Read Northwest Gbaya MATTHIEU 18 Bible Online

MATTHIEU 18 - Northwest Gbaya bible

MATTHIEU 18

¹O ŋgaiwi ko Jesu tɛ̀ɛ̀ tɛ a̧ tɛ ŋgimbi'i ɓɛɛ ak a̧: «Tɛ́ Wan mɛ yiwese, gasawi nɛ́ o?»

²Ɓɛɛ Jesu sa ŋma geɗek bem e mgbara wa,

³ɓɛɛ tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́; k’ɛ̀nɛ̀ kpá mbe ta mɛ duk hee obem ga na, ɛ́nɛ́ beka ye tɛ Wan mɛ yiwese na.

⁴Gasawi tɛ́ Wan mɛ yiwese nɛ́ wi nɛ tɛ e tɛ̀ mɛ duk hee geɗek bem’ɛ ga,

⁵ɓɛɛ wi nɛ̀ tɛ kpɛk ŋma geɗek bem hee bem’ɛ ga nɛ̀ nin am, wi’ɛi kpɛk nɛ‘m.

⁶«Ɓɛɛ kóó o ndé nɛ̀ de ha̧ ŋma mgbara obem nɔ'ɔ nɛ̀ kɔ̧ɔ̧ ɗɔaa’ɛ mɛ de ɗaŋmɔ, gana so a'i kún zɔm dita ta-hɔ̧n-mɔ ger-a pi̧ a̧ ɗɔɔ ɗuka dir gba-tɔp.

⁷Oee ŋga bɔnɛ nɛ̀ tɛ tik zu o bíí zaŋnu nɛ̀ de ha̧ ŋmá-wa mɛ de ɗaŋmɔ'ɛ wa! Mɔ tɛ de kànà hegɔ nɛ̀ mbetɛ, ɓɛɛ bɔnɛ tɛ tik zu bíí nɛ̀ de ha̧ ŋmá-a mɛ de ɗaŋmɔ.

⁸«Kà er-mɛ, kóó naŋ-mɛ nɛ́ ɔra mɛ mɛ de ɗaŋmɔ, nɛ̀ mɛ̀ ɓír a̧ yinɛ, pi̧ a̧ taŋ nyɛi̧ nɛ̀ mɛ, wen gana so ha'i mɛ kpasi nɛ̀ oi kum gan pí̧í̧ wi kɔ̧́ wee nɛ̀ bi na kpoo nɛ kpoo nɛ̀ oi kiitɛ-wi lɛŋ.

⁹Kà yí-mɛ nɛ́ ɔra mɛ mɛ de ɗaŋmɔ, nɛ̀ mɛ̀ sɔ́tí a̧ yinɛ, pi̧ a̧ taŋ nyɛi̧ nɛ̀ mɛ, wen gana so ha'i mɛ kpasi nɛ̀ kpɔk yí gan pí̧í̧ wi kɔ̧́ wee Gehɛn nɛ̀ oi yí-wi yiitoo mbɛt.

¹⁰«Ɛ̀nɛ̀ zɔ́k tɛ‘nɛ́ k’ɛ́nɛ́ tɛ́ɛ̀ e ŋma kpɔk mgbara o geɗek bem nɔ'ɔ hee geemɔ ga, wen mi tɔ̧ h’ɛ́nɛ́, o betom mɛ yiwese nɛ̀ pɛm wa ya katɛ Dáà kɔ‘m yiwese mɛ ɓɔnsɛnɛ. [

¹¹Wen Bem ko bíí tɛ̀ɛ̀ mɛ kpasi o bíí nɛ̀ yɔa.]

¹²«Tɛ taamɔ k’ɛ́nɛ́, kà ŋma bíí nɛ́ bòó nɛ̀ sami gɔmŋmaa, ɓɛɛ kà kpɔk yɔ, wi’ɛi beka e oi ɓu-mɔɔrɔ-ɗoŋ-naar-zua-mɔɔrɔ-ɗoŋ-naar fara nyɔŋ mɔ zu kaya ha̧ a̧ mɛ nɛ̀ɛ́ kii i̧i̧ kpɔk'i nɛ̀ yɔa'i na nde?

