Read Northwest Gbaya MARK 10 Bible Online

MARK 10 - Northwest Gbaya bible

MARK 10

¹Jesu kura hi̧i̧ yak si Judee, ɓɛɛ ku yì si kur Jurdɛn mɛ. Giiwi mɔi̧a katɛ a̧ woyo, ɓɛɛ a̧ ku̧ naŋ usa mɔ ha̧ wa, hee mɔ'ɔ n'aa de ɓɔnsɛnɛ ga.

²Nɛ́ mɔ'ɔ nɛ̀ o Fariziɛn tɛ̀ɛ̀ tɛ a̧ mɛ ba wen zaŋ-aa. Wa aka a̧: «Heembea ee war ha'i mɛ ndak kóò kɔ‘i yinɛ nde?»

³A̧ kifa nú ha̧ wa: «Moisɛ yɔra so bɔɔ h’ɛ́nɛ́ hee ge?»

⁴Ɓɛɛ wa tɔ̧: «Moisɛ ee war ha'i mɛ yɔr kalata gbia-a ha̧ kóò sɛka'i ndaka a̧.»

⁵Ɓɛɛ Jesu tɔ̧: «Mɛ̀ nɛ́ wen nɛ̀ ɛ́nɛ́ nɛ́ o wi-ŋga-see, sa a̧ yɔr heembea'i h’ɛ́nɛ́;

⁶wen nɛ̀ ku̧u̧naŋ-a mɛ, Sɔ̧ dee wiwii in okoo.

⁷Hegɔ, wiwii tɛ e dáà in nàà kɔ‘i duk mɛ ndaɗi in kóò kɔ‘i,

⁸ɓɛɛ wa yiitoo lɛŋ tɛ duk nɛ́ kiitɛ kpɔk.

⁹Wen hegɔ, mɔ nɛ̀ Sɔ̧ ndaɗa nɛ̀ ŋmaa kaɗi, ká bíí kɛ̧ mgbara-a na.»

¹⁰Sɛn kɔ̧́ tua mɛ, o ŋgaiwi kɔ̧-a̧ aka a̧ zu kpɔk wen gbíá-kóò‘i woyo.

¹¹Jesu tɔ̧ɔ̧ ha̧ wa: «Wi nɛ ndak kóò kɔ‘i, ɓɛɛ nɛ̀ɛ̀ ba mbe-a, de nɛ́ dàlà ti kuti-a n'aa ndaka'i.

¹²Kà ŋma okoo gbii wíì, ɓɛɛ nɛ̀ɛ̀ ba mbe-a, a̧ de nɛ́ dàlà.»

¹³Nɛ́ mɔ'ɔ nɛ̀ o bíí mgbɔɔ o geɗek bem tɛnɛ, wen ha̧ a̧ mɛ e er zu wa, ɓɛɛ o ŋgaiwi kɔ̧-a̧ dor wa.

¹⁴Jesu zɔka mɔ‘i, ɓɛɛ kpa ɗaŋsee; a̧ tɔ̧ɔ̧ ha̧ ŋgaiwi kɔ̧-a̧: «Ɛ̀nɛ̀ é ha̧ o geɗek bem mɛ tɛ pii tɛ‘m; k’ɛ́nɛ́ dor wa na, wen Wan ko Sɔ̧ nɛ́ ko o wi nɛ̀ duk hee wa ga.

¹⁵Nɛ́ kpasawen a̧‘m tɔ̧ h’ɛ́nɛ́; wi nɛ̀ kpɛk Wan ko Sɔ̧ hee o geɗek bem ga na beka ye tɛ Wan'i na.»

¹⁶Nɛ́ mɔ'ɔ n'aa mɔi̧a wa, ɓɛɛ e er zu wa tok nɛ̀ de yoŋgo zu wa.

¹⁷Hee mɔ'ɔ nɛ̀ Jesu yee yuwar mɛ yak ga, ŋma bíí maa yì tɛnɛ, gbɛ zugur nù ti a̧, ɓɛɛ ak a̧: «De wan-usi-mɔ, mɔ n'am tɛ de sɛka'm kpaa duka-kpasa kpoo nɛ kpoo nɛ̀ mɔɔ-oi nɛ́ ge?»

