Read Northwest Gbaya MATTHIEU 4 Bible Online

MATTHIEU 4 - Northwest Gbaya bible

MATTHIEU 4

¹Hɔ-ɗoŋ-aa, Sa̧a̧ Ɔmi mgbɔɔ Jesu si ŋga-gbárà mɛ̀ ha̧ Wan-ɗaŋmɔ mɛ we a̧.

²Jesu zima yì zɛ ɓu-naar, wese nɛ̀ zɛ, ɓɛɛ wɔ ba tɛ-a.

³Nɛ́ mɔ'ɔ nɛ̀ Wan-ɔr-wi tɛ̀ɛ̀ pii katɛ a̧, ɓɛɛ tɔ̧ ha̧ a̧: «Kà mɛ̀ nɛ́ bòò nɛ́ Bem ko Sɔ̧, mɛ̀ tɔ̧́ ha̧ o ta nɔ'ɔ mɛ kifi brɛt.»

⁴Ɓɛɛ Jesu kífí nú ha̧ a̧: «Yɔramɔ tɔ̧ɔ̧‘e ndé: ‹Bó nɛ́ brɛt ɓɛɛ a̧ tɛ de ha̧ bíí mɛ duk kpasa na, ɓɛɛ mɛ̀ nɛ́ wen lɛŋ nɛ̀ gbo nɛ̀ nú Sɔ̧ a̧ de ha̧ bíí mɛ duk kpasa.› »

⁵Wan-ɗaŋmɔ mgbɔɔ a̧ nɛnɛ sitɛ Sá̧á̧ Yé,[1] ba a̧ e zu Tua ko Sɔ̧,

⁶ɓɛɛ tɔ̧ ha̧ a̧: «Kà mɛ̀ nɛ́ bòò nɛ́ Bem ko Sɔ̧, mɛ̀ kpíɗí tik nù wen Yɔramɔ tɔ̧a̧‘e: ‹A̧ tɛ ha̧ nú ha̧ o betom kɔ̧-a̧ wen zu mɛ́, ɓɛɛ wa tɔia mɛ́ nɛ̀ er wen ká naŋ-mɛ tɛ̀ɛ́ tò ta.› »

⁷Ɓɛɛ Jesu tɔ̧ ha̧ a̧: «Yɔramɔ tɔ̧ɔ̧ mbɛt'e: ‹Ká mɛ́ wé Gasa Wan Sɔ̧ kɔ-mɛ na.› »

⁸Nɛ́ mɔ'ɔ nɛ̀ Wan-ɗaŋmɔ mgbɔɔ Jesu nɛnɛ woyo si zu ŋma kusa kaya, ɓɛɛ usi wan zu nù'ɛ lɛŋ in gasamɔ kɔ-wa ha̧ a̧,

⁹ɓɛɛ tɔ̧ ha̧ a̧: «Kà mɛ̀ gbɛ zugur-mɛ nù ti'm mɛ gas'am, mi tɛ ha̧ mɔɔ nɔ'ɔ lɛŋ ha̧ mɛ.»

¹⁰Ɓɛɛ Jesu tɔ̧ ha̧ a̧: «Satan, mɛ̀ yú síɓí! Wen Yɔramɔ‘e: ‹Nɛ́ Gasa Wan Sɔ̧ kɔ-mɛ́ à̧ mɛ̀ tɛ́ zɔn; ɓɛɛ mɛ gasa nɛ́ a̧ kpɔk ɓɛɛ.› »

¹¹Nɛ́ mɔ'ɔ nɛ̀ Wan-ɗaŋmɔ ee Jesu duk, ɓɛɛ o betom mɛ yiwese tɛ mɛ de tom ha̧ a̧.

¹²Ŋgimbi nɛ̀ Jesu zia'e wa pi̧i̧ Jean zɔɓɔ wó, a̧ sìí ɗoŋ si Galilee.

