Read Northwest Gbaya MATTHIEU 23 Bible Online

MATTHIEU 23 - Northwest Gbaya bible

MATTHIEU 23

¹Nɛ́ mɔ'ɔ nɛ̀ Jesu tɔ̧ɔ̧ ha̧ o giiwi in o ŋgaiwi kɔ‘i:

²«O wi-usi-heembea in o Fariziɛn duk oi Moisɛ ha̧ wa mɛ usi mgbara Heembea.

³Hegɔ, ɛ̀nɛ̀ zíí wen nú-wa, ɛ̀nɛ̀ dé mɔ lɛŋ nɛ̀ wa usi h’ɛ́nɛ́, ɓɛɛ k’ɛ́nɛ́ zɔk ɗoŋ deemɔ kɔ-wa na, wen wa tɔ̧ wen nɛ̀ ndàrá-nú géè, wa de mɔ-aa na.

⁴Wa hɛr nɛ́ dita tui e zu o bíí, ɓɛɛ kɔ-wa nɛ̀ tɛ-wa, wa kɔ̧ mɛ fo tui'i nɛ̀ géé nú-zɔ̧ɔ̧ er-wa na.

⁵Tom nɛ̀ wa de lɛŋ, wa de wen yí-bíí géè. Mɛ̀ nɛ́ wen hegɔ sa wa yɔr heembea ko Moisɛ tɛ pafu-ndàrá hɛr tɛ wa, ɓɛɛ wa aa mɔ naŋ-laa kɔ-wa nɛ̀ dura-a wɛzɛ-wɛzɛ.

⁶Wa kɔ̧ɔ̧ nɛ́ duka-a tɛ o kuti fara tɛ gbaŋa in o kuti fara kɔ̧ tua-mɔi̧a-a.

⁷Wa kɔ̧ɔ̧ ha̧ o bíí mɛ fan wa sɛn bee-gara, ha̧ o bíí mɛ sa wa'e ‹Wan-usi-mɔ› mbɛt.

⁸Ɓɛɛ k’ɛ́nɛ́, k’ɛ́nɛ́ e ha̧ o bíí mɛ sa'nɛ́ ‹Wan-usi-mɔ› na, wen Wan-usi-mɔ k’ɛ́nɛ́ kpɔk ɓɛɛ, ɓɛɛ ɛnɛ lɛŋ nɛ́ o nya-wi.

⁹K’ɛ́nɛ́ sa ŋma bíí zu nù‘e ‹Dáà› k’ɛ́nɛ́ na, wen Dáà k’ɛ́nɛ́ kpɔk ɓɛɛ; nɛ́ wan nɛ̀ a̧a̧ yiwese.

¹⁰K’ɛ́nɛ́ e ha̧ o bíí mɛ sa'nɛ́ ‹Gasawi› na, wen Gasawi k’ɛ́nɛ́ nɛ́ Mɛsii kpɔk ɓɛɛ.

¹¹Gasawi mɛ mgbara'nɛ́ a̧ dúk nɛ́ wi-de-tom k’ɛ́nɛ́.

¹²Kóó o ndé nɛ̀ kii mɛ duk si ŋgɔn, Sɔ̧ tɛ gbɔs'a si ɗɔɔ, ɓɛɛ wi nɛ̀ duk si ɗɔɔ, Sɔ̧ tɛ ba a̧ e ŋgɔn.»

¹³«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ o wi nɛ̀ a̧a̧ nɛ̀ see yiitoo! Ɛ́nɛ́ nɛ̀ kpe nú tua Wan mɛ́ yiwese’ɛ, ɛ́nɛ́ kɔ̧ k’ɛ́nɛ́ yea-a na, ɓɛɛ ɛ́nɛ́ dora o wi nɛ̀ kɔ̧ɔ̧ mɛ ye sɛnɛ mbɛt. [

¹⁴«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ o wi nɛ̀ a̧a̧ nɛ̀ see yiitoo! Ɛ́nɛ́ kai nɛ mɔ er o ko-gera, ɓɛɛ zu-a'i, ɛ́nɛ́ nɛ̀ɛ̀ kɔfi Sɔ̧ ɗoŋ-aa nyɛi̧ ha̧ o bíí mɛ zɔk. Sɔ̧ tɛ gɔn kita zu'nɛ́ nɛ̀ ŋgaya-a zu mɔ n’ɛnɛ de'i.]

¹⁵«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ nɛ̀ a̧a̧ nɛ̀ see-yiitoo! Ɛ́nɛ́ yar k’ɛ́nɛ́ nɛ̀ zu o gasa nana-yì, gɔn nɛ̀ kao nɛnɛ, kii nɛ̀ bíí mɛ kpɛk wen ko Sɔ̧, ɓɛɛ kà wi’ɛi kpɛ́k kaɗi, ɛ́nɛ́ dèè ha̧ a̧ mɛ duk nɛ́ bíí nɛ̀ nyɛma mɛ ye kɔ̧́ wee Gehɛn ɓɔnsɛnɛ, wen a̧ tɛ duk nɛ̀ ɗaŋ-a war yiitoo gan k’ɛ́nɛ́.

