Read Northwest Gbaya MATTHIEU 2 Bible Online

MATTHIEU 2 - Northwest Gbaya bible

MATTHIEU 2

¹Nɛ́ tɛ́ ŋgimbi wan ko Herod a̧ wa koo nɛ̀ Jesu sɛn Bɛtlɛhɛm, nú Judee. Nɛ́ mɔ'ɔ nɛ̀ o ŋma wi-iŋ-mgbara-mɔ tɛ̀ɛ́ nɛ̀ war daŋa-wese hɔ Jerusalɛm,

²ɓɛɛ ak mɔ: «Wannu ko o Juif nɛ̀ wa koo sɛn hɛ̧ɛ̧ a̧a̧ déè? Wen ɛ́ɛ́ zɔka sɔra kɔ̧-a̧ si war daŋa-wese, nɛ́ mɔ'ɔ n’ɛ̀ɛ̀ tɛ mɛ gas'a̧‘i.»

³Ŋgimbi nɛ̀ Herod zia wen'i, ɗɛɗɛ-a gɔna in o bíí Jerusalɛm lɛŋ.

⁴A̧ mɔi̧a o gasa wan-ɗafi-sɔ̧ lɛŋ in o wi-usi-heembea ha̧ dukbíí, ɓɛɛ ak wa ha̧ a̧ mɛ iŋ fara nɛ̀ wa tɛ ko Mɛsii sɛnɛ;

⁵ɓɛɛ wa kifi nú ha̧ a̧: «Wa tɛ́ ko a̧ sɛn Bɛtlɛhɛm, nú Judee, wen wi-tɔ̧-wen oi nú Sɔ̧ baa yɔr so hee mɔ'ɔ ga:

⁶‹Kɔ-mɛ Bɛtlɛhɛm, nú Judee, mɛ́ bó nɛ́ sɔŋkur geɗek ye mgbara o gasa ye nú Judee na, wen wan nɛ̀ tɛ́ dai dukbíí kɔ‘m Israɛl tɛ́ gbo nɛ̀ tɛ-mɛ.› »

⁷Nɛ́ mɔ'ɔ nɛ̀ Herod saa o wi-iŋ-mgbara-mɔ nɔ‘i nɛnɛ nɛ̀ hu̧sa̧-a̧ sitɛ wi, ɓɛɛ ak wa ha̧ a̧ mɛ iŋ mgbák ŋgimbi nɛ̀ sɔra'i gboo nɛnɛ.

⁸A̧ toma wa nɛnɛ si Bɛtlɛhɛm, ɓɛɛ a̧ tɔ̧ ha̧ wa: «Ɛ̀nɛ̀ nɛ́ɛ̀ ak mɔ nɛ̀ sa̧a̧-a̧ wen zu bem’ɛi; k’ɛ̀nɛ̀ nɛ́ kpaa a̧ kaɗi, ɓɛɛ ɛ̀nɛ̀ mbáŋ tɛ‘m ha̧‘m nɛ́ɛ̀ gas'a̧ mbɛt.»

⁹Ɗoŋ nɛ̀ o wi-iŋ-mgbara-mɔ nɔ‘i zia wen ko wannu kaɗi, wa kura yák; ɓɛɛ sɔra nɛ̀ wa zɔka so si war daŋa-wese'i yaka duk ti ha̧ wa hɔ nɛnɛ fara nɛ̀ zɔɗi-bem ɔ nù sɛnɛ‘i, ɓɛɛ yor zu fara'i.

¹⁰O wi-iŋ-mgbara-mɔ nɔ‘i kpaa desee nyɛmna tɛ zɔka sɔra'i.

¹¹Wa yee tua, ɓɛɛ wa kpa bem in nàà kɔ̧-a̧ Marii; nɛ́ mɔ'ɔ nɛ̀ wa gbɛ̀ɛ̀ zugur wa nù ti a̧ gasi nɛ̀ a̧. Wa hu̧i̧a̧ o mɔɔ-a-mɔ kɔ-wa, ɓɛɛ wa ha̧ lɔr bá nɛ̀ fuu-nyama in nɔ̧́-nyama ha̧ a̧.

¹²Ɗoŋ mɔ‘i, ɓɛɛ wa ɔ zu'e, ká wa sí ɗoŋ nɛ̀ tɛ́ Herod ɓɔna; ɓɛɛ wa ba nɛ́ ŋma war nɛtɛ si nɛnɛ.