¹³A̧ kura Nazarɛt nɛ́ɛ̀ dúk Kafarnaum, sɛn ká̧ tɔp Galilee tɛ̀ nú Zabulɔŋ in Nɛftalii.

¹⁴A̧ dee hegɔ ha̧ wen nɛ̀ wi-tɔ̧-wen oi nú Sɔ̧ Esaii tɔ̧ɔ̧ so mɛ hɔ gba̧a̧:

¹⁵«Nú Zabulɔŋ, nú Nɛftalii, yuwar si nú gba-tɔp, nù nɛ̀ a̧a̧ kur Jurdɛn, Galilee fara ko o gɔni-dùk!

¹⁶Dukbíí nɛ̀ yaa so ti tum zɔka gasa sa̧a̧mɔ; sa̧a̧mɔ nyɛka zu o bíí nɛ̀ duka so ti tum ye ko o fio!»

¹⁷Tɛ́ ŋgimbi'i, Jesu ku̧u̧ naŋ tɔ̧ɔ̧ wen ko Sɔ̧ ɓɛɛ tɔ̧: «Ɛ̀nɛ̀ kpáí duka-a k’ɛ́nɛ́, wen Wan mɛ yiwese hɛɗa kaɗi.»

¹⁸Hee mɔ'ɔ nɛ̀ Jesu yara nɛ̀ ká̧ tɔp Galilee ga, a̧ zɔka o nya-wi yiitoo, Simɔŋ (nɛ̀ wa sa'e Pierre), in Andre. Wa pi̧ nɛ́ yɔk ɗɔɔ tɔp, wen wa nɛ́ o wi-gbɛ-zoro.

¹⁹Ɓɛɛ Jesu tɔ̧ ha̧ wa: «Ɛ̀nɛ̀ tɛ́ ɗoŋ am, ɓɛɛ mi tɛ de h’ɛ́nɛ́ mɛ ya nɛ́ o wi-mɔi̧-bíí.»

²⁰Soɓee, wa ee o yɔk kɔ-wa dúk, ɓɛɛ wa nɛ́ ɗoŋ-aa.

²¹Jesu yaka siti ɓɛɛ nɛ́ɛ̀ kpa o ŋma nya-wi yiitoo woyo, Jak bem kó Zebedee in Jean. Wa ya kɔ̧ kombon kɔ-wa ɗafi nɛ̀ yɔk in dáà kɔ-wa, ɓɛɛ Jesu sa wa.

²²Soɓee, wa ee kombon in dáà kɔ-wa dúk ɓɛɛ wa nɛ́ ɗoŋ Jesu.

²³Jesu yara dam nú Galilee lɛŋ usi nɛ̀ mɔ nɛ̀ kɔ̧ tua-mɔi̧a-a nɛnɛ, tɔ̧ nɛ̀ De Mbe Wen Wan ko Sɔ̧, kpasi nɛ̀ o wi-zɛɛ lɛŋ in wi-nyimmɔ nɛtɛ nɛtɛ mgbara o bíí nù‘i.

²⁴Nyɛrɛmɔ kɔ̧-a̧ pɛsa dam nú Sirii, ɓɛɛ wa kai o wi-zɛɛ lɛŋ nɛnɛ ha̧ a̧, in o wi nɛ̀ a̧a̧ nɛ̀ nyimmɔ nɛtɛ nɛtɛ, o wi nɛ̀ ɗaŋ-sɔ̧ a̧a̧ tɛ-wa, o wi-doe ká bá nɛ̀ o kara-wi, ɓɛɛ a̧ kpasi wa.

²⁵Gba giiwi mɔi̧a tɛnɛ nɛ̀ Galilee, nɛ̀ Dekapol, nɛ̀ Jerusalɛm, nɛ̀ Judee in nɛ̀ kur Jurdɛn mɛ mbɛt ha̧ wa mɛ́ nɛ̀ ɗoŋ-aa.