¹⁶«Bɔnɛ a̧a̧ zu'nɛ́, o wi-usi-war nɛ̀ zɔk mɔ na’ɛ, nɛ̀ tɔ̧‘e, kà ŋma bíí nɛ́ kàná Tua ko Sɔ̧, ɓɛɛ wen'i bo nɛ́ kpasawen na; a̧ kà a̧ nɛ́ kànà nɛ́ lɔr mɛ kɔ̧́ Tua ko Sɔ̧, ɓɛɛ, wen'i dee kpasawen.

¹⁷Ɛ́nɛ́ o mgbélé wi-zɔk-mɔ na’ɛ! Nɛ́ ge a̧ gana ge, nɛ́ lɔr náà, kóó nɛ́ Tua ko Sɔ̧ nɛ̀ de ha̧ lɔr'i mɛ duk nɛ̀ ko Sɔ̧ nde?

¹⁸Ɛ́nɛ́ tɔ̧ɔ̧ woyo'e, kà ŋma bíí nɛ́ kàná fara-ɗafi-sɔ̧, ɓɛɛ wen'i bó nɛ́ kpasawen na; á̧ kà a̧ nɛ́ kànà nɛ́ mɔɔ-ɗafi-sɔ̧ nɛ̀ duk zu fara-ɗafi-sɔ̧‘i, ɓɛɛ wen'i dee kpasawen.

¹⁹Ɛ́nɛ́ o wi n’ɛnɛ zɔk mɔ na’ɛ! Nɛ́ ge a̧ gana ge, nɛ́ mɔɔ-ɗafi-sɔ̧ náà, kóó nɛ́ fara-ɗafi-sɔ̧ nɛ̀ de ha̧ mɔɔ-ɗafi-sɔ̧ mɛ duk nɛ̀ ko Sɔ̧ nde?

²⁰Hegɔ, káná fara-ɗafi-sɔ̧ nɛ́ káná mɔ lɛŋ nɛ̀ ya zu fara-ɗafi-sɔ̧‘i in kiitɛ fara-ɗafi-sɔ̧‘i mbɛt.

²¹Káná Tua ko Sɔ̧ nɛ́ káná nin wi nɛ̀ duk kɔ̧́ Tua'i in kiitɛ Tua'i mbɛt.

²²Káná yiwese nɛ́ káná damti in nin wi nɛ̀ duk zu a̧ mbɛt.

²³«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ o wi nɛ̀ a̧a̧ nɛ̀ see yiitoo! Ɛ́nɛ́ ha̧ nɛ́ zu mɛɛwa, masóró in kímbá[17] ha̧ Sɔ̧, ɓɛɛ ɛ́nɛ́ ee deemɔ nɛ̀ yuwar-a, deako in mboozu, nɛ̀ duk nɛ́ gasamɔ tɛ heembea dúk. Mɔ n’ɛnɛ tɛ̀ɛ́ de so, nɛ́ kasa o gasa heembea in geɗek-a mbɛt.

²⁴Ɛ́nɛ́ o wi-usi-war nɛ̀ zɔk mɔ na’ɛ! Ɛ́nɛ́ mbák yì wen be zi̧, ɓɛɛ mɔ n’ɛnɛ gur nɛ́ ŋgeloba!

²⁵«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ o wi nɛ̀ a̧a̧ nɛ̀ see-yiitoo! Ɛ́nɛ́ fɔ́r nɛ́ ɗoŋ ɗele in tasi, ɓɛɛ kɔ̧́ a̧ duna nɛ̀ wɔ-ɓara-mɔ nɛ̀ ŋgai in ɗaŋ wɔ-mɔ.

²⁶Mɛ́ Fariziɛn wi-zɔk-mɔ na’ɛ! Mɛ̀ fɔ́r kɔ̧́ ɗele in tasi nɛ̀ sa̧a̧-a̧ nɛti, ɓɛɛ ɗoŋ-aa tɛ sa̧ mbɛt.

²⁷«Bɔnɛ a̧a̧ zu'nɛ́, o wi-usi-heembea in o Fariziɛn, ɛ́nɛ́ o wi nɛ̀ a̧a̧ nɛ̀ see yiitoo! Ɛ́nɛ́ hɔɔ ŋmaa in pɛsi-fio nɛ̀ wa aa bu ɓɔndɔ ɗoŋ-aa nɛ̀ zan ha̧ a̧ mɛ duk nɛ̀ de-a, ɓɛɛ kɔ̧́ a̧ duna nɛ̀ gba̧a̧-fio in ndiŋmɔ nɛtɛ nɛtɛ.

