Read Northwest Gbaya MARK 3 Bible Online

MARK 3 - Northwest Gbaya bible

MARK 3

¹Jesu yee kɔ̧́ ŋma tua-mɔi̧a-a woyo, ɓɛɛ ŋma wan-mɔka-er a̧a̧ so hi̧i̧.

²O bíí duka mbaɗi nɛ́ mɔ sitɛ Jesu ha̧ wa mɛ zɔk kà a̧ nɛ́ tɛ̀ɛ́ kpasi wan-mɔka-er'i tɛ wese-ɔm-tɛ, ha̧ wa mɛ kpa wen mɛ pi̧ zu a̧.

³Nɛ́ mɔ'ɔ nɛ̀ Jesu tɔ̧ɔ̧ ha̧ wan-mɔka-er: «Mɛ̀ kúr, mɛ̀ tɛ́ pii ti.»

⁴Ɓɛɛ Jesu ak o dɔka bíí: «Heembea kɔ̧ɔ̧ ha̧ bíí mɛ de demɔ wese-ɔm-tɛ náà, kóó ɗaŋmɔ nde? Kóó mɛ kpasi bíí náà, kóó gbɛɛ bíí nde?» Ɓɛɛ wa ya nɛ̀ oi nú-wa.

⁵Jesu zɔka wa nɛ̀ nyimsea zik kpa, ɓɛɛ see-aa tu̧ zu wa wen ŋga-see kɔ-wa, ɓɛɛ a̧ tɔ̧ ha̧ wan-mɔka-er'i: «Mɛ̀ nyɛ́í̧ er-mɛ.» Nɛ́ mɔ'ɔ n'aa nyɛi̧a er-a, ɓɛɛ er-a kpasi.

⁶O Fariziɛn gboo kɔ̧́ tua-mɔi̧a-a kaɗi, ɓɛɛ wa ba keta in o bíí ko Herod kii nɛ̀ war mɛ gbɛ Jesu.

⁷Jesu yaka in o ŋgaiwi kɔ‘i si ká̧ tɔp, ɓɛɛ o bíí Galilee nɛ́ ɗoŋ-aa nɛ̀ dɔka-a. Gba gíí bíí Judee

⁸in Jerusalɛm, o bíí Idume in kur Jurdɛn mɛ, ká bá nɛ̀ o bíí nù Tir in Sidɔŋ mbɛt zia nyɛrɛ mɔ n'aa de lɛŋ, ɓɛɛ wa nɛ́ tɛ a̧.

⁹Ɓɛɛ a̧ tɔ̧ ha̧ o ŋgaiwi kɔ̧-a̧ mɛ e ŋma kombon ha̧ a̧, wen ká giiwi tɛ́ɛ̀ nɔ ŋmaa in a̧.

¹⁰A̧ kpasa so o bíí nɛ̀ dɔka-a; hegɔ o wi-zɛɛ lɛŋ ir nɛ́ ŋmaa sitɛ a̧ mɛ fo tɛ-a.

¹¹Ŋgimbi nɛ̀ o ɗaŋ-sɔ̧ zɔka Jesu, wa guu nù ti a̧, ɓɛɛ wa hiɗi mɔ: «Mɛ́ nɛ́ Bem ko Sɔ̧!»

¹²Ɓɛɛ a̧ mbo nú-wa nɛ̀ ŋgaya-a ká wa tɛ̀ɛ́ de ha̧ o ŋma bíí mɛ iŋ a̧.

¹³Jesu daŋa kaya ɓɛɛ sa o bíí n'aa kɔ̧ɔ̧ mɛ sa, ɓɛɛ wa nɛ́ sitɛ a̧.

¹⁴A̧ hoka bíí ɓu-zua-yiitoo ha̧ wa mɛ gbam in a̧, ha̧ a̧ mɛ tom wa mɛ tɔ̧ wen ko Sɔ̧ nɛnɛ,

¹⁵in ha̧ wa mɛ kpa ŋgai wen ndaka o ɗaŋ-sɔ̧ yinɛ mbɛt.

¹⁶O bíí ɓu-zua-yiitoo n'aa hoka'i, nin-wa nɛ́ mɔ'ɔ: Simɔŋ (n'aa gɔna mbe nin-a'e Pierre),

¹⁷Jak, bem ko Zebedee in Jean nya Jak (nɛ̀ Jesu gɔna mbe nin-wa'e Boarnɛrgɛs, mɛ̀ nɛ́ wen nɛ̀ tɔ̧‘e «o bem ko kórò»).

