma o ŋgaiwi kɔ‘i ɓu-zua-yiitoo nɔ‘i yaknɛ ɓɛɛ tɔ̧ ha̧ wa: «K’ɛ́nɛ́ ye tɛ nù ko o gɔni-dùk na, in ŋma ye nú Samarii na mbɛt,

⁶ɓɛɛ ɛ̀nɛ̀ nɛ́ nutua ko o be Israɛl nɛ̀ ya hee o sami nɛ̀ yɔa ga.

⁷Ɛ̀nɛ̀ tɔ̧́ wen nɛ̀ yuwar nɛnɛ ha̧ wa'e: ‹Wan mɛ yiwese hɛɗa kaɗi!›

⁸Ɛ̀nɛ̀ kpásí o wi-zɛɛ, ɛ̀nɛ̀ tún o fio, ɛ̀nɛ̀ dé ha̧ tɛ o wi-doko mɛ sa̧, ɛ̀nɛ̀ ndák o ɗaŋ-sɔ̧ yinɛ tɛ bíí. Ɛ́nɛ́ kpàá mɔ géè, ɛ̀nɛ̀ há̧ mɔ géè mbɛt.

⁹K’ɛ́nɛ́ ba lɔr kóó bu-sede, kóó be kɔya sede kpo pi̧ kɔ̧ zibaa k’ɛ́nɛ́ na.

¹⁰K’ɛ́nɛ́ ba ŋgoɓo nɛnɛ na, k’ɛ́nɛ́ ba ŋma laa gbam nɛ̀ i̧i̧ tɛ‘nɛ́‘i na, kà bó nɛ̀ ndárà in dɔra na mbɛt, wen wi-de-tom tɛ kpa kànà mɔɔ-nyɔŋ oi tom kɔ‘i.

¹¹«Ŋgimbi n’ɛ̀nɛ̀ tɛ ye ŋma gasa ye, kóó geɗek ye, ɛ̀nɛ̀ ák mɔ ha̧ wa mɛ usi fara ko ŋma bíí nɛ̀ nyɛma mɛ kpɛk'nɛ́, ɓɛɛ ɛ̀nɛ̀ zír tɛ̀ kɔ̧-a̧ hɔ ŋgimbi n’ɛ̀nɛ̀ tɛ yak.

¹²Ɓɛɛ k’ɛ̀nɛ̀ nɛ́ yee kɔ̧́ tua ko ŋma bíí, ɛ̀nɛ̀ tɔ̧́‘e, ga̧a̧mɔ a̧ dúk in wi’ɛi.

¹³Kà o wan-tua'i nɛ́ duka nɛ́ wi-de-demɔ mɛ kpɛk'nɛ́, ɓɛɛ ga̧a̧mɔ k’ɛ́nɛ́ a̧ dúk zu wa; ɓɛɛ kà wa nɛ́ kpɛka'nɛ́ na, ɓɛɛ nɛ̀ ga̧a̧mɔ k’ɛ́nɛ́ a̧ píí ɗoŋ tɛ‘nɛ́.

¹⁴Kà wa nɛ́ bɛ̧ɛ̧ kpɛka'nɛ́, kà wa nɛ́ bɛ̧ɛ̧ zia wen k’ɛ́nɛ́ mbɛt, ɓɛɛ ɛ̀nɛ̀ gbó kɔ̧́ tua'i, kóó saaye'i yak, ɓɛɛ tɛ̀ yaka-a k’ɛ́nɛ́, ɛ̀nɛ̀ mgbɔ́ fuunu naŋ‘nɛ́ a nù fara'i.

¹⁵Nɛ́ kpasawen a̧‘m tɔ̧ h’ɛ́nɛ́: sɛn wese-kita, kita tɛ ŋgai zu ye'i gan ko o bíí Sɔdɔm in Gɔmɔr.»

¹⁶«Ɛ̀nɛ̀ zii, mi tom ɛ́nɛ́ nɛnɛ hee o sami mgbara o gbóò ga. Kɔ̧́ zaŋ‘nɛ́ a̧ gɔ́n hee gɔ́k ga, ɛ̀nɛ̀ yá nɛ̀ ga̧a̧-a̧ hee o gbaku̧i̧ ga.

