Read Northwest Gbaya MATTHIEU 9 Bible Online

MATTHIEU 9 - Northwest Gbaya bible

MATTHIEU 9

¹Jesu yee kombon ɓɛɛ ku tɔp pii ɗoŋ pii saaye kɔ‘i.

²Nɛ́ mɔ'ɔ nɛ̀ wa gɔɔ ŋma kara-wi nɛ̀ mɔɔ-gɔ-wi-zɛɛ tɛnɛ ha̧ a̧. A̧ zɔka kɔ̧ɔ̧ɗɔɔwen ko o wi nɔ‘i, ɓɛɛ a̧ tɔ̧ ha̧ kara-wi'i: «Bem kɔ‘m, mɛ̀ nɔ́ ŋgiɗi! Ɗaŋmɔ kɔ-mɛ bo zu mɛ ɓɔna.»

³O ŋma wi-usi-heembea zia wen nɛ̀ Jesu tɔ̧a̧‘i, ɓɛɛ ta mɔ hee mɔ'ɔ ga: «Hó! Wi’ɛ ɗaŋ nɛ́ nin Sɔ̧!»

⁴Jesu iŋa taamɔ kɔ-wa'i, ɓɛɛ ak wa: «Wen ge s’ɛ́nɛ́ ta ɗaŋ taamɔ hegɔ sɛn kɔ̧́ see'nɛ́ ge?

⁵Wen n’ɛ̀nɛ́ tàá nɛ̀ dúk yɛ́kɛ́ɗɛ́ mɛ tɔ̧ nɛ́ tɔ̧a-a ha̧ kara-wi’ɛ: ‹Ɗaŋmɔ kɔ-mɛ bo zu mɛ ɓɔna,› náà, kóó nɛ́ tɔ̧a-a'e: ‹Mɛ̀ kúr, mɛ̀ nɛ́ nɔ̀,› nde?

⁶Hegɔ, mi tɛ usi h’ɛ́nɛ́‘e Bem ko bíí a̧a̧ nɛ̀ ŋgai sɛn zaŋnu mɛ e ɗaŋmɔ ko o bíí ha̧ wa.» Ɓɛɛ a̧ tɔ̧ ha̧ kara-wi'i: «Mɛ̀ kúr, mɛ̀ bá mɔɔ-gɔ-mɛ, ɓɛɛ mɛ̀ sí ɗoŋ tɛ̀ kɔ-mɛ.»

⁷Ɓɛɛ wi’ɛi kur si ɗoŋ tɛ̀ kɔ‘i.

⁸Tɛ̀ zɔka mɔ‘i, kíì dee o giiwi, ɓɛɛ wa zɔn Sɔ̧ wen n'aa ha̧a̧ pɛrtí ŋgai hegɔ ha̧ o bíí.

⁹Jesu nɛɛ siti ɓɛɛ zɔk ŋma bíí nɛ̀ duk nù fara-ba-garama; nin wi’ɛi nɛ́ Matthieu, ɓɛɛ Jesu tɔ̧ ha̧ a̧: «Mɛ̀ tɛ́ ɗoŋ am.» Wi’ɛi kura, ɓɛɛ nɛ́ ɗoŋ Jesu.

¹⁰Ŋma wese, Jesu duka nyɔŋ nɛ̀ mɔ in o ŋgaiwi kɔ‘i kɔ̧́ tua ko Matthieu, ɓɛɛ nɛ́ mɔ'ɔ nɛ̀ o wi-ba-garama in o ɗaŋwi tɛ̀ɛ́ nɛ̀ dɔka-a duk nù nyɔŋ nɛ̀ mɔ in a̧.

¹¹O Fariziɛn zɔka mɔ‘i, ɓɛɛ wa ak o ŋgaiwi ko Jesu: «Wen ge sa Wan-usi-mɔ k’ɛ́nɛ́ nyɔŋ mɔ in o wi-ba-garama ká bá nɛ̀ o ɗaŋwi ge?»

