Read Northwest Gbaya MATTHIEU 21 Bible Online

MATTHIEU 21 - Northwest Gbaya bible

MATTHIEU 21

¹Ŋgimbi nɛ̀ wa hɛɗa nɛ̀ Jerusalɛm, wa hɔɔ ɗoŋ tua Bɛtfage zu Kaya Te-nɔ̧́, ɓɛɛ Jesu tom o ŋma ŋgaiwi kɔ‘i yiitoo tɔ̧ nɛnɛ ha̧ wa'e:

²«Ɛ̀nɛ̀ nɛ́ tɛ be ye ti'i. Hɔa-a k’ɛ́nɛ́ hegɔ, ɓɛɛ ɛ́nɛ́ tɛ kpa nana-tuifuu nɛ̀ wa kuna, nɛ̀ be-a a̧a̧ katɛ a̧. Ɛ̀nɛ̀ búr nana-a ɓɛɛ ɛ̀nɛ̀ mgbɔ́ wa tɛnɛ ha̧‘m.

³Kà ŋma bíí nɛ́ tɔ̧ɔ̧ ŋma wen h’ɛ́nɛ́, ɓɛɛ ɛ̀nɛ̀ kífí nú ha̧ a̧‘e: ‹Nɛ́ Gasa Wan a̧ kɔ̧ɔ̧ wa,› ɓɛɛ wi’ɛi tɛ e h’ɛ́nɛ́ mɛ mgbɔ wa tɛnɛ nɛ̀ haya-a.»

⁴Mɔ‘i dee hegɔ ha̧ wen nɛ wi-tɔ̧-wen oi nú Sɔ̧ bàá tɔ̧ so mɛ hɔ gba̧a̧:

⁵«Ɛ̀nɛ̀ tɔ̧́ ha̧ boko-be Siɔŋ‘e: Mɛ̀ zɔ́k Wannu kɔ-mɛ a̧ tɛ tɛ mɛ‘i; a̧ nɛ́ wi-mɔka-see, a̧ a̧a̧ zu nana-tuifuu in be-a, bem ko saɗi-tui-mɔ.»

⁶O ŋgaiwi kɔ̧-a̧ nɛ̀ɛ́, ɓɛɛ de hee mɔ'ɔ nɛ̀ Jesu tɔ̧ɔ̧ ha̧ wa ga.

⁷Wa mgbɔɔ nana-tuifuu in be-a tɛnɛ ha̧ a̧, wa tata laa kɔ-wa gɔn see tuifuu, ɓɛɛ Jesu daŋ duk zu a̧.

⁸O gba gii bíí tata laa kɔ-wa sɛn yuwar, ɓɛɛ o ŋma gbin kɔ‘i nɛ́ wa̧a̧ a yuwar.

⁹O gba dɔka bíí nɛ̀ yaa nɛ̀ ti in o wan nɛ̀ yaa nɛ̀ ɗoŋ-aa gaia mɔ‘e: «Bem ko David oee! Tok- de-yoŋgo a̧ dúk zu wi nɛ̀ tɛ‘i nɛ̀ nin Gasa Wan. Osoko ha̧ Sɔ̧, yiwese ŋgɔn mɛ!»

¹⁰Jesu yee Jerusalɛm, ɓɛɛ o bíí lɛŋ sakali, ɓɛɛ ak mɔ: «Wi’ɛ bɔɔ nɛ́ o?»

¹¹Ɓɛɛ o gba giiwi kifi nú: «Mɛ̀ nɛ́ Jesu, wi-tɔ̧-wen oi nú Sɔ̧, be Nazarɛt nú Galilee mɛ.»

¹²Jesu yee kɔ̧́ Tua ko Sɔ̧ ɓɛɛ ndak o bíí nɛ̀ yaa hi̧i̧ ɗɔr nɛ̀ mɔ, hi̧fi nɛ̀ mɔ, gbonɛ, ɓɛɛ a̧ ndur o taŋe ko o wi-kpai-sede in o gboŋgoe ko o wi-ɗɔr-pola a nù,

¹³ɓɛɛ a̧ tɔ̧ ha̧ wa: «Kalata ko Sɔ̧ tɔ̧a̧‘e: ‹Wi tɛ sa Tua kɔ‘m'e tua-kɔfi-sɔ̧›, ɓɛɛ nɛ́ mɔ'ɔ n’ɛnɛ kifa a̧ e nɛ́ di̧i̧ ko o kpɔ̧i̧-gba̧a̧-nin!»

