Read Northwest Gbaya MATTHIEU 27 Bible Online

MATTHIEU 27 - Northwest Gbaya bible

MATTHIEU 27

¹Nɛ̀ mɔ sa̧a̧ kaɗi, ɓɛɛ o gasa wan-ɗafi-sɔ̧ lɛŋ in o gasawi ko o Juif e nú ba nɛ̀ keta ha̧ Jesu mɛ fe.

²Wa hɛra a̧, ɓɛɛ mgbɔ a̧ yaknɛ sitɛ wannu Pilat.

³Ɓɛɛ nɛ̀ Judas, wi-e-ɗɔra tɛ Jesu, zɔka'e, wa gɔna kita-fio zu Jesu kaɗi, a̧ taa mɔ nyɛmna, ɓɛɛ kai kɔya-sede nɔ‘i ɓu-taar'i sinɛ ɗoŋ ha̧ o gasa wan-ɗafi-sɔ̧ in o gasawi, ɓɛɛ tɔ̧:

⁴«Mi dee ɗaŋmɔ wen n'am ee wi nɛ̀ de ŋma ɗaŋmɔ na er'nɛ́.» Ɓɛɛ wa kifi nú ha̧ a̧: «Ŋma wen k’ɛɛ so sɛnɛ? I̧i̧ nɛ́ wen kɔ-mɛ!»

⁵Nɛ́ mɔ'ɔ nɛ̀ Judas aa sede'i nù kɔ̧́ Tua ko Sɔ̧, ɓɛɛ yak nɛ́ɛ̀ ga̧i̧ tɛ̀ nɛ̀ nyak.

⁶O wan-ɗafi-sɔ̧ dɔra sede'i, ɓɛɛ tɔ̧: «Heembea k’ɛɛ e ha̧ pɛrti sede hegɔ'ɛ mɛ ye mgbara sede ko Sɔ̧ na, wen nɛ́ sede-tɔk.»

⁷Wa baa keta in o ŋmaa, ɓɛɛ wa ba sede'i hi̧fi nɛ̀ fɔ ko wi-ɓu-kpánà wen guna o gɛnɛ sɛnɛ.

⁸Mɛ̀ nɛ́ wen hegɔ, hɔ sɔsɔɔ‘i wa sa fara'i nɛ́ «Fɔ-tɔk».

⁹Hegɔ wen nɛ̀ wi-tɔ̧-wen oi nú Sɔ̧ Jeremii bàá tɔ̧ so hɔɔ gba̧a̧; a̧ tɔ̧ɔ̧ so'e: «Nɛ́ mɔ'ɔ nɛ̀ wa kaia kɔya-sede ɓu-taar, gɛnɛ-a nɛ̀ wa gɔna'i nɛ́ mɔ‘i, gɛnɛ-a nɛ̀ o be Israɛl gɔna nɛ́ mɔ‘i,

¹⁰ɓɛɛ wa hi̧fi nɛ̀ fɔ ko wi-ɓu-kpánà, hee mɔ'ɔ nɛ̀ Gasa Wan bàá tɔ̧ so ha̧‘m nɛti ga.»

¹¹Nɛ́ mɔ'ɔ nɛ̀ wa mgbɔɔ Jesu nɛnɛ ti Pilat, ɓɛɛ Pilat ak a̧: «Mɛ́ nɛ́ wannu ko o Juif nde?» Ɓɛɛ Jesu kifi nú: «Nɛ́ mɛ́ a̧ tɔ̧́.»

¹²O gasa wan-ɗafi-sɔ̧ in o gasawi dika wen a zu a̧, ɓɛɛ a̧ kifi nú na.

¹³Ɓɛɛ Pilat ak a̧: «Mɛ zii wen nɛ̀ o wi nɔ'ɔ tɔ̧ zu mɛ'ɛ na nde?»

¹⁴Jesu hu̧i̧ nú kóó tikiɗi na, ɓɛɛ mɔ‘i gɔna ɗɛɗɛ Pilat nyɛmna.

¹⁵Ɓɔnsɛnɛ kà gbaŋa Paska de, ɓɛɛ wannu gboo ŋma wi-zɔɓɔ nɛ̀ giiwi kɔ̧a̧ pi̧ nù.

¹⁶Ŋgimbi'i ŋma bíí nɛ̀ o bíí lɛŋ iŋa duka so kɔ̧́ zɔɓɔ, nin-a nɛ́ Barabas.