¹⁸Sɛka Andre, Filip, Bartelemii, Matthieu, Tomas, Jak bem ko Alfe, Tadee,

¹⁹Simɔŋ nɛ̀ wa sa'e mgbák kpasa be-nù in Judas Iskariot, wi-e-ɗɔra tɛ Jesu.

²⁰Jesu pia ɗoŋ kɔ̧́ tua in o ŋgaiwi kɔ‘i, ɓɛɛ wa kpa fara mɛ nyɔŋ mɔ na wen o giiwi mɔi̧a ŋmaa woyo dun nú wa.

²¹O bíí ko Jesu zia hegɔ, ɓɛɛ wa nɛ́ mɛ ba a̧ gbonɛ nɛ̀ ŋgai, wen wa'e ndé: «Zu a̧ zik zik.»

²²O wi-usi-heembea nɛ̀ tɛ̀ɛ́ nɛ̀ Jerusalɛm tɔ̧a̧: «Bɛlzebul wan ko o ɗaŋ-sɔ̧ a̧a̧ tɛ-a.» Ɓɛɛ wa tɔ̧ mbɛt'e ndé: «Ɗaŋ-sɔ̧ n'aa ndak’ɛ, a̧ ndak nɛ̀ ŋgai ko wan ko o ɗaŋ-sɔ̧.»

²³Jesu saa wa pii katɛ, ɓɛɛ a̧ tɔ̧ wen’ɛ nɛ̀ lizaŋ ha̧ wa: «Satan nyɛma mɛ ndak Satan hee ge?

²⁴Kà ŋma wan kɛ̧ yiitoo, wan'i beka yor na.

²⁵Kà o bíí kpɔk nutua kɛ̧ tɛ̀ nɛ̀ ŋmaa, nutua'i beka yor na mbɛt.

²⁶Hegɔ mbɛt, kà Satan de biro in tɛ-wi, ɓɛɛ kà a̧ kɛ̧ tɛ-a nɛ̀ ŋmaa, a̧ beka yor na, a̧ tɛ tik.

²⁷«Kà‘i hɛr ŋga-wi pi̧ nù na, wi nyɛm mɛ ye kɔ̧ tua ko ŋga-wi'i wen kaia o mɔ kɔ̧-a̧ er-a na.

²⁸«Nɛ́ kpasawen a̧‘m tɔ̧ h’ɛ́nɛ́; mɔ nɛ̀ bíí tɛ de lɛŋ, kóó nɛ́ ɗaŋmɔ, kóó nɛ́ ɗaŋa nin Sɔ̧ héé ge, Sɔ̧ tɛ e ha̧ wa.

²⁹Ɓɛɛ kà ŋma bíí tɔ̧ ɗaŋ wen ha̧ Sa̧a̧ Ɔmi, Sɔ̧ beka e mɔ‘i ha̧ wi’ɛi na ndó-ndó-ndó. Ɗaŋmɔ‘i tɛ duk zu a̧ kpoo nɛ kpoo.»

³⁰Jesu tɔ̧ɔ̧ wen'i ha̧ wa wen nɛ̀ wa'e ndé: «Ɗaŋ-sɔ̧ a̧a̧ tɛ-a.»

³¹Nàà ko Jesu in o nya-a̧ hɔɔ ya zan, ɓɛɛ wa tom bíí mɛ sa a̧.

³²O bíí nɛ̀ dɔka-a yaa nù zik a̧ e see-a, wa tɔ̧ɔ̧ ha̧ a̧: «Nàà k’ɛ́nɛ́ in o nya'nɛ́ a̧a̧ zan'i, wa kíí nɛ́ ɛ́nɛ́.»

³³Ɓɛɛ a̧ kifi nú ha̧ wa: «Nàà kɔ‘m in o nya'm nɛ́ o?»

³⁴Jesu zɔka o bíí nɛ ya nù katɛ zik kpa lɛŋ, ɓɛɛ tɔ̧: «Zɔ́k, nàà kɔ‘m in o nya'm nɛ́ mɔ'ɔ.

³⁵Kóó o ndé nɛ̀ de mɔ nɛ̀ Sɔ̧ kɔ̧a̧, wi’ɛi nɛ́ nya'm in boko-nya'm in nàà kɔ‘m.»