Read Northwest Gbaya LUK 12 Bible Online

LUK 12 - Northwest Gbaya bible

LUK 12

¹O bíí mɔi̧a zu ŋmaa booro booro nɔ́ nɛ̀ ŋmaa súm-súm, ɓɛɛ Jesu ku̧ naŋ tɔ̧ɔ̧ wen ha̧ o ŋgaiwi kɔ‘i: «Ɔ dee nyɛmna h’ɛ́nɛ́ mɛ zɔk tɛ‘nɛ́ nɛ̀ hao ko o Fariziɛn, wen hao'i nɛ́ deemɔ ko o wi nɛ̀ a̧a̧ nɛ̀ see yiitoo.

²Ŋma mɔ nɛ̀‘i tɛ kpe zu a̧ nɛ̀ beka gbo zan na, bo na; ŋma mɔ nɛ̀‘i tɛ hu̧si nɛ̀ bíí beka iŋ na, bo na mbɛt.

³Wen hegɔ, wen lɛŋ n’ɛnɛ tɔ̧ ti tum, bíí tɛ zii tɛ sa̧a̧mɔ, ɓɛɛ wen n’ɛnɛ fu̧i̧a̧ zer bíí ndaa-tua mɛ, bíí tɛ duk zu tua hiɗi nɛnɛ.»

⁴«Mi tɔ̧ h’ɛ́nɛ́, o sɛm kɔ‘m: k’ɛ́nɛ́ yu o bíí nɛ̀ gbɛ kiitɛ-wi ɓɛɛ hɔ-ɗoŋ-aa wa nyɛm mɛ de ŋma mɔ gan zu i̧i̧ na’ɛ, na.

⁵Mi tɛ́ usi wi n’ɛnɛ tɛ́ yu h’ɛ́nɛ́: ɛ̀nɛ̀ yú nɛ́ wi nɛ̀ tɛ́ gbɛ‘nɛ́, ɓɛɛ hɔ-ɗoŋ-aa a̧a̧ nɛ ŋgai mɛ pi̧‘nɛ́ kɔ̧́ wee. Nɛ̀ mbetɛ, mi tɔ̧ h’ɛ́nɛ́, nɛ́ wi’ɛi ɛ̀nɛ̀ tɛ yu!

⁶«Bo nɛ wi ɗɔr sósór[15] mɔɔrɔ tɛ dálà yiitoo na nde? Ɓɛɛ tɛ́ Sɔ̧ bi ɗoŋ ŋma kpɔk na.

⁷Ɓɛɛ k’ɛ́nɛ́, kóó buma zu'nɛ́, Sɔ̧ tɔra dam lɛŋ. K’ɛ́nɛ́ de kíì na, wen ɛ́nɛ́ gana o sósór lɛŋ! »

⁸«Mi tɔ̧́ h’ɛ́nɛ́, kóó o ndé nɛ̀ tɔ̧ ti o bíí‘e, wi nɛ́ bíí kɔ‘m, Bem ko bíí tɛ tɔ̧ ti o betom ko Sɔ̧‘e, wi’ɛi nɛ́ bíí kɔ‘i mbɛt;

⁹ɓɛɛ wi nɛ̀ tɛ kaf'am ti o bíí, mi tɛ kaf'a ti o betom ko Sɔ̧ mbɛt.

¹⁰«Kóó o ndé nɛ̀ tɛ ɗaŋ nin Bem ko bíí, Sɔ̧ tɛ e ɗaŋmɔ‘i ha̧ a̧, ɓɛɛ wi nɛ̀ tɛ tɔ̧ ɗaŋ wen ha̧ Sa̧a̧ Ɔmi, Sɔ̧ beka e ɗaŋmɔ‘i ha̧ a̧ na.

¹¹«Ŋgimbi nɛ̀ o bíí tɛ mgbɔ‘nɛ́ nɛnɛ kɔ̧́ tua-mɔi̧a-a, kóó ti o gasawi in o wannu, k’ɛ́nɛ́ de kíì wen n’ɛnɛ tɛ tɔ̧ mɛ fo nɛ̀ wen zu'nɛ́ yinɛ na,

¹²wen nɛ́ Sa̧a̧ Ɔmi a̧ tɛ usi mɔ n’ɛnɛ tɛ tɔ̧ tɛ́ kale ŋgimbi'i h’ɛ́nɛ́.»