¹⁷Nɛ́ mɔ'ɔ nɛ̀ Pilat aka o giiwi nɛ̀ mɔi̧a: «Mgbara o Barabas in Jesu nɛ̀‘i sa'e Mɛsii, ɛ́nɛ́ kɔ̧ɔ̧ a̧‘m gbó nɛ́ o h’ɛ́nɛ́ o?»

¹⁸Wen Pilat iŋa'e, nɛ́ tɛ̀ aa-see-mɔ a̧ wa ee nɛ̀ Jesu er a̧.

¹⁹Pilat biti fara-kita, ɓɛɛ kóò kɔ̧-a̧ tom nɛnɛ ha̧ a̧‘e, ká a̧ pi̧ nú tɛ wen ko wi-de-mɔ nɛ̀ yuwar-a'i na, wen mɛ zɛ'ɛ wi ɔɔ ɗaŋ zu nyɛmna wen zu wi’ɛi.

²⁰Nɛ́ mɔ'ɔ nɛ̀ o gasa wan-ɗafi-sɔ̧ in o gasawi aa wen ha̧ giiwi mɛ tɔ̧ ha̧ Pilat'e, a̧ a̧ gbó nɛ́ Barabas, ɓɛɛ nɛ̀ ko Jesu, a̧ a̧ gbɛ́ a̧.

²¹Pilat aka mɔ woyo: «Mgbara o wi nɔ'ɔ yiitoo’ɛ, ɛ́nɛ́ kɔ̧ɔ̧ a̧‘m gbó nɛ́ o?» Wa kifa nú: «Ɛ̀nɛ̀ gbó nɛ́ Barabas!»

²²Ɓɛɛ Pilat ak wa: «Ɓɛɛ ko Jesu nɛ̀‘i sa'e Mɛsii’ɛ, a̧‘m dé bɔɔ nɛ́ ge in a̧ ge?» Wa lɛŋ kifa nú‘e: «A'i mgbóí a̧ zu te-diŋa!»

²³Ɓɛɛ sa Pilat ak wa: «Nɛ́ ge ɗaŋmɔ ge á̧ a̧ dee ge?» Ɓɛɛ wa gai mɔ nɛ̀ ŋgaya-a gan kuti-a tɔ̧ nɛnɛ‘e: «A'i mgbóí a̧ zu te-diŋa!»

²⁴Ɓɛɛ nɛ̀ Pilat zɔka mɔ ŋgai ŋgai siti, a̧ baa yì tai nɛ̀ er ti giiwi, ɓɛɛ tɔ̧ ha̧ wa: «Tɔk-tɛ wi’ɛ bo zu'm na. Nɛ́ wen k’ɛ́nɛ́ ɛ̧!»

²⁵Ɓɛɛ giiwi kifi nú: «Simbo kɔ̧-a̧ a̧ tík zu yɛ in o bem k’ɛɛ!»

²⁶Nɛ́ mɔ'ɔ nɛ̀ Pilat gboo Barabas, ba Jesu gusi, ɓɛɛ e a̧ er o bíí ha̧ wa mɛ nɛ̀ɛ́ mgboi a̧ zu te-diŋa.

²⁷Nɛ́ mɔ'ɔ nɛ̀ o wi-biro ko Pilat mgbɔɔ Jesu si kɔ̧́ ŋma bɛr-tua, ɓɛɛ wa mɔi̧ oi o dɔka wi-biro lɛŋ pii tɛ a̧.

²⁸Wa kpɔ̧i̧a̧ laa tɛ-a yinɛ pi̧ nɛ́ gbɛ̧ laa ha̧ a̧.

²⁹Wa kara tɛnmɔ gu zu-a, ba tòrò e er-a mɛ wiiko; ɓɛɛ wa gbɛ zugur nù ti a̧ zɛkɛɗi nɛ̀ a̧ tɔ̧ nɛnɛ‘e: «Ɛ̀nɛ̀ wór mɔ wa! Wannu ko o Juif!»

³⁰Wa aa sap yí-a ɓɛɛ wa zuɗi tòrò er-a, gusi nɛ̀ zu-a.

³¹Wa zɛkɛɗa a̧ hegɔ kaɗi, ɓɛɛ wa kpɔ̧i̧ gbɛ̧ laa yinɛ pi̧ nɛ́ laa kɔ̧-a̧ tɛ-a woyo; nɛ́ mɔ'ɔ nɛ̀ wa mgbɔɔ a̧ yaknɛ mɛ nɛ̀ɛ́ mgboi a̧ zu te-diŋa.

³²Tɛ gboa-a, wa kpaa ŋma wi Sirɛn, nin-a nɛ́ Simɔŋ, ɓɛɛ wa ba a̧ nɛ̀ ŋgai ha̧ a̧ mɛ tui te-diŋa ko Jesu.

