Read Northwest Gbaya MATTHIEU 16 Bible Online

MATTHIEU 16 - Northwest Gbaya bible

MATTHIEU 16

¹O Fariziɛn in o Saduseɛn nɛ̀ɛ́ tɛ Jesu ha̧ wa mɛ ba wen zaŋ-aa. Wa tɔ̧ɔ̧ ha̧ a̧ mɛ de ŋma mɔɔ-kifi nɛ̀ tɛ́ nɛ̀ yiwese ha̧ wa mɛ zɔk.

²Ɓɛɛ Jesu kifi nú ha̧ wa: «Mɛ́ ga̧a̧mɔ ɛ́nɛ́ tɔ̧a̧‘e, yí-zan nɛ̀ gbɛ̧ɛ̧ bereŋ'ɛ, kaara tɛ yor mɔɔsa̧.

³Ɓɛɛ mɛ tutuyɛ, ɛ́nɛ́ tɔ̧a̧‘e, yí-zan nɛ̀ de na’ɛ, kórò tɛ hɔ sɔsɔɔ. Hegɔ, ɛ́nɛ́ iŋa kɛ̧ɛ̧ mgbara mɔɔ-yí-zan, ɓɛɛ ɛnɛ iŋ kɛ̧ɛ̧ mgbara mɔ nɛ de kinɛɛ na.

⁴O ɗaŋ tugun bíí-de-ŋgazu nɛ̀ ak mɔɔ-kifi mɛ zɔk’ɛ! Wa nɛ́ kɔ̧ɔ̧ mɛ zɔk mɔɔ-kifi, wa beka zɔk ŋma mbe-a gan zu wan nɛ̀ dee in Jɔnas na.» Ɓɛɛ a̧ e wa duk yak kɔ̧-a̧.

⁵Wa kuu yì si kur, ɓɛɛ tɛ o ŋgaiwi ko Jesu bíí so ɗoŋ kaia brɛt.

⁶Jesu tɔ̧ɔ̧ ha̧ wa: «Ɛ̀nɛ̀ mbó ta'nɛ́, ɛ̀nɛ̀ zɔ́k tɛ‘nɛ́ nɛ̀ de-a wen hao ko o Fariziɛn in ko o Saduseɛn!»

⁷Ɓɛɛ wa ta kɔ-wa'e, mɛ̀ nɛ́ wen nɛ̀‘i kai brɛt nɛnɛ na a̧ a̧ tɔ̧ nɛ̀ wen'i.

⁸Jesu kɔɓa taamɔ kɔ-wa ɓɛɛ tɔ̧ ha̧ wa: «Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ! Wen ge s’ɛnɛ ta mɔ‘e mɛ̀ nɛ́ wen zu brɛt n’ɛnɛ bo nɛnɛ na ge?

⁹Ɛ́nɛ́ tɛ iŋ mgbara mɔ'ɔ hɔ̧ɔ̧ na nde? Tɛ‘nɛ́ bìí ɗoŋ mɔ n'am dea’ɛ? Bó nɛ́ mi kɛ̧ɛ̧ brɛt mɔɔrɔ ha̧ o bíí booro-mɔɔrɔ, ɓɛɛ ɛnɛ mɔi̧ oi-aa dun gɛsɛ ɓu-zua-yiitoo na nde?

¹⁰Hɔ-ɗoŋ-aa bó nɛ́ mi kɛ̧ɛ̧ brɛt mɔɔrɔ-ɗoŋ-yiitoo ha̧ o bíí booro-naar, ɓɛɛ ɛnɛ mɔi̧ oi-aa dun gɛsɛ mɔɔrɔ-ɗoŋ-yiitoo na nde?

¹¹Ɛ́nɛ́ tɛ̀ɛ́ iŋ so kànà mgbara-a'e, wen n'am tɔ̧ h’ɛ́nɛ́‘e, ɛ̀nɛ̀ zɔ́k tɛ‘nɛ́ nɛ̀ hao ko o Fariziɛn in o Saduseɛn wó‘i, bó nɛ́ wen brɛt a̧‘m tɔ̧ɔ̧ nɛnɛ na.»

¹²Nɛ́ hegɔ sɛka o ŋgaiwi ko Jesu biti iŋ gba̧a̧ wen n'aa tɔ̧a̧‘i: bó nɛ́ a̧ tɔ̧ɔ̧ nɛ́ wen zu hao-gi-brɛt na, ɓɛɛ nɛ́ zu usamɔ ko o Fariziɛn in o Saduseɛn.

¹³Nɛ́ mɔ'ɔ nɛ̀ Jesu hɔa zika-nù Sezaree ko Filip, ɓɛɛ a̧ ak o ŋgaiwi kɔ̧-a̧ nɛ̀ wen’ɛ: «Tɛ́ wen nɛ o bíí tɔ̧ nɛnɛ'ɛ, wa tɔ̧ bɔɔ‘e Bem ko bíí nɛ́ o?»

¹⁴Wa kifa nú: «O ŋma bíí‘e, a̧ nɛ́ Jean Zui-bíí, o ŋma'e, nɛ́ Elii, ɓɛɛ o ŋma tɔ̧ɔ̧ kɔ‘i'e, nɛ́ Jeremii, kóó a̧ nɛ́ ŋma kpɔk mgbara o wi-tɔ̧-wen oi nú Sɔ̧.»