¹³Kà a̧ nɛ́ kpaa sami'i, nɛ́ kpasawen a̧‘m tɔ̧ h’ɛ́nɛ́, wi’ɛi tɛ kpa desee zu i̧i̧ kpɔk'i gan zu o dɔka-a ɓu-mɔɔrɔ-ɗoŋ-naar-zua-mɔɔrɔ-ɗoŋ-naar nɛ̀ yɔ kɔ-wa na'i.

¹⁴Hegɔ mbɛt, Dáà k’ɛ́nɛ́ nɛ̀ a̧a̧ yiwese kɔ̧ ha̧ ŋma kpɔk mgbara o bem nɔ'ɔ mɛ yɔ na.»

¹⁵«Kà nya-mɛ nɛ́ dee ɗaŋmɔ, ɓɛɛ mɛ̀ nɛ́ tɛ a̧ ɛ̀nɛ̀-mɛ, mɛ̀ gáí a̧. Kà a̧ nɛ́ zia wen nú-mɛ́, ɓɛɛ mɛ kpasa nya-mɛ kaɗi.

¹⁶Kà a̧ nɛ́ zia wen nú-mɛ́ na, mɛ̀ mgbɔ́ ŋma bíí kpɔk kóó yiitoo, ɛ̀nɛ̀ nɛ́ tɛ a̧, ɓɛɛ ɛ̀nɛ̀ ɗáfí wen'i ti wi-sedaako nɔ‘i yiitoo kóó taar'i nyɛm nɛ̀ ɗoŋ Yɔramɔ.

¹⁷Kà a̧ nɛ́ bɛ̧ɛ̧ zia wen nú-wa, ɓɛɛ mɛ̀ nɛ́ɛ̀ wé ɗoŋ wen'i ha̧ zuduk bíí ko Sɔ̧.[15] Kà a̧ nɛ́ bɛ̧ɛ̧ zia wen nú zuduk bíí ko Sɔ̧ mbɛt, ɓɛɛ mɛ̀ é a̧ hee wi nɛ̀ iŋ kpasa Sɔ̧ na in hee wi-ba-garama ga mbɛt.

¹⁸«Nɛ́ kpasawen a̧‘m tɔ̧ h’ɛ́nɛ́, mɔ lɛŋ n’ɛ̀nɛ̀ tɛ hɛr zaŋnu’ɛ tɛ duk nɛ̀ hɛra-a yiwese mɛ, ɓɛɛ mɔ lɛŋ n’ɛ̀nɛ̀ tɛ bur zaŋnu’ɛ tɛ duk nɛ̀ bura-a yiwese mɛ mbɛt.

¹⁹«Nɛ́ kpasawen a̧‘m tɔ̧ h’ɛ́nɛ́ woyo, kà o bíí yiitoo mgbara'nɛ́ zaŋnu’ɛ nɛ́ ee nú kpɔk mɛ ak ŋma mɔ er Sɔ̧, ɓɛɛ Dáà kɔ‘m nɛ̀ a̧a̧ yiwese tɛ ha̧ mɔ‘i ha̧ wa;

²⁰wen fara nɛ̀ o bíí yiitoo kóó taar mɔi̧ ŋmaa sɛnɛ nɛ̀ nin-am, mi a̧a̧ mgbara wa.»

²¹Nɛ́ mɔ'ɔ nɛ̀ Pierre nɛ̀ɛ̀ si katɛ Jesu ɓɛɛ ak a̧: «Kà nya'm nɛ́ dee ɗaŋmɔ in am, a̧‘m e ɗaŋmɔ ha̧ a̧ war géè, war mɔɔrɔ-ɗoŋ-yiitoo nde?»

²²Ɓɛɛ Jesu kifi nú ha̧ a̧: «Weyaa, bo nɛ mi tɔ̧ɔ̧‘e war mɔɔrɔ-ɗoŋ-yiitoo na, ɓɛɛ nɛ́ war ɓu-mɔɔrɔ-ɗoŋ-yiitoo war mɔɔrɔ-ɗoŋ-yiitoo.