¹³Ŋma bíí duka poo giiwi ɓɛɛ tɔ̧ ha̧ Jesu: «Wan-usi-mɔ, ɛ̀nɛ̀ tɔ̧́ ha̧ zɔmwi kɔ‘m a̧ kɛ̧́ ŋma mɔɔ-oi-dáà k’ɛɛ ha̧‘m.»

¹⁴Ɓɛɛ Jesu kifi nú ha̧ a̧: «Nɛ́ o a̧ ea'm nɛ̀ wi-gɔn-kita, kóó wi-kɛ̧-mɔ k’ɛ́nɛ́ o?»

¹⁵Jesu tɔ̧ɔ̧ ha̧ o dɔka bíí: «A̧i̧yoo, ɛ̀nɛ̀ zɔ́k tɛ‘nɛ́ tɛ dee wɔ-mɔ lɛŋ; bó nɛ́ wen nɛ̀ ŋma bíí nɛ́ wanmbɔi a̧ mbɔi tɛ kpas'a na.»

¹⁶Ɓɛɛ Jesu tɔ̧ lizaŋ'ɛ ha̧ wa: «Ŋma wanmbɔi duka so, nɛ̀ fɔ kɔ̧-a̧ dɛma nɛ̀ dɔka-a.

¹⁷Nɛ́ mɔ'ɔ n'aa taa mɔ: ‹Mi tɛ de héé ge? Wen mi kpa fara-a-nyɔnɔ kɔ‘m sɛnɛ na.›

¹⁸Ɓɛɛ a̧ tɔ̧: ‹Mɔ n'am tɛ de nɛ́ mɔ'ɔ: mi tɛ yai o dam kɔ‘m yinɛ, de mbe-a nɛ̀ gasa-a gan kuti-a ha̧‘m mɛ mɔi̧ nyɔnɔ in mbɔi kɔ‘m lɛŋ a̧ kɔ̧́ a̧,

¹⁹ɓɛɛ mi tɛ tɔ̧ ha̧ tɛ‘m: Mɛ a̧a̧ nɛ̀ nyɔŋmɔ nyɛm mɛ wen pɛ nɛ̀ dɔka-a. Mɛ̀ ɔ́m tɛ-mɛ, mɛ̀ nyɔ́ŋ mɔ, mɛ̀ nɔ́ mɔ, mɛ̀ dúk nɛ̀ desee.›

²⁰Ɓɛɛ Sɔ̧ tɔ̧ ha̧ wi’ɛi: ‹Mgbelewi, mɛ tɛ fe mɛ zɛ hɛ̧ɛ̧. Ɓɛɛ mɔɔ nɔ‘i nɛ̀ mɛ mɔi̧a lɛŋ‘i nɛ́ o'o tɛ kai o?›

²¹Nɛ́ kale kpɔk mɔ‘i a̧ de in wi nɛ̀ kii mbɔi wen tɛ-wi nɛ̀ tɛ-wi, ɓɛɛ kii mbɔi mɛ yiwese na.»

²²Ɓɛɛ Jesu tɔ̧ ha̧ o ŋgaiwi kɔ‘i: «Nɛ́ mɔ‘i sa'm tɔ̧ h’ɛ́nɛ́‘e: k’ɛ́nɛ́ ai nú wen mɔ n’ɛnɛ tɛ nyɔŋ, kóó wen laa-pi̧-tɛ‘nɛ́ na.

²³Bó nɛ́ duka-kpasa gana nyɔŋmɔ, in kiitɛ-wi gana laa na nde?

²⁴Ɛ̀nɛ̀ zɔ́k o gba-kɔra, wa gun mɔ na, wa mɔi̧ mɔ na mbɛt, wa bó nɛ̀ tua in dam-a-nyɔnɔ sɛnɛ na, ɓɛɛ Sɔ̧ dai nɛ́ wa! Bó nɛ́ ɛnɛ gana wa na nde?

