Read Northwest Gbaya LUK 11 Bible Online

LUK 11 - Northwest Gbaya bible

LUK 11

¹Ŋma wese, Jesu duka kɔfi nɛ̀ Sɔ̧ ŋma fara. Ɗoŋ n'aa kɔfa Sɔ̧ kaɗi, ŋma ŋgaiwi kɔ̧-a̧ kpɔk aka a̧: «Gasa Wan, ɛ̀nɛ̀ úsí ɗoŋ kɔfa Sɔ̧ h’ɛ́ɛ́, hee mɔ'ɔ nɛ̀ Jean usa so nɛnɛ ha̧ o ŋgaiwi kɔ‘i’ɛ ga.»

²Ɓɛɛ a̧ tɔ̧ ha̧ wa: «Ŋgimbi n’ɛnɛ kɔfi Sɔ̧, ɛ̀nɛ̀ tɔ̧́ hee mɔ'ɔ ga: ‹Dáà, nin'nɛ́ a̧ húr; ɛ̀nɛ̀ ɔ́ wan zu yɛ.

³Ɛ̀nɛ̀ há̧ mɔɔ-nyɔŋ nɛ̀ tɛ nyɛm ɛɛ wese kpɔk kpɔk h’ɛ́ɛ́.

⁴Ɛ̀nɛ̀ é ɗaŋmɔ k’ɛɛ h’ɛ́ɛ́, wen k’ɛɛ, ɛɛ e nɛ́ ɗaŋmɔ ha̧ o wi nɛ̀ de ɗaŋmɔ in yɛɛ. Ɓɛɛ k’ɛ́nɛ́ e ha̧ weamɔ mɛ gan yɛ na.› »[11]

⁵Ɓɛɛ Jesu tɔ̧ ha̧ wa woyo: «Kà ŋma bíí mgbara'nɛ́ nɛ́ bòó nɛ̀ ŋma sɛm, kà̧ a̧ nɛ́ tɛ́ sɛm kɔ̧-a̧‘i mɛ ɗuka zɛ mɛ tɔ̧ ha̧ a̧‘e: ‹Wiyɛ, mɛ̀ há̧ brɛt taar ha̧‘m, ká‘m ha̧a̧ mɛ si ɗoŋ,

⁶wen ŋma sɛm kɔ‘m tɛɛ gɛnɛ tɛ‘m, ɓɛɛ mí bó nɛ̀ ŋma mɔ mɛ ha̧ ha̧ a̧ na.›

⁷Ɓɛɛ kà ɓii wi’ɛi tɔ̧ ha̧ a̧ nɛ̀ kɔ̧́ tua mɛ gbonɛ‘e: ‹Ká mɛ gba zu'm na; ɛɛ kpee nú tua ɔ k’ɛɛ nú in o bem kaɗi; mi nyɛm kɔ‘m mɛ kur mɛ ha̧ brɛt ha̧ mɛ na.›

⁸Mi tɔ̧ h’ɛ́nɛ́, kóó kà a̧ nɛ́ kura ha̧ mɔ‘i ha̧ a̧ nɛ̀ war ko sɛm na, a̧ tɛ kur kànà wen nɛ̀ sɛm kɔ̧-a̧ gba nɛ́ zu-a, ɓɛɛ a̧ tɛ ha̧ mɔ lɛŋ n'aa tɛ ak ha̧ a̧.»

⁹«Mi'e ɛ̀nɛ̀ ák mɔ, ɓɛɛ Sɔ̧ tɛ ha̧ h’ɛ́nɛ́; ɛ̀nɛ̀ kíí mɔ, ɓɛɛ ɛnɛ tɛ kpa; ɛ̀nɛ̀ kɔ́n nú tua, ɓɛɛ Sɔ̧ tɛ hu̧i̧ h’ɛ́nɛ́.

¹⁰Wen nɛ́ wi-ak-mɔ, a̧‘i ha̧ mɔ ha̧ a̧; nɛ́ wi-kii-mɔ a̧ kpa mɔ; nɛ wi-kɔn-nú tua, a̧‘i hú̧í̧ nú tua ha̧ a̧.

