Read Northwest Gbaya MARK 4 Bible Online

MARK 4 - Northwest Gbaya bible

MARK 4

¹Jesu usa mɔ woyo ká̧ ŋgere tɔp, ɓɛɛ o bíí mɔi̧ ya katɛ a̧ nɛ̀ dɔka-a nyɛmna; ɓɛɛ a̧ daŋ ŋma kombon duk nù kɔ̧́ a̧ zu tɔp, ɓɛɛ giiwi ya kɔ‘i nɛ̀ ká̧ ŋgere.

²A̧ usa mɔ ha̧ wa nɛ̀ dɔka-a nɛ̀ lizaŋ. A̧ tɔ̧ɔ̧ zaŋ usamɔ‘i'e ndé:

³«Ɛ̀nɛ̀ zìì! Ŋma wi-pɛ-kpar-mɔ gboo so mɛ pɛ mɔ.

⁴Ɓɛɛ tɛ pɛɛ kpar-mɔ n'aa pɛ nɛnɛ‘i, o ŋma kpar-mɔ aa nù ká̧ war, ɓɛɛ o nɔ̧́í̧ tɛ́ɛ̀ dɔr nyɔŋ yinɛ.

⁵Ŋma aa nù zu sɔkɔr-ta fara nɛ̀ nù dɔk sɛnɛ na, ɓɛɛ hɔ nɛ̀ haya-a wen nù ɗuk fara'i na;

⁶wese daŋa ɓɛɛ dɔ wa, ɓɛɛ wa kor wen kunin-wa ye nù ɗuk na.

⁷O ŋma aa nù poo tɛnmɔ, ɓɛɛ tɛnmɔ gasi kpe zu wa, ɓɛɛ wa kpa fara waya-a na.

⁸O ŋma aa nù tɛ de nù, ɓɛɛ hɔ gasi, ɓɛɛ wai, o ŋma ɓu-taar, o ŋma ɓu-mɔɔrɔ-ɗoŋ-kpɔk, o ŋma gɔmŋmaa.»

⁹Ɓɛɛ Jesu tɔ̧ woyo: «Wi nɛ̀ a̧a̧ nɛ̀ zer mɛ zii wen a̧ a̧ zíí ŋgaɓo!»

¹⁰Jesu ee giiwi duk kaɗi, ɓɛɛ o wi nɛ̀ ya katɛ a̧ in o ŋgaiwi kɔ̧-a̧ ɓu-zua-yiitoo ak a̧ mɛ tɔ̧ gba̧a̧ lizaŋ‘i ha̧ wa.

¹¹Ɓɛɛ Jesu kifi nú ha̧ wa: «K’ɛ́nɛ́, Sɔ̧ dee h’ɛ́nɛ́ mɛ iŋ mgbara o ɗukamɔ tɛ́ Wan kɔ‘i, ɓɛɛ ko o ŋma bíí nɛ̀ bó nɛ́ o ŋgaiwi kɔ‘m na, nɛ́ lizaŋ a̧‘m tɔ̧ nɛ̀ wen ha̧ wa,

¹²‹Wen wa tɛ mbaɗi mɔ, ɓɛɛ wa beka zɔk mɔ na. Wa tɛ yeŋ zer-wa mɛ zii wen, ɓɛɛ wa beka zii gba̧a̧-a̧ na, wen ká wa tɛ kpai duka-a kɔ-wa in ká Sɔ̧ tɛ́ɛ̀ e ɗaŋmɔ ha̧ wa.› »

¹³«K’ɛ̀nɛ̀ zii gba̧a̧ lizaŋ'ɛ na, ɓɛɛ ɛ́nɛ́ tɛ de héé ge zii nɛ̀ o ŋma dɔka lizaŋ ge nde?

¹⁴Wi-pɛ-mɔ pɛ nɛ́ wen ko Sɔ̧.

¹⁵O kpar-mɔ nɛ̀ aa nù ká̧ war usi nɛ́ o bíí nɛ̀ zii wen ko Sɔ̧, ɓɛɛ soɓee, Satan tɛ̀ɛ̀ ba wen'i kɔ̧́ see-wa yinɛ.