²⁵Nɛ́ o mgbara'nɛ́ tɛ aia-nú kɔ‘i a̧ nyɛma mɛ e ŋma zɛ kpɔk zu zɛ nɛ̀ Sɔ̧ gɔna ha̧ a̧ kaɗi o nde?

²⁶Hegɔ, kà géé be mɔ‘i nɛ́ gana'nɛ́, wen ge s’ɛnɛ ai nú‘nɛ́ wen oi dɔka mɔ ge?

²⁷Ɛ̀nɛ̀ zɔ́k o gba-dɛŋ, wa pír laa na, wa tók laa na. Ɓɛɛ mi tɔ̧ɔ̧ h’ɛ́nɛ́, kóó Salomɔŋ nɛ̀ tɛ-wi zaŋ gasamɔ kɔ‘i lɛŋ pi̧ de laa nɛ̀ hɔɔ ŋma o gba-dɛŋ na.

²⁸Kà Sɔ̧ nɛ́ pi̧i̧ laa tɛ zɔ̧ zaŋbɛɛ nɛ̀ duk sɔsɔɔ, ɓɛɛ mɔɔsa̧ wi pi̧i̧ wee sɛnɛ dɔ a nù'ɛ, bó nɛ́ a̧ tɛ zɔk'nɛ́ nɛ̀ de-a gan wa na nde? Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ!

²⁹Wen hegɔ, k’ɛ́nɛ́ ai nú‘nɛ́ kii nɛ̀ mɔ n’ɛnɛ tɛ nyɔŋ in mɔ n’ɛnɛ tɛ nɔ na,

³⁰wen mɛ̀ nɛ́ o wi nɛ iŋ kpasa Sɔ̧ na zaŋnu’ɛ a̧ kii kɔ‘i o mɔɔ nɔ‘i, ɔm tɛ na; ɓɛɛ nɛ̀ k’ɛ́nɛ́, Dáà k’ɛ́nɛ́ iŋa'e mɔɔ nɔ‘i nɛ́ o mɔ nɛ tɛ gbak'nɛ́.

³¹Wen hegɔ, ɛ̀nɛ̀ kíí nɛ́ Wan kɔ̧-a̧, ɓɛɛ mɔɔ nɔ‘i, a̧ tɛ ha̧ e zu-a h’ɛ́nɛ́.»

³²«K’ɛ́nɛ́ de kíì na, be dùk-mɔ-dai, wen Dáà k’ɛ́nɛ́ zɔka'e ɔ dee ha'i mɛ ha̧ wan kɔ‘i h’ɛ́nɛ́.

³³Ɛ̀nɛ̀ ɗɔ́r o mɔ n’ɛnɛ a̧a̧ nɛnɛ, ɛ̀nɛ̀ há̧ nɛ̀ gbaka-mɔ; ɛ̀nɛ̀ fúr nɛ́ ŋgoɓo-sede nɛ̀ beka a̧k na, in ɛ̀nɛ̀ kíí nɛ́ mbɔi nɛ̀ beka ɗaŋ na e yiwese mɛ, wen fara'i wi-zuzu hɔ sɛnɛ na, kóó zɛmɛ ɗaŋ mɔ na mbɛt.

³⁴Wen nɛ́ fara nɛ̀ mbɔi k’ɛ́nɛ́ a̧a̧ sɛnɛ a̧ see'nɛ́ duk sɛnɛ mbɛt.»

³⁵«Laa-tom a̧ ɓɔ́n tɛ‘nɛ́, wee a̧ ɓɔ́n tɛ lamba k’ɛ́nɛ́.

³⁶Ɛ̀nɛ̀ yá hee o bíí nɛ̀ pɛm nɛ́ pia ɗoŋ ko wan-tom kɔ‘i nɛ̀ pii nɛ̀ tɛ gbaŋa-baa-kóò ga, wen ha̧ wa mɛ hú̧í̧ nú tua ha̧ a̧, ŋgimbi n'aa tɛ hɔ mɛ kɔn mɔ.