²⁸Ɛ́nɛ́ mbɛt, nɛ̀ zan ɛ́nɛ́ usi ha̧ o bíí‘e, ɛ́nɛ́ nɛ́ o wi-de-mɔ nɛ̀ yuwar-a, ɓɛɛ kɔ̧́ see'nɛ́ duna nɛ̀ ɔrmɔ in ɗaŋmɔ.

²⁹«Bɔnɛ a̧a̧ zu'nɛ́, o wi-usi-heembea in o Fariziɛn, ɛnɛ o wi nɛ̀ a̧a̧ nɛ̀ see yiitoo! Ɛ́nɛ́ mbó nɛ́ pɛsi ko o wi-tɔ̧-wen oi nú Sɔ̧, yɔk nɛ̀ zu pɛsi ko o wi-de-mɔ nɛ̀ yuwar-a nɛ̀ de-a,

³⁰ɓɛɛ ɛ́nɛ́‘e, kà‘i dúk so ŋgimbi ko zɔmdáa kɔ‘i, wi beka gbam so in wa mɛ gbɛ o wi-tɔ̧-wen oi nú Sɔ̧ na.

³¹Hegɔ, wen k’ɛ́nɛ́ sii ɗoŋ zu'nɛ́: ɛ́nɛ́ nɛ́ o bem ko o wi nɛ̀ gbɛɛ so o wi-tɔ̧-wen oi nú Sɔ̧.

³²Wen hegɔ, tom nɛ̀ o dáà k’ɛ́nɛ́ ku̧u̧ so naŋ-a'i, ɛ̀nɛ̀ dé oi-aa kaɗi ŋgaɓo!

³³Ɛ́nɛ́ o gɔ́k! Kpar be-kóró nɔ'ɔ! Ɛ́nɛ́ tɛ nyaŋ so yea-a kɔ̧́ wee Gehɛn nde?

³⁴Nɛ́ mɔ‘i sa'm tom o wi-tɔ̧-wen oi nú Sɔ̧ in o wi-iŋ-mgbara-mɔ ká bá nɛ̀ o wi-usi-heembea nɛnɛ sitɛ‘nɛ́. Ɓɛɛ ɛnɛ tɛ mgboi o ŋma mgbara wa zu te-diŋa, ɛnɛ tɛ gusi o ŋma kɔ̧́ tua-mɔi̧a-a k’ɛ́nɛ́, ɓɛɛ ɛnɛ tɛ ndak wa nɛ̀ ŋgɔn nɛ̀ ŋgɔn dam ɗoŋ ye lɛŋ.

³⁵Ɛ́nɛ́ tɛ de mɔɔ nɔ‘i, wen ha̧ tɔk-tɛ o wi-de-mɔ nɛ̀ yuwar-a nɛ̀ aa nù lɛŋ mɛ tik zu'nɛ́, ku̧u̧naŋ-a nɛ̀ tɔk-tɛ Abɛl wi-de-mɔ nɛ̀ yuwar-a hɔ nɛnɛ tɛ Zakarii, bem ko Barakii, n’ɛnɛ gbɛɛ so ɗoŋ fara-ɗafi-sɔ̧ ti sa̧a̧-fara.

³⁶Nɛ́ kpasawen a̧‘m tɔ̧ h’ɛ́nɛ́, mɔɔ nɔ‘i lɛŋ tɛ tik zu tugun bíí'ɛ!»

³⁷«Jerusalɛm! Jerusalɛm! Ho! Mɛ, wi nɛ̀ gbɛ o wi-tɔ̧-wen oi nú Sɔ̧, yo nɛ̀ o betom nɛ Sɔ̧ toma tɛnɛ ha̧ mɛ nɛ̀ ta gbɛ'ɛ! Ɓɔnsɛnɛ mi kɔ̧ɔ̧ so mɛ mɔi̧ o bem kɔ-mɛ hee mɔ'ɔ nɛ̀ nana-kɔra mɔi̧ nɛ̀ o bem kɔ‘i a ɗɔɔ ɓaa-wi’ɛ ga wó, ɓɛɛ ɛnɛ kɔ̧ na.

³⁸Mɛ̀ nɛ́ wen hegɔ, tua kɔ-mɛ tɛ duk nɛ́ gɛ̧ɛ̧ tua.

³⁹Nɛ́ kpasawen a̧‘m tɔ̧ h’ɛ́nɛ́, ɛnɛ beka zɔk am ɓɔna hɔ fara n’ɛnɛ tɛ tɔ̧‘e: ‹Toka-de-yoŋgo a̧ dúk zu wi nɛ̀ tɛ‘i nɛ̀ nin Gasa Wan!› »