¹⁴Nɛ́ mɔ'ɔ nɛ̀ o ŋma wi-boma-yí in o wi-kum nɛ̀ɛ́ tɛ Jesu kɔ̧́ Tua ko Sɔ̧ mɛ, ɓɛɛ a̧ kpasi wa.

¹⁵O gasa wan-ɗafi-sɔ̧ in o wi-usi-heembea zɔka mɔɔ-gɔn-ɗɛɗɛ-wi nɛ̀ Jesu dea'i, wa zia gaia mɔ nɛ̀ o obem gai sɛn kɔ̧́ Tua ko Sɔ̧ mbɛt tɔ̧ nɛnɛ‘e: «Bem ko David oee!» ɓɛɛ wa kpa ɗaŋsee.

¹⁶Wa tɔ̧ɔ̧ ha̧ Jesu: «Mɛ́ zii wen nɛ̀ wa tɔ̧‘i na nde?» Ɓɛɛ Jesu kifi nú‘e: «Íì, mi zia; ɓɛɛ nɛ̀ k’ɛ́nɛ́, ɛ́nɛ́ tɔr wen’ɛ nɛ̀ tɔ̧a̧‘e: ‹Mɛ dee ha̧ o bem in o zɔɗi-bem mɛ zɔn mɛ,› na nde?»

¹⁷A̧ tɔ̧ɔ̧ wen'i kaɗi, ɓɛɛ a̧ e wa duk gbo yak nɛ́ɛ̀ ɔ Betanii mɛ.

¹⁸Mɛ́ tutuyɛ ŋgimbi nɛ̀ Jesu a̧a̧ tɛ sii ɗoŋ si Jerusalɛm, wɔ gbɛɛ a̧.

¹⁹Nɛ́ mɔ'ɔ n'aa zɔka ŋma te-mbɔra ká̧ war, ɓɛɛ nɛ́ si ká̧ a̧, gbakna a̧ kpaa ŋma waya-a wó, ɓɛɛ nɛ́ géé wa̧a̧-a̧ a̧ da̧a̧ sɔɔ géè. Ɓɛɛ a̧ tɔ̧ ha̧ te'i: «Kɔ-mɛ, mɛ beka wai ɓɔna ndó-ndó-ndó!» Ɓɛɛ wen'i nú-wi'i, te-mbɔra'i kora.

²⁰O ŋgaiwi kɔ̧-a̧ zɔka mɔ‘i, ɗɛɗɛ-wa gɔna, ɓɛɛ wa tɔ̧: «Dee hee ge sɛka te’ɛ kora nɛ̀ haya-a hegɔ'ɛ ge?»

²¹Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; k’ɛ̀nɛ̀ nɛ́ kɔ̧ɔ̧ ɗɔaa ha̧ Sɔ̧, nɛ̀ ŋma sii-kafɛ bo na, ɛ́nɛ́ tɛ de mɔ gan mɔ n'am dee in te-mbɔra’ɛ. Kóó ɛ́nɛ́ tɔ̧ɔ̧ ha̧ kaya’ɛ: ‹Mɛ̀ kúr, mɛ̀ gbín a ɗɔɔ gba-tɔp,› mɔ‘i tɛ de.

²²Mɔ lɛŋ n’ɛ̀nɛ̀ te kɔfi Sɔ̧ ak nɛnɛ nɛ̀ kɔ̧ɔ̧ɗɔɔwen, a̧ tɛ ha̧‘nɛ́.»

²³Jesu yee kɔ̧́ Tua ko Sɔ̧ ɓɛɛ duk usi nɛ̀ mɔ. Nɛ́ mɔ'ɔ nɛ̀ o gasa wan-ɗafi-sɔ̧ in o gasawi saaye tɛ̀ɛ̀ tɛ a̧ ɓɛɛ ak a̧: «Mɔ nɛ̀ mɛ de’ɛ, mɛ de nɛ̀ ŋgai ko o? Nɛ́ o'o ha̧a̧ ŋgai’ɛ ha̧ mɛ o?»