³⁷O wi-de-tom nɛ̀ wan-tom tɛ pii ɗoŋ kpa fara pɛm mɔ tɛ kpa desee. Nɛ́ kpasawen a̧‘m tɔ̧ h’ɛ́nɛ́: a̧ tɛ pi̧ laa-de-tom, ɓɛɛ a̧ tɔ̧ɔ̧ ha̧ wa mɛ ya nù ká̧ fara-nyɔŋ-mɔ, ɓɛɛ a̧ ha̧a̧ nyɔŋmɔ ha̧ wa.

³⁸Kà wan-tom'i nɛ́ pia ɗoŋ tɛ yiitoo tɔŋ-ya, kóó taar-a, kà a̧ nɛ́ kpaa wa fara pɛm mɔ, wa tɛ ya nɛ̀ desee.

³⁹Ɛ̀nɛ̀ zìì, kà wan-tua a̧ iŋ so ŋgimbi nɛ̀ wi-zuzu tɛ̀ɛ́ tɛ nɛnɛ mɛ zɛ gáà, bó nɛ́ a̧ tɛ̀ɛ́ e ha̧ wi-zuzu mɛ kom tua kɔ̧-a̧ na.

⁴⁰Hegɔ, ɛ́nɛ́ mbɛt, ɛ̀nɛ̀ pɛ́m mɔ, wen Bem ko bíí tɛ pii ɗoŋ tɛ ŋma ŋgimbi n’ɛnɛ iŋ na.»

⁴¹Ɓɛɛ Pierre ak mɔ: «Gasa Wan, ɛ́nɛ́ tɔ̧ lizaŋ‘i h’ɛ́ɛ́ náà, kóó ha̧ bíí lɛŋ nde?»

⁴²Ɓɛɛ Gasa Wan kifi nú ha̧ a̧: «Nɛ́ ge wi-de-tom ge nɛ̀ mbo zu in nɛ̀ iŋa mgbara tom a̧ wan-tom tɛ e zu o bíí kɔ̧́ tua kɔ‘i mɛ kɛ̧ nyɔŋmɔ ha̧ wa tɛ ŋgimbi-a ge?

⁴³Wi-de-tom nɛ̀ wan-tom tɛ pii ɗoŋ kpa fara dee tom'i duk kɔ‘i nɛ̀ desee.

⁴⁴Nɛ́ kpasawen a̧‘m tɔ̧ h’ɛ́nɛ́, wan-tua'i tɛ e a̧ zu mbɔi kɔ‘i lɛŋ.

⁴⁵Ɓɛɛ kà wi-de-tom'i ta'e: ‹Wan-tom kɔ‘m beka pii kinii na,› ɓɛɛ kà a̧ ye tɛ gusa o be-ŋgaiwi in o boko-be-de-tom, in kà a̧ nyɔŋ mɔ gbɛ nɛ̀ dɔ̧ɔ̧,

⁴⁶wan-tom tɛ pii ɗoŋ wese n'aa beka ta na, in tɛ ŋgimbi n'aa beka iŋ na mbɛt; wan-tom'i tɛ ndak a̧ yinɛ, ɓɛɛ foo a̧ pi̧ mgbara o wi nɛ̀ mbo zu na.

⁴⁷«Wi-de-tom nɛ̀ iŋa mɔ nɛ̀ wan kɔ‘i kɔ̧a̧, ɓɛɛ ɗafi mɔ na, in nɛ̀ de mɔ nyɛm ɗoŋ mɔ nɛ̀ wan-tom kɔ̧ɔ̧ na'i, wan-tom'i tɛ gus'a nɛ̀ kpasa-a.

⁴⁸Wi-de-tom nɛ̀ iŋ mɔ nɛ̀ wan-tom kɔ‘i kɔ̧ɔ̧ na, ɓɛɛ nɛ̀ deemɔ kɔ̧-a̧ nyɛma ha̧ wan-tom mɛ gus'a, wan-tom'i tɛ gus'a tikiɗi ɓɛɛ. Wi nɛ̀‘i ha̧ mɔ ha̧ a̧ nɛ̀ dɔka-a, a'i tɛ ak mɔ er-a nɛ̀ dɔka-a; ɓɛɛ wi nɛ‘i ee mɔ er-a nɛ̀ dɔka-a, a'i tɛ ak mɔ er-a nɛ̀ dɔka-a gan mbɛt.

