Read Northwest Gbaya MATTHIEU 3 Bible Online

MATTHIEU 3 - Northwest Gbaya bible

MATTHIEU 3

¹Tɛ́ ŋgimbi'i Jean Zui-bíí hɔa, ɓɛɛ duk tɔ̧ nɛ̀ wen ko Sɔ̧ sɛn ŋga-gbárà Judee mɛ.

²A̧ tɔ̧a̧: «Ɛ̀nɛ̀ kpáí duka-a k’ɛ́nɛ́ wen Wan mɛ yiwese hɛɗa kaɗi.»

³Jean nɛ́ bíí nɛ̀ wi-tɔ̧-wen oi nú Sɔ̧ Esaii baa tɔ̧ so nɛnɛ‘e: «Ŋma bíí hiɗi nɛ́ mɔ ŋga-gbárà mɛ‘e: ‹Ɛ̀nɛ̀ ɗáfí yuwar ko Gasa Wan, ɛ̀nɛ̀ ɗáfí yuwar kɔ̧-a̧ nɛ̀ tana-a.› »

⁴Jean duka pí̧ nɛ́ laa-buma-ŋgeloba, ɓɛɛ hɛr kanda guntir-wi. Mɔɔ-nyɔŋ kɔ̧-a̧ nɛ́ gba-dɔya in gɔrɔ.

⁵Ɓɛɛ o bíí Jerusalɛm in o bíí Judee ká bá nɛ̀ o bíí ká̧ Jurdɛn lɛŋ nɛ́ tɛ́ a̧.

⁶Wa gbara ɗaŋmɔ kɔ-wa, ɓɛɛ Jean zui wa sɛn ɗɔɔ Jurdɛn.

⁷Hee mɔ'ɔ n'aa zɔka o Fariziɛn in o Saduseɛn nɛ̀ nɛ́ tɛ́ a̧ nɛ̀ dɔka-a ha̧ a̧ mɛ zui wa ga, a̧ tɔ̧ɔ̧ ha̧ wa: «Ɛ́nɛ́ o kpar be-kóró nɔ'ɔ, o'o usa h’ɛ́nɛ́ mɛ yu nyimsea ko Sɔ̧ nɛ̀ tɛ‘i o?

⁸Ɛ̀nɛ̀ dé mɔ nɛ̀ tɛ́ usi'e, ɛ́nɛ́ kpaia duka-a k’ɛ́nɛ́,

⁹ɓɛɛ k’ɛ́nɛ́ ta mɛ tɔ̧‘e: ‹Dáà k’ɛ́ɛ́ nɛ́ Abraham,› na, wen mi tɔ̧ h’ɛ́nɛ́, Sɔ̧ nyɛma mɛ de o ta nɔ'ɔ nɛ̀ bem ha̧ Abraham.

¹⁰Kpi̧i̧ hɛɗa kànà dɔ̧́ɔ̧́ mɛ gɔm te nɛ̀ oi kunin-a pi̧ nù kaɗi; hegɔ o te lɛŋ nɛ̀ wai de waya-a na, wi tɛ gɔm pi̧ tɛ wee.

¹¹Mi zui kɔ‘m'nɛ́ nɛ̀ yì mɛ usi'e ɛ́nɛ́ kpaia duka-a k’ɛ́nɛ́ kaɗi, ɓɛɛ wi nɛ̀ tɛ́ ɗoŋ am'i tɛ zui kɔ‘i'nɛ́ nɛ̀ Sa̧a̧ Ɔmi in nɛ̀ wee, wen ŋgai kɔ̧-a̧ gana kɔ‘m. Kóó géé ndárà mɛ naŋ-a, mi nyɛm mɛ kpɔ̧i̧ na.

¹²Mɔɔ-pɛfi-mɔ a̧a̧ er-a mɛ pɛfi nɛ̀ alkamaari. A̧ tɛ kai gba̧a̧ alkamaari a kɔ̧́ dam, ɓɛɛ a̧ dɔɔ pumyulu-a tɛ́ wee nɛ̀ bi na kpoo nɛ kpoo.»

¹³Nɛ́ mɔ'ɔ nɛ̀ Jesu kura Galilee ɓɛɛ tɛ pii nú Jurdɛn ha̧ Jean Zui-bíí mɛ zui a̧.

¹⁴Jean kɔ̧ɔ̧ so mɛ bɛ̧ zuia a̧, ɓɛɛ tɔ̧ ha̧ a̧: «Nɛ́ ɛ́nɛ́ a̧ tɛ̀ɛ́ zui só‘m, ɓɛɛ s’ɛ́nɛ́ tɛ́ bɔ̀ɔ́ tɛ‘m ha̧‘m mɛ zui'nɛ́'ɛ héé ge?»

¹⁵Ɓɛɛ Jesu kifi nú ha̧ a̧: «Mɛ̀ é ha̧ mɔ hegɔ mɛ de kinii, wen h’ɛ́ɛ́ mɛ de mɔ nyɛm nɛ̀ ɗoŋ mɔ nɛ̀ Sɔ̧ kɔ̧a̧,» ɓɛɛ Jean de hee mɔ‘i ga.

¹⁶Ɗoŋ n'aa zuia a̧ kaɗi, Jesu daŋa ɗɔɔ yì, ɓɛɛ kà wa zɔk wó, yiwese hu̧i̧a̧, ɓɛɛ Jesu zɔk Ɔmi ko Sɔ̧ fara zira-a hee gbaku̧i̧ ga pii zu-wi,

¹⁷ɓɛɛ wa zii ŋma tiger nɛ̀ tɔ̧ wen tɛnɛ nɛ̀ yiwese mɛ‘e: «Wi’ɛ nɛ́ Bem kɔ‘m, n'am kɔ̧ɔ̧ nyɛmna; see-am lɛŋ a̧a̧ zu a̧.»