¹⁵Sa a̧ ak wa: «Ɓɛɛ nɛ̀ k’ɛ́nɛ́, ɛnɛ tɔ̧ k’ɛ́nɛ́‘e, mi nɛ́ o?»

¹⁶Ɓɛɛ Pierre kifi nú: «Ɛ́nɛ́ nɛ́ Mɛsii, Bem ko Sɔ̧ nɛ̀ duk kpasa.»

¹⁷Ɓɛɛ Jesu tɔ̧ ha̧ a̧: «Simɔŋ, bem ko Jɔnas, mɛ̀ dúk nɛ̀ desee; wen nɛ̀ mɛ́ tɔ̧a̧‘i, bo nɛ́ mɛ́ kpàà tɛ ŋma bíí[11] zu nù'ɛ na, ɓɛɛ nɛ́ Dáà kɔ‘m nɛ̀ duk yiwese mɛ a̧ usa ha̧ mɛ́.

¹⁸Ɓɛɛ kɔ‘m, mi tɔ̧ ha̧ mɛ, mɛ́ nɛ́ Pierre;[12] mɛ̀ nɛ́ see zu ta'i a̧‘m tɛ mbo tua[13] kɔ‘m sɛnɛ, ɓɛɛ kóó nɛ́ fio beka kpa ŋgai zu tua'i na.

¹⁹Mi tɛ ha̧ mɔɔ-hu̧i-nú tua Wan mɛ yiwese ha̧ mɛ. Mɔ lɛŋ nɛ̀ mɛ tɛ hɛr zaŋnu’ɛ tɛ duk nɛ̀ hɛra-a yiwese mɛ, ɓɛɛ mɔ lɛŋ nɛ̀ mɛ tɛ bur sɛn zaŋnu’ɛ tɛ duk nɛ̀ bura-a yiwese mɛ mbɛt.»

²⁰Ɓɛɛ a̧ mbo nú o ŋgaiwi kɔ̧-a̧ nɛ̀ ŋgaya-a wen ká wa tɛɛ tɔ̧ ha̧ ŋma bíí ndé a̧ nɛ́ Mɛsii.

²¹Nɛ́ ŋgimbi'i a̧ Jesu ku̧u̧ nɛ̀ naŋ tɔ̧a̧-a̧ ha̧ o ŋgaiwi kɔ‘i'e, wi tɛ nɛ̀ kànà si Jerusalɛm; o gasawi in o gasa wan-ɗafi-sɔ̧ in o wi-usi-heembea tɛ usi bɔnɛ ha'i nyɛmna; wa tɛ gbɛ wi yinɛ, ɓɛɛ ɗoŋ zɛ taar wi kura ŋgɔn.

²²Pierre saa a̧ si katɛ wi, ɓɛɛ tɔ̧ ha̧ a̧: «Sɔ̧'ɔ̧ gú er zu'nɛ́, Gasa Wan! Mɔ‘i beka kpa'nɛ́ na!»

²³Jesu zika ɗoŋ e ha̧ a̧, ɓɛɛ tɔ̧: «Mɛ̀ yú síɓí Satan! Mɛ̀ yák nɛ̀ ɗoŋ-am! Mɛ́ nɛ́ mɔɔ-kɔ̧-naŋ wen am, wen taamɔ kɔ-mɛ bó nɛ́ ko Sɔ̧ na, nɛ́ taamɔ ko bíí.»

²⁴Ɓɛɛ a̧ tɔ̧ ha̧ o ŋgaiwi kɔ̧-a̧: «Kà ŋma bíí nɛ́ kɔ̧ɔ̧ mɛ tɛ ɗoŋ am, a̧ a̧ é tɛ tɛ geemɔ, a̧ a̧ túí te-diŋa kɔ̧-a̧, ɓɛɛ a̧ a̧ tɛ́ ɗoŋ-am.

²⁵Wen kóó o ndé nɛ̀ kɔ̧ɔ̧ mɛ duk kpasa tɛ fe, ɓɛɛ wi nɛ tɛ fe wen zu'm tɛ kpasi.

²⁶Kà ŋma bíí á̧ ha̧a̧ duka-kpasa kɔ‘i mɛ kpa mɔɔ-zaŋnu lɛŋ, ɓɛɛ kpaamɔ kɔ̧-a̧‘i tɛ de nɛ́ ge ha̧ a̧ ge? Nɛ́ ge a̧ a̧ tɛ ha̧ mɛ gɔn nɛ̀ zu duka-kpasa kɔ̧-a̧ woyo ge?

²⁷Wen Bem ko bíí tɛ tɛ in o betom mɛ yiwese tɛ gasamɔ ko Dáà kɔ‘i; nɛ́ hi̧i̧ a̧ a̧ tɛ kɛ̧ nɛ̀ mɔ ha̧ bíí kpɔk kpɔk nyɛm nɛ̀ ɗoŋ tom kɔ-wa.

²⁸Nɛ́ kpasawen a̧‘m tɔ̧ h’ɛ́nɛ́! O ŋma bíí a̧a̧ mgbara'nɛ́ nɛ̀ beka fe na hɔ ŋgimbi nɛ̀ wa tɛ zɔk Bem ko bíí fara tɛa-a nɛ̀ oi mɔɔ-wan kɔ‘i.»