¹⁸Jesu tɔ̧ɔ̧ ha̧ a̧: «Mɛ́ sa'm'e, de-wi wen ge? Ŋma de-wi bo na, ɓaa de-wi nɛ́ Sɔ̧ kpɔk ɓɛɛ.

¹⁹Mɛ́ iŋa o heembea ko Sɔ̧: ‹Ká mɛ gbɛ zu na, ká mɛ de dàlà na, ká mɛ zu̧ mɔ na, ká mɛ ɓir wen e nú bíí na, ká mɛ de ɗaŋmɔ in bíí na, mɛ̀ tú̧ tɛ dáà in nàà kɔ-mɛ.› »

²⁰Wi’ɛi kifa nú ha̧ Jesu: «Wan-usi-mɔ, mi kasa o heembea nɔ‘i lɛŋ, nɛ̀ bem mɛ hɔ kinii.»

²¹Nɛ́ mɔ'ɔ nɛ̀ Jesu mbaɗa a̧, kɔ̧ a̧, ɓɛɛ tɔ̧ ha̧ a̧: «Oi mɔ kpɔk nɛ̀ ɓɔna ha̧ mɛ nɛ́ mɔ'ɔ: mɛ̀ nɛ́, mɛ̀ ɗɔ́r mɔ nɛ̀ mɛ a̧a̧ nɛnɛ, a̧ mɛ̀ kɛ̧́ sede-a nɛ̀ o wisan. Hegɔ, mɛ́ tɛ kpa mbɔi sɛn yiwese mɛ; ɓɛɛ mɛ̀ tɛ́ ɗoŋ am.»

²²Wi’ɛi zia wen'i ɓɛɛ see ɗaŋ. A̧ yaka nɛ̀ tu̧u̧-see, wen a̧ a̧a̧ so nɛ̀ dɔka mbɔi nyɛmna.

²³Jesu zɔka mɔ zik katɛ, ɓɛɛ tɔ̧ ha̧ o ŋgaiwi kɔ‘i: «Ɔ ŋgaya ha̧ wanmbɔi mɛ ye tɛ Wan ko Sɔ̧!»

²⁴O ŋgaiwi ko Jesu zia wen'i, ɓɛɛ ɗɛɗɛ-wa gɔn. Ɓɛɛ Jesu tɔ̧ ha̧ wa woyo: «O bem kɔ‘m, ɔ ŋgaya nyɛmna ha'i mɛ ye tɛ Wan ko Sɔ̧!

²⁵Gboa-a ko ŋgeloba nɛ̀ kɔ̧́ woi-si̧ɔ̧ ɔ yɛ́kɛ́ɗɛ́ gan yea-a ko wanmbɔi tɛ Wan ko Sɔ̧!»

²⁶Ɗɛɗɛ-wa gɔna gan kuti-a, ɓɛɛ wa tɔ̧ sitɛ ŋmaa: «Kà nɛ́ bòò hegɔ, nɛ́ o'o tɛ kpasi o nde?»

²⁷Jesu mbaɗa wa, ɓɛɛ tɔ̧: «Mɔ‘i gana bíí, ɓɛɛ gan Sɔ̧ na, wen ŋma mɔɔ-gan Sɔ̧ bo na.»

²⁸Pierre tɔ̧ɔ̧ ha̧ a̧: «Ɓɛɛ ho! K’ɛ́ɛ́ n’ɛɛ ee mɔ k’ɛ́ɛ́ lɛŋ duk h’ɛ́ɛ́ mɛ nɛ̀ ɗoŋ‘nɛ́'ɛ, ɛ́ɛ́ tɛ de héé ge?»

²⁹Ɓɛɛ Jesu tɔ̧ ha̧ a̧: «Nɛ́ kpasawen a̧‘m tɔ̧ h’ɛ́nɛ́; wi nɛ̀ tɛ e bíí nutua kɔ‘i, o nya-wi, o boko-nya-wi, nàà in dáà kɔ‘i, ká bá nɛ̀ o bem kɔ‘i, gú nɛ̀ o fɔ kɔ‘i lɛŋ duk, wen zu'm in wen zu De Mbe Wen ko Sɔ̧,

³⁰wi’ɛi tɛ kpa tua, o nya-a̧, o boko-nya-a̧, o nàá, o dáà, o bem, gú nɛ̀ fɔ war gɔmŋmaa oi ɛ̧ɛ̧ nɔ'ɔ kinii’ɛ; o bíí tɛ usi bɔnɛ ha̧ a̧ mbɛt, ɓɛɛ nɛ̀ ɗoŋ, a̧ tɛ kpa duka-kpasa kpoo nɛ kpoo.