¹⁶O wan nɛ̀ aa nù zu sɔkɔr-ta usi nɛ́ o bíí nɛ̀ zii wen ko Sɔ̧, ɓɛɛ kpɛka nɛ̀ desee,

¹⁷ɓɛɛ wa e ha̧ wen'i mɛ de yiŋgi kɔ̧́ see-wa nɛ̀ de-a na. Wa yor kɔ-wa nɛ̀ nɔa-a na. Kà bɔnɛ, kóó ŋgamɔ kpa wa wen zu wen ko Sɔ̧, ɓɛɛ wa tika.

¹⁸Wan nɛ̀ aa poo tɛnmɔ usi nɛ́ o bíí nɛ̀ zia wen ko Sɔ̧ nɛ̀ de-a,

¹⁹ɓɛɛ aia-nú wen mɔɔ-zaŋnu, in wɔ-mbɔi in wɔ-mɔ nɛtɛ nɛtɛ gana zu wa, ɓɛɛ wen ko Sɔ̧ nɛ̀ wa zia'i nyɛm mɛ de ŋma mɔ tɛ wa na.

²⁰Ɓɛɛ o wan nɛ̀ aa tɛ de nù usi nɛ́ o bíí nɛ̀ zii wen ko Sɔ̧, ɓɛɛ kpɛka mbɛt, ɓɛɛ wen nɛ̀ wa zia'i waia, o ŋma ɓu-taar, o ŋma ɓu-mɔɔrɔ-ɗoŋ-kpɔk, o ŋma gɔmŋmaa.»

²¹Jesu tɔ̧ɔ̧ ha̧ wa woyo: «Lamba duk so kɔ‘i wen báá a̧ e ɗɔɔ kpánà, kóó ɗɔɔ gado nde? Bó nɛ́ wen ea a̧ zu paku na nde?

²²Ŋma mɔ nɛ̀ bíí tɛ hu̧si nɛ̀‘i beka zɔk na, bo na; ŋma hu̧sa̧mɔ nɛ̀ beka gbo zan tɛ sa̧a̧mɔ na, bo na mbɛt.

²³Wi nɛ̀ a̧a̧ nɛ̀ zer mɛ zii wen, a̧ a̧ zíí ŋgaɓo!»

²⁴Ɓɛɛ Jesu tɔ̧ ha̧ wa: «Ɛ̀nɛ̀ mbó ta'nɛ́ tɛ́ mɔ n’ɛnɛ zii! Wen nɛ́ kale mɔ n’ɛnɛ we nɛ̀ mɔ ha̧ o ŋma bíí a'i tɛ we nɛ̀ mɔ h’ɛ́nɛ́ mbɛt. Ɓɛɛ wi tɛ we mbe-a a zu-a h’ɛ́nɛ́ mbɛt,

²⁵wen wi nɛ̀ a̧a̧ nɛ̀ mɔ, a'i tɛ e mbe-a zu-a ha̧ a̧; ɓɛɛ wi nɛ̀ bó nɛ̀ mɔ na, kóó be mɔ n'aa a̧a̧ nɛnɛ, wi tɛ ba er-a yinɛ.»

²⁶Ɓɛɛ Jesu tɔ̧ ha̧ wa: «Wan ko Sɔ̧ hɔɔ ŋmaa in ŋma bíí nɛ̀ pɛɛ kpar-mɔ.

²⁷Kóó wi’ɛi ɔ nɛ́ yá, kóó a̧ duk nɛ̀ yí, mɛ zɛ kóó mɛ wese, kpar-mɔ‘i kaɗi hɔa-a gasi nɛnɛ siti na, ɓɛɛ wi’ɛi iŋ mgbara hɔa-a nɛ̀ mɔ‘i hɔ nɛnɛ na.

²⁸Nɛ́ nù nɛ̀ tɛ-wi, a̧ de ha̧ kpar-mɔ mɛ hɔ, hɔ-ɗoŋ-aa kpar-mɔ‘i doa, ɓɛɛ waia.