¹¹Nɛ́ ge dáa-wan-bem ge mgbara'nɛ́, kà bem nɛ́ aka nɛ́ zoro er-a, ɓɛɛ ha̧a̧ nɛ́ gɔ́k ha̧ a̧ oi nú zoro,

¹²kóó kà bem nɛ́ aka kui-kɔra er-a ɓɛɛ ha̧a̧ nɛ̀ tore ha̧ a̧ ge nde?

¹³Hegɔ, ɛ́nɛ́ o wi-ɗaŋ, k’ɛ̀nɛ̀ nɛ́ iŋa ha̧a̧ demɔ ha̧ o bem k’ɛ́nɛ́, bó nɛ́ Dáà k’ɛ́nɛ́ nɛ̀ a̧a̧ yiwese tɛ ha̧ Sa̧a̧ Ɔmi ha̧ o bíí nɛ̀ kɔf'a wen kpaa Sa̧a̧ Ɔmi na nde?»

¹⁴Jesu a̧a̧ so tɛ ndaka ɗaŋ-sɔ̧-mukɛ̧ tɛ ŋma bíí yinɛ. Ɗoŋ nɛ̀ ɗaŋ-sɔ̧ gboo tɛ wi’ɛi kaɗi, mukɛ̧‘i ku̧u̧ naŋ tɔ̧ɔ̧ wen, ɓɛɛ ɗɛɗɛ giiwi gɔn.

¹⁵Nɛ́ mɔ'ɔ nɛ̀ o ŋma mgbara wa tɔ̧a̧: «Nɛ́ tɛ́ ŋgai ko Bɛlzebul, wan ko o ɗaŋ-sɔ̧ a̧ a̧ ndak nɛ̀ ɗaŋ-sɔ̧.»

¹⁶O ŋma woyo aka a̧ mɛ de ŋma mɔɔ-kifi nɛ̀ tɛ́ nɛ̀ yiwese, wen wa kɔ̧ɔ̧ so mɛ ba wen zaŋ-aa.

¹⁷Ɓɛɛ hee mɔ'ɔ nɛ̀ Jesu iŋa taamɔ kɔ-wa ga, a̧ tɔ̧ɔ̧ ha̧ wa: «Kà ŋma wan nɛ́ duka, kà kɛ̧́ tɛ̀ nɛ̀ ŋmaa, wan'i tɛ yai; ɓɛɛ o tua-wan'i tɛ gbin a̧ zu ŋmaa.

¹⁸Hegɔ, kà Satan á̧ kɛ̧ɛ̧ tɛ a̧ nɛ̀ tɛ a̧, ɓɛɛ wan kɔ̧-a̧ tɛ yor hee ge? Wen ɛnɛ‘e ndé, mi ndak ɗaŋ-sɔ̧ nɛ̀ ŋgai ko Bɛlzebul.

¹⁹Wen kà bó nɛ́ ŋgai ko Bɛlzebul a̧‘m ndak nɛ̀ ɗaŋ-sɔ̧, ɓɛɛ o ŋgaiwi k’ɛ́nɛ́ ndak kɔ‘i nɛ̀ ŋgai ko o nde? Wen hegɔ, nɛ́ o ŋgaiwi k’ɛ́nɛ́ a̧ tɛ gɔn kita zu'nɛ́.

²⁰Kà‘m nɛ́ ndaka ɗaŋ-sɔ̧ yinɛ nɛ̀ ŋgai ko Sɔ̧, ɓɛɛ Wan ko Sɔ̧ hɔɔ tɛ‘nɛ́ kaɗi.

²¹«Kà ŋma ŋga-wi pɛm tua kɔ‘i nɛ̀ boi-biro, ŋma bíí nɛ̀ tɛ fo mɔ kɔ̧-a̧ bo na.

