Read Northwest Gbaya MATTHIEU 5 Bible Online

MATTHIEU 5 - Northwest Gbaya bible

MATTHIEU 5

¹Jesu zɔka o giiwi nɔ‘i, ɓɛɛ daŋ si zu kaya, nɛ́ɛ̀ dúk nù. O ŋgaiwi kɔ̧-a̧ nɛ̀ɛ̀ si katɛ a̧,

²ɓɛɛ a̧ usi mɔ ha̧ wa tɔ̧ nɛnɛ hee mɔ'ɔ ga:

³«O wi nɛ̀ iŋa'e wi nɛ́ wisan ti Sɔ̧ à̧ yá nɛ̀ desee, wen Wan mɛ yiwese nɛ́ kɔ-wa!

⁴O wi-hi̧i̧-kɔ̧a̧ à̧ yá nɛ̀ desee, wen Sɔ̧ tɛ ga̧ see-wa!

⁵O ga̧a̧-wi à̧ yá nɛ̀ desee, wen Sɔ̧ tɛ ha̧ nù ha̧ wa nɛ̀ mɔɔ-oi!

⁶O wi nɛ̀ wɔ-deemɔ nɛ̀ yuwar-a gbɛ wa à̧ yá nɛ̀ desee, wen Sɔ̧ tɛ ha̧ ha̧ wa!

⁷O wi-de-ko à̧ yá nɛ̀ desee, wen Sɔ̧ tɛ de ko ha̧ wa!

⁸O wi-sa̧a̧-see à̧ yá nɛ̀ desee, wen wa tɛ zɔk Sɔ̧!

⁹O wi-am-mɔ à̧ yá nɛ̀ desee, wen Sɔ̧ tɛ sa wa nɛ́ o bem kɔ‘i!

¹⁰O wi nɛ̀ zɔk bɔnɛ wen zu deemɔ nɛ̀ yuwar-a à̧ yá nɛ̀ desee, wen Wan mɛ yiwese nɛ́ kɔ-wa!

¹¹«Kà o bíí nɛ́ da̧a̧‘nɛ́, kà wa nɛ́ usa bɔnɛ h’ɛ́nɛ́, in kà wa nɛ́ ɓira wen e nú‘nɛ́ wen zu'm, ɛ̀nɛ̀ yá nɛ̀ desee.

¹²Ɛ̀nɛ̀ yá nɛ̀ desee, ɛ̀nɛ̀ dé nyɛŋɛ wen mɔɔ-oi-tom k’ɛ́nɛ́ nɛ̀ pɛm'nɛ́ yiwese mɛ ɔ gasa. Nɛ́ hegɔ a̧ wa usa so nɛ̀ bɔnɛ ha̧ o wi-tɔ̧-wen oi nú Sɔ̧ nɛ̀ duka so zaŋnu nɛti h’ɛ́nɛ́.»

¹³«Ɛ́nɛ́ nɛ́ tɔŋ zu nù'ɛ. Kà kpɔra-tɔŋ nɛ́ gboo kaɗi, wi tɛ de héé ge ha̧ a̧ mɛ kpɔr nɛnɛ woyo ge nde? I̧i̧ tɔŋ‘i beka de tom ɓɔna. Kànà nɛ́ gbaia-a a taŋ ha̧ bíí mɛ i̧si̧ ɓɛɛ.

¹⁴«Ɛ́nɛ́ nɛ́ sa̧a̧mɔ zaŋnu’ɛ. Gasa ye nɛ̀ duk zu kaya hu̧si tɛ na.

¹⁵Wi e wee tɛ lamba mɛ ba e ɗɔɔ mɔ na; wi e wee tɛ lamba mɛ ba e zu paku, ha̧ a̧ mɛ duk hi̧i̧ nyɛk nɛnɛ ti o bíí lɛŋ nɛ̀ a̧a̧ kɔ̧ tua ɛ̧.

¹⁶Nɛ́ hegɔ ɛ̀nɛ̀ tɛ e ha̧ sa̧a̧mɔ k’ɛ́nɛ́ mɛ nyɛk ti o bíí ha̧ wa mɛ zɔk de deemɔ k’ɛ́nɛ́, ɓɛɛ ha̧ wa mɛ gasi Dáà k’ɛ́nɛ́ nɛ̀ a̧a̧ yiwese.»