²⁴Ɓɛɛ Jesu kifi nú ha̧ wa: «Mi mbɛt, mi a̧a̧ nɛ̀ ŋma akamɔ kpɔk mɛ ak nɛ̀ ɛnɛ. K’ɛ̀nɛ̀ nɛ́ kifa nú ha̧‘m, ɓɛɛ sɛka'm tɔ̧ɔ̧ ndaa ŋgai kɔ‘m h’ɛ́nɛ́.

²⁵Zuia-bíí nɛ̀ Jean duka so zui’ɛ tɛɛ nɛ̀ déè? Tɛ̀ɛ́ nɛ̀ tɛ́ Sɔ̧ náà, kóó nɛ̀ tɛ̀ bíí nde?» Ɓɛɛ wa tɔ̧ sitɛ ŋmaa: «K’ɛ̀ɛ̀ tɔ̧‘e, zuia-bíí nɛ̀ Jean zuia so'i tɛ̀ɛ́ nɛ̀ tɛ́ Sɔ̧ wó, a̧ tɛ ak yɛ‘e wen ge s’ɛɛ kɔ̧ bɔɔ ɗɔɔ wen ko Jean na ge?

²⁶Á̧ k’ɛɛ tɔ̧‘e tɛ̀ɛ́ nɛ̀ tɛ̀ bíí wó, o bíí tɛ de wen in yɛɛ, wen wa lɛŋ iŋa'e Jean nɛ́ wi-tɔ̧-wen oi nú Sɔ̧.»

²⁷Ɓɛɛ wa kifi nú ha̧ Jesu: «Ɛɛ iŋ k’ɛɛ na.» Ɓɛɛ Jesu tɔ̧: «Mi mbɛt, mi beka tɔ̧ ndaa ŋgai n'am de nɛ̀ mɔ‘i h’ɛ́nɛ́ na.»

²⁸«Ɛ̀nɛ̀ tɔ̧́ mɔ n’ɛnɛ ta tɛ lizaŋ'ɛ ha̧‘m zii. Ŋma bíí a̧a̧ so nɛ̀ o be-wiwii kɔ‘i yiitoo; a̧ nɛ̀ɛ̀ tɛ kaya-a, tɔ̧ ha̧ a̧: ‹Bem kɔ‘m, mɛ̀ nɛ̀ɛ́ dé tom kpɛɛfɔ kɔ‘m sɔsɔɔ.›

²⁹Ɓɛɛ bem’ɛi kifi nú: ‹Mi kɔ̧ na!› Nɛ̀ ɗoŋ, a̧ kpaia taamɔ, ɓɛɛ a̧ ba war yak si kpɛɛfɔ mɛ de tom.

³⁰Ɓɛɛ dáa-wan’ɛi nɛ́ tɛ́ hɔ-ɗoŋ-kaya-bem ɓɛɛ tɔ̧ kale kpɔk wen'i ha̧ a̧, ɓɛɛ bem’ɛi kifi nú: ‹Íì baaba, mi tɛ nɛ.› Ɓɛɛ a̧ nɛ na.

³¹Mgbara o bem nɔ'ɔ yiitoo’ɛ, nɛ́ o'o zia zia wen nú dáà kɔ‘i o?» Ɓɛɛ wa kifi nú: «Nɛ́ kaya-a.» Nɛ́ mɔ'ɔ nɛ̀ Jesu tɔ̧ɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, o wi-ba-garama in o ko-de-dàlà tɛ ye tɛ Wan ko Sɔ̧ nɛti h’ɛ́nɛ́.

³²Wen Jean tɛ̀ɛ́ tɛ‘nɛ́ mɛ usi deemɔ nɛ̀ yuwar-a h’ɛ́nɛ́, ɓɛɛ nɛ́ o wi-ba-garama in o ko-de-dàlà a̧ kpɛka a̧, ɛ́nɛ́ kpɛk k’ɛ́nɛ́ a̧ na. Ɛ́nɛ́ zɔka mɔ‘i mbɛt, ɓɛɛ ɛ́nɛ́ kpai duka-a k’ɛ́nɛ́ wen h’ɛ́nɛ́ mɛ kɔ̧ ɗɔaa ha̧ a̧ na.»

³³«Ɛ̀nɛ̀ zíí ŋma lizaŋ woyo: Ŋma wan-tua duka so, ɓɛɛ wá fɔ-nyak-dɔ̧ɔ̧. Nɛ́ mɔ'ɔ n'aa ɓora fɔ‘i, ɓɛɛ ɗafi fara-vati-dɔ̧ɔ̧ in tua-pɛm-mɔ mbɛt. A̧ ee fɔ‘i er o bíí, ɓɛɛ nɛ́ kɔ̧-a̧ gɛnɛ si ŋma nù.