²²Ɓɛɛ kà ŋma ŋga-wi nɛ̀ gana a̧ nɛ̀ ŋgai tɛ́ɛ̀ bi a̧, a̧ tɛ kai boi-biro nɛ̀ wi’ɛi e so nɛ̀ tɛ, ɓɛɛ kaia mɔ kɔ̧-a̧ kɛ̧ ha̧ o bíí.

²³«Wi nɛ̀ ndaɗi in am na, sɛn nɛ́‘m; wi nɛ̀ mɔi̧ mɔ in am na, pɛsi nɛ́ mɔ a taŋ.

²⁴«Kà ɗaŋ-sɔ̧ gbo tɛ ŋma bíí yak, ɓɛɛ a̧ yambala nɛ̀ ŋga-gbárà nɛnɛ kii nɛ̀ fara-ɔm-tɛ. Kà a̧ kpa fara-ɔm-tɛ na, ɓɛɛ a̧ tɔ̧a̧: ‹Mi tɛ si ɗoŋ fara-duk kɔ‘m n'am gboo so sɛnɛ‘i.›

²⁵Hɔa-a hegɔ, a̧ zɔka'e wa mbia fara'i, ɗafi mɔ lɛŋ a nɛ̀ war-a.

²⁶A̧ yaka nɛ́ɛ̀ kai o ŋma ɗaŋ-sɔ̧ mɔɔrɔ ɗoŋ-yiitoo nɛ̀ gana a̧ nɛ̀ ɗaŋ tɛnɛ. Wa yee tua ba fara hi̧i̧, ɓɛɛ mbe duka-a ko wi’ɛi ɗaŋ gan kuti-a.»

²⁷Jesu ɓɔna fara tɔ̧ɔ̧ wen'i, ɓɛɛ ŋma okoo hiɗi mɔ poo giiwi tɔ̧ nɛnɛ‘e: «Okoo nɛ̀ baa zaŋ‘nɛ́ ko nɛ̀ ɛ́nɛ́, pi̧ nɛ̀ bere nú‘nɛ́‘i duk kɔ‘i nɛ̀ desee.»

²⁸Ɓɛɛ Jesu tɔ̧: «Nɛ́ o wi nɛ̀ zii wen ko Sɔ̧, kasi nɛnɛ a̧ ya kɔ‘i nɛ̀ desee ɛ̧!»

²⁹Hee mɔ'ɔ nɛ̀ giiwi mɔi̧ nɛ́ ŋmaa tɛnɛ ga, Jesu tɔ̧a̧: «Tugun bíí'ɛ nɛ́ ɗaŋ tugun bíí; wa ak nɛ́ mɔɔ-kifi; kà bó nɛ́ mɔɔ-kifi a̧ wa ak, wa beka zɔk mbe-a gan zu wan nɛ̀ dee so in Jɔnas na.

³⁰Wen hee mɔ'ɔ nɛ̀ Jɔnas baa duk so nɛ́ mɔɔ-usi-mɔ ko bíí Ninivɛ ga, hegɔ mbɛt, Bem ko bíí tɛ duk nɛ́ mɔɔ-usi-mɔ ha̧ tugun bíí'ɛ.

³¹Wese kita, okoo nɛ̀ ɔɔ so wan nɛ̀ ká̧-zan-mɛ́-ɗɔɔ tɛ kur mɛ pi̧ wen zu tugun bíí'ɛ, wen a̧ tɛɛ so nɛ̀ nduti nù mɛ, mɛ zii iŋa-mgbara-mɔ ko Salomɔŋ; ɓɛɛ kinii ŋma mɔ[12] a̧a̧ hɛ̧ɛ̧ nɛ̀ gana Salomɔŋ!

³²Ɓɛɛ saaye Ninivɛ tɛ kur mɛ pi̧ wen zu tugun bíí'ɛ, wen wa zia so wen ko Jɔnas, ɓɛɛ wa kpai duka-a kɔ-wa; ɓɛɛ kinii, ŋma mɔ a̧a̧ hɛ̧ɛ̧ nɛ̀ gana Jɔnas!»