²⁹Ɓɛɛ ŋgimbi nɛ̀ waya-a sɔka kaɗi, wi pɔia wen ŋgimbi-mɔi̧-nyɔnɔ hɔɔ kaɗi.»

³⁰Ɓɛɛ Jesu tɔ̧ woyo: «Ɛ́ɛ́ tɛ we Wan ko Sɔ̧ nɛ̀ ge mɔ ge nde? Ɛ́ɛ́ tɛ we nɛ̀ ge lizaŋ ge?

³¹Wan ko Sɔ̧ hɔɔ ŋmaa in ŋma bé kpár-mɔ̀[3] nɛ̀ ŋma bíí guna kpɛɛfɔ kɔ‘i. Nɛ́ be kpar-mɔ kɛ̧́ɛ̧́ ɓɛɛ, o dɔka nyɔnɔ lɛŋ gana a̧ nɛ̀ gásì.

³²Ɓɛɛ ŋgimbi nɛ̀‘i guna a̧, a̧ hɔa, ɓɛɛ kusi gan o dɔka wa̧a̧-kpoo lɛŋ; a̧ gbaa er-a nɛ̀ gasa-a, ɓɛɛ o nɔ̧́í̧ tɛ́ɛ̀ de yáá kɔ‘i kɔ̧̀ gbaa-er-a hu̧si nɛnɛ ti gi̧ɔ̧-a̧.»

³³Jesu tɔ̧ɔ̧ wen ko Sɔ̧ ha̧ wa nɛ̀ pɛrti lizaŋ hegɔ nɛ̀ dɔka-a, nyɛm nɛ̀ ɗoŋ mɔ nɛ̀ o bíí nyɛma mɛ zii.

³⁴Ŋma wen n'aa tɛ tɔ̧ ha̧ wa ká bó nɛ́ lizaŋ na, bó na, ɓɛɛ ŋgimbi n'aa duk ɛ̀nɛ́-a in o ŋgaiwi kɔ̧-a̧, a̧ tɔ̧ɔ̧ gba̧a̧ wen-aa lɛŋ ha̧ wa.

³⁵Wese'i mɛ ga̧a̧mɔ, Jesu tɔ̧ɔ̧ ha̧ o ŋgaiwi kɔ‘i: «Ɛ̀ɛ̀ kú yì si kur tɔp mɛ.»

³⁶Wa ee giiwi duk, ɓɛɛ a̧ duk ɓɔn kɔ̧́ kombon'i, wa ba nɛ̀ a̧ yaknɛ, ɓɛɛ o ŋma kombon nɛ́ ɗoŋ wa mbɛt.

³⁷Nɛ́ mɔ'ɔ nɛ̀ ŋga-búk yua, ɓɛɛ yì pɛŋi a kɔ̧́ kombon mɛ dun dun.

³⁸Jesu ee so kɔ‘i zu tɛ pilo ɔ nɛ̀ yá ndaa kombon mɛ. Wa tuna a̧, ɓɛɛ wa tɔ̧ ha̧ a̧: «Wan-usi-mɔ, fea-a n’ɛɛ tɛ fe’ɛ de ŋma mɔ tɛ‘nɛ́ na nde?»

³⁹Jesu tuna, gai búk, ɓɛɛ a̧ tɔ̧ ha̧ tɔp: «Mɛ̀ dúk keɗeŋ a̧ mɛ̀ gà̧!» Búk'i kaɗa yua-a, ɓɛɛ mɔ ga̧ dezeŋ,

⁴⁰ɓɛɛ Jesu tɔ̧ ha̧ wa: «Kíì de'nɛ́ hegɔ wen ge? Ɛ́nɛ́ tɛ́ bò nɛ̀ kɔ̧ɔ̧ɗɔɔwen hɔ̧ɔ̧ na nde?»

⁴¹Kíì dee wa nyɛmna, ɓɛɛ wa tɔ̧ sitɛ ŋmaa: «Wi’ɛ nɛ́ o, sá búk in tɔp mbɛt mbo nɛ́ zu ha̧ a̧'ɛ o?»