¹³Ɗoŋ nɛ̀ o wi-iŋ-mgbara-mɔ sii kaɗi, betom ko Gasa Wan hɔɔ zu ha̧ Jozɛf, ɓɛɛ tɔ̧ ha̧ a̧: «Mɛ̀ kúr, mɛ̀ mgbɔ́ bem in nàà kɔ̧-a̧, ɛ̀nɛ̀ yú mɔ yak si Egiptɛ mɛ; ɓɛɛ ɛ̀nɛ̀ yá hi̧i̧ hɔ wese n'am tɛ ha̧ nú sɛ, wen Herod tɛ́ kìì bem’ɛ mɛ gbɛ a̧ yinɛ.»

¹⁴Nɛ́ mɔ'ɔ nɛ̀ Jozɛf kura mɛ zɛ‘i ɓɛɛ mgbɔ bem in nàà kɔ̧-a̧ yaknɛ si Egiptɛ.

¹⁵Wa yaa hi̧i̧ hegɔ hɔ ŋgimbi fio ko Herod. Mɔ‘i dee hegɔ ha̧ wen nɛ̀ Gasa Wan tɔ̧ɔ̧ só nɛ̀ nú wi-tɔ̧-wen oi nú Sɔ̧ mɛ hɔ gba̧a̧: «Mi saa bem kɔ‘m gbonɛ nɛ̀ Egiptɛ mɛ.»

¹⁶Ɗoŋ nɛ̀ Herod zɔka'e o wi-iŋ-mgbara-mɔ nɔ‘i ɔra nɛ́ wí wó, see-aa nyima nyɛmna, ɓɛɛ a̧ tom o bíí mɛ́ nɛ̀ɛ́ gbɛ̀ o be-wiwii lɛŋ nɛ̀ a̧a̧ nɛ̀ pɛ yiitoo in o wan nɛ̀ tɛ kpa pɛ yiitoo hɔ̧ɔ̧ na mbɛt, sɛn Bɛtlɛhɛm in zika-nú Bɛtlɛhɛm. Pɛ yiitoo n'aa gona'i nyɛma nɛ̀ ɗoŋ wen nɛ̀ o wi-iŋ-mgbara-mɔ tɔ̧ɔ̧ zu ŋgimbi nɛ̀ sɔra'i gbòó nɛnɛ.

¹⁷Hegɔ wen nɛ̀ Jeremii, wi-tɔ̧-wen oi nú Sɔ̧ baa tɔ̧ so hɔɔ gba̧a̧:

¹⁸«Wa zia hiɗimɔ sɛn Rama, o bíí ai nɛ́ nú, hi̧i̧ nɛ̀ kɔ̧a̧: nɛ́ Rachɛl a̧ hi̧i̧ o bem kɔ‘i, ɓɛɛ a̧ kɔ̧ ha̧ bíí mɛ tɔ̧ wen-ga̧-see-aa na, wen o bem kɔ̧-a̧ bó ɓɔna.»

¹⁹Ŋgimbi nɛ̀ Herod fee kaɗi, betom ko Gasa Wan hɔɔ zu ha̧ Jozɛf sɛn Egiptɛ, ɓɛɛ tɔ̧ ha̧ a̧:

²⁰«Mɛ̀ kúr, mɛ̀ mgbɔ́ bem in nàà kɔ̧-a̧, ɛ̀nɛ̀ sí ɗoŋ si nú Israɛl wen o bíí nɛ̀ kɔ̧ɔ̧ so mɛ gbɛ bem’ɛi fee kaɗi.»

²¹Nɛ́ mɔ'ɔ nɛ̀ Jozɛf kura, ɓɛɛ mgbɔ bem in nàà kɔ̧-a̧ ɓɛɛ wa si ɗoŋ si nú Israɛl.

²²Ɓɛɛ hee mɔ'ɔ n'aa zia'e nɛ́ Arkelaus a̧ ɔ wan oi dáà kɔ‘i Herod sɛn nú Judee ga, a̧ dee kíì síí ɗoŋ si hi̧i̧, ɓɛɛ a̧ yak si nú Galilee hee mɔ'ɔ nɛ̀ Sɔ̧ usa ha̧ a̧ tɛ̀ ɔɔ-zu ga.

²³A̧ nɛ̀ɛ̀ de ye tɛ ŋma ye nɛ̀‘i sa'e Nazarɛt. Hegɔ wen nɛ̀ o wi-tɔ̧-wen oi nú Sɔ̧ tɔ̧ɔ̧ so hɔɔ gba̧a̧: «Wa tɛ sa a̧‘e be Nazarɛt.»