Read Northwest Gbaya MARK 12 Bible Online

MARK 12 - Northwest Gbaya bible

MARK 12

¹Jesu ku̧u̧ naŋ tɔ̧ɔ̧ wen nɛ̀ lizaŋ ha̧ wa: «Ŋma bíí waa so fɔ́-nyak-dɔ̧̀ɔ̧́.[5] Nɛ́ mɔ'ɔ n'aa ɓora fɔ‘i, za̧ fara-vati-dɔ̧ɔ̧ sɛnɛ, de kusa tua-duk-nɔ̧́í̧ sɛnɛ mbɛt; a̧ ee fɔ‘i er o wi-zɔk-fɔ, ɓɛɛ a̧ yak gɛnɛ si ŋma nù.

²Ŋgimbi ɓi waya-nyak-dɔ̧ɔ̧ hɔa, ɓɛɛ a̧ tom ŋma wi-de-tom kɔ̧-a̧ sitɛ o wi-zɔk-fɔ mɛ ba war waya-nyak-dɔ̧ɔ̧ kɔ̧-a̧ piinɛ ha̧ a̧.

³Nɛ́ mɔ'ɔ nɛ̀ wa tika zu wi-de-tom'i, mbɛr a̧ ɓɛɛ wa fo a̧ sinɛ ɗoŋ nɛ̀ géé er.

⁴Nɛ́ mɔ'ɔ n'aa toma ŋma wi-de-tom kɔ̧-a̧ nɛnɛ woyo; i̧i̧ hi̧i̧ mbɛt, wa ee da̧i̧ zu-a, ɓɛɛ wa da̧ a̧.

⁵A̧ toma taar-a woyo, ɓɛɛ wa gbɛ a̧ yinɛ; hɔ-ɗoŋ-aa a̧ toma o ŋma nɛ̀ dɔka-a. Nɛ́ mɔ'ɔ nɛ̀ wa gusa o ŋma, ɓɛɛ wa gbɛ o ŋma.

⁶Oi bíí nɛ̀ ɓɔna in a̧ nɛ́ kpɔk ɓɛɛ, nɛ́ bem kɔ̧-a̧ n'aa kɔ̧ɔ̧ nyɛmna. Nɛ́ mɔ'ɔ n'aa toma bem’ɛi sitɛ wa, wen a̧ taa so kɔ̧-a̧‘e ndé, wa tɛ yu kíí bem kɔ‘i.

⁷Ɓɛɛ o wi-zɔk-fɔ tɔ̧ ha̧ o ŋmaa: ‹Zɔ́k wi-duk-oi dáà nɛ̀ tɛ mɛ‘i! Ɛ̀nɛ̀ tɛ́, ɛ̀ɛ̀ gbɛ́ a̧, kà dé k’ɛɛ kaia mɔɔ-oi dáà kɔ̧-a̧.›

⁸Nɛ́ mɔ'ɔ nɛ̀ wa tika zu a̧, gbɛ a̧, ɓɛɛ wa gbur wɔr-aa pi̧ taŋ ɗoŋ fɔ mɛ.

⁹«Wan-fɔ tɛ de hee ge? A̧ tɛ nɛ̀ɛ́ gbɛ o wi-pɛm-fɔ nɔ‘i lɛŋ, ɓɛɛ a̧ tɛ ha̧ fɔ ha̧ o mbe bíí.

¹⁰Ɛ́nɛ́ tɔra wen’ɛ nɛ̀ mbetɛ zaŋ Yɔramɔ? ‹Nɛ́ ta nɛ̀ o wi-ba-naŋ-tua pi̧i̧ so taŋ‘i, a̧ kifa duk nɛ́ de kina-ta-e mgbii-tua.›

¹¹Mɔ‘i nɛ́ deemɔ ko Gasa Wan, ɓɛɛ duk nɛ́ gasamɔ yí-ɛɛ lɛŋ!»

¹²Wa kia so war mɛ ba a̧, ɓɛɛ wa yu nɛ́ giiwi, wen wa iŋa'e, nɛ́ wen zu wi a̧ Jesu tɔ̧ nɛ̀ lizaŋ‘i. Wa ee a̧ duk, ɓɛɛ wa yak.

¹³Nɛ́ mɔ'ɔ nɛ̀ wa toma o ŋma Fariziɛn in o ŋma bíí ko Herod sitɛ Jesu ha̧ wa mɛ ba wen zaŋ-aa.

¹⁴Ɓɛɛ wa nɛ́ɛ̀ tɔ̧ ha̧ Jesu: «Wan-usi-mɔ, ɛ́ɛ́ iŋa'e, ɛ́nɛ́ nɛ́ wi-tɔ̧-kpasawen, ɓɛɛ kóó nɛ́ o ndé, ɛ́nɛ́ yu kíí a̧ na, wen ɛ́nɛ́ kɛ̧ mgbara bíí na; ɓɛɛ ɛ́nɛ́ usi nɛ́ yuwar ko Sɔ̧, nyɛm nɛ̀ ɗoŋ kpasawen. Heembea k’ɛɛ ee ha̧ bíí mɛ gbo garama ha̧ Sezar náà, kóó weyaa nde? Ɛ̀ɛ̀ gbó garama náà, kóó k’ɛ́ɛ́ gbo na nde?»