³³«Wi e wee tɛ lamba mɛ e tɛ hu̧sa̧ fara na. Wi ba lamba e zu paku wen ha̧ o bíí nɛ̀ ye tua mɛ zɔk sa̧a̧mɔ.

³⁴Lamba tɛ-mɛ nɛ́ yí-mɛ́. Kà yí-mɛ́ duk nɛ̀ de-a, ɓɛɛ tɛ-mɛ lɛŋ duk tɛ sa̧a̧mɔ, ɓɛɛ kà yí-mɛ́ ɗaŋ, tɛ-mɛ lɛŋ duk ti-tum.

³⁵Wen hegɔ, yí-mɛ́ a̧ bá wen ká sa̧a̧mɔ nɛ̀ duk tɛ-mɛ‘i tɛ̀ɛ́ bò nɛ́ tum.

³⁶Kà tɛ-mɛ lɛŋ nɛ́ duka tɛ sa̧a̧mɔ, ŋma tum bo sɛnɛ na, ɓɛɛ tɛ-mɛ lɛŋ tɛ duk tɛ sa̧a̧mɔ hee mɔ'ɔ nɛ̀ lamba ha̧ nɛ̀ sa̧a̧mɔ kɔ‘i ha̧ mɛ'ɛ ga.»

³⁷Hee mɔ'ɔ nɛ̀ Jesu ɓɔna fara tɔ̧ɔ̧ wen ga, ŋma Fariziɛn saa a̧ mɛ nyɔŋ mɔ tɛ kɔ‘i. Nɛ́ mɔ'ɔ nɛ̀ Jesu nɛɛ ye tua, ɓɛɛ duk nù ká̧ nyɔŋmɔ.

³⁸Fariziɛn'i zɔka hegɔ, ɓɛɛ ɗɛɗɛ gɔn wen nɛ̀ Jesu ɗafi war-tɛ nɛti sɛka a̧ nyɔŋa mɔ na.

³⁹Ɓɛɛ Gasa Wan tɔ̧ ha̧ a̧: «Ɛ́nɛ́ o Fariziɛn nɔ'ɔ, ɛ́nɛ́ fɔr k’ɛ́nɛ́ nɛ́ ɗoŋ ɗele in tasi, ɓɛɛ kɔ̧́ see'nɛ́ duna nɛ̀ wɔ-ɓara-mɔ in déé ɗaŋ!

⁴⁰O mgbelewi nɔ'ɔ, bó nɛ́ wi nɛ̀ dee ɗoŋ ɗele a̧ dee kɔ̧́ a̧ mbɛt na nde?

⁴¹Hegɔ ɛ̀nɛ̀ há̧ nɛ́ mɔ nɛ̀ duk si kɔ̧́ a̧ nɛ̀ gbaka-mɔ, ɓɛɛ yuwar deemɔ k’ɛ́nɛ́ lɛŋ tɛ sa̧.

⁴²Bɔnɛ a̧a̧ zu'nɛ́, o Fariziɛn, wen ɛnɛ ha̧ nɛ́ zu mɔ hee mɛ̧ɛ̧wa, wa̧a̧-gu̧wɛ̧[13] in wa̧a̧-kpoo nɛ̀ hɔ kpɛɛfɔ lɛŋ ga ha̧ Sɔ̧, ɓɛɛ ɛnɛ ee deemɔ nɛ̀ yuwar-a in kɔ̧ɔ̧mɔ sitɛ Sɔ̧ duk’ɛ. Nɛ́ mɔ‘i ɛ́nɛ́ tɛ̀ɛ́ de so, ɓɛɛ ɛ́nɛ́ dee ɓii-aa mbɛt.[14]

⁴³«Bɔnɛ a̧a̧ zu'nɛ́, o Fariziɛn, wen ɛ́nɛ́ kɔ̧ɔ̧ duka-a tɛ o kuti fara sɛn kɔ̧́ tua-mɔi̧a-a, in ha̧ o bíí mɛ fan'nɛ́ bee-gara mbɛt.