¹⁷Ɛ̀nɛ̀ dé hakilo, wen o bíí tɛ e'nɛ́ ti o gasa fara-gɔn-kita. Wa tɛ gusi'nɛ́ kɔ̧ tua-mɔi̧a-a kɔ-wa.

¹⁸Wa tɛ kai'nɛ́ nɛnɛ ti o wi-duk-zu zika-nù in o wannu wen zu'm; mɔ‘i tɛ duk nɛ́ mɔɔ-sedaako yí-wa in o gɔni-dùk.

¹⁹Ŋgimbi n’ɛnɛ tɛ yor fara-kita, k’ɛ́nɛ́ ta mɔ wen wen n’ɛnɛ tɛ tɔ̧ in yuwar tɔ̧a̧-a̧ na mbɛt, wen ɛnɛ tɛ kpa mɔ n’ɛnɛ tɛ tɔ̧ tɛ ŋgimbi-a.

²⁰Wen bó nɛ́ ɛnɛ'ɛ tɛ tɔ̧ wen na, ɓɛɛ nɛ́ Sa̧a̧ Ɔmi ko Dáà k’ɛ́nɛ́ nɛ̀ duk tɛ‘nɛ́ a tɔ̧ wen.

²¹«O nya-wi tɛ e ɗɔra tɛ ŋmaa ha̧ bíí mɛ gbɛ wa yinɛ, dáa-wan-bem tɛ e ɗɔra tɛ bem kɔ‘i mbɛt. O bem tɛ kur zu dáà in nàà de nɛnɛ ha̧ wa mɛ fe.

²²O bíí lɛŋ tɛ sɛn'nɛ́ wen zu'm, ɓɛɛ wi nɛ̀ tɛ nɔ ŋgiɗi hɔ sɔŋkur-aa tɛ kpasi.

²³Kà o bíí ŋma ye nɛ́ ndaka'nɛ́, ɓɛɛ ɛ̀nɛ̀ yú mɔ si ŋma mbe ye. Nɛ́ kpasawen a̧‘m tɔ̧ h’ɛ́nɛ́: ɛ́nɛ́ beka yar dam tɛ o ye Israɛl nɛti ha̧ Bem ko bíí mɛ pii ɗoŋ na.»

²⁴«Wi-yambi-mɔ gan wan-usi-mɔ kɔ‘i na, ɓɛɛ wi-de-tom gan wan-tom kɔ‘i na mbɛt.

²⁵Nyɛma so ha̧ wi-yambi-mɔ mɛ duk hee wan-usi-mɔ kɔ‘i ga, in ha̧ wi-de-tom mɛ duk hee wan-tom kɔ‘i ga mbɛt. Kà wa nɛ́ saa wan-tua'e Bɛlzebul, wanye ko o ɗaŋ-sɔ̧ wó, ɓɛɛ bó nɛ́ wa tɛ tɔ̧ ɗaŋ wen zu o bíí ko wi’ɛi gan na nde?»

²⁶«Hegɔ, k’ɛ́nɛ́ de kíì bíí na. Ŋma mɔ nɛ̀‘i te kpe zu-a nɛ̀ beka gbo zan na, bo na; ŋma mɔ nɛ̀ tɛ hu̧si nɛ̀ bíí beka iŋ na, bo na mbɛt.

²⁷Mɔ n'am tɔ̧ h’ɛ́nɛ́ nɛ̀ ti tum, ɛ̀nɛ̀ tɔ̧́ k’ɛ́nɛ́ tɛ wese. Mɔ nɛ̀ wa fu̧i̧ kɔ̧́ zer'nɛ́, ɛ̀nɛ̀ híɗí k’ɛ́nɛ́ hiɗi nɛ̀ ŋgɔn ha̧ bíí mɛ zii.

²⁸O wi nɛ̀ gbɛ kiitɛ-wi, ɓɛɛ nɛ̀ bó nɛ̀ ŋgai mɛ gbɛ sɔ̧-tɛ-wi na, k’ɛ́nɛ́ yu wa na. Ɓɛɛ ɛ̀nɛ̀ yú nɛ́ wi nɛ̀ a̧a̧ nɛ̀ ŋgai mɛ pi̧ kiitɛ-wi in sɔ̧-tɛ-wi mbɛt kɔ̧ wee Gehɛn.