¹²Jesu zia wen nɛ̀ wa tɔ̧a̧‘i, ɓɛɛ kifi nú ha̧ wa: «Bó nɛ́ o wi nɛ̀ duk nɛ̀ haya-tɛ a̧ kíí wan-nyina na, ɓɛɛ nɛ́ o wi-zɛɛ a̧ kíí wan-nyina.

¹³Ɛ̀nɛ̀ nɛ́ɛ̀ kíí mgbara wen ko Sɔ̧ nɛ̀ tɔ̧a̧‘e: ‹Nɛ́ deeko a̧‘m kɔ̧a̧, nɛ̀ bó nɛ́ ɗafa-sɔ̧ na.› Bó nɛ́ mi tɛ̀ɛ̀ mɛ sa nɛ́ o wi-de-mɔ nɛ̀ yuwar-a na, ɓɛɛ mi tɛ̀ɛ̀ mɛ sa nɛ́ o ɗaŋwi.»

¹⁴O ŋgaiwi ko Jean tɛ̀ɛ́ tɛ Jesu, ɓɛɛ wa ak a̧: «War k’ɛɛ in o Fariziɛn, ɛɛ zim k’ɛɛ yì zim, ɓɛɛ o ŋgaiwi k’ɛ́nɛ́ zim kɔ‘i na’ɛ, wen ge?»

¹⁵Jesu kifa nú ha̧ wa: «O sɛm ko wi-ba-kóò tɛ zim so fio ŋgimbi nɛ̀ wi-ba-kóò biti in wa nde? Wese nɛ̀ wa tɛ ba wi-ba-kóò mgbara wa yaknɛ kaɗi, sɛka wa zima yì.

¹⁶«Wi fur mbe zɔ̧-laa tɛ gba̧‘a̧ laa na; wen mbe zɔ̧-laa'i tɛ diti tɛ́ gba̧‘a̧-a̧, ɓɛɛ laa'i zuɗa a nù.

¹⁷Wi a mbe dɔ̧ɔ̧ kɔ̧́ gba̧‘a̧ kpánà na, wen ká kpánà‘i tɛ́ɛ̀ mbaŋ ɓɛɛ dɔ̧ɔ̧ tofa a nù. Wi a mbe dɔ̧ɔ̧ kɔ̧̀ mbe kpánà sɛka wa yiitoo mbɛt duka nɛ̀ de-a.»

¹⁸Jesu ɓɔna fara tɔ̧ɔ̧ wen ha̧ wa, ɓɛɛ ŋma gasawi hɔ, gbɛ zugur nù ti a̧, ɓɛɛ tɔ̧: «Boko-bem kɔ‘m fee kinii kinii; ɛ̀nɛ̀ tɛ́, ɛ̀nɛ̀ é er'nɛ́ zu a̧ ɓɛɛ a̧ tɛ kpasi.»

¹⁹Jesu kura si ɗoŋ in gasawi'i, ɓɛɛ o ŋgaiwi ko Jesu nɛ́ in wa mbɛt.

²⁰Ŋma okoo nɛ̀ tɔk gbo a̧ tɛ pɛ ɓu-zua-yiitoo tɛ̀ɛ́ nɛ̀ ɗoŋ Jesu, ɓɛɛ tam nú laa kɔ̧-a̧,

²¹wen a̧ taa so'e, kà‘i tam nɛ́ géé nú laa ko Jesu, ɓɛɛ wi kpasa.

²²Jesu zika tɛ, zɔk kóò‘i ɓɛɛ tɔ̧ ha̧ a̧: «Boko-bem kɔ‘m, mɛ̀ nɔ́ ŋgiɗi; kɔ̧ɔ̧ɗɔɔwen kɔ-mɛ kpasa mɛ.» Ɓɛɛ tɔk nɛ̀ duka so gbo a̧‘i gɔn tɛ̀ kpɔk kale ŋgimbi'i.

²³Jesu hɔɔ tɛ̀ ko gasawi'i, kpa o wi-dɔm-fol in giiwi fara hi̧i̧ fio, ɓɛɛ tɔ̧ ha̧ wa:

²⁴«Ɛ̀nɛ̀ gbò! Be-zɔŋa’ɛ fe na, a̧ ɔ nɛ́ yá.» Ɓɛɛ wa mam a̧.