²³Hegɔ Wan mɛ yiwese hɔɔ ŋmaa in ŋma wannu nɛ̀ kɔ̧ɔ̧ so mɛ ɗafi mɔ mgbara wi in o wi-de-tom kɔ‘i.

²⁴Tɛ̀ ku̧u̧naŋ-a, wa mgbɔɔ nɛ́ ŋma wi-de-tom kɔ̧-a̧ nɛ̀ a̧a̧ nɛ̀ nyamandoi miliɔŋ miliɔŋ zu a̧ tɛnɛ.

²⁵Hee mɔ'ɔ n'aa kpa mɔ mɛ gbo nɛ̀ nyamandoi'i na ga, wan-tom tɔ̧a̧ wa a̧ ɗɔ́r a̧ in kóò kɔ̧-a̧ in o bem kɔ̧-a̧ ká bá nɛ̀ o mɔ kɔ̧-a̧ lɛŋ gbo nɛ̀ nyamandoi'i yinɛ.

²⁶Ɓɛɛ dáa-wan’ɛi tik nù ti naŋ wan kɔ‘i, ɓɛɛ ai nú: ‹Ɛ̀nɛ̀ é ha̧‘m kaŋ! Mi tɛ gbo lɛŋ h’ɛ́nɛ́.›

²⁷Ko dee wan-tom'i; a̧ gbɛɛ nyamandoi'i lɛŋ ha̧ a̧, ɓɛɛ e a̧ duk.

²⁸«Nɛ́ mɔ'ɔ nɛ̀ wi-de-tom'i gboo, ɓɛɛ nɛ́ɛ̀ kpa ŋma gbama wi-de-tom kɔ‘i nɛ̀ baa so be kɔya-sede gɔmŋmaa er-a. A̧ nɔmɔi̧a̧ laa nɔ nɛ̀ ger-a ha̧ hiɗ‘a mɛ gɔn, ɓɛɛ tɔ̧: ‹Mɛ̀ gbó nyamandoi kɔ‘m ha̧‘m!›

²⁹Ɓɛɛ gbama wi-de-tom kɔ̧-a̧‘i tik nù ti naŋ-a, ɓɛɛ ai nú: ‹Ɛ̀nɛ̀ é ha̧‘m kaŋ. Mi tɛ gbo lɛŋ h’ɛ́nɛ́.›

³⁰Ɓɛɛ wi’ɛi kɔ̧ na! A̧ baa a̧ nɛ́ɛ̀ pi̧ zɔɓɔ hɔ ŋgimbi n'aa tɛ gbo nyamandoi kɔ̧-a̧ kaɗi sɛ́.

³¹Nɛ́ mɔ'ɔ nɛ̀ o ŋma gbama wi-de-tom kɔ̧-a̧ zɔka mɔ‘i. See o wi nɔ‘i ɗaŋa nyɛmna, ɓɛɛ wa nɛ́ɛ̀ we ɗoŋ mɔ‘i lɛŋ ha̧ wan-tom.

³²Wan-tom saa wi-de-tom'i tɛnɛ, ɓɛɛ tɔ̧ ha̧ a̧: ‹Mɛ́ ɗaŋ wi-de-tom’ɛ, mɛ aia nú ha̧‘m, ɓɛɛ mi gbɛ nyamandoi kɔ‘m ha̧ mɛ lɛŋ.

³³Mɛ tɛ̀ɛ́ de so ko ha̧ gbama wi-de-tom kɔ-mɛ hee mɔ'ɔ n'am dee ha̧ mɛ'ɛ ga na nde?›

³⁴See wan-tom nyima; ɓɛɛ ba a̧ pi̧ zɔɓɔ ha̧ a̧ mɛ duk hi̧i̧ zɔk nɛ̀ bɔnɛ hɔ ŋgimbi n'aa tɛ gbo nyamandoi lɛŋ sɛ́.

³⁵Nɛ́ kale mɔ‘i a̧ Dáà kɔ‘m nɛ̀ a̧a̧ yiwese tɛ de in'nɛ̀ɛ́, kà o ndé kpɔk kpɔk mgbara'nɛ́ nɛ̀ e ɗaŋmɔ ko nya-a̧ ha̧ a̧ nɛ̀ see lɛŋ na.»