¹⁷«K’ɛ́nɛ́ ta'e mi tɛ̀ɛ̀ mɛ yai nɛ́ heembea ko Moisɛ, kóó usamɔ ko o wi-tɔ̧-wen oi nú Sɔ̧ yinɛ na. Bó nɛ́ mi tɛ̀ɛ̀ mɛ yai wa yinɛ na. Mi tɛ̀ɛ̀ mɛ de ha̧ wa mɛ hɔ gba̧a̧.

¹⁸Nɛ́ kpasawen a̧‘m tɔ̧ h’ɛ́nɛ́; ŋgimbi nɛ̀ yiwese in nù biti duka-a, ŋma be geɗek yɔramɔ tɛ heembea, kóó tikiɗi, beka tik nù na hɔ wese nɛ̀ mɔ lɛŋ tɛ hɔ gba̧a̧.

¹⁹Wen hegɔ, wi nɛ̀ tɛ gbin ŋma be geɗek heembea kpɔk in nɛ̀ tɛ usi ɗoŋ gbina heembea ha̧ o ŋma bíí, tɛ duk nɛ́ sɔŋkur geɗek-wi tɛ Wan mɛ yiwese. Ɓɛɛ wi nɛ̀ tɛ mbo zu tɛ heembea, ɓɛɛ usa ha̧ o ŋma-a mɛ de hegɔ mbɛt, tɛ duk nɛ́ gasawi tɛ Wan mɛ yiwese.

²⁰Mi tɔ̧ h’ɛ́nɛ́: kà mboozu k’ɛ́nɛ́ ha̧ Sɔ̧ nɛ́ gana ko o wi-usi-heembea in ko o Fariziɛn na, ɛ́nɛ́ beka ye tɛ Wan mɛ yiwese na.»

²¹«Ɛ́nɛ́ iŋa wa bàá tɔ̧ so ha̧ o zɔmdáa'e ndé: ‹Ká mɛ gbɛ zu na, ɓɛɛ kà ŋma bíí nɛ́ gbɛ̀ɛ́ zu, wi’ɛi tɛ nɛ̀ɛ́ ɓa wen-gbɛɛ-zu kɔ‘i ti gasa-gɔna-kita.›

²²Ɓɛɛ kɔ‘m, mi tɔ̧ h’ɛ́nɛ́, kóó o ndé nɛ̀ de nyimsea in nya-a̧ tɛ nɛ̀ɛ́ ɓa wen-aa ti kita. Wi nɛ̀ tɔ̧ ha̧ nya-a̧‘e ndé: ‹Mɛ́ nɛ́ mgbelewi!› tɛ nɛ̀ɛ́ ɓa kita dara kɔ̧-a̧‘i ti gasa-gɔna-kita.[2] Wi nɛ̀ da̧ nya-wi'e ndé: ‹Mɛ́ nɛ́ wi-dawa,› tɛ ye kɔ̧ wee Gehɛn.

²³Kà mɛ̀ nɛ́ baa ha̧a̧mɔ kɔ-mɛ nɛnɛ si fara-ɗafi-sɔ̧, ɓɛɛ kà tɛ-mɛ nɛ́ mbaŋa ɗoŋ ŋma mɔ nɛ̀ a̧a̧ mgbara mɛ in nya-mɛ,

²⁴mɛ̀ é ha̧a̧mɔ kɔ̧-mɛ ha̧ duk hi̧i̧ kaŋ; mɛ̀ sí ɗoŋ, mɛ̀ ɗáfí mgbara mɛ in nya-mɛ sɛka mɛ pia ɗoŋ mɛ ha̧ ha̧a̧mɔ kɔ-mɛ‘i ha̧ Sɔ̧.

²⁵Kà ŋma bíí nɛ́ wula mɛ, mɛ̀ ɗáfí mɔ mgbara mɛ in a̧ nɛ̀ yuwar nɛ̀ haya-a wen ká à̧ nɛ́ɛ̀ e mɛ er wan-gɔn-kita, ɓɛɛ ká wan-gɔn-kita tɛ́ɛ̀ e kɔ‘i mɛ er wi-biro, ɓɛɛ wa pi̧i̧ mɛ zɔɓɔ.