²⁵Ɗoŋ nɛ̀ wa foo o bíí lɛŋ gbonɛ kaɗi, Jesu yèé tua, ba er be-zɔŋa'i, ɓɛɛ be-zɔŋa'i tun.

²⁶Ɓɛɛ nyɛrɛmɔ‘i pɛsi dam zika-nù‘i lɛŋ.

²⁷Yaka-a ko Jesu hegɔ, ɓɛɛ o ŋma wi-boma-yí yiitoo ndak ɗoŋ-aa hiɗi nɛ̀ mɔ nɛnɛ‘e: «Bem ko David, ɛ̀nɛ̀ dé ko h’ɛ́ɛ́!»

²⁸Ŋgimbi nɛ̀ Jesu yee tua, o wi-boma-yí nɔ‘i nɛ̀ɛ̀ si katɛ a̧, ɓɛɛ Jesu ak wa: «Ɛ́nɛ́ taa'e mi nyɛma mɛ hu̧i̧ yí‘nɛ́ nde?» Ɓɛɛ wa kifi nú ha̧ a̧: «Íì, Gasa Wan.»

²⁹Jesu ee er zu yí-wa, ɓɛɛ tɔ̧: «Mɔ'ɔ dé h’ɛ́nɛ́ nyɛm nɛ̀ ɗoŋ kɔ̧ɔ̧ɗɔɔwen k’ɛ́nɛ́.»

³⁰Ɓɛɛ yí-wa hu̧i̧. Nɛ́ mɔ'ɔ nɛ̀ Jesu mboo nú-wa nɛ̀ ŋgaya-a hegɔ: «Ɛ̀nɛ̀ mbó ta'nɛ́, ká ŋma bíí iŋ mɔ'ɔ na!»

³¹Gboa-a kɔ-wa hegɔ, wa pɛsa nyɛrɛmɔ ko Jesu dam zika-nù‘i lɛŋ.

³²Gboa-a ko o wi-boma-yí nɔ‘i yak hegɔ, ɓɛɛ o bíí mgbɔ ŋma mukɛ̧ nɛ̀ a̧a̧ nɛ ɗaŋ-sɔ̧ tɛnɛ ha̧ Jesu.

³³Jesu ndaka ɗaŋ-sɔ̧‘i tɛ-a yinɛ, ɓɛɛ mukɛ̧‘i ku̧ naŋ tɔ̧ɔ̧ wen. Ɗɛɗɛ giiwi gɔna ɓɛɛ wa tɔ̧: «Ɛɛ tɛ zɔk pɛrti mɔ hegɔ sɛn Israɛl nɛti na!»

³⁴Ɓɛɛ o Fariziɛn tɔ̧: «Nɛ́ tɛ́ ŋgai ko wan ko o ɗaŋ-sɔ̧ a̧ a̧ ndak nɛ̀ o ɗaŋ-sɔ̧.»

³⁵Jesu yara nɛ̀ o gasa ye in o geɗek ye lɛŋ, usi nɛ̀ mɔ kɔ̧́ tua-mɔi̧a-a nɛnɛ, pɛsi nɛ̀ De Mbe Wen Wan ko Sɔ̧, kpasi nɛ̀ o bíí tɛ o zɛɛ in o nyimmɔ kɔ-wa nɛtɛ nɛtɛ lɛŋ.

³⁶Ŋgimbi nɛ̀ Jesu zɔka o giiwi, ko dee a̧ wen a̧ zɔka mɔ bàà tɛ-wa, ɓɛɛ wa ya nɛ̀ dita-see; wa ya hee o sami nɛ̀ wi-daia-a bo na ga.

³⁷Nɛ́ mɔ'ɔ n'aa tɔ̧ɔ̧ ha̧ o ŋgaiwi kɔ̧-a̧: «Nyɔnɔ dɛma nyɛmna, ɓɛɛ o wi-de-tom-aa dɔk na.

³⁸Wen hegɔ, ɛ̀nɛ̀ áí nú ha̧ wan-nyɔnɔ mɛ tom o wi-de-tom si fara-mɔi̧-nyɔnɔ kɔ̧-a̧.»