²⁹Bó nɛ wa ɗɔr sosor yiitoo tɛ dálà na nde? Ɓɛɛ ŋma kpɔk nɛ̀ tɛ tik nù yambali, ɓɛɛ ka Dáà k’ɛ́nɛ́ iŋ na, bo na.

³⁰Kóó nɛ́ buma-zu'nɛ́, a̧ tɔra dam lɛŋ!

³¹Wen hegɔ, k’ɛ́nɛ́ de kíì na. Ɛ́nɛ́ gana gan o sosor nyɛmna.»

³²«Kóó o ndé nɛ̀ tɔ̧ ti o bíí‘e, wi nɛ́ bíí kɔ‘m, mi mbɛt mi tɛ tɔ̧ ti Dáà kɔ‘m nɛ̀ a̧a̧ yiwese'e, a̧ nɛ́ bíí kɔ‘m.

³³Ɓɛɛ kóó o ndé nɛ̀ tɛ kaf'am ti o bíí, mi tɛ kaf'a ti Dáà kɔ‘m nɛ̀ a̧a̧ yiwese mbɛt.»

³⁴«K’ɛ́nɛ́ ta k’ɛ́nɛ́‘e ndé, mi baa nɛ́ ga̧a̧mɔ tɛnɛ zaŋnu na. Bó nɛ́ mi baa nɛ́ ga̧a̧mɔ tɛnɛ na, mi baa nɛ́ gba-paa tɛnɛ.

³⁵Wen mi tɛɛ mɛ kɛ̧ mgbara bem in dáà kɔ‘i, mgbara boko-bem in nàà kɔ‘i, mgbara be-for mɛ kóò in for-wi mɛ kóò.

³⁶Sɛnmɔ tɛ ye mgbara kóó-wi in o ŋmaa.

³⁷«Wi nɛ̀ kɔ̧ɔ̧ dáà kɔ‘i, kóó nàà kɔ‘i gan am, nyɛm wen duka bíí kɔ‘m na. Wi nɛ̀ kɔ̧ɔ̧ bem kɔ‘i mɛ be wiwii-a kóó be-okoo-a gan am, nyɛm wen duka bíí kɔ‘m na mbɛt.

³⁸Wi nɛ̀ tui te-diŋa kɔ‘i mɛ nɛ̀ ɗoŋ am na, nyɛm wen duka bíí kɔ‘m na.

³⁹Wi nɛ̀ kɔ̧ɔ̧ mɛ duk kpasa tɛ fe, ɓɛɛ wi nɛ̀ fe wen zu'm tɛ kpasi.»

⁴⁰«Wi nɛ̀ kpɛka'nɛ́ kpɛka nɛ̀‘m, ɓɛɛ wi nɛ̀ kpɛka'm kpɛka nɛ́ wi nɛ̀ toma'm tɛnɛ.

⁴¹Wi nɛ̀ kpɛka ŋma wi-tɔ̧-wen oi nú Sɔ̧, wen n'aa iŋa'e nɛ́ wi-tɔ̧-wen oi nú Sɔ̧ a'i kpɛk wó, tɛ kpa mɔɔ-oi-tom ko wi-tɔ̧-wen oi nú Sɔ̧; ɓɛɛ wi nɛ̀ kpɛka ŋma wi-de-mɔ nɛ̀ yuwar-a, wen n'aa iŋa'e nɛ́ wi-de-mɔ nɛ yuwar-a a'i kpɛk wó, tɛ kpa mɔɔ-oi-tom ko wi-de-mɔ nɛ̀ yuwar-a.

⁴²Nɛ́ kpasawen a̧‘m tɔ̧ h’ɛ́nɛ́: kóó o ndé nɛ̀ tɛ ha̧ be gɛ̧ɛ̧ yì ha̧ ŋma bem mgbara o ŋgaiwi kɔ‘m nɔ'ɔ, wen a̧ nɛ́ ŋgaiwi kɔ‘m wó, tɛ kpa mɔɔ-oi-tom kɔ‘i.»