⁴⁹«Nɛ́ wee a̧‘m baa tɛnɛ mɛ pi̧ zu nù'ɛ, ɓɛɛ mi kɔ̧ɔ̧ so nyɛmna ha̧ wee'i mɛ ku̧ naŋ baa-a.

⁵⁰Mi a̧a̧ nɛ̀ ŋma zuia'm nɛ̀ wa tɛ zui, ɓɛɛ mɔ‘i ba nɛ́ tɛ‘m nyɛmna hɔ wese nɛ̀ mɔ‘i tɛ hɔ gba̧a̧!

⁵¹Ɛnɛ ta k’ɛ́nɛ́‘e mi baa nɛ́ ga̧a̧mɔ tɛnɛ zaŋnu nde? Weyaa, mi tɔ̧ h’ɛ́nɛ́, nɛ́ kɛ̧ɛ̧ mgbara ŋmaa a̧‘m baa tɛnɛ.

⁵²Wen hegɔ, ku̧u̧naŋ sɔsɔɔ, kà bíí mɔɔrɔ nɛ́ ɔɔ kpɔk kɔ̧́ tua, wa tɛ kɛ̧ tɛ nɛ̀ ŋmaa; bíí taar tɛ sɛn bíí yiitoo, ɓɛɛ bíí yiitoo sɛna bíí taar mbɛt.

⁵³O bíí tɛ kɛ̧ mgbara ŋmaa, dáà tɛ sɛn bem, bem tɛ sɛn dáà, nàá-wan-bem tɛ sɛn bem kɔ‘i be-okoo-a, boko-bem tɛ sɛn nàà kɔ‘i, for mɛ kóò tɛ sɛn kóò ko bem, kóò ko bem tɛ sɛn for mɛ kóò.»

⁵⁴Jesu tɔ̧ɔ̧ ha̧ giiwi woyo: «Ŋgimbi n’ɛnɛ zɔk tura-zan ndaa-zan mɛ, ɓɛɛ ɛnɛ‘e kórò tɛ hɔ, ɓɛɛ kórò hɔɔ nɛ̀ mbetɛ.

⁵⁵Ŋgimbi n’ɛnɛ zɔk búk fara yua-a nɛ̀ ká̧-zan-mɛ́-ɗɔɔ, ɓɛɛ ɛnɛ‘e gbɛ̧ŋmɔ tɛ de mɔ, ɓɛɛ gbɛ̧ŋmɔ dee kànà mɔ nɛ̀ mbetɛ.

⁵⁶Ɛ́nɛ́ o wi nɛ̀ a̧a̧ nɛ̀ see yiitoo! Ɛ́nɛ́ iŋa kɛ̧ɛ̧ mgbara mɔ mɛ́ zaŋnu in zɔka yí-zan, ɓɛɛ ɛ́nɛ́ iŋ kɛ̧ɛ̧ mgbara ŋgimbi kinii’ɛ na hee ge?»

⁵⁷«Ɓɛɛ wen ge, ɛnɛ nɛ̀ tɛ̀‘nɛ́, ɛnɛ kɛ̧ mgbara mɔ nɛ̀ duk nɛ̀ yuwar-a na ge?

⁵⁸Kà ŋma bíí nɛ́ wula mɛ, k’ɛ̀nɛ̀ nɛ́ nɛɛ mɛ ɓa kita, mɛ̀ ɗáfí mɔ mgbara mɛ in a̧ nɛ̀ yuwar, wen ká a̧ nɛ́ɛ̀ e mɛ er wi-gɔn-kita, ɓɛɛ ká wi-gɔn-kita tɛ́ɛ̀ e kɔ‘i mɛ er wi-biro, ɓɛɛ wa pi̧i̧ mɛ zɔɓɔ.

⁵⁹Mi tɔ̧ ha̧ mɛ, mɛ beka gbo zɔɓɔ‘i na hɔ wese nɛ̀ mɛ yoɓa mɔ hɔ tɛ sɔŋkur dálà sɛ́.»