Read Northwest Gbaya MATTHIEU 28 Bible Online

MATTHIEU 28 - Northwest Gbaya bible

MATTHIEU 28

¹Nɛ̀ wese-ɔm-tɛ yaka kaɗi, ɓɛɛ Marii Magdala in Marii nàà ko Jak nɛ́ mɛ zɔk zu pɛsi wese alat mɛ tutuyɛ sut.

²Nɛ́ mɔ'ɔ nɛ̀ nù naka nɛ̀ ŋgaya-a, ɓɛɛ betom ko Sɔ̧ zir nɛ̀ yiwese, kin ta nú pɛsi yinɛ ɓɛɛ duk nù zu a̧.

³Saŋa-yí-a tok tok hee pi̧i̧-kórò ga; laa kɔ̧-a̧ ɔ fɛ̧ŋa ndáká-ndáká.

⁴Nɛ̀ o wi-biro-pɛm-mɔ zɔka a̧, bele zara wa a nù gbéyéŋ hee fio ga.

⁵Ɓɛɛ betom mɛ yiwese tɔ̧ ha̧ o kóò nɔ‘i: «Ká kíì de'nɛ́ na. Mi iŋa ɛ́nɛ́ kíí nɛ́ Jesu nɛ̀ wa mgboia zu te-diŋa.

⁶A̧ bo hɛ̧ɛ̧ na; ɛ̀nɛ̀ tɛ́ ɛ̀nɛ̀ zɔ́k fara n'aa ɔɔ so nù sɛnɛ. A̧ kura ŋgɔn kaɗi, hee mɔ'ɔ n'aa bàá tɔ̧ so ga.

⁷Ɛ̀nɛ̀ nɛ́ nɛ̀ haya-a, ɛ̀nɛ̀ tɔ̧́ ha̧ o ŋgaiwi kɔ̧-a̧‘e: ‹A̧ kura ŋgɔn tɛ fio kaɗi, ɓɛɛ a̧ tɛ yak ti h’ɛ́nɛ́ si Galilee mɛ; nɛ́ hi̧i̧ ɛ̀nɛ̀ tɛ zɔk a̧.› Zɔ́k mi tɔ̧ɔ̧ h’ɛ́nɛ́ kaɗi.»

⁸Kíì dee wa, ɓɛɛ wa ya nɛ̀ desee mbɛt. Wa ee pɛsi-fio duk nɛ̀ haya-a, ma yì mɛ nɛ̀ɛ́ tɔ̧ wen'i ha̧ o ŋgaiwi ko Jesu.

⁹Nɛ́ mɔ'ɔ nɛ̀ Jesu wee ti wa tɛnɛ, ɓɛɛ fan wa: «Ɛ̀nɛ̀ wór mɔ!» Wa nɛ̀ɛ̀ si katɛ a̧, ɓɛɛ gu nù kasi naŋ-a.

¹⁰Ɓɛɛ Jesu tɔ̧ ha̧ wa: «Ká kíì de'nɛ́ na. Ɛ̀nɛ̀ tɔ̧́ ha̧ o nya'm'e: wa a̧ nɛ́ si Galilee mɛ; nɛ́ hi̧i̧ a̧ wa tɛ zɔk am.»

¹¹Yaka-a ko o okoo nɔ‘i hegɔ, ɓɛɛ o ŋma wi-pɛm-mɔ nɛ́ saaye mɛ we ɗoŋ mɔ lɛŋ nɛ̀ yaka ha̧ o gasa wan-ɗafi-sɔ̧.

¹²O gasa wan-ɗafi-sɔ̧ mɔi̧a ŋmaa in o gasawi, ɓɛɛ ba keta mɛ ha̧ sede nɛ̀ dɔka-a ha̧ o wi-biro.

¹³Ɓɛɛ wa tɔ̧: «Ɛ̀nɛ̀ tɔ̧́‘e, nɛ́ o ŋgaiwi kɔ̧-a̧ a̧ tɛ̀ɛ̀ zu̧ wɔr-aa yaknɛ mɛ zɛ k’ɛ́nɛ́ biti ɔ̀ yá.

¹⁴Ɓɛɛ kà wen-aa nɛ́ aa zer gasa wi-duk-zu zika-nù, ɛɛ tɛ ga̧ see-aa wen ká wen tɛ́ɛ̀ tik zu'nɛ́.»

¹⁵Nɛ́ mɔ'ɔ nɛ̀ o wi-biro baa sede'i ɓɛɛ ku̧ naŋ tɔ̧ɔ̧ wen hee mɔ'ɔ nɛ̀ o gasa wan-ɗafi-sɔ̧ tɔ̧ɔ̧ ha̧ wa ga, ɓɛɛ wen'i nɛ́ mɔ'ɔ nɛ̀ biti kànà mgbara o Juif hɔ sɔsɔɔ‘i.

¹⁶Ɓɛɛ ko o ŋgaiwi ko Jesu ɓu-zua-kpok, wa yaka kɔ-wa si Galilee zu kaya nɛ̀ Jesu usa so ha̧ wa mɛ mɔi̧ ŋmaa sɛnɛ.

¹⁷Ŋgimbi nɛ̀ wa zɔka a̧, wa guu nù ti a̧, ɓɛɛ o ŋma biti si kafɛ.

¹⁸Nɛ́ mɔ'ɔ nɛ̀ Jesu tɛ̀ɛ̀ pii tɛ wa, ɓɛɛ tɔ̧ ha̧ wa: «Sɔ̧ ha̧a̧ ŋgai mɛ́ yiwese in mɛ́ zaŋnu lɛŋ ha̧‘m.

¹⁹Wen hegɔ ɛ̀nɛ̀ nɛ́, ɛ̀nɛ̀ dé ha̧ o zuduk bíí lɛŋ mɛ ya o ŋgaiwi kɔ‘m; ɛ̀nɛ̀ zúí wa nɛ̀ nin Dáà in Bem in Sa̧a̧ Ɔmi,

²⁰ɓɛɛ ɛ̀nɛ̀ úsí mɔ lɛŋ n'am usa h’ɛ́nɛ́ ha̧ wa mɛ kasi mbɛt. Ɓɛɛ kɔ‘m, mi a̧a̧ in'nɛ̀ɛ́ wese lɛŋ hɔ nɛnɛ sɔŋkur ŋgimbi.»