³³Ŋgimbi nɛ̀ wa hɔɔ Gɔlgɔta mɛ kaɗi, mɛ̀ nɛ́ wen nɛ̀ tɔ̧ «Fara Koŋgoi-zu»,

³⁴wa ha̧a̧ dɔ̧ɔ̧ nɛ̀‘i zaŋa nɛ̀ ŋma kpɔra-mɔ ha̧ Jesu mɛ nɔ. A̧ wea ɓɛɛ a̧ e duk.

³⁵Ɗoŋ nɛ̀ wa mgboia a̧ zu te-diŋa kaɗi, wa baa laa kɔ̧-a̧ bi nɛ̀ mbaɗi,

³⁶ɓɛɛ wa ya hi̧i̧ pɛm nɛ̀ a̧.

³⁷Wa yɔra mɔ nɛ̀ dea ha̧ a̧ mɛ fe wen-aa'i e zu-a hee mɔ'ɔ ga: «Wi’ɛ nɛ́ Jesu, wannu ko o Juif.»

³⁸Wa hɛra o ŋma kpɔ̧i̧-gba̧a̧-nin yiitoo, kpɔk nɛ̀ war wii-er-a, ɓii-aa nɛ̀ war gale, kóó o ndé zu te-diŋa kɔ‘i.

³⁹O wi nɛ̀ ɓir yak fara'i mia zu ɓɛɛ zɛkɛɗi a̧,

⁴⁰tɔ̧ nɛnɛ‘e: «Mɛ́ yàá-gbin Tua ko Sɔ̧ a nù ɓɛɛ ɗoŋ zɛ yiitoo, taar-a mɛ mboo lɛŋ woyo’ɛ, mɛ̀ kpásí tɛ-mɛ nɛ̀ tɛ-mɛ gɔ! Mɛ́ nɛ́ bòò nɛ́ Bem ko Sɔ̧, mɛ̀ zír zu te-diŋa’ɛ, h’ɛ́ɛ́ zɔk.»

⁴¹O gasa wan-ɗafi-sɔ̧ in o wi-usi-heembea ká bá nɛ̀ o gasawi zɛkɛɗa a̧ mbɛt, ɓɛɛ tɔ̧:

⁴²«A̧ kpasa so o ŋma bíí, ɓɛɛ a̧ nyɛm mɛ kpasi tɛ-a nɛ̀ tɛ-a na. A̧ nɛ́ wannu ko Israɛl gɔ. A̧ a̧ zír zu te-diŋa’ɛ kinii, h’ɛ́ɛ́ kɔ̧ ɗɔaa ha̧ a̧!

⁴³A̧ baa e ta nɛ̀ Sɔ̧; kà Sɔ̧ nɛ́ kɔ̧ɔ̧ a̧, ɓɛɛ a̧ a̧ kpás'a kinii, wen a̧ bàá tɔ̧ so'e, wi nɛ́ Bem ko Sɔ̧.»

⁴⁴O kpɔ̧i̧-gba̧a̧-nin nɛ̀ wa hɛra zu te-diŋa katɛ a̧ da̧a̧ a̧ tɔ̧ nɛnɛ hegɔ mbɛt.

⁴⁵Ŋgimbi nɛ̀ wese hɔɔ see zu, tum baa nù fara lɛŋ hɔ gira-wese.

⁴⁶Mɛ gira-wese Jesu hiɗa mɔ nɛ̀ ŋgaya-a ɓɛɛ tɔ̧: «Sɔ̧ kɔ‘m, Sɔ̧ kɔ‘m! Wen ge s’ɛnɛ ea'm duk ge nde?»

⁴⁷O ŋma bíí nɛ̀ yaa fara'i zia hiɗimɔ‘i, ɓɛɛ tɔ̧: «A̧ sa nɛ́ Elii.»

⁴⁸Nɛ́ mɔ'ɔ nɛ̀ ŋma bíí mgbara wa maa yì pi̧ saala ɗɔɔ kpa̧i̧a̧-mɔ, ɓɛɛ sɔk nú tòrò nyɛi̧ e nú Jesu ha̧ a̧ mɛ zɔɓi.

⁴⁹Ɓɛɛ oi dɔka bíí tɔ̧ ha̧ wi’ɛi: «Mɛ̀ é kaŋ; ɛ̀ɛ̀ zɔ́k kà Elii nɛ́ tɛ̀ɛ́ tɛ̀ mɛ́ kpas'a.»

⁵⁰Jesu hiɗa mɔ nɛ ŋgaya-a woyo, ɓɛɛ ɔmi yak.