³¹O dɔka bíí mɛ ti tɛ ya nɛ̀ ɗoŋ, ɓɛɛ o bíí mɛ ɗoŋ yaa nɛ̀ ti.»

³²Wa a̧a̧ yuwar daŋa-a si Jerusalɛm, ɓɛɛ Jesu duk ti ha̧ wa. Ɗɛɗɛ o ŋgaiwi kɔ̧-a̧ gɔn gɔn, ɓɛɛ kíì de o wi nɛ̀ tɛ́ nɛ̀ ɗoŋ wa mbɛt. A̧ mɔi̧a o ŋgaiwi kɔ̧-a̧ ɓu-zua-yiitoo si katɛ a̧ woyo, ɓɛɛ a̧ ku̧ naŋ mbaŋa tɛ-wa wen mɔ nɛ̀ tɛ hɔ zu a̧ hee mɔ'ɔ ga:

³³«Kinii ɛ́ɛ́ nɛ́ mɔ'ɔ n’ɛɛ daŋ si Jerusalɛm’ɛ. Nɛ́ hi̧i̧ a̧ wa tɛ de ha̧ Bem ko bíí mɛ ye nɛ er o gasa wan-ɗafi-sɔ̧ in o wi-usi-heembea. Wa tɛ gɔn kita-fio zu a̧, wa tɛ e a̧ er o bíí nɛ̀ iŋ kpasa Sɔ̧ na.

³⁴Wa tɛ zɛkɛɗ‘a, a nɛ̀ sap tɛ a̧, gusi nɛ̀ a̧; wa tɛ gbɛ a̧, ɓɛɛ ɗoŋ zɛ yiitoo, taar-a a̧ kura ŋgɔn tɛ fio.»

³⁵O bem ko Zebedee, Jak in Jean nɛ̀ɛ̀ si katɛ Jesu, ɓɛɛ tɔ̧ ha̧ a̧: «Wan-usi-mɔ, ɛ́ɛ́ kɔ̧ɔ̧ so h’ɛ́nɛ́ mɛ de mɔ n’ɛɛ tɛ ak er'nɛ́‘i h’ɛ́ɛ́.»

³⁶Ɓɛɛ Jesu ak wa: «Nɛ́ ge ɛ́nɛ́ kɔ̧ɔ̧ ha̧‘m mɛ de h’ɛ́nɛ́ ge?»

³⁷Ɓɛɛ wa tɔ̧ ha̧ a̧: «Ɛ̀nɛ̀ é h’ɛ́ɛ́ mɛ ya nù katɛ‘nɛ́ tɛ gasamɔ k’ɛ́nɛ́, ɛ̧ɛ̧ kpɔk’ɛ nɛ̀ war wii-er'nɛ́, ɓii-aa nɛ̀ war gale.»

³⁸Ɓɛɛ Jesu tɔ̧ ha̧ wa: «Ɛ́nɛ́ iŋ mgbara mɔ n’ɛnɛ ak'i na; ɛ́nɛ́ nyɛma mɛ nɔ be-ɗele-bɔnɛ n'am tɛ nɔ‘i nde? Ɛ́nɛ́ nyɛma ha'i mɛ zui'nɛ́ hee mɔ'ɔ nɛ̀‘i tɛ zui nɛ‘m'i ga nde?»

³⁹Wa kifa nú‘e: «Ɛ́ɛ́ nyɛma.» Ɓɛɛ Jesu tɔ̧ ha̧ wa: «Be-ɗele n'am tɛ nɔ, ɛ́nɛ́ tɛ nɔ; wa tɛ zui'nɛ́ hee mɔ'ɔ nɛ̀ wa tɛ zui nɛ‘m ga.