²⁶Nɛ́ kpasawen a̧‘m tɔ̧ ha̧ mɛ, mɛ beka gbo zɔɓɔ‘i na hɔ ŋgimbi nɛ̀ mɛ́ tɛ yoɓi nyamandoi'i hɔ tɛ dálà kpɔk sɛ́.»

²⁷«Ɛ́nɛ́ iŋa wa bàá tɔ̧ so'e: ‹Ká mɛ́ de dàlà na.›

²⁸Ɓɛɛ kɔ‘m mi tɔ̧ h’ɛnɛ, kóó o ndé nɛ̀ zɔka ŋma okoo ɓɛɛ de wɔ a̧, dèé dàlà in kóò‘i nɛ̀ kɔ̧́ see-aa mɛ kaɗi.

²⁹Kà yí-mɛ́ mɛ wiiko nɛ́ ɔra mɛ mɛ de ɗaŋmɔ, nɛ̀ mɛ sɔ́tí a̧ yinɛ pí̧ taŋ nyɛi̧ nɛ̀ mɛ, wen gana so ha̧ ŋma mɔɔ-tɛ-mɛ kpɔk mɛ ɗaŋ gan pi̧i̧ mɛ kɔ̧ wee Gehɛn nɛ̀ oi kiitɛ-mɛ lɛŋ.

³⁰Kà er-mɛ mɛ wiiko nɛ́ ɔra mɛ mɛ de ɗaŋmɔ, ɓɛɛ mɛ̀ ɓír a̧ yinɛ pí̧ taŋ nyɛi̧ nɛ̀ mɛ, wen gana so ha̧ ŋma dokoɗo-tɛ-mɛ kpɔk mɛ tik nù gan yea-a kɔ̧́ wee Gehɛn nɛ̀ oi kiitɛ-mɛ lɛŋ.»

³¹«Ɛ́nɛ́ iŋa wa bàá tɔ̧ mbɛt'e: ‹Kà ŋma bíí nɛ́ ndaka kóò kɔ‘i, a̧ tɛ ha̧ kànà kalata gbia-a ha̧ a̧.›

³²Ɓɛɛ kɔ‘m, mi tɔ̧ h’ɛ́nɛ́, kà ŋma bíí ndak kóò kɔ‘i, kà bó‘e kóò‘i dèè nɛ́ dàlà na,[3] a̧ ir nɛ́ kóò‘i mɛ de dàlà; ɓɛɛ kà ŋma bíí nɛ́ bàà kóò nɛ̀ wa ndaka'i, wi’ɛi de nɛ́ dàlà in kóò‘i.»

³³«Ɛ́nɛ́ iŋa wa bàá tɔ̧̀ so ha̧ o zɔmdáa k’ɛ́ɛ́ mbɛt'e: ‹Ká mɛ́ kan mɔ nɛ̀ ndela na; á̧ kà mɛ̀ nɛ́ kàná mɔ nɛ̀ nin Sɔ̧, ɓɛɛ nɛ̀ mɛ̀ ɗáfí war-tɛ-mɛ ŋgaɓo.›

³⁴Ɓɛɛ kɔ‘m, mi tɔ̧ h’ɛ́nɛ́, k’ɛ́nɛ́ kan géé káná mɔ na! K’ɛ́nɛ́ e er'nɛ si yiwese kan nɛ̀ mɔ na, wen yiwese nɛ́ damti ko Sɔ̧.

³⁵K’ɛ́nɛ́ ndal nù kan nɛ̀ mɔ na wen nù nɛ́ mɔɔ-e-ɗɔɔ-naŋ Sɔ̧. K’ɛ́nɛ́ kan mɔ nɛ̀ nin Jerusalɛm na, wen Jerusalɛm nɛ́ ye ko Gasa Wannu.

³⁶K’ɛ́nɛ́ kan bɛɗɛ-zu'nɛ na, wen ɛ́nɛ́ nyɛm mɛ de ha̧ mu̧i̧-zu'nɛ kpɔk mɛ kifi nɛ̀ bu-a kóó nɛ̀ tu̧-a̧ na mbɛt.