¹⁵Jesu iŋa ɗaŋ taamɔ́-see-yiitoo kɔ-wa'i, ɓɛɛ tɔ̧ ha̧ wa: «Ɛ́nɛ́ tui pɛr ha̧‘m wen ge? Ɛ̀nɛ̀ bá ŋma kɔya-sede tɛnɛ ha̧‘m zɔk.»

¹⁶Wa baa ŋma kɔya-sede tɛnɛ ha̧ a̧, ɓɛɛ a̧ ak wa: «Zu-wi in yɔramɔ sɛnɛ'ɛ nɛ́ ko o?» Wa kifa nú ha̧ a̧: «Nɛ́ ko Sezar.»

¹⁷Ɓɛɛ Jesu tɔ̧ ha̧ wa: «Ɛ̀nɛ̀ há̧ mɔ ko Sezar ha̧ Sezar, ɓɛɛ ɛ̀nɛ̀ há̧ mɔ ko Sɔ̧ ha̧ Sɔ̧.» Ɓɛɛ ɗɛɗɛ-wa gɔn tɛ kifa-nú kɔ̧-a̧‘i.

¹⁸O Saduseɛn nɛ̀ ta kɔ‘i'e o bíí nɛ̀ fea beka kur ŋgɔn na, nɛ̀ɛ́ tɛ Jesu, ɓɛɛ ak a̧:

¹⁹«Wan-usi-mɔ, Moisɛ bàá yɔr heembea h’ɛ́ɛ́‘e: ‹Kà ŋma bíí nɛ̀ a̧a̧ nɛ̀ nya ɗoŋ fe, e kóò duk, bem bo na, nya-a̧‘i a̧ bá kó-oi-aa ko nɛ̀ bem nɛ̀ tɛ ba nin wan-fio e ŋgɔn.›

²⁰O ŋma nya-wi yaa so mɔɔrɔ-ɗoŋ-yiitoo, nɛ́ mɔ'ɔ nɛ̀ kaya-wi baa kóò, ko bem na, ɓɛɛ fe.

²¹Yiitoo-aa baa kóò‘i, ko bem na, fe nɛnɛ mbɛt. Taar-a kànà nɛ́ kale kpɔk mɔ‘i.

²²Wa mɔɔrɔ-ɗoŋ-yiitoo lɛŋ fea, bem bo na. Ɓɛɛ sɔŋkur-aa, kóò‘i tɛ̀ɛ̀ fe mbɛt.

²³Wese kura-ŋgɔn ko o fio, ŋgimbi nɛ̀ wa bé tɛ̀ɛ́ kpasi, kóò‘i tɛ duk nɛ́ kóò ko o nde? Wen wa mɔɔrɔ-ɗoŋ-yiitoo lɛŋ baa so a̧ nɛ̀ kóò.»

²⁴Jesu tɔ̧ɔ̧ ha̧ wa: «Ɛ́nɛ́ yɔ nɛ kaya; ɓɛɛ wen ge? Wen n’ɛnɛ in Yɔramɔ in ŋgayamɔ ko Sɔ̧ na.

²⁵Wen sɛn wese kura-ŋgɔn ko o fio, wiwii beka ba kóò na, okoo beka ba wíì na, ɓɛɛ wi tɛ duk hee o betom ko Sɔ̧ yiwese mɛ ga.

²⁶Kà bó nɛ́ wen kura-ŋgɔn ko o fio, ɓɛɛ bó nɛ́ ɛ́nɛ́ tɔra kalata ko Moisɛ tɛ nyɛrɛmɔ ko be te fara nyɛka wee, ká Sɔ̧ tɔ̧ nɛnɛ ha̧ a̧‘e: ‹Mi nɛ́ Sɔ̧ ko Abraham, Sɔ̧ ko Izak in Sɔ̧ ko Jakob,› na nde?

²⁷A̧ bó nɛ́ Sɔ̧ ko o fio na; a̧ nɛ́ Sɔ̧ ko o bíí nɛ̀ duk kpasa. Ɛ́nɛ́ yɔɔ kaya nyɛmna!»

²⁸Ŋma wi-usi-heembea zia zaŋa-wen kɔ-wa'i, ɓɛɛ zɔk'e Jesu kifa nú nɛ̀ de-a. Nɛ́ mɔ'ɔ n'aa ɗɔŋa pii ti, ɓɛɛ ak Jesu: «Heembea nɛ̀ gana o dɔka heembea lɛŋ nɛ́ ge-aa ge?»