⁴⁰Ɓɛɛ nɛ̀ ko duka-a k’ɛ́nɛ́ nɛ̀ war wii-er-am in nɛ̀ war gale'i, bó nɛ́ mi'i tɛ e bíí sɛnɛ na; fara nɔ‘i tɛ duk nɛ́ wen o bíí nɛ̀‘i ɗafa so e wen wa nɛti kaɗi.»

⁴¹O oi ŋgaiwi ɓu nɛ̀ zia wen'i kpaa ɗaŋsee zu Jak in Jean.

⁴²Jesu saa wa si katɛ, ɓɛɛ tɔ̧ ha̧ wa: «Ɛ́nɛ́ iŋa'e ndé, o wannu ɔ wan zu o bíí kɔ‘i, ɓɛɛ o gasawi duk nɛ́ zu wa mbɛt.

⁴³Ɓɛɛ k’ɛ́nɛ́, mɔ beka de mgbara'nɛ́ hegɔ na. Wi nɛ̀ kɔ̧ɔ̧ mɛ duk gasawi mgbara'nɛ́, a̧ a̧ dúk nɛ́ wi-de-tom k’ɛ́nɛ́.

⁴⁴Ɓɛɛ wi nɛ̀ kɔ̧ɔ̧ mɛ duk nɛ́ kuti-wi mgbara'nɛ́, a̧ a̧ dúk nɛ́ bara ko bíí lɛŋ.

⁴⁵Wen bo nɛ́ Bem ko bíí tɛ̀ɛ̀ ha̧ o bíí mɛ de tom ha̧ a̧ na, ɓɛɛ a̧ tɛ̀ɛ̀ ha̧ a̧ mɛ de tom ha̧ bíí, in ha̧ a̧ mɛ ha̧ tɛ-a gɔn nɛ̀ zu o dɔka bíí.»

⁴⁶Wa hɔɔ saaye Jeriko. Ɓɛɛ hee mɔ'ɔ nɛ̀ Jesu in o ŋgaiwi kɔ‘i, ká bá nɛ̀ giiwi, de mɛ gbo saaye'i ga, Bartimee ŋma wi-boma-yí, bem ko Timee, duka nù ká̧ war kɔfi nɛ̀ mɔ.

⁴⁷N'aa bé zii'e nɛ́ Jesu be Nazarɛt a̧ ɓir yak wó, ɓɛɛ a̧ ŋma nú tɛ hiɗimɔ tɔ̧ nɛnɛ‘e: «Jesu, Bem ko David, ɛ̀nɛ̀ dé ko ha̧‘m!»

⁴⁸Bíí nɛ̀ dɔka-a gaia a̧ ha̧ a̧ mɛ kpe nú-a, ɓɛɛ a̧ hiɗi mɔ nɛ̀ ŋgaya-a gan kuti-a'e: «Bem ko David, ɛ̀nɛ̀ dé ko ha̧‘m wa!»

⁴⁹Jesu yora, ɓɛɛ tɔ̧: «Ɛ̀nɛ̀ sá a̧ tɛnɛ.» Wa saa wi-boma-yí‘i, ɓɛɛ wa tɔ̧ɔ̧ ha̧ a̧: «Mɛ̀ nɔ́ ŋgiɗi, mɛ̀ kúr, a̧ sa nɛ mɛ.»

⁵⁰Nɛ́ mɔ'ɔ n'aa kpɔ̧i̧a̧ gasa laa kɔ̧-a̧ pi̧ nù, kur zɛm, ɓɛɛ nɛ́ sitɛ Jesu.

⁵¹Nɛ́ mɔ'ɔ nɛ̀ Jesu aka a̧: «Mɛ kɔ̧ɔ̧ a̧‘m dé nɛ́ ge ha̧ mɛ ge?» Wi-boma-yí‘i kifa nú: «Wan-usi-mɔ, mi kɔ̧ɔ̧ mɛ zɔk mɔ.»

⁵²Ɓɛɛ Jesu tɔ̧ ha̧ a̧: «Mɛ̀ yàk, kɔ̧ɔ̧ɗɔɔwen kɔ-mɛ kpasa mɛ.» Soɓee, yí-a hu̧i̧a̧, ɓɛɛ a̧ nɛ́ ɗoŋ Jesu.