³⁷‹Íì› k’ɛ́nɛ́ a̧ ɓɔ́n kànà nɛ́ ‹íí› ɓɛɛ ‹weyaa› k’ɛ́nɛ́ a̧ ɓɔ́n kànà nɛ́ ‹weyaa›, wen mɔ nɛ̀‘i tɔ̧ gan zu ‹íì› in ‹weyaa› tɛ́ nɛ̀ tɛ́ Wan-ɗaŋmɔ.»

³⁸«Ɛ́nɛ́ iŋa wa bàá tɔ̧̀ so'e: ‹Kà ŋma bíí nɛ́ oo yí-mɛ́, ɓɛɛ mɛ̀ ó yí-wi’ɛi mbɛt; kà ŋma bíí nɛ́ gbina gba̧a̧-nin-mɛ, ɓɛɛ mɛ̀ gbín gba̧a̧-nin-a̧ mbɛt.›

³⁹Ɓɛɛ kɔ‘m, mi tɔ̧ h’ɛ́nɛ́, k’ɛ́nɛ́ kifi er ha̧ o wi nɛ̀ de ɗaŋmɔ in'nɛ̀ɛ́ na. Kà ŋma bíí nɛ́ mbɛra ká̧ yí-mɛ́ mɛ wiiko, mɛ̀ zík ɓii-aa ha̧ a̧ mbɛt.

⁴⁰Kà ŋma bíí nɛ́ kɔ̧ɔ̧ mɛ wuli mɛ wen báá geɗek laa kɔ-mɛ, mɛ̀ é ha̧ a̧ bá gasa-a mbɛt.

⁴¹Kà ŋma bíí nɛ́ baa mɛ nɛ̀ ŋgai mɛ tui tui kɔ̧-a̧ tɛ kilomɛtrɛ kpɔk, mɛ̀ túí tui'i nɛnɛ tɛ kilomɛtrɛ yiitoo.

⁴²Kà bíí nɛ́ kɔfa ŋma mɔ er-mɛ, ɓɛɛ mɛ̀ há̧ mɔ‘i ha̧ a̧; ká mɛ́ zík ɗoŋ-mɛ e ha̧ wi nɛ̀ kɔ̧ɔ̧ mɛ gbak ŋma mɔ er-mɛ na.»

⁴³«Ɛ́nɛ́ iŋa wa bàá tɔ̧̀‘e: ‹Mɛ̀ kɔ̧́ ŋma-mɛ, ɓɛɛ mɛ̀ sɛ́n wi nɛ̀ sɛn mɛ.›

⁴⁴Ɓɛɛ kɔ‘m, mi tɔ̧ h’ɛ́nɛ́, ɛ̀nɛ̀ kɔ̧́ o wí nɛ̀ sɛn'nɛ́, ɛ̀nɛ̀ kɔ́fí Sɔ̧ wen o bíí nɛ̀ usi bɔnɛ h’ɛ́nɛ́,

⁴⁵h’ɛ́nɛ́ mɛ ya nɛ́ o mgbák bem ko Dáà k’ɛ́nɛ́ nɛ̀ a̧a̧ yiwese, wen nɛ́ a̧ a̧ dé ha̧ wese mɛ nyɛk zu o wi-de-demɔ in o wi-ɗaŋ, in ha̧ kórò mɛ hɔ a zu o wi-de-mɔ nɛ̀ yuwar-a in o wi nɛ̀ de mɔ nɛ̀ yuwar-a na mbɛt.

⁴⁶K’ɛ̀nɛ̀ nɛ́ kɔ̧ɔ̧ nɛ́ o wi nɛ̀ kɔ̧ɔ̧‘nɛ́ ɓɛɛ, nɛ́ ge yí-mɔ ge ɛ̀nɛ̀ tɛ kpa oi-aa ge? Bó nɛ́ o wi-ba-garama de hegɔ mbɛ́t na nde?

⁴⁷K’ɛ̀nɛ̀ nɛ́ fana nɛ́ o nya'nɛ ɓɛɛ, nɛ́ ge demo ge ɛnɛ dea tɛ mɔ‘i gan o ŋma bíí ge? Bó nɛ́ o gɔni-dùk de hegɔ mbɛt na nde?

⁴⁸Ɓɛɛ war k’ɛ́nɛ́, ɛ̀nɛ̀ dé nɛ́ demɔ ɓɔnsɛnɛ hee Dáà k’ɛ́nɛ́ nɛ̀ a̧a̧ yiwese ga.»