²⁹Ɓɛɛ Jesu kifi nú: «Kuti heembea nɛ́ mɔ'ɔ: ‹Ɛ̀nɛ̀ zìì, Israɛl, ɓaa Gasa Wan nɛ́ Gasa Wan Sɔ̧ k’ɛɛ kpɔk ɓɛɛ;

³⁰mɛ̀ kɔ̧́ Gasa Wan Sɔ̧ kɔ-mɛ nɛ̀ see-mɛ lɛŋ, nɛ̀ sɔ̧-tɛ-mɛ lɛŋ, nɛ̀ taamɔ kɔ-mɛ lɛŋ in nɛ̀ ŋgai tɛ-mɛ lɛŋ.›

³¹Yiitoo-aa nɛ́ mɔ'ɔ: ‹Mɛ̀ kɔ̧́ ŋmà-mɛ hee kiitɛ-mɛ ga.› Ŋma heembea nɛ̀ gana o heembea nɔ‘i bo na.»

³²Ɓɛɛ wi-usi-heembea'i tɔ̧ ha̧ a̧: «Nɛ́ mɔ‘i Wan-usi-mɔ, nɛ́ kpasawen ɛ́nɛ́ tɔ̧a̧‘i, Gasa Wan Sɔ̧ kpɔk ɓɛɛ, ɓaa Sɔ̧ nɛ́ a̧.

³³Kɔ̧́ɔ̧́ Sɔ̧ nɛ̀ see-wi lɛŋ, nɛ̀ taamɔ kɔ‘i lɛŋ, nɛ̀ ŋgai tɛ-wi lɛŋ in kɔ̧ɔ̧ ŋmà-wi hee kiitɛ-wi ga, gana dɔɔ-kpoo-ɗafi-sɔ̧ in o ŋma ɗafa-sɔ̧ lɛŋ.»

³⁴Ŋgimbi nɛ̀ Jesu zia kifa-nú ko wi-usi-heembea'i, a̧ tɔ̧ɔ̧ ha̧ a̧: «Mɛ́ nyɛi̧ nɛ̀ Wan ko Sɔ̧ na.» Ɓɛɛ ŋma bíí nyɔŋ nin mɛ ak a̧ ɓɔna.

³⁵[6] Jesu bàá wen tɛ ŋgimbi usamɔ kɔ̧́ Tua ko Sɔ̧, ɓɛɛ tɔ̧: «O wi-usi-heembea tɛ tɔ̧ bɔɔ‘e Mɛsii nɛ́ Bem ko David hee ge?

³⁶Wen David nɛ̀ zù tɔ̧ɔ̧ nɛ̀ ŋgai ko Sa̧a̧ Ɔmi'e: ‹Gasa Wan tɔ̧ɔ̧ ha̧ Gasa Wan kɔ‘m: Mɛ̀ dúk nɛ̀ war wii-er-am hɔ ŋgimbi n'am tɛ de ha̧ mɛ mɛ kpa ŋgai zu o wisɛn kɔ-mɛ.›

³⁷David, nɛ̀ tɛ̀, saa a̧‘e ndé, Gasa Wan, ɓɛɛ wi’ɛi tɛ duk bɔɔ nɛ́ Bem ko David hee ge?» Ɓɛɛ giiwi zii wen kɔ̧-a̧‘i nɛ̀ desee.

³⁸A̧ usa mɔ, ɓɛɛ a̧ tɔ̧: «Ɛ̀nɛ̀ zɔ́k tɛ‘nɛ́ nɛ̀ o wi-usi-heembea nɛ̀ kɔ̧ɔ̧ yara-a nɛ̀ gasa laa in nɛ̀ kɔ̧ɔ̧ ha̧ bíí mɛ fan wa sɛn bee-gara.

³⁹Wa nasi nɛ́ o kuti fara-duk-nù kɔ̧́ tua-mɔi̧a-a in ká̧ nyɔŋmɔ.

⁴⁰Wa nyɔŋ nɛ́ mbɔi ko o ko-gera, in wa kɔfi nɛ́ Sɔ̧ nɛ̀ ɗoŋ nyɛi̧a-a wen yí bíí; kita nɛ̀ tɛ tik wa ɔ ŋgaya nyɛmna.»

⁴¹Jesu duka nù zɔk mɔ si fara-a-sede kɔ̧́ Tua ko Sɔ̧, ɓɛɛ a̧ zɔk giiwi nɛ̀ a kɔya sede kɔ̧̀ kuɓa. O dɔka wanmbɔi a nɛ sede nɛ̀ dɔka-a nyɛmna.

⁴²Ŋma ko-gera-san tɛa, ɓɛɛ a kɔ‘i nɛ́ be kɔya sede yiitoo hee dálà ga sɛnɛ.

⁴³Jesu saa o ŋgaiwi kɔ‘i, ɓɛɛ tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, ko-gera-san’ɛ aa mɔ kɔ̧̀ kuɓa gan o dɔka bíí lɛŋ.

⁴⁴Wen o dɔka bíí ha̧ nɛ mɔ nɛ̀ daŋ zu mbɔi kɔ‘i, ɓɛɛ kɔ̧-a̧, zu san kɔ̧-a̧‘i, a̧ ha̧a̧ nɛ́ sɔŋkur be mɔɔ-nyɔŋ-mɔ nɛ̀ ɓɔna er-a.»