³⁴Ŋgimbi ɓi waya-nyak-dɔ̧ɔ̧ hɔa, ɓɛɛ wan-fɔ tom o wi-de-tom kɔ̧-a̧ sitɛ o wi nɔ‘i mɛ nɛ̀ɛ́ kai war waya-nyak-dɔ̧ɔ̧ kɔ̧-a̧ piinɛ ha̧ a̧.

³⁵Nɛ́ mɔ'ɔ nɛ̀ o wi-zɔk-fɔ tika zu o betom nɔ‘i, ɓɛɛ mbɛr ɛ̧ɛ̧ mɛ mbɛr gbɛ; gbɛ ɓii-aa, ɓɛɛ wa yo ŋma ɓii-aa nɛ̀ ta mbɛt.

³⁶Wan-fɔ toma o ŋma wi-de-tom nɛnɛ nɛ̀ dɔka-a gan kuti-a, ɓɛɛ o wi-zɔk-fɔ de kànà nɛ́ kale kpɔk mɔ in wa mbɛt.

³⁷Sɔŋkur-aa, a̧ toma nɛ́ bem kɔ̧-a̧ nɛnɛ wen a̧ taa'e ndé, wa tɛ yu bem kɔ̧-a̧.

³⁸Ɓɛɛ zɔka bem’ɛi nɛ̀ o wi-zɔk-fɔ zɔka fara tɛa-a, ɓɛɛ wa tɔ̧ ha̧ o ŋmaa: ‹Zɔ́k wi-duk-oi-dáà kɔ‘i nɛ̀ tɛ mɛ‘i! Ɛ̀nɛ̀ tɛ́ ɛ̀ɛ̀ gbɛ́ a̧ yinɛ, ɛ̀ɛ̀ káí mɔɔ-oi-dáà kɔ̧-a̧.›

³⁹Wa baa a̧, gbur a̧ si ká̧ nú fɔ ɓɛɛ gbɛ a̧.

⁴⁰Ŋgimbi nɛ̀ wan-fɔ bé tɛ̀ɛ́ hɔ, nɛ́ ge a̧ a̧ tɛ de nɛ̀ o wi-zɔk-fɔ nɔ‘i ge?»

⁴¹Wa kifa nú ha̧ Jesu: «A̧ tɛ gbɛ o ɗaŋ wi nɔ‘i yinɛ, ɓɛɛ a̧ tɛ e fɔ kɔ̧-a̧ er o wi nɛ̀ tɛ tom waya-nyak-dɔ̧ɔ̧ ha̧ a̧ tɛ ŋgimbi-a.»

⁴²Ɓɛɛ Jesu ak wa: «Ɛ́nɛ́ tɛ tɔr wen’ɛ zaŋ Yɔramɔ hɔ̧ɔ̧ na? ‹Nɛ́ ta nɛ o wi-ba-naŋ-tua pi̧i̧ so taŋ‘i, a̧ kifa duk nɛ́ de kina-ta-e mgbii-tua; mɔ‘i nɛ deemɔ ko Gasa Wan, nɛ̀ duk nɛ́ gasamɔ yí-ɛɛ lɛŋ!›

⁴³Mɛ̀ nɛ́ wen hegɔ s'am tɔ̧ h’ɛ́nɛ́‘e, Sɔ̧ tɛ ba Wan kɔ‘i er'nɛ́ yinɛ mɛ ha̧ ha̧ dukbíí nɛ̀ tɛ de ha̧ tom kɔ̧-a̧ mɛ nɛ siti. [

⁴⁴Kóó o ndé nɛ̀ tɛ yo nù zu ta'i tɛ gbin, ɓɛɛ wi nɛ ta'i tɛ tik zu a̧, tɛ mbɔli.]»

⁴⁵O gasa wan-ɗafi-sɔ̧ in o Fariziɛn zia o lizaŋ nɔ‘i ɓɛɛ wa iŋ‘e Jesu tɔ̧ nɛ́ wa.

⁴⁶Wa kia mɛ ba a̧, ɓɛɛ nɛ́ kíì giiwi nɛ̀ zɔk a̧ hee wi-tɔ̧-wen oi nú Sɔ̧ ga a̧ de wa.