⁵¹Tɛ́ ŋgimbi'i, babir-laa kɔ̧́ Tua ko Sɔ̧ mbaŋa nɛ̀ ŋgɔn hɔ ɗɔɔ; nɛ́ mɔ'ɔ nɛ̀ nù naka, o gasa ta mbaŋa;

⁵²o pɛsi-fio hu̧i̧a̧, ɓɛɛ o bíí ko Sɔ̧ nɛ̀ dɔka-a nɛ̀ fee so kur ŋgɔn,

⁵³gbo zan, ɓɛɛ ɗoŋ kura-ŋgɔn ko Jesu wa yee saaye Jerusalɛm, ɓɛɛ bíí nɛ̀ dɔka-a zɔk wa.

⁵⁴Wi-duk-zu o wi-biro gɔmŋmaa in o wi nɛ̀ yaa in a̧ pɛm nɛ̀ Jesu zɔka naka-nù in mɔ nɛ̀ yaka lɛŋ; bele zara wa, ɓɛɛ wa tɔ̧: «Wi’ɛ duka nɛ́ Bem ko Sɔ̧ nɛ̀ mbetɛ!»

⁵⁵O gii okoo nɛ̀ tɛɛ so in Jesu nɛ̀ Galilee mɛ gbak a̧ yaa so nɛ̀ nyɛi̧a-a zɔk nɛ̀ mɔ.

⁵⁶Marii Magdala, in Marii nàà ko Jak in Jozɛf, ká bá nɛ̀ nàà ko Jean in Jak a̧a̧ mgbara wa mbɛt.

⁵⁷Mɛ́ ga̧a̧mɔ ŋma wanmbɔi hɔa; a̧ nɛ́ be saaye Arimatee; wi’ɛi so nɛ́ ŋma ŋgaiwi ko Jesu mbɛt, nin-a nɛ́ Jozɛf.

⁵⁸A̧ nɛ̀ɛ̀ tɛ Pilat mɛ ak wɔr Jesu, ɓɛɛ Pilat tɔ̧ ha̧ wa mɛ ha̧ ha̧ a̧.

⁵⁹Nɛ́ mɔ'ɔ nɛ̀ Jozɛf baa wɔr Jesu, ye nɛ̀ bu ndɔmbɔ,

⁶⁰ɓɛɛ bá nɛ́ɛ̀ gun sɛn kɔ̧-fio n'aa za̧a̧ so kɔ̧́ ta nɛ̀ mbe-a wen a̧ nɛ̀ tɛ-a. Nɛ́ mɔ'ɔ n'aa kina gasa ta kpe nɛ̀ nú kɔ̧‘i, ɓɛɛ a̧ yak.

⁶¹Marii Magdala in ɓii Marii yaa nù ká̧ fara'i zɔk nɛ̀ mɔ si nú pɛsi-fio.

⁶²Nɛ̀ mɔ sa̧a̧ kaɗi, mɛ̀ nɛ́ wen mɛ tɔ̧ wese-ɔm-tɛ, o gasa wan-ɗafi-sɔ̧ in o Fariziɛn nɛ̀ɛ̀ kpa Pilat,

⁶³ɓɛɛ tɔ̧: «Nyaa, tɛ-ɛɛ mbaŋa ɗoŋ ŋma wen nɛ̀ wi-ɔr-wi’ɛ tɔ̧ɔ̧ so ká a̧ tɛ fe na'e, ɗoŋ zɛ yiitoo, taar-a ɓɛɛ wi kura ŋgɔn;

⁶⁴hegɔ, ɛ̀nɛ̀ tɔ̧́ ha̧ o bíí mɛ pɛm pɛsi sɛn tɛ zɛ taar, wen ká o ŋgaiwi kɔ̧-a̧ nɛ́ɛ̀ zu̧ wɔr-aa yaknɛ, ɓɛɛ ká wa tɔ̧ ha̧ o bíí‘e, a̧ kura ŋgɔn tɛ fio. Wen ká sɔŋkur ɔramɔ‘i tɛ gan wan mɛ ti.»

⁶⁵Ɓɛɛ Pilat kifi nú ha̧ wa: «O wi-biro nɛ́ mɔɔ nɔ'ɔ, ɛ̀nɛ̀ pɛ́m pɛsi hee mɔ'ɔ n’ɛnɛ kɔ̧a̧ ga.»

⁶⁶Nɛ́ mɔ'ɔ nɛ̀ wa nɛ̀ɛ̀ e tumbal ɗoŋ ta-kpe-nú kɔ̧-fio, ɓɛɛ wa a o wi-biro mɛ pɛm mɔ.