⁴⁴Bɔnɛ a̧a̧ zu'nɛ́, wen ɛ́nɛ́ duk hee o pɛsi-fio nɛ̀ mɔɔ-sedaako bo sɛnɛ na, nɛ̀‘i iŋ na i̧si̧ nɛnɛ'ɛ ga.»

⁴⁵Ɓɛɛ ŋma wi-usi-heembea tɔ̧: «Wan-usi-mɔ, k’ɛ̀nɛ̀ tɔ̧ hegɔ, ɓɛɛ ɛnɛ da̧ nɛ ɛɛ mbɛt!»

⁴⁶Ɓɛɛ Jesu kifi nú: «Bɔnɛ a̧a̧ zu'nɛ́ mbɛt, ɛnɛ o wi-usi-heembea, wen ɛnɛ ba nɛ́ dita tui e zu o bíí, ɓɛɛ k’ɛ́nɛ́, ɛnɛ kɔ̧ foo tui'i nɛ̀ géé ndɔŋ er'nɛ́ na.

⁴⁷Bɔnɛ a̧a̧ zu'nɛ́, wen ɛnɛ ɗafi nɛ́ zu o pɛsi-fio ko o wi-tɔ̧-wen oi nú Sɔ̧, ɓɛɛ nɛ́ o dáà k’ɛ́nɛ́ a̧ gbɛɛ so gbɛɛ wa.

⁴⁸Mɔ n’ɛnɛ de'i usi'e, ɛnɛ kɔ̧ɔ̧ ɗɔɔ mɔ nɛ̀ o dáà k’ɛ́nɛ́ dee so. Wen kɔ-wa, wa gbɛɛ so nɛ́ o wi-tɔ̧-wen oi nú Sɔ̧, ɓɛɛ k’ɛ́nɛ́, ɛnɛ ɗafi k’ɛ́nɛ́ nɛ́ zu pɛsi-fio kɔ-wa.

⁴⁹Nɛ́ hegɔ sa Iŋa-mgbara-mɔ ko Sɔ̧ tɔ̧: ‹Mi tɛ tom o wi-tɔ̧-wen oi nú‘m in o betom nɛnɛ sitɛ wa; wa tɛ gbɛ o ŋma, ɓɛɛ wa usa bɔnɛ ha̧ o ŋma mbɛt,›

⁵⁰wen ha̧‘m mɛ ak tɔk-tɛ o wi-tɔ̧-wen oi nú Sɔ̧ lɛŋ nɛ̀ aa nù er tugun bíí'ɛ, nɛ̀ ku̧u̧ naŋ fara mɛ tɛnɛ,

⁵¹ku̧u̧naŋ-a nɛ̀ tɔk tɛ Abɛl hɔ nɛnɛ tɛ Zakarii nɛ̀ wa gbɛɛ so ɗoŋ fara-ɗafi-sɔ̧ ti sa̧a̧-fara. Nɛ̀ mbetɛ, mi tɔ̧ h’ɛ́nɛ́, Sɔ̧ tɛ ak tɔk tɛ o wi nɔ‘i er tugun bíí'ɛ!

⁵²«Bɔnɛ a̧a̧ zu'nɛ́, o wi-usi-heembea, wen mɔɔ-hu̧i-nú iŋamɔ duk-er'nɛ; ɓɛɛ k’ɛ́nɛ́ nɛ̀ tɛ‘nɛ́, ɛnɛ ye na; ɓɛɛ war ko o wi nɛ̀ kɔ̧ɔ̧ mɛ ye, ɛnɛ dor nɛ́ wa.»

⁵³Jesu gboo kɔ̧ tua-mɔi̧a-a kaɗi, ɓɛɛ o wi-usi-heembea in o Fariziɛn kii wen in a̧; wa aka a̧ zu mɔ nɛ̀ dɔka-a,

⁵⁴kii nɛ̀ war mɛ ba wen zaŋ-aa.